Samuwele wa Mathomo
17 Mafilisita ma kgobaketsa masole ya wona gore ma ye ntweng. Ma yye ma kgobakana Sokho ya gore yi Juda, ma kampa segare ga Sokho le Azekha ku Efese-damimi. 2 Sawulo le banna ba Israyele ba kgobakana ba kampa Moyeding wa Ela, ba tilukiselela go ye lwa le Mafilisita. 3 Mafilisita ke mo ma le ka nthoko ye nngwana ya thaba, Maisrayele ma le ka nthoko ye nngwana, moyedi wone ke mo wo le segare ga bona.
4 Ku kampeng ya Mafilisita gwa tšwa monna wa segoboro; lebitso lage ke mo go le Gholiyate wa go tšwa Ghathe, ke mo a lefiye go teya gana hala ga 3 ya dimitha.* 5 Ke mo a yapere lekarapo la koporo mo hlogong, fote ke mo a yapere mokgopa wa go ba le dipelekete. Mokgopa wone ke mo wo kala 5 000 ya dišekele.* 6 Mo mawotong ke mo a yapere tsa go pasopa mafatsa tsa go makiwa ka koporo, fote ke mo a hakiye lerumo la go makiwa ka koporo mo magetleng. 7 Phate ya lerumo lage ke mo yi lekana le phate ya sebhongholwane sa batho ba go loga, mo ga go hlaba ka gona ga gore go makiwwe ka tshipi ke mo go kala 600 ya dišekele;* fote ye ke mo a tshwere legawu lage ke mo a mo yetiye mahlong. 8 A yema, a yahlamela Maisrayele ya gore ma tilukiselele go lwa, a re ga wona: “Ke ntaba le tilukiselele go tl’le lwa le rune? Anthe nna a yi nna Lefilisita, fote lune a yi lune malata ya Sawulo? Hlawolaneng monna gore a tle ho gaka. 9 Mo a ka lwa le nna fote a mpolaya, re nyoko ba malata ya lune. Mara mo nna nka bolaya yene, le nyoko ba malata ya rune la re berekela.” 10 Ke mokane Lefilisita lone la re: “Nje mo ga masole ya Israyele go na le wa gore a ka lwa le nna lekgono? Hlawolaneng motho wa gore a ka lwa le nna!”
11 Mo Sawulo le Maisrayele ka mokana ga wona ba kwa tso Lefilisita lone le di hlayang, ba thomisa go hlagasela, ba tšhoga ka matla.
12 Byalo, Dafita ke mo go le morwayi wa Jese wa gore ke Leeforatha la go tšwa Bhetlelehema ya Juda, Jese ke mo a na le mabala (8) ya barwayi fote ka dinako tsa bo Sawulo ke mo a šele a tsofele. 13 Barwayi ba Jese kararo (3) ya bona ba bagolo ba latelele Sawulo ku ntweng. Mabitso ya barwayi bane kararo ya bona ba gore ke mo ba yye ku ntweng ke mo go le Eliyabho wa gore ke letšibula, wa go latela ke mo go le Abhinadabo, ke mokane wa kararo ke mo go le Šama. 14 Dafita ke mo go le lekotwana la gona, fote bala ba bagolo kararo ya bona ba latelele Sawulo.
15 Dafita ke mo a fela a tloga ga Sawulo a ye pasopa dinku tsa papage ku Bhetlelehema. 16 Go fediye 40 ya matšatši Lefilisita lone le fo tla le yema hone ka bošego byo bongwana le byo bongwana le ka malobana.
17 Ke mokane Jese a re ga Dafita morwayi wage: “Ke kgopela o tseye mabelethoro yawa ya go besiwa ya go lekana ifa* le lesome (10) la malofo yawa ya sekgwa, o yakgoswe o ye di neya bobhuti bago ku kampeng. 18 Tseya le lesome la ditšhisi tsowa o ye natso ga ndhuna ya mogoba wa masole ya bona; o hlole le gore bobhuti bago ba sa le gabutši naa, fote o boye le se sengwana sa go šupetsa gore ba sa le gabutši.” 19 Ke mo ba na le Sawulo le banna ba Maisrayele ka mokana ga bona ku Moyeding wa Ela, ba lwa le Mafilisita.
