Tsowa di Hlatolla ke Mareka

9 Go tokegela gana hone, Jeso a re ga bona: “Nnete ke ya le botsa, ba bangwana bo ba yemmeng ho gare ga lune ba ka sa kgwe, go segela ba bona Mmušo wa Modimo wo lawola.” 2 Ka nthago ga kobodi ya matšatši, Jeso a tseya Petro, Jakobo le Johane a ya nabo thabeng ya go lefa. Ke mokane a tšhentšha mo a kene a le nabo; 3 dikobo tsage tsa ka tawong dya thomisa go gadima, dya ba tse di tšhwewu go phala dikobo ka mokana ga tsona tsa ho lefaseng. 4 Gwa nyarela Eliya le Moše, ba bolabola le Jeso. 5 Byalo Petro a re ga Jeso: “Rabi, di gabutši gore re be howa. Re lisetse re hlome matente ka mararo, ka lloši go be lago, ka lloši go be la Moše le lengwana go be la Eliya.” 6 Gabutšibutši, Petro ke mo a sa di tšibi gore a make ying, ka taba la gore ke mo ba tšhugiye ka matla. 7 Gwa nyarela liru la ba kogetsa, ke mokane gwa kwagala lentsu le tšwa lirung, la re: “Yewa ke Morwayi waka ye ke mo nyakang ka matla. Le mo theetseleneng.” 8 Mo ba re phaphara, ba bona go sa sa na motho, go šele Jeso a ntoši.

9 Mo ba kene ba thewoga hala thabeng, Jeso a ba botsa a tiyisiye ganong gore ba sa botse motho tso ba di bonneng, go segela mo Morwayi wa motho a šele a tsusiwwe. 10 A baa botsa motho, mara bona beng ba yye ba bolabodisana gore di ra gore king tsa gore o nyoko tsusiwa. 11 Malata yage ma thomisa go mmutsisa gore: “Anthe ke ntaba bomabhalane ba re Kreste o tshwanele a tle ka nthago ga Eliya?” 12 A re ga bona: “Go nyoko thomisa go tla Eliya, gore a make gore batho ba kwane le Modimo; byalo ke ntaba go ngwadiwwe gore Morwayi wa motho o nyoko hlupegisiwa ga tsa go tlala, a boya a makiwa lešidi? 13 Mara ke re ga lune, Eliya o šele a tlile, fote ba mo makiye tso ba di nyakang, go ya ka mokgo go ngwadiwweng.”

14 Mo ba segela ga malata yala ya mangwana, ba bonne mogoba wo ma kgobakanele fote ke mo go na le bomabhalane ba phigisana nabo. 15 Mo mogoba wo bona Jeso wa makala, ke mokane wa taboga wo ye mo gahlanetseng. 16 Byalo a ba butsisa gore: “Anthe le phigisana ka ying?” 17 Ye mongwana hala mogobeng a mo fetola a re: “Thitšere, ne ke tlisiye morwayi waka ho gago, ka taba la gore o na le ledimona la go mo šitisa go bolabola. 18 Mo le šele le mo hlorisa, le mo wisela fase ke mokane o tšwa diphušane ka ho ganong, o loma le meno fote o fo lelemela. Ke kgopele malata yago gore ma le rake, mara ma šitegiye.” 19 Mo Jeso a fetola a re ga bona: “Lune moloko wa go hloka tumelo, le nyaka ke dula ke le gelepa go segela leng? Ke tshwanele ke tiyisele tso le di makang go segela leng? Mo leyeneng ho gaka.” 20 Byalo, ba leya mošomanyana yela ga Jeso, mo ledimona lela le bona Jeso la napa le wisela mošomanyana yela fase. Mo a šele a wele fase, ke mo a fo phukulugana, a tlala diphušane ka mo molomong. 21 Ke mokane Jeso a butsisa papa wa mošomanyana yela gore: “Di thomme neng go mo maka ka mokgo?” A re: “Go tlugisela go sa le ye monyana, 22 ga go tlala le mo wisela ka mollong le meetšing le nyaka go mmolaya. Mo nkare go na le so o ka se makang, re kwele go baba barena, o re gelepe.” 23 Jeso a re gage: “Ke ntaba o re, ‘Mo nkare’? Dilo ka mokana ga tsona di ka makega ga ye a nang le tumelo.” 24 Papa wa ngwanela a napa a bolabolela gedimo a re: “Ke na le tumelo! N’gelepe mo ke gayelang tumelo!”

