Kansi tingatang’ishe tyani chikhulupililo chasu pa lonjezo ya Yehova ya chalo chanyowani?

1-2. Kansi tufunika kuchita chinji patuyembekezela chalo chanyowani?

TUTEMBEJA ngako lonjezo ya Yehova yochosa chino chalo chiipa noleta chalo chanyowani cholungama. (2 Pet. 3:13) Olo kuti tuziŵalini nthawe ngayo-ngayo yachikuti chizafwike chalo chamene ichi, umboni uwonesha kuti tiliye nthawe itali tuyembekezela.—Mt. 24:32-34, 36; Mac. 1:7.

² Palipano, viliye kanthu kuti tankhala m’choonadi kwa nthawe itali tyani, tonse tufunika kutang’isha chikhulupililo chasu pa lonjezo yamene iyi. Ndaŵa yanji? Ndaŵa yakuti olo chikhulupililo chotang’a chingafoke. Kulaŵila chendi, olo ntumwi Paulo enena kuti kufoka kwa chikhulupililo “ni chimo yamene yutikasha mosavuta.” (Ahe. 12:1) Kuti chikhulupililo chasu osati chifoke, tufunika kuganizila nthawe zonse umboni usimikijila kuti chalo chanyowani chifwike kwalombapano.—Ahe. 11:1.

3. Kansi tikambilane chinji mu nkhani ino?

³ Mu nkhani ino, tikambilane njila zitatu za mwatingatang’ishile chikhulupililo chasu pa lonjezo ya Yehova yonena za chalo chanyowani: (1) mwa kuganizila nkhani yunena za dipo, (2) mwa kuganizila mphamvu za Yehova, komasoti (3) mwa kukatishila ntchito nthawe yasu pa ntchito zauzimu. Pavuli pake tikambilane mwamene uthenga wa Yehova woluta kuli Habakuku mwautang’ishila chikhulupililo chasu masiku ŵano. Poyamba, tiyeni tikambilane vinthu viyakine vatukumana navo palipano vamene vufuna kuti tikokhulupilila ngako lonjezo yunena za chalo chanyowani chamene chikuza.

VINTHU VAMENE VUFUNIKILA CHIKHULUPILILO CHOTANG’A

4. Kansi ni vosankha votyani vamene vufunikila chikhulupililo chotang’a?

⁴ Nsiku iliyonse, tupanga vosankha vamene vufunikila chikhulupililo chotang’a. Mwachisanzo, tupanga vosankha vokhuza azishamwali ŵasu, vosangalasa, maphunzilo, ukwati, ŵana, komasoti ntchito yolembewa. Tingachite luweme kulikonsha kuti: ‘Kansi vosankha vangu vuwonesha kuti nukhulupilila kuti chino chalo n’chakanthawe katontho ndipo lombapano chiloŵewe mmalo na chalo chanyowani cha Mulungu? Olo kapena vosankha vangu vukatijana na ŵanthu amene pa moyo wawo ochita vinthu monga kuti imfwa niye mapeto a vonse?’ (Mt. 6:19, 20; Lk. 12:16-21) Tonse tingopanga vosankha viweme ngako keno tutang’isha chikhulupililo chasu pa nkhani yakuti chalo chanyowani chili pafupi ngako kufwika.

5-6. Ndaŵa yanji tufunikila chikhulupililo chotang’a pa nthawe ya mavuto? Pelekani chisanzo.

⁵ Sewo tukumanasoti na viyeso vamene vufunikila chikhulupililo chotang’a. Tingakumane na chinzunzo, matenda akulu, olo vinthu viyakine vamene vingatifokeshe. Poyamba, tingalimvwe kuti tukwanisha kulimbana bwino-bwino na mayeselo ŵasu. Koma mavuto monga ni amene aŵa nthawe zinyinji opitilija kwa nthawe itali, tetyo tizafunikile chikhulupililo chotang’a kuti tipilile nopitilija kutumikila Yehova mosangalala.—Aro. 12:12; 1 Pet. 1:6, 7.

