Uthenga Wabwino Wolembewa na Mateyo
13 Pa siku iyi, Yesu ecoka ku ng’anda ndipo eciyonkhala m’mbali mwa nyanja. 2 Gulu ikulu ya ŵanthu yesonkhana penze yove, ndipo yove ekwela m’boti nonkhala pansi. Gulu yonse ya ŵanthu yenze yepanama m’mbali mwa nyanja. 3 Pavuli pake, eŵauzhya vinthu vinyinji poseŵenzesha mafanizo kuti: “Mvwani! Munthu wokomola mbeu eluta kuyokomola. 4 Peenzokomola, mbeu ziyakine zeponela m’mbali mwa mseu ndipo tunyoni twewela na kulya mbeu izi. 5 Mbeu ziyakine zeponela pa miyala pamene penze lito itontho, ndipo zemela kamangu cifukwa cakuti penzeve lito inyinji. 6 Koma zuŵa peyeŵala, zeŵauka ndipo zefota cifukwa zenzeve mizhyu. 7 Mbeu ziyakine zeponela pa minga, ndipo minga izi zekula nokangisha mbeu izi kuti zikule. 8 Olo n’tetyo, mbeu ziyakine zeponela pa lito yabwino ndipo zeyamba kutwala vipaso, ziyakine zetwala vipaso 100, ziyakine 60 ndipo ziyakine 30. 9 Ali na matu amvwe.”
10 Ophunzila ŵake eluta kuli yove nomukonsha kuti: “Ndaŵa yanji mulaŵila nao poseŵenzesha mafanizo?” 11 Yove eŵayankha kuti: “Mweo mwapasiwa mwai womvwisha visinsi vopatulika va Ufumu wa kululu, koma ove aliyopasiwe mwai uyu. 12 Cifukwa aliyense ali nazo, akapasiwe zinyinji ndipo zikapakileko. Koma aliyense wamene aliye, akamulonde olo zakuganiza kuti ali nazo. 13 Niye cifukwa cake nulaŵila nao poseŵenzesha mafanizo. Cifukwa olo kuti ololesha, oona lini ciliconse, olo kuti akumvwa, omvwisha lini zulaŵilika ndipo ozindikila lini tanthauzo yake. 14 Ulosi wa Yesaya ukwanilishiwa pali ove wamene ukamba kuti: ‘Mukamvwe zulaŵilika koma mukazindikile lini tanthauzo yake ndipo mukaloleshe koma mukaone lini ciliconse. 15 Cifukwa ŵanthu aŵa ayumisha mitima yao, ndipo amvwa na matu yao koma ocitapo lini kanthu. Avala menso yao kuti asaone novala matu yao kuti asamvwe ciliconse olo kuzindikila tanthauzo yake m’mitima yao na colinga cakuti awelele kuli neo kuti niŵapoleshe.’
16 “Koma mweo nimwe osangalala cifukwa menso ŵanu oona koma soti matu ŵanu akumvwa. 17 Kulaŵila cendi, nukuuzhyani kuti aneneli anyinji na ŵanthu olungama enzofunishisha kuona vinthu vamuona, koma aliyokwanishe kuviona. Ndipo enzofunishisha kumvwa vinthu vamukumvwa koma aliyokwanishe kuvimvwa.
18 “Lomba mvwani fanizo ya munthu wamene ekomola mbeu. 19 Aliyense wamene akumvwa mau a Ufumu koma ozindikila lini tanthauzo yake, muipa owela nocosa zekomolewa mu mtima mwake. Iyi niye mbeu yekomolewa m’mbali mwa mseu. 20 Ndipo mbeu yamene yekomolewa pa miyala, ni munthu wamene akumvwa mau noyavomelezhya kamangu mwacimwemwe. 21 Cifukwa cakuti aliyozike mizhyu opitilizhya kukula kwa kanthawi. Koma akakumana na masauso olo akayamba kunzunziwa cifukwa ca mau amene ao, okhumudwa kamangu. 22 Mbeu yamene yekomolewa pa minga, ni munthu wamene akumvwa mau koma nkhaŵa za umoyo wa nthawi ino koma soti cinyengo camphamvu ca cuma, zucitisha kuti mau aŵa asakule ndipo otwala lini vipaso. 23 Ndipo mbeu yamene yekomolewa pa lito yabwino, ni munthu wamene akumvwa mau nozindikila tanthauzo yake, ndipo otwala vipaso. Muyakine otwala vipaso 100, muyakine 60 ndipo muyakine 30.”
24 Yove eŵafotokozela soti fanizo iyakine kuti: “Ufumu wa kululu tingaulinganizhye na munthu wamene ekomola mbeu iweme m’munda mwake. 25 Ŵanthu peenze lale, mdani wake ewela nokomola namsongole* m’munda uyu wa witi noluta. 26 Witi pewekula nocosa ngalangala, nao namsongole weonekela. 27 Tetyo akapolo a mwineco wa munda eluta kuli yove nomukonsha kuti, ‘Ambuye, kansi muliyekomole mbeu yabwino m’munda mwanu? Lomba ndaŵa yanji muli namsongole?’ 28 Yove eŵayankha kuti, ‘Munthu muyakine wamene ni mdani wangu, niye ecita izi.’ Ove emukonsha kuti, ‘Kansi mufuna kuti tilute tikaunyule?’ 29 Yove eŵauzhya kuti, ‘Yai, cifukwa cakuti pamunyula namsongole munganyulile pamozi na witi. 30 Vilekeni vikulile pamozi mpaka nthawi yowezhya. Nthawi yowezhya ikayofwika, nikauzhye owezhya kuti: Coyamba, nyulani namsongole ndipo muumange pamozi kuti ushokewe. Pavuli pake, musonkhanishe witi nouika mu cimphaka cangu.”’
