UMOYO WACIKHRISTU
Seŵenzeshani Buku Yakuti Sangalalani na Moyo Kosasila! Poyavya Ayakine Kutang’isha Cikhulupililo Cao Mwa Yehova na Yesu
Kuti ophunzila Baibo akondweleshe Mulungu, ofunika kunkhala na cikhulupililo cotang’a. (Aheb 11:6) Tingaŵayavye mwakuseŵenzesha buku yakuti Sangalalani na Moyo Kosasila! Buku iyi ili na zinthu monga malemba, mfundo zomvwika bwino, makonsho okata mtima, mavidyo olimbikisha na vithunzithunzi vokongola. Ngati tuyavya ophunzila Baibo kukulisha minkhalidwe yacikhristu notang’isha ushamwali wao na Mulungu, niye kuti tumanga na vomangila vosakata mulilo.—1Akor 3:12-15.
Ŵanthu ayakine oona kuti n’covuta kunkhala pa ushamwali na Mulungu wamene omuona lini. Tetyo, tufunika kuŵayavya kuti aziŵe Yehova nakuti akomukhulupilila.
ONELELANI VIDYO YA MUTU WAKUTI YAVYANI AYAKINE KUTANG’ISHA CIKHULUPILILO CAO MWA YEHOVA, POSEŴENZESHA BUKU YAKUTI “SANGALALANI NA MOYO KOSASILA!” NDIPO PAVULI PAKE YANKHANI MAKONSHO AŴA:
Kansi tuziŵa tyani kuti kalongosi ekonzekela bwino phunzilo?
Kansi kalongosi eseŵenzesha tyani makonsho poyavya wophunzila kumvwishisha lemba ya Yesaya 41:10, 13?
Kansi mavidyo na mavesi a m’Baibo emuyavya tyani wophunzila?
Ŵanthu anyinji omvwishisha lini nkhani yokhuza dipo ndipo oiona lini kuti ni mphaso yofumila kwa Mulungu. (Aga 2:20) Tetyo, tufunika kuŵayavya kukulisha cikhulupililo mu dipo ya Yesu.
ONELELANI VIDYO YA MUTU WAKUTI YAVYANI AYAKINE KUTANG’ISHA CIKHULUPILILO CAO MWA YESU, POSEŴENZESHA BUKU YAKUTI “SANGALALANI NA MOYO KOSASILA!” NDIPO PAVULI PAKE YANKHANI MAKONSHO AŴA:
Kansi tuziŵa tyani kuti mkwasu ekonzekela bwino phunzilo?
Kansi eseŵenzesha tyani mbali yakuti “Fufuzani” poyavya wophunzila?
Ndaŵa yanji tufunika kupemphelela wophunzila Baibo?