LENGWALO LA MABEDI LA GO YA GA MAKORENTE

1 Nna Pawulo wa gore ke nna lepostola la Jeso Kreste ka taba la mo Modimo a di nyakiye, le mogageru Thimothi,+ re ngwalela phutego ya Modimo ya Korente borifi byowa, le batho ka mokana ga bona ba go hlawolega bo ba leng Akhaya,+ re re:

2 Nkare Modimo, yene Papa wa rune le Morena Jeso Kreste ba ka le kwela go baba, ba maka gore le bebe.

3 Go thanakiwe Modimo wa gore ke Papa wa Morena wa rune Jeso Kreste,+ wa gore fote ke Papa wa go kwelana go baba+ le Modimo wa go kgomoletsana,+ 4 wa gore o re kgomoletsa ga dilo ka mokana ga tsona tso di re ghulang,+ gore le rune re thogo kgomoletsa ba bangwana+ ga dilo ka mokana ga tsona tso di ba ghulang ka tso Modimo a re kgomoletsang ka tsona.+ 5 Re hlorisa ke dilo tsa go tlala ka taba la gore re malata ya Kreste+ fote ka gore re malata yage, re nyoko kgomoletsiwa ka matla. 6 Byalo mo re gahlana le tsa go re ghula, ke tsona di makang gore le kgomoletsege fote le phone. Mo nkare re ya kgomoletsiwa le lune le nyoko kgomoletsiwa, tsotsone di nyoko maka gore le tiyisele ga tso di le hlupang ka taba la gore le rune re hlupa ke tsa mošaga wonone. 7 Fote re le tshepa re sa kamake gore mo le kgonne go tshepega ga tso le rune di re hlupiyeng, di ra gore le nyoko kgomoletsiwa ka mokgo le rune re yyeng ra kgomoletsiwa ka gona.+

8 Re nyaka gore le di tšibe magageru, tsa gore re hlorisiwwe ga poleke ya Asia.+ Ke mo re kgahleletsegiye re sa kgone selo, fote ke mo re sa tšibi gore re ko pheleng kela byang+ 9 Gabutšibutši re f’lo kwa nkare ba re yahlulele likgu. Mara sosone se makiye gore re sa titshepi, re tshepe Modimo+ wa go tsosa bo ba kgwileng. 10 Modimo o re phonisiye ga likgu fote o sa nyoko re phonisa, re ya tshepa gore o nyoko ya mahlong a kene a re phonisa.+ 11 Le lune le ka re gelepa ka go re rapelela di le baba,+ ka gore mo go rapela batho ba go tlala ba re kgopelela ga Modimo, o nyoko theetsela a boya a re gelepa, ke mokane ba go tlala ba nyoko leboga ka taba la tsotsone.+

12 So re kganyang ka sona ke gore makwalo ya rune ma re hlatsela gabutši gore re yye ra titshwara ka go hlawolega, fote ra tshepela ga Modimo mo re le ho lefaseng, re makiye dilo tsone ka matlamatla mo re na le lune. Mara tsotsone a re ya di maka ka taba la gore re hlalefiye,+ re di makiye ka taba la gore Modimo o re kwele go baba. 13 Ka gore re ngwala dilo tsowa gore le thogo di bala* le go di kwisisa fote ke tshepa gore le ko ya mahlong le di kwisisa gabutši, 14 ba bangwana ba lune le šele le ya di kwisisa fote ba bangwana ba lune le ya tšiba gore ke rune re makang gore le šale le titeya sekguba, le rune re nyoko titeya sekguba ka lune mo go segela letšatši la Morena wa rune Jeso.

