Eksoda

16 Ka nthago ga mo ba tlugiye Elimi, setšhaba sa Maisrayele ka mokana ga sona sa fetsa se segele mašahleng ya Sini ya gore yi segare ga Elimi le Sinayi, ka letšatši la bo 15 la kgwedi ya bobedi (2) ya mo ba tlugiye nageng ya Egepita.

2 Setšhaba ka mokana ga sona sa Maisrayele sa thomisa go kokola ga Moše le Aroni ku mašahleng. 3 Maisrayele ke mo ma fo dula ma ba botsa gore: “Nke Jehova a re bolayye ku nageng ya Egepita ga gore ke mo re ja nama, re ja le sekgwa re šala re kgotsofele. Gana byalo le re leyye ho mašahleng gore le bolaye phutego ka mokana ga yona ka tlala.”

4 Ke mokane Jehova a re ga Moše: “Ke nyoko le nisela sekgwa se tšwa magedimong, motho ye mongwana le ye mongwana a tšwe a ye kotela sa go mo lekana letšatši le lengwana le le lengwana, gore ke ba liketse ke bone gore ba nyoko sepela ka molawo waka kela awwa. 5 Mara ka letšatši la kobodi (6) mo ba lukiselela tso ba di koteleng, go be tsa go lekana matšatši ka mabedi (2).”

6 Byalo Moše le Aroni ba botsa Maisrayele ka mokana ga wona gore: “Ka malobana le nyoko di tšiba gore Jehova ke yene a le ntshiyeng nageng ya Egepita. 7 Ka bošego le nyoko bona go gadima ga Jehova ka gore o le kwile mo le kokolela Jehova. Rune ke rune bomang la gore le ka šinya le re kokolela?” 8 Moše a ya mahlong a re: “Mo Jehova a le neya nama gore le je ka malobana fote ka bošego a le neya sekgwa gore le je le kgotsofale, le nyoko di bona gore Jehova o le kwile mo le mo kokolela. Mara rune ke rune bomang? Phela a le kokolele rune, mara le kokolela Jehova.”

9 Ke mokane Moše a re ga Aroni: “Botsa setšhaba sa Israyele ka mokana ga sona gore, ‘Šutelaneng mahlong ga Jehova ka gore o le kwile mo le kokola.’” 10 Mo Aroni a fetsa go bolabola le setšhaba sa Israyele ka mokana ga sona, ba sokologa ba liba ku mašahleng, ba bona go gadima ga Jehova go nyarele hala lirung.

11 Jehova a ya mahlong a bolabola le Moše a re: 12 “Ke di kwile mo Maisrayele ma kokola. Ma botse gore, ‘Ka malobana le nyoko ja nama fote ka bošego le nyoko ja sekgwa la šala le kgotsofele, le nyoko di tšiba gore ke nna Jehova Modimo wa lune.’”

13 Byalo, ka malobana yane gwa tla dikhwiri* dya tlala mo ne ba kampiye gona, fote ka bošego ke mo go na le phooka mo ba kampiyeng gona ka mokana ga gona. 14 Mo phooka yi thomisa go tloga, hala mašahleng ke mo go na le selo se sesesane sa gore se yatladiye ho fase, sa gore se fo šehlulugana, go le se sesesane go tshwana le sebera mo se le mo fase. 15 Mo Maisrayele ma di bona, ma thomisa go bolabodisana ma re, “King tsotso?” ka gore ke mo ba sa di tšibi gore king. Moše a re ga bona: “Ke sekgwa so Jehova a le neyyeng sona gore le je. 16 Tsowa ke tso Jehova a di hlayyeng, ‘Di nyaka ye mongwana le ye mongwana wa lune a kotele tsa go lekana gore a je. Motho ye mongwana le ye mongwana le mo tseyele tsa go lekana gana hala ga dilitha ka dipedi (2),* di ya ka gore go na le batho ka bakaye letenteng la ye mongwana le ye mongwana wa lune.’” 17 Maisrayele ma thomisa go maka ka mokgonone; ma ye koteleng, ya mangwana ma kotela tsa go tlala, ya mangwana ma kotela tse dinyana. 18 Mo ba di kala ka omere, ke mo go sa šale selo ga ye wa gore o kotele tsa go tlala fote ga ye wa gore o kotele tse dinyana ke mo go sa gayele selo. Ye mongwana le ye mongwana o kotele tso a ka kgonang go di ja.

