Eksoda

34 Ke mokane Jehova a re ga Moše: “Timakele matlapa ka mabedi (2) ya dipsyatla ya go tshwana le yala ya mathomo, fote mo gedimo ga wona ke nyoko ngwala mantsu yala ya gore ne ke ma ngwadiye ga matlapa yala ya mathomo ya gore o ma pshyayye. 2 Ka motshwana ka bošego o be o tilukisiye ka gore o nyoko ya Thabeng ya Sinayi, ke mokane wa segela o yema mahlong gaka gana hone gedimo ga yona. 3 O sa yi le motho, fote go sa be le motho ye a boniwang hone thabeng. Go sa be le merape yo yi kgulang thina le thaba yone.”

4 Byalo Moše a maka matlapa ka mabedi (2) ya dipsyatla ya go tshwana le yala ya mathomo, fote a tsoga ka bošego a ya Thabeng ya Sinayi go fo ya ka mokgo Jehova a mmutsiyeng ka gona, ke mo a tshwere matlapa ka mabedi ya dipsyatla. 5 Ke mokane Jehova a thewoga ka liru a yema naye gana hone, fote a bolabola ka lebitso la Jehova. 6 Jehova ke mo a feta mahlong gage a re: “Jehova, Jehova, Modimo wa go kwelana go baba, wa gore o na le pelo ya gabutši, wa go diyega go kwata, wa go nyakanana ka matla, wa gore fote wa tshepega, 7 wa go šupetsa dikete tsa batho gore wa nyakanana, wa go re tshwarela ga tso re di kekemisang le mo re sa makang gabutši le ga tso re di sinnyeng, mara ba gore ba na le molato a ka sa ba lisetsi a sa ba wolola, o nyoko wolola barwayi le ditlogolwane ka taba la tso di makiyeng ke bopapa ba bona, go segela ka leloko la kararo (3) le leloko la kanne (4).”

8 Moše a yakgoswa a thinya letolo fote a yinamisa hlogo. 9 Ke mokane a re: “Mo nkare o n’yamogele wene Jehova, ke kgopela gore o sepele le rune wene Jehova le mo nkare re batho ba go woma dihlogo, fote o re tshwarele ga tso re di sinnyeng, o re tseye re le batho bago.” 10 Yene a re: “Ke nna yewa ke maka kwano ya gore: Ke nyoko maka dilo tsa go makatsa mahlong ga Maisrayele ka mokana ga wona tsa gore a di soko makiwa lefaseng ka mokana ga lona kela ga ditšhaba ka mokana ga tsona, fote batho ka mokana ga bona bo le dulang nabo ba nyoko bona mmereko wa Jehova ka taba la gore dilo tso ke di makang le lune di ya makatsa.

11 “Dilo tso ke le botsang tsona lekgono le di tseyele gedimo. Ke nna yewa ke nyoko le yeta mahlong fote ke nyoko raka Maamore, Makanana, Mahethe, Maperezi, Mahivi le Majebuse. 12 Le pasope gore le sa make kwano le batho ba naga yo le yang ga yona, ka taba la gore go ka ba molabo ho ga lune. 13 Mara le wise dialetare tsa bona, le pshyayanye dikholomo tsa bona tsa go hlawolega fote le kupe dikwata tsa bona tsa go hlawolega. 14 Le sa kgotamele medimo ye mengwana, ka gore ye mongwana le ye mongwana wa di tšiba* gore Jehova o nyaka batho ba tineyela ka go felegelela gage. Eya, ke Modimo wa gore o nyaka gore batho ba felegelela mo ba tineyela gage. 15 Le pasope gore le sa make kwano le batho ba naga yone, ka taba la gore mo ba maka bonghwahla le medimo ya bona, fote ba yi makela dihlabelo, ye mongwana o nyoko le mema, fote le nyoko ja ga tso a makiyeng dihlabelo ka tsona. 16 Ke mokane le nyoko fetsa le tseyele barwayi ba lune barwediya ba bona ba bangwana, barwediya ba bona ba nyoko maka bonghwahla le medimo ya bona, fote ba maka gore barwayi ba lune ba make bonghwahla le medimo ya bona.

17 “Le sa make medimo ya go makiwa ka tshipi.