15 Byalo a ke kamake ka taba yowa ka gore ke mo ke nyaka go thomisa ka go tla ga lune gore re jabolele go bonana fote,* 16 ka gore ke mo ke nyaka go le vakašela mo ke ya Masedoniya, fote ke fete mone ga lune mo ke boya gore le thogo mfelegetsa Judiya.+ 17 Mo ke polana taba yowa ne ke sa fo bolabola nje, fote ne ke nagana go maka tso di nyakang ke nna, ka go thomisa ke re “eya” ke mokane jikijiki ke re “awwa.” 18 Ka gore Modimo wa tshepega le mantsu ya rune maa tshepega, byalo re ka sa ‘gane’ ra fetsa ra ‘dumela.’ 19 Ka gore Jeso Kreste Morwayi wa Modimo wa gore nna, Silvanase le Thimothi+ re tšhomayele ka yene mone ga lune, a gwa ba “eya” ke mokane a tšhentšha gwa ba “awwa,” “eya” gage go f’lo ba “eya.” 20 Dilo ka mokana ga tsona tso Modimo a di tshepisiyeng di makegiye ka Jeso,+ nka taba lo re hlayang gore “Amene” ka lebitso lage ga Modimo+ gore re thanake Modimo. 21 Modimo ke yene a hlayang gore nna le lune ke rune ba Kreste, fote ke yene a re hlawodiyeng.+ 22 Fote Modimo o re merekiye.+ O re merekiye ka ku tengteng ga dipelo tsa rune ka moya wa go hlawolega,+ moya wone ke wona wo a wo berekisang go re tshepisa tso di sa tlang.

23 Le Modimo taba yowa wa yi tšiba gore a ke ya tla Korente ka taba la gore ke le kwela go baba. 24 A yi gore re nyaka go lawola tumelo ya lune,+ re fo ba re berekisana le lune gore le thogo jabola, ka taba la gore le tiyelele ga so le se dumelang.

2 Ke fetsiye le monagano waka gore a ke nyake go le kgongwetsa mo ke tla mone ga lune. 2 Ka gore mo nka le kgongwetsa, nna ke nyoko kgomoletsa ke mang mo ke sa kgomoletse ke lune ba gore nko ba ke le kgongwetsiye? 3 Tso ke di ngwadiyeng, ke di ngwalele gore mo ke tla mone ga lune, ke sa segele ke kgongwetsa ke bo ne ke tshwanele ke jabole nabo ka gore ke ya tshepa gore tso di makang gore ke jabole ke tsona di makang gore le lune le jabole. 4 Ke le ngwalele borifi byola ke le teng ga motšhatšhamelo ke kwa go baba ka ho pelong fote ke lla mara ne ke sa ngwalele gore ke le kwise go baba,+ ke mo ke fo nyaka gore le di tšibeneng tsa gore ke le nyaka ka matla.

5 Mo nkare go na le ye a le kwisiyeng go baba+ ka taba la dilo tsa go befa tso a di makiyeng, aa kwatisa nna mara o kwatisiye lune. Le ntshwareleneng mo nkare ke bolabola ke sa jikajiki. 6 Motho yene o šele a wolodiwwe; 7 byalo di nyaka le mo tshwarele fote le mo kgomoletse+ gore a sa kgongwele ka matla.+ 8 Byalo ke kgopela gore le šupetseneng motho yene gore le mo nyaka ka matla.+ 9 Nka taba lo ke le ngwaleleng borifi byowa gore ke thogo bona gore ayitsano le ya theetsela ga dilo ka mokana ga tsona. 10 Mo nkare le tshwarele motho ye mongwana le ye mongwana ga tso a le sinyeleng tsona, le nna ke nyoko maka ka mokgonone, gabutšibutši selo se sengwana le se sengwana so ke le tshwareleng ga sona (mo nkare se gona) le Kreste o di bonne gore ke le tshwarele. 11 Gore Sathane a sa re woke+ ka taba la gore re tšiba mathayithayi yage.+

12 Byalo mo ke segela Terowa+ gore ke tšhomayele ditaba tsa go bafala ka Kreste fote ke thulegela ke lešuba mo ga mmereko wa Morena, 13 ke f’lo kwa ke sa jabola mo ke kraya bhuti waka Titosi+ a se šiyo. Byalo ke f’lo ba layela ke mokane ka ya Masedoniya.+