⁶ Tikankhala pa mayeselo, nthawe ziyakine tingoganiza kuti chalo cha Yehova chizawelelini. Kansi vamene ivi vutanthauza kuti chikhulupililo chasu chafoka? Osati ngako-ngako. Ganizilani fanizo iyi. Nkati mwa nyengo yozizila ngako, payakine tingaganize kuti chisalo chizafwikelini. Koma olo n’tetyo chisalo chufwika. Molingana na vamene ivi, keno tafoka ngako tingaganize kuti chalo chanyowani chizawelelini. Koma keno chikhulupililo chasu n’chotang’a, tuziŵa kuti malonjezo a Mulungu azakwanilishiwe. (Sal. 94:3, 14, 15; Ahe. 6:17-19) Tikankhala na chidalilo chotetyo, tingapitilije kuika pasogolo kulambila Yehova pa moyo wasu.

7. Kansi tufunika kupewa maganizo otyani?

⁷ Tufunikilasoti chikhulupililo chotang’a kuti tikokata ntchito yolalikila. Ŵanthu anyinji ŵatulalikila owona kuti “uthenga uweme” unena za chalo chanyowani cha Mulungu wangonkhala tyala uthenga uweme koma n’vosakwanishika. (Mt. 24:14; Eze. 33:32) Sewo tufunalini kuti kukaikila kwawo kusokoneze maganizo ŵasu. Kuti vamene ivi osati vichitike, tufunika kupitilija kutang’isha chikhulupililo chasu. Tiyeni tione njila zitatu zatingachitile vamene ivi.

MUKOGANIZILA VOKHUZA DIPO

8-9. Kansi kuganizila vokhuza dipo kungatang’ishe tyani chikhulupililo chasu?

⁸ Njila imozi yatingatang’ishile chikhulupililo chasu ni kuganizila vokhuza dipo. Dipo niye yutisimikijila kuti malonjezo a Mulungu azakwanilishiwe. Keno tuganizila ngako chifukwa cheipelekelewa dipo komasoti kufunika kwake, tutang’isha chikhulupililo chasu chakuti lonjezo ya Mulungu yunena za moyo wosasila m’chalo chiweme ngako izakwanilishiwe chendi. Ndaŵa yanji tinganene tetyo?

⁹ Lomba kansi dipo yupamikijapo chinji? Yehova etumija Mwana wake wokondewa woyamba kuvyalika, shamwali wake wapantima, kufuma kululu kuti azavyalike monga munthu wangwilo. Yesu ali pano pachalo, epilila mavuto osiyana-siyana. Pavuli pake yove etamana komasoti kufwa imfwa yoŵaŵa ngako. Yehova elipila ntengo ukulu ngako! Mulungu wasu wachikondi sembe aliyelole kuti Mwana wake atamane na kufwa pofuna tyala kutipasa moyo uweme koma ufupi. (Yoh. 3:16; 1 Pet. 1:18, 19) Powona kuti Yehova elipila ntengo ukulu teti, yove azawonesheshe kuti moyo wosasila m’chalo chanyowani unkhale ngawo-ngawo.

MUKOGANIZILA NGAKO MPHAMVU ZA YEHOVA

10. Mokatijana na Aefeso 3:20, kansi Yehova angakwanishe kuchita chinji?

¹⁰ Njila yachiŵili yotang’ishila chikhulupililo chasu ni kuganizila vokhuza mphamvu za Yehova. Yove ali na mphamvu zokwanisha kuchita chinthu chilichonse chawalonjeza. N’chendi, kukwanilishiwa kwa lonjezo ya moyo wosasila m’chalo chanyowani kungawoneke monga n’kosakwanishika m’menso mwa ŵanthu. Koma nthawe zinyinji Yehova olonjeza vinthu vamene ŵanthu angavichitelini. Pala yove ni Mulungu Wamphamvuzonse. (Yobu 42:2; Mk. 10:27) Tetyo, sewo tudabwalini akatilonjeza vinthu vodabwisa!—Ŵelengani Aefeso 3:20.

11. Pelekani chisanzo chimozi cha malonjezo odabwisa a Mulungu. (Onani bokosi yakuti “Malonjezo ayakine odabwisa ekwanilishiwa.”)

¹¹ Onani viyakine mwa vinthu vuwoneka monga n’vosakwanishika vechilonjeza Yehova kuli ŵanthu ŵake mmasiku akuvuli. Yove esimikijila Abulahamu na Sara kuti azankhale na mwana mwanalume mu ukalamba wawo. (Gen. 17:15-17) Yove eujasoti Abulahamu kuti mbadwa zake zizapasiwe chalo cha Kanani. Pa vyaka vinyinji vamene Aisiraeli mbadwa za Abulahamu, penze ku ukapolo ku Iguputo venzewoneka monga kuti lonjezo yamene iyo izachitikelini. Koma vamene ivi vichitika. Pavuli pake, Yehova elonjeza kuti Elizabeti wamene enze wokalamba azankhale na mwana. Yove eujasoti Mariya, wamene enze ndola kuti azavyale Mwana wa Mulungu, wamene kufwika kwake kwekwanilisha ulosi wamene Yehova enze elonjezelatu kukali vyaka masauzande kuvuli m’munda wa Edeni—lonjezo iyakine ikwanilishiwa!—Gen. 3:15.