20 Dafita a tsoga go sa le ka phu, a šiya motho gore a pasope dinku; ke mokane a loka, a sepela ka mokgo Jese a mmutsiyeng ka gona. Mo a segela ku kampeng, masole ke mo ma tšwa ma yahlamela go šupetsa gore ma tilukiselele ntwa. 21 Maisrayele le Mafilisita ma yema ma lebeletsanne ma tilukiselela go lwa. 22 Dafita a napa a šiya morwalo wage le yela wa go pasopa morwalo, a taboga a ya ga bala ba gore ba tilukiselele go lwa. Mo a segela a butsisa gore bobhuti bage ba sa le gabutši naa.
23 Mo a kene a sa bolabola nabo, gwa tla monna yela wa segoboro ye ba reng ke Gholiyate, Lefilisita la go tšwa Ghathe. O tšwile ga Mafilisita yala ya gore ke mo ma tilukiselele ntwa, a bolabola mantsu yanala a ma bolabodiyeng mathomisong, fote Dafita a mo kwa. 24 Mo banna ka moka ba Maisrayele ba bona monna yene, ba tšhaba, ke mo ba tšhugiye. 25 Banna ba Maisrayele ke mo ba re: “Nje le mmone monna ye a tlang? O tlela go rogelela Israyele. Kgoši yi nyoko maka gore motho ye a bolayang monna yene a ghanye, yi nyoko mo neya morwediya wa yona, di ka sa sa nyaka gore ba mutši wa papage ba neye kgoši dilo tso Maisrayele ma di neyang kgoši.”
26 Dafita a thomisa go butsisa banna bo ne ba yemme thina gage gore: “Monna ye a bolayang Lefilisita lowa, a maka gore Israyele yi sa poyilege ba nyoko mo makela ying? Nje Lefilisita lowa la lešoboro go ro ba mang gore le ka šinya le rogelela masole ya Modimo wa go phela?” 27 Batho bala ba mmotsa tso ba mmutsiyeng tsona mathomisong, ba re: “Tsowa ke tso ba nyoko di makelang motho ye a bolayang monna yene.” 28 Mo bhuti wage ye mogolo ye ba reng ke Eliyabho a kwa Dafita a bolabola le banna bala, a kwata a re: “O nyaka ying howa? Dinku tsela tsa gore a di ya tlala o di šiyye le mang ku mašahleng? Ke ya di tšiba gore o na le magaba fote a wa tikemisela selo sa gabutši; o f’lo tlela go bona ntwa.” 29 Mo a reyane, Dafita a re: “Ke makiye ying byalo? Ne ke fo butsisa!” 30 Dafita a tloga mone gage a ya ga ye mongwana a ye mmutsisa tsetsela, ba mo fetola ka mokgonola.
31 Ba kwile tso Dafita a di hlayyeng, ba ya ba botsa Sawulo. Byalo Sawulo a re ba mo leye gage. 32 Dafita a re ga Sawulo: “Batho bowa ba sa tshose ke monna yewa. Lelata lago le nyoko ya le ye lwa le Lefilisita lowa.” 33 Mara Sawulo a re ga Dafita: “O ka sa yi o ye lwa le Lefilisita lowa ka taba la gore o sa le sešomanyana, yene ke mo go le lesole go tlugisela go sa le ye monyana.” 34 Dafita a re ga Sawulo: “Nakwela lelata lago le disa dinku tsa papa wa lona, go tlile tawu, gwa tla le bhere, ye nngwana le ye nngwana ya tseya nku mone morapeng. 35 Ke di lelekisiye ka phonisa dinku tsaka molomong wa tsona. Mo yi tsoga yi re yi lwa le nna, ka yi tshwara ka maboya* ya yona ka yi bolaya. 36 Lelata lago le bolayye tawu le bhere, fote Lefilisita lowa la lešoboro le nyoko tshwana le se sengwana sa tsona, ka taba la gore le rogelele masole ya Modimo wa gore wa phela.” 37 Ke mokane Dafita a tokegela ka gore: “Jehova wa gore o mphonisiye ga tawu le bhere, ke yene a nyoko mphonisang ga Lefilisita lowa.” Mo a reyane, Sawulo a re ga Dafita: “Ariye, fote nkare Jehova a ka ba nago.”
38 Byalo Sawulo a tseya dikobo tsage a yapesa Dafita. A mo yapesa lekarapo la koporo mo hlogong, ka nthago a mo yapesa mokgopa wa go ba le dipelekete. 39 Dafita a haka sabola yage gedimo ga dikobo tsage, a liketsa go sepela mara a šitega ka taba la gore ke mo a sa di tlwayela. Dafita a re ga Sawulo: “Nka sa kgone go ya ke yapere dilo tsowa, ka gore a ke ya di tlwayela.” Byalo Dafita a di yapola. 40 A tseya thoka yage, a hlawola kapheta (5) ya matlapa ya go thelela hala moyeding, a ma tšhela ka teng ga sekhwama so ne a se berekisa mo a ya go ye diseng, fote ke mo a tshwere le sepelopelo. A thomisa go šutela ku ga Lefilisita lela.