14 Mara re leboga Modimo wa go dula a re yetetsa re na le Kreste go tshwana le mo a yetetsa masole mo ma hludiye ntweng, o maka gore re botse batho ba dipoleke ka mokana ga tsona ka yene, tsotsone di tshwana le selo sa go nkgela. 15 Ga Modimo re tshwana le selo sa go nkgela mo re kene re tšhomayela ka Kreste ga batho ba gore ba nyoko phonisiwa le ga bo ba gore go nyoko fela ka bona. 16 Ga bo ba gore go nyoko fela ka bona, selo sowa sa go nkgela, se nkga likgu+ ga bona fote se nyoko ba bolaya mara bo ba gore ba nyoko phona, selo sowa se nkgela lephelo ga bona fote se nyoko ba phidisa. Byalo ke mang wa gore yene dilo tsowa di mo tshwanela gabutši? 17 Rune di ya re tshwanela ka taba la gore a re rekisi lentsu la Modimo+ go tshwana le ba go tlala. Mara mo re tšhomayela, re tšhomayela dilo tsa nnete, fote ke rune malata ya Kreste ya gore Modimo o ma hlawodiye gore re make mmereko wage fote re nyoko yahlula ke yene.

3 Nje di nyaka re titšibise ga lune? Kela le nyaka marifi ya go hlatolla gore ke rune bomang? 2 Lune ke setšha le le marifi yane,+ ya gore ma ngwadiwwe ka dipelong tsa rune, batho ka mokana ga bona baa ma tšiba fote baa ma bala. 3 Ka taba la gore le šupetsiye gore ke lune borifi bya Kreste bya gore bo ngwadiye ke rune malata ya Modimo,+ a bya ngwadiwa ka inki mara bo ngwadiwwe ka moya wa Modimo wa go phela fote a bya ngwadiwa matlapeng+ mara bo ngwadiwwe ka ho dipelong.+

4 Re tshepa re tiyye gore di ya re tshwanela go ba malata ya Modimo ka Kreste. 5 Mara a di rele gore tsowa ka mokana ga tsona re di makiye ka matšhika ya rune, re di makiye ka matšhika ya Modimo.+ 6 Ke yene a makiyeng gore di re tshwanele tsa go ba malata ya kwano yowa ya nyuwane,+ re sa be malata ya Molawo,+ mara re be malata ya moya wa go hlawolega, ka taba la gore Molawo wo yahlula batho gore ba kgwe+ mara moya wa go hlawolega wona wa ba phidisa.+

7 Go tokegela gana hone, Molawo wa gore ke mo wo leya likgu, wa gore ba wo ngwadiye letlapeng+ ke mo wo gadima ka matla tsa gore le barwayi ba Israyele ke mo ba sa kgone go lebelela Moše mo sefahlegong, ka taba la gore ke mo a gadima ka matla,+ mara tsotsone ke mo di nyoko fela. 8 Byalo mo nkare tso Molawo wo kgonneng go di segelela di gabutši di ra gore tso moya wa go hlawolega+ wo di segeleleng di gabutši ka matla,+ 9 mara mo nkare Molawo wa go yahlulela likgu+ ne wo le gabutši,+ di ra gore tso moya wo di makang tsa go gelepa batho gore ba loke di gabutši ka matla.+ 10 Gabutšibutši Molawo ne wo le gabutši mara gana byalo wo phala ke kwano ya nyuwane.+ 11 Mo nkare sowa sa gore ne se nyoko fela ke mo se le gabutši,+ di rela gore sowa sa gore se šele, se gabutši ka matla!+