12. Kansi lemba ya Yoswa 23:14 na Yesaya 55:10, 11 yutisimikijila chinji vokhuza mphamvu za Yehova?

¹² Keno tuganizila malonjezo onse ŵechilonjeza Yehova komasoti mwechikwanilishiliwa, tuziŵa kuti yove ali na mphamvu. Tetyo, chikhulupililo chasu pa lonjezo yake yoleta chalo chanyowani chizatang’e. (Ŵelengani Yoswa 23:14; Yesaya 55:10, 11.) Vamene ivi vutichitisha kunkhala okonzeka kuyavyako ayakine kuziŵa kuti lonjezo yunena za chalo chanyowani ni maloto lini kapena nthano tyala. Ponena za kululu kwanyowani na chalo chanyowani, Yehova enena kuti: “Mawu amene aŵa ni odalilika komasoti ni achendi.”—Chiv. 21:1, 5.

NKHALANI NA VOCHITA VINYINJI PA NTCHITO ZAUZIMU

13. Kansi misonkhano ya mpingo ingatang’ishe tyani chikhulupililo chasu? Fotokozani.

¹³ Njila yachitatu yatingatang’ishile chikhulupililo chasu ni kunkhala na nthawe yochita vinthu vauzimu. Mwachisanzo, ganizilani mwatupindulila na misonkhano yasu ya mpingo. Anna, wamene wankhala vyaka vinyinji ochita utumiki wa nthawe zonse enena kuti: “Misonkhano yutang’isha chikhulupililo changu. Olo kuti olaŵila nkhani aliye luso yophunzisa kapena kuti aliyenene chilichonse chanyowani, kanyinji-kanyinji nuphunzilapo chinthu chiyakine chamene chunichitisha kumvwisha luweme choonadi cha m’Baibolo, ndipo vamene ivi vutang’isha chikhulupililo changu.”b N’vosakaikisha kuti tutembejasoti ndemanga zotang’isha chikhulupililo za ŵanthu apezeka pa misonkhano.—Aro. 1:11, 12; 10:17.

14. Kansi utumiki utang’isha tyani chikhulupililo chasu?

¹⁴ Tutang’ishasoti chikhulupililo chasu tikokata nawo ntchito yolalikila. (Ahe. 10:23) Barbara, wamene watumikila Yehova kwa vyaka vopitilila 70 enena kuti: “Nthawe zonse nuwona kuti ntchito yolalikila yutang’isha chikhulupililo changu. Nikaujako ayakine vokhuza malonjezo aweme a Yehova, chikhulupililo changu niye pachupitilija kunkhala chotang’a.”

15. Kansi phunzilo yapaseka yutang’isha tyani chikhulupililo chasu? (Onanisoti vithunzi.)

¹⁵ Onani ntchito iyakine yauzimu yamene yutang’isha chikhulupililo chasu: phunzilo yapaseka. Susan owona kuti n’koyavya kunkhala na ndandanda yophunzila. Yove enena kuti: “Pa nsiku ya sondo nuphunzila phunzilo ya Nsanja ya Mulonda ya sondo yokonkhapo. Pamande na pachiŵili nukonzekela misonkhano ya nkati mwa sondo. Masiku ayakine osala nuchita phunzilo yapaneka.” Mwakukonkheja monkhazikika ndandanda ya phunzilo yake, Susan opitilija kutang’isha chikhulupililo chake. Irene, wamene watumikila kwa vyaka vinyinji ku likulu ya pachalo chonse wawona kuti kuphunzila maulosi a m’Baibolo n’kotang’isha chikhulupililo. Yove enena kuti: “Nuwona kuti olo vinthu vitontho-vitontho vili m’maulosi odabwisa a Yehova vukwanilishiwa.”c

“AZAKWANILISHIWE CHENDI”