25 Mo Jeso a bona gore mogoba wo tla ga bona ka go yakgoswa, a lakatsa ledimona lela, a re: “Ye wene ledimona la go sa bolabole le la go sa kwe, ke re tšwang mone gage fote o sa sa boya!” 26 Ka nthago ga gore le lle fote le mo wisele fase, la tšwa ke mokane ngwanela a šupa nkare o kgwile, batho ba šinya ba re: “O kgwile!” 27 Mara Jeso a tshwara mošomanyana yela ka letsogo, a mo tsosa ke mokane mošomanyana yela a tlogamela. 28 Byalo mo Jeso a šele a kenne ka ntlong, malata yage ma mmutsisa ka makhukhung, ma re: “Ke ntaba rune re šitegiye go le raka?” 29 A re ga wona: “La mošaga wowa, le tšwa mo o rapela.”

30 Ba tloga mone, ba feta Galeliya, mara Jeso ne a sa nyake gore batho ba di tšibe gore o kaye 31 ka taba la gore ke mo a sa tšhutisa malata yage a ma botsa gore: “Morwayi wa motho o nyoko rekisiwa, fote ba nyoko mmolaya, mara le mo ba ka mmolaya o nyoko tsusiwa ka nthago ga matšatši ka mararo.” 32 Mara ne ma sa kwisisi tso a di bolabolang fote ne ma tšhaba go mmutsisa.

33 Ba segela Kapernawume. Mo ba šele ba kenne ka ntlong, Jeso a ba butsisa a re: “Ke mo le phigisana ka ying hala pateng?” 34 Ba fo kgomolela, ka taba la gore ke mo ba phigisana ka gore ke mang ye mogolo. 35 Byalo a dula fase, a bitsa bala 12 ya bona a re ga bona: “Ye a nyakang go ba wa mathomo, di nyaka a be motšobong fote a berekele ba bangwana.” 36 A tseya sengwananyana, a se yemisa gare ga bona; a beya matsogo yage magetleng ya sona, a re ga bona: 37 “Ye a yamogelang wa go tshwana le sengwananyana sowa ka taba la lebitso laka, o yamogela le nna; fote ye a yamogelang nna, o yamogela le Ye a nrommeng.”

38 Johane a re gage: “Thitšere, re bonne ye mongwana a raka madimona a berekisa lebitso lago, fote re liketsiye go mo thibelela ka taba la gore ke mo a sa sepele le rune.” 39 Mara Jeso a re: “Le sa liketse go mo thibelela, ka taba la gore aa šiyo ye a nyoko makang mehlolo ka lebitso laka a jika a bolabola dilo tsa go befa ka nna. 40 Ye a sa phigisaneng le rune, o yema le rune. 41 Fote ye a le neyang komitši ya meetši ka taba la gore ke lune batho ba Kreste, nnete ke ya le botsa, o nyoko kraya patela yage. 42 Mara ye a phiriketsang ye mongwana wa bowa ba banyana ba gore ba na le tumelo, di kawone ba make mogwabetso ga tšhilo ya go dukulusa ke bhongholo, ba wo gwabetse mo molaleng wage, a bošediwe ka teng ga lewatle.

43 “Mo nkare letsogo lago le ya go phiriketsa, le kope. Go kawone gore o kraye lephelo o le segole, o sa kraye o bošediwwe Ghehena* o na le matsogo ka mabedi, ga gore go na le mollo wa gore wo ka sa timi. 44 —— 45 Fote mo nkare loto lago le ya go phiriketsa, le kope. Go kawone gore o kraye lephelo o se na loto, o sa kraye o bošediwwe Ghehena* o na le mawoto ka mabedi. 46 —— 47 Mo nkare lihlo lago le ya go phiriketsa, le gonye. Go kawone gore o kene Mmušong wa Modimo o na le lihlo ka lloši, o sa kraye o bošediwwe Ghehena* o na le maahlo ka mabedi, 48 ga gore diboko a di kgwi fote mollo wa gona a wo timi.

49 “Batho bowa ba tshwanele ba tšhediwe ka mollo, go tshwana le mo motho a tšhela letswayi tsa go jeng. 50 Letswayi le gabutši, mara mo letswayi lone le sa sa tsapela, ayitsano le sa na le mmereko? Le lune le tshwaneneng le letswayi, gore le thogo phidisana gabutši le ba bangwana.”