12 Re bolabola re sa tšhabe selo, ka taba la tso re di tshepang.+ 13 Re sa make go tshwana le Moše wa gore o yye a tikwala ka llapi mo sefahlegong,+ gore Maisrayele ma sa boni tso ne di nyoko segelela ke molawo tsa gore fote ne go nyoko fela ka tsona. 14 Mara ke mo ba sa kgone go di kwisisa gabutši+ fote le lekgono lowa ba sa na ba kwadiye ke llapi lela mo go badiwa molawo wa kwano ya botala+ ka taba la gore Kreste ke yene a ka ba gelepang go tlosa llapi lone+ 15 fote llapi lela le sa f’lo ba kwala,+ le gana byalo lowa a ba kgone go kwisisa tso di ngwadiyeng ke Moše.+ 16 Mara llapi lela le ya tloga mo motho a sokologa a boyela ga Jehova.*+ 17 Jehova* ke Moya+ fote batho bo ba nang le moya wa Jehova* ba lokologiye.+ 18 Fote rune ka mokana ga rune re tshwana le diboki tsa go šupetsa gore Jehova* wa gadima. Modimo o re tšhentšhiye gore re tshwane naye fote re nape re šupetsa ka matla gore yene wa gadima, ka mokgo yene mong Jehova* wa gore aa bonale a di nyakang.+

4 Byalo a re lahle tewu mo re tšhomayela ka taba la gore Modimo o re kwele go baba. 2 A re sa maka dilo tsa go tšebisa ka makhukhung, re tšhutisa dilo tsa gore di ka lentsung la Modimo+ fote re maka gore batho ba bone nnete, mo re maka ka mokgonone a re phiriketsi makwalo ya batho mahlong ga Modimo.+ 3 Mo nkare ditaba tsowa tsa go bafala tso re di sabalatsang di wutamme, di wutamele bo ba gore go nyoko fela ka bona, 4 ba gore modimo wa lefase lowa+ o ba kwadiye menagano+ gore ba sa bone go khanya ga ditaba tsa go bafala ka Kreste, wa gore ke setshwano sa Modimo+ le gore di sa ba gadimele.+ 5 Ka gore a re tšhomayele ka rune mara re tšhomayela ka Kreste Jeso gore ke Morena fote rune re malata ka taba la Jeso. 6 Ka gore Modimo ke yene a hlayyeng gore: “Go nyakega gore go khanye letshwifing,”+ o khanyisele dipelo+ tsa rune gore batho ba mo tšibe a berekisa Kreste.

7 Fote mmereko wo re wo tshwereng ke wa go hlawolega mara rune re fo tshwana le ditša tsa botsopa+ tsa gore di na le makolwane,+ gore di thogo šupetsa gore matšhika yawa ya gore a maa tlwayelega a yi ya rune mara ma tšwa ga Modimo.+ 8 Go na le dilo tsa go tlala tsa go re kgahleletsa mara a yi gore di re šitisa go wona, ka nako ye nngwana o kraya re sa tšibi gore re make byang mara re dula re kraya polane.+ 9 Batho baa re hlorisa mara Modimo aa re lahle.+ Re kgongwetsa ke dilo tsa go tlala mara a re kgwe.+ 10 Go gongwana le go gongwana mo re yang, re fo dula re le kotsing ya go bolayiwa go tshwana le Jeso, tsotsone di maka gore batho ba thogo di bona gore re hlorisiwa go tshwana le Jeso.+ 11 Ka gore rune ba gore re ya phela re dula re libanne le likgu ka taba la Jeso,+ tsotsone di šupetsa batho gore re hlorisiwa go tshwana le Jeso. 12 Le mo ho ga rune go le likgu mara ga lune ke lephelo.