16. Ndaŵa yanji Mawu a Yehova kuli Habakuku ali na tanthauzo kuli sewo masiku ŵano? (Aheberi 10:36, 37)

¹⁶ Atumiki ayakine a Yehova ankhala oyembekezela mapeto a chino chalo kwa nthawe itali. Mokatijana na mwakuwonela ŵanthu, kukwanilishiwa kwa malonjezo a Mulungu kungawoneke monga kuchelwa. Koma Yehova oziŵa mwakumvwila atumiki ŵake, mwakuti esimikijila Habakuku kuti: “Vili m’mensophenya ivi n’vawenye lini. Olo mensomphenya amene aŵa achelwe, ukoŵayembekezela mphela chifukwa azakwanilishiwe chendi. Ove azachelwe lini.” (Hab. 2:3) Kansi Mulungu elonjeza vamene ivi kuti ayavye Habakuku yeka? Olo payakine mawu amene aŵa ali na tanthauzo kuli sewo masiku ŵano? Moujiliwa, ntumwi Paulo ekatishila ntchito mawu amene aŵa kuli Akhilisitu amene oyembekezela chalo chanyowani. (Ŵelengani Aheberi 10:36, 37.) N’chendi, olo kuti malonjezo onena za kupulumushiwa kwasu akowoneka monga ochelwa “azakwanilishiwe chendi. Malonjezo amene aŵa azachelwelini!”

17. Kansi mulongo muyakine ekatishila tyani ntchito malangizo ŵechipeleka Yehova kuli Habakuku?

¹⁷ Atumiki a Yehova anyinji okonkheja malangizo a Yehova akuti “ukoŵayembekezela mphela”—olo kwa vyaka vinyinji. Mwachisanzo, Louise eyamba kutumikila Yehova mu 1939. Yove enena kuti: “Pa nthawe yamene iyo, nenzeganiza kuti Aramagedo ifwike nikaliye silija sikulu ya sekondale. Koma vamene ivi niyelini vichitika. Kwa vyaka vinyinji, nawona kuti n’koyavya kuŵelenga nkhani zanutomola kuti ‘chiyembekezo’ zamene ni nkhani za ŵanthu otomolewa m’Baibolo monga Nowa, Abulahamu, Yosefe komasoti ayakine amene eyembekezela kwa nthawe itali akaliye londela mphaso yechilonjezewa na Yehova. Kuyembekezela kwachitisha kuti newo komasoti ŵanthu ayakine tikoganizila ngako za vinthu vamene vusimikijila kuti chalo chanyowani chavwendela.” Ŵanthu anyinji amene ankhala otumikila Yehova kwa nthawe itali ovomekeja mfundo yamene iyi!

18. Kansi kulolesha chilengedwe kungatang’ishe tyani chikhulupililo chasu pa lonjezo ya chalo chanyowani chamene chikuza?

¹⁸ N’chendi kuti chalo chanyowani chikaliye fwika. Koma olo n’teyo, onani vinthu viyakine vamene vilipo palipano monga—nyenyezi, vimiti, vinyama komasoti ŵanthu. Paliye angakaikile kuti vinthu vamene ivi ni ngavo-ngavo, olo kuti nthawe iyakine vinthu vamene ivi kwenzeve. Vonse vamene ivi vilipo chifukwa tyala chakuti Yehova evilenga. (Gen. 1:1, 26, 27) Mulungu wasu alisoti na cholinga chonkhazikisha chalo chanyowani. Yove azakwanilishe cholinga chamene ichi. M’chalo chanyowani ŵanthu azasangalale na moyo wosasila komasoti wathanzi iweme. Pa nthawe ya Mulungu yoikika, chalo chanyowani chizankhale ngacho-ngacho monga mwachilili chilengedwe chonse masiku ŵano.—Yes. 65:17; Chiv. 21:3, 4.

19. Kansi mungatang’ishe tyani chikhulupililo chanu?

¹⁹ Pakalipano, katishilani ntchito mpata uliwonse wamuli nawo kuti mutang’ishe chikhulupililo chanu. Mukotembeja mphaso ya dipo. Mukoganizila mphamvu za Yehova. Komasoti nkhalani na vochita vinyinji pa ntchito zauzimu. Keno muchita vamene ivi mungankhale pakati pa “ŵanthu amene mwachikhulupililo na kuleza ntima olondela vinthu vechilonjeza Mulungu monga cholowa chawo.”—Ahe. 6:11, 12; Aro. 5:5.