Mukophunzila na cholinga chiweme

Pokonzekela kuti muphunzila Mawu a Mulungu, mungachite luweme kulikonsha kuti, ‘Kansi nuyembekezela kuti niphunzile chinji?’ Koma olo n’tetyo, tingachite luweme kunkhala osamala kuti vinthu vatuyembekezela kuti tiphunzile, osati vitikangishe kuwona vakutiphunzisa Yehova panthawe yamene iyo. Kansi tingachite tyani kuti tikofwana mfundo zanyowani keno tuphunzila Mawu a Mulungu?

Mukosenga Mulungu kuti akupaseni nzelu. Mukosenga Yehova kuti akuyavyeni kuziŵa vinthu vakufuna yove kuti muphunzile panthawe yamene iyo. (Yako. 1:5) Mukopewa ntima wodalila vinthu vamuziŵa kale panthawe yamene iyo.—Miy. 3:5, 6.

Mukolola kuti mphanvu ya Mawu a Mulungu ichinje moyo wanu. “Mawu a Mulungu ni amoyo.” (Ahe. 4:12) Tetyo, nthawe iliyonse tikaŵelenga Baibolo tingafwane mfundo zanyowani,—komasoti ingatiyavye munjila zosiyana-siyana pamoyo wasu. Koma kuti vamene ivi vikwanishike, tufunika kuziŵa kuti Mulungu ofuna kuti tikophunzila vinthu vakufuna yove.

Mukomutembeja Yehova pachinthu chilichonse chakukatishila ntchito potiphunzisa. Chakulya chauzimu chakutipasa, chili monga ni “pwando ya vakulya viweme ngako.” (Yes. 25:6) Osati mukowaya-waya kuŵelenga nkhani chifukwa choganiza kuti mungasangalalelini kuziphunzila. Mukachita tetyo, Yehova azakuyavyeni kuti munkhale munthu muweme ngako ndipo mukosangalala ngako pophunzila Mawu ŵake!