13 Go ngwadiwwe gore: “Ke ya bolabola ka taba la gore ke na le tumelo.”+ Byalo le rune re šupetsiye gore re na le tumelo, nka taba lo re bolabolang. 14 Re ya di tšiba tsa gore Ye a tsusiyeng Jeso le rune o nyoko re tsosa ka mokgo a tsusiyeng Jeso fote a re yamogela re le naye.+ 15 Dilo tsowa ka mokana ga tsona di makegiye gore di thogo gelepa lune gore Modimo a kwele batho ba go tlala go baba, tsotsone di nyoko maka gore batho ba go tlala ba leboge Modimo fote ba mo gadimise.+

16 Byalo re ka sa lahle tewu le mo mmele wa rune wo tsofala, mara menagano ya rune le dipelo tsa rune di kraya matšhika ya nyuwane letšatši le lengwana le le lengwana. 17 Le mo dilo tso di re hlorisang di sa tseyi nako fote di sa robe, ke tsa go maka gore re tle re rufiwe ka matla le go ya go yye.+ 18 A re nyake go nagana ka dilo tsa gore re kgona go di bona mara re nyaka go nagana ka dilo tsa gore a re kgone go di bona,+ ka taba la gore dilo tsowa tsa gore re kgona go di bona di ya feta mara tso tsa gore a re kgone go di bona ke tsa go ya go yye.

5 Re ya di tšiba gore mo nkare ntlo ya rune ya mo lefaseng yi nyoko rutlumuluga,+ Modimo o nyoko re neya ntlo ya go ya go yye ku legedimong ya gore a ya yagiwa ka matsogo.+ 2 Ga ntlo yowa ya ho lefaseng re ya tsitla. Gabutšibutši re nabela go kena ga ntlo ya rune ya ku legedimong, ya gore yi nyoko re yapesa go tshwana le dikobo.+ 3 Gore mo go segela nako ya gore re yi yapare, re sa tikraye re sa tšwara. 4 Gabutšibutši, rune ba gore re ga ntlo yowa re ya tsitla fote re ya hlupega, ka gore a re nyake go šiya ntlo yowa tsa nkare re yapola dikobo mara ka gore re nyaka go kena ga ntlo ya ku legedimong+ re ya wo yapola gore sekaleng sa mmele wowa wa go kgwa go kene lephelo la go ya go yye.+ 5 Byalo Modimo ke yene a re makeleng dilo tsowa+ fote o re neyye moya wa go hlawolega gore re fo tšwa re tshwarelele ga wona solanka re sa yemele tso di sa nyoko tlang.+

6 Byalo re tshepa re sa kamake gore mo re sa na le mmele wowa wa nkare ke ntlo re sa le kgole le Modimo+ 7 ka gore re yetetsa ke tumelo, a re yetetse ke dilo tso re di bonang ka maahlo. 8 Re di tshepa re sa kamake fote re nyoko jabola mo re šiya mmele wowa wa rune wa nkare ke ntlo ke mokane re ye dula ntlong ya rune le Morena.+ 9 Go gongwana le go gongwana mo re leng gona kela re dula naye kela re duli kgole naye re nyoko fo ya mahlong re karakara gore a re yamogele. 10 Ka gore ka mokana ga rune re tshwanele gore re yeme mahlong ga setulo sa Kreste sa go yahlula gore ye mongwana le ye mongwana a yahludiwe go ya ka tso a di makiyeng mo a sa na le mmele wa ho lefaseng di ya ka gore o makiye tsa go loka kela tsa go befa.+

11 Byalo ka gore rune re tšiba Modimo, re ya mahlong re hlohletsela batho gore ba make se sengwana mo re kene re ba tšhutisa mara rune Modimo o re tšiba gabutši fote re tshepa gore le lune le ya di bona gore ke rune batho ba mošaga mang. 12 A yi gore re titeya sekguba mo re le ho mahlong ga lune, re fo ba re nyaka go le hlohletsela gore le titeye sekguba ka rune gore le thogo fetola batho bo ba titeyang sekguba ka tso ba di bonang ka maahlo+ mara ba sa kgone go bona sa ka pelong. 13 Mo nkare re makiye dilo tsa nkare ke rune batho ba go hlanya,+ re di makiye ka taba la Modimo mara mo nkare re makiye dilo tsa go šupetsa gore a re hlanye, re di makele lune. 14 Ka taba la gore Kreste o šupetsiye gore o re nyaka ka matla, tsotsone di makiye gore re fetse ka gore motho ka wwoši o kgwele ba go tlala+ byalo ka mokana ga bona ba kgwile. 15 Fote Kreste o kgwile gore batho ka mokana ga bona ba gore baa phela ba sa sa tiphelela+ mara ba phelele yene wa gore o ba kgwele a boya a tsoga.