18 “Le make Monyanya wa Dikgwa Tsa go se na Dikomelo. Le nyoko ja dikgwa tsa go se na dikomelo go fo ya ka mokgo ke le butsiyeng ka gona; le fetse kašupa (7) ya matšatši le maka ka mokgo ka nako ya gona ka kgwedi ya Abhibhi,* ka taba la gore le tšwile Egepita ka kgwedi ya Abhibhi.

19 “Barwayi ba lune ba matšibula ke baka, le matšibula ka mokana ga wona ya diphoolwane tsa lune ke yaka, go ka fo ba go le letšibula la kgomu ya phoolo kela la nku. 20 Le lepolle matšibula ya dibhongholo tsa lune ka dinku. Mara mo le sa di lepolle, le robe melala ya tsona. Di nyaka le lepolle letšibula le lengwana le le lengwana la barwayi ba lune. Go sa be le ye a tlang mahlong gaka a lekalekisa matsogo.

21 “Le nyoko fetsa kobodi (6) ya matšatši le bereka, mara ka letšatši la kašupa (7) le nyoko khutsa.* Le nyoko khutsa le mo go le nako ya go lima le ya go buna.

22 “Le nyoko maka Monyanya wa Mabeke ka diyengwa tsa lune tsa gore di butšwiye mathomisong tsa mo le buna korong, le make le Monyanya wa mo go le Nako ya go Fetsa go Buna* mo go fela mongwaga.

23 “Banna ka mokana ga bona di nyaka ba nyarele mahlong ga Jehova Morena wa mannete, Modimo wa Israyele gararo (3) ka mongwaga. 24 Ke nyoko le yeta mahlong ka raka ditšhaba fote ka maka gore poleke ya lune go be ye kgolo, a go na ye a nyoko nabelang naga ya lune mo le ya mahlong ga Jehova Modimo wa lune gararo (3) ka mongwaga.

25 “Le sa leye selo sa go ba le dikomelo mo le neyela madi ya sehlabelo saka. Sehlabelo sa monyanya wa Paseka le sa se yetsedisi go segela ka bošego.

26 “Le leye diyengwa tsa gore di butšwiye mathomisong tso le di bunneng tsa gore ke mong tsona ntlong ya Jehova Modimo wa lune.

“Le sa bidisi seputsanyana ka lebese la mmane wa sona.”

27 Jehova a ya mahlong a bolabola le Moše a re: “O ngwale mantsu yawa, ka gore ke maka kwano nago le Maisrayele ka go dumelelana le mantsu yawa.” 28 O fetsiye 40 ya matšatši le 40 ya mašego a le gana hone le Jehova. Ke mo a sa ji selo fote a sa nwe meetši. Fote hala ga matlapa yala ya dipsyatla, Modimo o ngwadiye mantsu ya kwano ya gore ke Lesome la Melawo.

29 Moše a thewoga hala Thabeng ya Sinayi, ke mo a tshwere matlapa ka mabedi (2) ya dipsyatla ya go ba le lesome (10) la melawo. Mo a thewoga hala thabeng, ke mo a sa di tšibi gore letlalo lage la mo sefahlegong ke mo le gadima ka taba la gore ke mo a bolabola le Modimo. 30 Mo Aroni le Maisrayele ka mokana ga wona ba bona Moše, ke mo ba di bona gore letlalo la sefahlego sage le ya gadima fote ke mo ba tšhaba go šutela thina naye.

31 Moše a ba bitsa, byalo Aroni le dindhuna ka mokana ga tsona tsa mogoba wone ba ya gage ke mokane Moše a bolabola nabo. 32 Ka nthago ga hone, Maisrayele ka mokana ga wona ma šutela thina gage, a ba neya melawo ka mokana ga yona yo Jehova a mo neyyeng yona ku Thabeng ya Sinayi. 33 Mo Moše a fetsa go bolabola nabo, ke mo a tikwala ka llapi mo sefahlegong. 34 Mara mo Moše a ya mahlong ga Jehova gore a bolabole naye, ke mo a tlosa llapi lone go segela a tšwa. Ke mokane ke mo a tšwa fote a botsa Maisrayele tso Modimo a mmutsiyeng tsona. 35 Maisrayele ma di bona gore letlalo la Moše la mo sefahlegong ke mo le gadima; Moše ke mo a tikwala ka llapi lone mo sefahlegong go segela mo a ye bolabola le Modimo.