31 Eŵauzhya soti fanizo iyakine kuti: “Ufumu wa kululu uli monga ni kansele ka mpilu* kamene munthu ekatola nokakomola m’munda mwake. 32 Kansele aka ni katontho ngako pa nsele zonse. Koma kakamela kokula ngako kupambana mbeu zonse za mu dimba ndipo konkhala kamuti cakuti tunyoni twa m’mululu, tuwela nopeza malo onkhala m’misambo yake.”
33 Ewauzhya soti fanizo iyakine kuti: “Ufumu wa kululu uli monga ni vofufumisha vecitola munakazi muyakine noviyavizhya na fulawu wokwanila mipimo itatu ikulu-ikulu ndipo pavuli poukanya, fulawu wonse wefufumuka.”
34 Yesu euzhya gulu ya ŵanthu vinthu vonse ivi poseŵenzesha mafanizo. Kulaŵila cendi, nthawi zonse polaŵila nao enzoseŵenzesha mafanizo. 35 Ecita izi kuti akwanilishe mau yecilaŵila mneneli kuti: “Nikasegule pakamwa pangu kuti nilaŵile mafanizo. Nikalengeze za vinthu vamene venze vofisika kucokela paciyambi.”*
36 Pavuli pouzhya gulu ya ŵanthu kuti ilute, yove eloŵa m’ng’anda. Ophunzila ŵake eluta kuli yove nomuuzhya kuti: “Tifotokozeleni tanthauzo ya fanizo ya namsongole m’munda.” 37 Yove eŵayankha kuti: “Munthu ekomola mbeu iweme ni Mwana wa munthu. 38 Munda ni calo. Ndipo mbeu iweme, ni ŵana a Ufumu. Koma namsongole ni ŵana a muipa. 39 Ndipo mdani wamene ekomola namsongole ni Maleŵania. Nthawi yowezhya ni masilizhyilo a nthawi ino, ndipo owezhya ni angelo. 40 Tetyo, monga ni mwamene namsongole usonkhanishiwila pamozi noshokewa pa mulilo, niye mwati zikankhalile pa masilizhyilo a nthawi ino. 41 Mwana wa munthu akatume angelo ŵake kuti akacose vinthu vonse vokhumudwisha na ŵanthu asamvwila malamulo mu Ufumu wake. 42 Akaŵaponye m’cisengu ca mulilo. Kwamene uko akalile nokukuta menu. 43 Pa nthawi yamene iyo, olungama akawale monga ni zuŵa mu Ufumu wa Ausuwao. Ali na matu amvwe.
44 “Ufumu wa kululu uli monga ni cuma cofisika m’munda, camene munthu muyakine ecipeza nocifisa. Ndipo cifukwa ca cimwemwe ceenze naco, eluta kuyogulisa vinthu vonse veenze navo nogula munda uyu.
45 “Ufumu wa kululu uli soti monga ni munthu wa malonda oyendayenda wamene enzosakila ngale zabwino. 46 Pecipeza ngale imozi yodula, yove eluta ndipo nthawi yamene iyo, egulisa vinthu vake vonse noigula.
47 “Ufumu wa kululu uli soti monga ni neti yamene yeponyewa mu nyanja ndipo yekasha nsomba za mitundu yosiyanasiyana. 48 Peyezula, eidonsela m’mbali mwa nyanja ndipo pecinkhala pansi esankha nsomba zabwino-zabwino noziika m’mabasiketi. Koma zosafunikila ezitaya. 49 Umu niye mwati zikankhalile pa masilizhyilo a nthawi ino. Angelo akalute kuyocosa ŵanthu aipa pakati pa ŵanthu olungama. 50 Ndipo akaŵaponye m’cisengu ca mulilo. Kwamene uko akalile nokukuta menu.
51 “Kansi mwamvwisha tanthauzo ya vinthu vonse ivi?” Ove emuyankha kuti: “Eee.” 52 Pavuli pake eŵauzhya kuti: “Pofwana kuti zili teti, mphunzisi aliyense wamene waphunzisiwa za Ufumu wa kululu, ali monga ni munthu wamene ni mwineco wa ng’anda, wamene ocosa vinthu vanyowani na vakale mosungila cuma cake.”
53 Yesu pecisilizhya kufotokoza mafanizo aŵa, ecokako ku malo aŵa. 54 Pecifwika m’dela ya kwao, eyamba kuŵaphunzisa mu sunagoge mwao cakuti ŵanthu edabwa ngako ndipo ekamba kuti: “Kansi munthu uyu ezitola kuni nzelu zoteti ndipo okwanisha tyani kucita nchito zamphamvu teti? 55 Kansi uyu ni mwana lini wa kalipentala? Kansi amai ŵake ni ŵala lini oziŵika kuti Mariya? Ndipo akwake ni Yakobo lini, Yosefe, Simoni na Yudasi? 56 Kansi azilongosi ŵake onse tili lini nao kuno? Lomba kansi evitola kuni vinthu vonse ivi?” 57 Tetyo, eyamba kukhumudwa cifukwa ca yove. Koma Yesu eŵauzhya kuti: “Mneneli olemekezewa lini kudela ya kwao kapena m’ng’anda mwake koma ku malo ayakine.” 58 Cifukwa cakuti ŵanthu aŵa enzeve cikhulupililo, yove aliyocite nchito zinyinji zamphamvu kwamene uku.