16 Byalo go tlugisela gana byalo a re sa yahlula motho go ya ka so re se bonang.+ Le mo nkare ga Kreste ke mo re mo tseya go ya ka mokgo re mmonang, a re sa mo lebelela ka mokgonone.+ 17 Byalo mo motho go šele go le selo ka ssoši le Kreste ke setšha a makiwwe ka bonyuwane,+ dilo tsa botala di fitiye, byalo go šele go na le tsa nyuwane. 18 Dilo ka mokana ga tsona di tšwa ga Modimo byalo Modimo o berekisiye Kreste+ gore re thogo ba le senghana naye fote o re neyye mmereko wa go gelepa batho gore le bona ba be le senghana naye.+ 19 Tsowa di rela gore Modimo o berekisa Kreste gore a gelepe batho gore ba boyele gage,+ a boya a ba tshwarela ga tso ba di sinnyeng+ fote o re neyye mmereko wa go botsa batho ditaba tsone.+

20 Byalo rune ke rune sekwata+ sa go yemela Kreste sekala,+ tsa nkare Modimo ke mo a berekisa rune go bitsa batho. Byalo rune ba gore ke rune sekwata sa go yemela Kreste sekala, re kgopela batho re re: “Boyelaneng ga Modimo.” 21 Kreste aa sinya+ mara Modimo o neyele ka yene gore a re kgwele ga tso re di sinnyeng gore Modimo a thogo re tseya re lukiye.+

6 Byalo ka gore re berekisana le Modimo,+ re kgopela gore mo Modimo a le kwela go baba le sa make dilo tsa go šupetsa gore a le yisi felo ka taba ya gore Modimo o le kwele go baba.+ 2 Ka gore o re: “Ke le kwile ka nako ya gona fote ke le gelepiye ka letšatši la go phonisa.”+ Gana byalo ke nako ya gabutši fote ke lona letšatši la gore ke le phonise.

3 A re nyake go phiriketsa motho, gore ba sa sole mmereko wa rune wa go tšhomayela.+ 4 Byalo re tišupetsa re le malata ya Modimo.+ Re tiyisela ga dilo tsa go tlala tsa go tshwana le mehlupego, dilo tsa go re kwisa go baba, tsa go re phiriketsa,+ 5 go teyiwa, go hlahlediwa jele,+ go sa tshwariwi gabutši, go bereka go baba, ke mo re sa yetsele mašego ya mangwana fote re bolaya ke tlala.+ 6 Re šupetsa gore re malata ya Modimo ka go ba le maphelelo ya go yela, ka mokgo re phelang re šupetsa gore re tšiba nnete, re lefisiye pelo,+ re na le dipelo tsa go bafala,+ re lisetsa moya wa go hlawolega gore wo re yetetse, a re timakisi mo re re re ya nyakanana,+ 7 a re bolabole matsaka, re tikokotlela ka matšhika ya Modimo,+ ka letsogong la rune la go ja le la mpata re tshwere dilo tsa go loka+ tsa go lwa ka tsona, 8 re ya gadimisiwa fote a re hlompiwi, baa re yahlula fote baa re thanaka, batho ba tseya gore re na le matsaka mara re bolabola nnete. 9 A re tšibege mara Modimo wa re tšiba, nkare re šele re kgwile mara re ya phela,+ baa re teya mara a ba re bolaye.+ 10 Batho ba nagana gore re kgongwele mara rune re jabodiye, ba nagana gore re hlupegiye mara re neya batho ba go tlala dilo tsa gabutši fote ba nagana gore a re na selo mara re na le dilo ka moka.+

