Kunola Luso Yasu mu Utumiki—Kuseŵenzesha Makonsho Mosamala

NDAŴANJI N’KOFUNIKA: Ngati ‘maganizo a mumtima mwa munthu ali monga ni manzi ali pa cisime,’ niye kuti makonsho ali monga ni cikopo cotapila. (Miy 20:5) Makonsho oyavya kuti tikolaŵizhyana na omvwishila. Mayankho pa makonsho osankhiwa luweme oyavya kuti tiziŵe maganizo a munthu. Yesu eseŵenzesha makonsho mosamala. Kansi tingatolele tyani cisanzo cake?

MWAMUNGACITILE:

• Konshani makonsho angakuyavyeni kuziŵa maganizo a omvwishila. Yesu ekonsha makonsho anyinji kuti aziŵe maganizo a ophunzila ŵake. (Mat 16:13-16; be-CN peji 238 ndime 3-5) Ko mungakonshe makonsho otyani kuti muziŵe maganizo a munthu?

• Konshani makonsho osogolela ku yankho. Kuti aongolele maganizo a Petulo, Yesu ekonsha makonsho notwala mayankho amene emuyavya kupeza yankho yoyenelela. (Mat 17:24-26) Ko ni makonsho otyani osogolela ku yankho yamungakonshe kuti muyavye munthu muyakine kupeza yankho yoyenelela?

• Ayamikileni omvwishila ŵanu. Yesu eyamikila mlembi pavuli pakuti “wayankha mwanzelu.” (Mko 12:34) Kansi mungamuyamikile tyani munthu wamene wayankha konsho yamwamukonsha?

ONELELANI MBALI YOYAMBA YA VIDYO YA MUTU WAKUTI CITANI NCHITO YECICITA YESU—KUPHUNZISA, NDIPO PAVULI PAKE YANKHANI MAKONSHO AŴA:

• Ndaŵa yanji kaphunzisidwe kataonelela ni kaweme lini, nangu kuti uthenga ni wolondola?

• Ndaŵa yanji tuwamila kucita zinyinji osati tyala kufotokoza zatuziŵa?

ONELELANI MBALI YACIŴILI YA VIDYO, NDIPO PAVULI PAKE YANKHANI MAKONSHO AŴA:

• Ko mkwasu waseŵenzesha tyani makonsho mosamala?

• Kansi ni mbali ziyakine zotyani zawaseŵenzesha pophunzisa zatingatoleleko?