19 Ke mokane Moše a re: “Go sa be le ye a di šiyang go segela ka bošego.” 20 Mara ba sa mo theetsele ga Moše. Mo ba bangwana ba di šiya go segela ka bošego, ke mo di ba le diboko fote di nkga, Moše a ba kwatela. 21 Ke mo ba di kotela ka bošego byo bongwana le byo bongwana, ye mongwana le ye mongwana a kotela go ya ka mokgo a ka jang. Mo letšatši le fisa, ke mo di tuluga.

22 Ka letšatši la kobodi (6), ke mo ba kotela sekgwa sa go lekana matšatši ka mabedi (2), motho ye mongwana le ye mongwana ke mo a kotele dikala ka dipedi (2) tsa omere. Byalo, dindhuna ka mokana ga tsona tsa setšhaba dya tla dya botsa Moše. 23 Mo ba reyane, Moše a re ga bona: “Ke tso di hlayyeng ke Jehova. Ka motshwana go nyoko ba letšatši la go khutsa, sabatha ya go hlawolega ya Jehova. Bhakaneng tso le nyakang go di bhaka, le kgukgubege tso le nyakang go di kgukgubega; tso di ko bang di šele le di beyeneng go segela ka bošego.” 24 Byalo, ba di beya go segela ka bošego ka mokgo Moše a ba butsiyeng ka gona, ke mo di sa nkge, fote ke mo di se na diboko. 25 Ke mokane Moše a re: “Lekgono janeneng tso le di beyyeng, ka gore ke sabatha ya Jehova. Lekgono le ka sa di kraye mo fase. 26 Le nyoko fetsa kobodi (6) ya matšatši le di kotela, mara ka letšatši la kašupa (7) la gore ke Sabatha di nyoko ba di se šiyo.” 27 Batho ba bangwana ba fo ya go ye koteleng ka letšatši la kašupa (7), mara ba sa kraye selo.

28 Byalo Jehova a re ga Moše: “Le nyoko gana go theetsela tso ke di hlayang le melawo yaka go segela neng? 29 Le sa lebale taba ya gore Jehova o makiye gore le be le Sabatha. Nka taba lo ka letšatši la kobodi (6) a le neyang sekgwa sa matšatši ka mabedi (2). Ye mongwana le ye mongwana a dule mo a leng; go sa be le ye a yang go gongwana ka letšatši la kašupa (7).” 30 Byalo, batho ba gopola Sabatha ka letšatši la kašupa (7).

31 Ba ntlo ya Israyele ba re sekgwa sone ke “manna.”* Ke mo se tshwana nyana le dithoro tse di tšhwewu, fote ka mo ganong ke mo se tshwana le sekgwa sa sepsyatla sa gore se na le mamapo. 32 Moše a re: “Tsowa ke tso Jehova a di hlayyeng, ‘Kotelaneng tsa go lekana omere go be selo sa gore se nyoko ba gona ga leloko la lune ka mokana ga lona, gore ba tle ba bone sekgwa so ke le neyyeng sona gore le je ku mašahleng nakwela ke le ntsha nageng ya Egepita.’” 33 Moše a botsa Aroni gore: “Tseya jeke o tšhele manna ya go lekana omere o yi beye mahlong ga Jehova gore go be selo sa gore se nyoko ba gona ga leloko la lune ka mokana ga lona.” 34 Aroni a yi beya mahlong ga lebhokisi la go hlawolega gore yi dule yi le gona, go fo ya ka mokgo Jehova a butsiyeng Moše. 35 Maisrayele ma fetsiye 40 ya mengwaga ma ja manna go šinya ma segela nageng ya gore go dula batho. Ma jile manna go šinya ma segela mo naga ya Kanana yi kgerang gona. 36 Lesome (10) la diomere le lekana le ifa.*