11 Magageru ya Korente, re bolabola le lune re sa jikajiki fote re le nyaka ka matla. 12 Rune re le nyaka ka matla magageru+ mara lune a le re nyake. 13 Byalo mo ke le fetola ke bolabola le lune tsa nkare ke lune bana baka, ke re le lune le re nyake ka matla.+

14 Le sa tigahlanisi* le batho ba gore a ba dumele ga Modimo+ ka gore motho wa go loka a ka sa nghanelane le motho wa gore aa loka+ fote go khanya le letshwifi a di gahlane.+ 15 Go tokegela gana hone, ayitsano Kreste le Bhelayele*+ baa berekisana? Nje motho wa gore o dumela ga Modimo le wa gore aa dumele ga Modimo baa tshwana?+ 16 Tempele ya Modimo yi gahlana kaye le medimo ya dithombhe?+ Rune re tshwana le tempele ya Modimo wa go phela,+ go fo tshwana le ka mokgo Modimo a hlayyeng gore: “Ke nyoko ba nabo,+ ke nyoko sepela nabo, ke nyoko ba Modimo wa bona fote bona go nyoko ba batho baka.”+ 17 Jehova* o re: “‘Byalo tšwanneng hone gare ga bona le sa nghanelane nabo,’ ‘le lisetse go tshwara dilo tsa dithila,’”+ “‘ke mokane nna ke nyoko le yamogela.’”+ 18 Fote Jehova* wa Matšhika ka Moka o yitseri: “‘Ke nyoko ba papa wa lune+ ke mokane lune le nyoko ba barwayi le barwediya baka.’”+

7 Byalo lune magageru ya gore re ma nyaka ka matla, ka taba la gore re tshepisiwwe dilo tsowa+ tla re hlapeneng dithila ka mokana ga tsona tsa ho mmeleng le ho monaganong,+ re ye mahlong re kene re le ba go hlawolega fote re hlompa Modimo.

2 Le re yamogeleneng.+ A re ya sinyela motho, a re ya ntsha motho tseleng fote a re ya hlalefetsa motho.+ 3 A yi gore ke ya le yahlula, ka gore a yi botala ke le butsiye gore re le nyaka ka matla. 4 Ke bolabola le lune ke sa tšhabe selo ke titeya sekguba ka lune fote le ya nkgomoletsa, ke jabola ka matla mo re hlorisiwa.+

5 Gabutšibutši nakwela re segela Masedoniya,+ mmele wa rune ke mo wo tinnwe mara re f’lo ya mahlong re kene re hlupa ke dilo tsa go tlala. Mo ka mo tawong ga phutego go lwiwa, ka mo phutegong le gona ke mo re tšhugiye. 6 Mara Modimo wa gore o kgomoletsa batho ba gore ba kgongwele,+ o re kgomoletsiye a berekisa Titosi, 7 ka taba la gore le mo kgomoletsiye, le rune o re kgomoletsiye fote o tlile a mpotsa gore lune le nhlologele, le kwa go baba ka matla le gore le hlupega ka nna le sa timakisi, ke mokane ka napa ke jabola ka matla.