41 Lefilisita lone la fo ba le kene le šutela ga Dafita, fote ke mo le yetiye mahlong ke lelata la lona la go le tshwarela legawu. 42 Mo Lefilisita lone le lebelela Dafita, la mo tseyela fase ka gore ke mo go fo ba mošomanyana ye mokgubedu wa gore fote o bafele. 43 Lefilisita lela la re ga Dafita: “Ke nna mpsya, la gore o ka šinya o tla gaka o tshwere thoka?” Lefilisita lela la rogelela Dafita ka medimo ya lona. 44 Lefilisita lela la re ga Dafita: “O fo šutela wene, nama yago ke nyoko yi neya dinonyane tsa ku magedimong le diphoolwane tsa go tshosa tsa hlaga.”
45 Dafita a re ga Lefilisita lela: “Wene o tla ho gaka o tshwere sabola le marumo ka mabedi (2), mara nna ke tla gago ka lebitso la Jehova wa masole, Modimo wa masole ya Israyele, wa gore o mo rogelele. 46 Jehova o nyoko maka gore ke go hlule lekgono lowa, ke nyoko go bolaya fote ka go kopa hlogo; ditopo tsa masole ya Mafilisita ke nyoko di neya dinonyane tsa magedimong le diphoolwane tsa hlaga tsa go tshosa tsa lefaseng lekgono lowa; fote batho ba lefaseng ka mokana ga lona ba nyoko di tšiba gore go na le Modimo wa Maisrayele. 47 Batho bo ba kgobakanneng howa ka mokana ga bona ba nyoko di tšiba gore Jehova aa phonisi ka sabola kela ka lerumo, ke Jehova a ntoši a ka makang gore re hlule ntweng fote o nyoko maka gore re le hlule ka mokana ga lune.”
48 Ke mokane Lefilisita lela la šutela ka gonyana ka gonyana gore le ye gahlana le Dafita, mara Dafita a taboga ka lebelo a bakiye hala go nang le masole ya Mafilisita gore a gahlane le Lefilisita lone. 49 Dafita a tšhela letsogo sekhwameng sage a ntsha letlapa, a le tšhela sepelopelong a thunya. A teya Lefilisita lela mo mopong, letlapa lela la kena la sobela ke mokane Lefilisita lela la wa ka sefahlego. 50 Byalo Dafita a hlula Lefilisita lone ka sepelopelo le letlapa; a le bolaya le mo a kene a sa tshwara sabola. 51 Dafita a ya mahlong a taboga, a ya a yema thoko gage. Byalo Dafita a ntsha sabola ya Lefilisita lone ka sekhwameng sa yona, a le kopa hlogo gore di be lekgwaying gore le kgwile. Mo Mafilisita ma di bona gore segoboro sela se kgwile, ma tšhaba.
52 Banna ba Maisrayele le ba Majuda ba napa ba tlogamela, ba thomisa go yahlamela ba lelekisa Mafilisita go tloga mone moyeding go segela digheyiting tsa Ekrone, Mafilisita ya ba ma bolayyeng ke mo ma wele mo pateng go tlugisela Šarayimi go segela Ghathe le Ekrone. 53 Mo Maisrayele ma boya ma tšwa go lelekisa Mafilisita, ma tseya dilo tsa Mafilisita ku dikampeng tsa wona.
54 Dafita a tseya hlogo ya Lefilisita lela a ya nayo Jerusalema, mara tso ne le lwa ka tsona a di yisa letenteng lage.
55 Ka nako yo Sawulo a bona Dafita a tšwa a ye gahlana le Lefilisita lela, a re ga Abhonere ndhuna ya masole: “Ye Abhonere, mošomanyana yewa ke morwayi wa mang?” Abhonere a re: “Go bolabola nnete kgoši, a ke tšibi!” 56 Kgoši ya re: “Nyakolla gore mosogana yewa ke morwayi wa mang.” 57 Byalo, mo Dafita a boya a tšwa go bolaya Lefilisita lela, Abhonere a mo tseya a mo yisa ga Sawulo. Dafita ke mo a tshwere hlogo ya Lefilisita lela. 58 Sawulo a re ga Dafita: “Ke wene morwayi wa mang?” mo a reyane Dafita a re: “Ke nna morwayi wa lelata lago Jese wa go dula Bhetlelehema.”