8 Le mo nkare ke makiye gore le kgongwele ka tso ke di ngwadiyeng ga borifi byaka,+ a ke tisole. Le mo nkare ne ke tisola mathomisong (ka gore ke di bonne gore borifi byowa bo makiye gore le kgongwele, mara tsa senakonyana). 9 A ke jabodisi ke gore ke le kwisiye go baba, ke jabodisa ke gore le sokologiye, go kgongwela ga lune go makiye gore le make tso Modimo a di nyakang, ke tsona di makiyeng gore tso ke di hlayyeng di sa le kwaletse. 10 Go kgongwela ka mokgonone go maka gore motho a sokologe ke mokane a phone fote a sa tisole+ mara go kgongwela ga lefase go maka gore motho a kgwe. 11 Di fo ba lekgwaying gore le mo le kene le kgongwele le yye mahlong le maka tso Modimo a di nyakang, sosone se makiye gore le karakare ka matla fote le hlatswiye mabitso ya lune, ke mo le kwatiye ka taba la dilo tsa go sa loka tso ba di makiyeng, le hlompiye Modimo, ne le nyaka go sokologa fote le berekele Modimo ka dipelo tsa lune ka moka, le lukisiye dilo tsa go sa loka tso ba di sinnyeng,+ le makiye dilo ka mokana ga tsona gabutši gore le lukise taba yowa. 12 Mo ke le ngwalela borifi byowa, ke mo ke sa ngwalele motho wa gore o sinnye+ kela wa gore ba mo sinyele, mara ke mo ke ngwala ke fo nyaka go bona gore ayitsano le nyoko tišupetsa mahlong ga Modimo gore le nyoko re theetsela kela byang. 13 Nka taba lo le rune le yyeng la re kgomoletsa.

Mara go tokegela gana hone re jabola ka matla ka gore le kgonne go tiyisa Titosi. 14 Ka gore dilo ka moka tso ne re le botsa tsona ke mo go fo ba nnete, ke mo ke sa tšebi mo ke mo kganyisela ka lune ka gore dilo tso ke mo go fo ba nnete. 15 Mo Titosi a bolabola ka go theetsela ga lune le ka mokgo le mo yamogeleng ka gona le kene le mo hlompa,+ di napa di šupetsa gore o le nyaka ka matla. 16 Ke le tshepa ke sa kamake* gore le nyoko maka dilo ka mokana ga tsona gabutši, tsotsone di maka gore ke jabole.

8 Magageru, re nyaka gore le di tšibe tsa gore Modimo o yye a kwela diphutego tsa Masedoniya go baba.+ 2 Ka nakwela ba libanne le go hlupegisiwa fote ba ba liketsa tumelo, ba f’lo ya mahlong ba jabodiye fote le mo ba kene ba hlupega ke mo ba neyana dilo ba sa kokole, tsotsone ke mo di šupetsa gore a ba konane. 3 Ke mo ba neyana ka matla tsa gore ka nako ye nngwana ke mo ba neya+ le go feta ka mokgo ba ka kgonang.+ Nna ke di bonne. 4 Ba re kgopele ba sa fetsi gore re ba lisetse ba ye mahlong ba neyela ka tso ba nang natso, gore le bona ba tšhele letsogo ga mmereko wa go gelepa bo ba go hlawolega.+ 5 Ba makiye dilo tso ne re sa nagane gore ba ka di maka, ke mo ba berekela Morena ka dipelo tsa bona ka moka fote ba re gelepiye ka mokgo Modimo a nyakang. Ba tineyele ka dipelo tsa bona ka moka ga mmereko wowa wa Morena. 6 Re hlohletsele Titosi+ gore ka gore ke yene ye a thommeng mmereko wowa ho gare ga lune, di nyaka a ye mahlong ka go koleka dilo tso le neyelang ka tsona. 7 Dilo di le sepelela gabutši, tumelo ya lune yi tiyelele, le thogo beya ditaba gabutši fote le tšiba dilo tsa go tlala. Ga dilo ka mokana ga tsona tso le di makang le ya karakara, fote batho ba bangwana le ba nyaka tsa mannete ka gore le rune re le nyaka ka matla. Byalo nkare le ka ya mahlong le neyana dilo tsa gabutši.+

8 A ke le botse dilo tsowa gore ke le beyele molawo, ke fo ba ke nyaka gore le bone gore batho ba bangwana baa karakara. Fote ke nyaka go bona gore ayitsano le nyakanana tsa mannete. 9 Byalo le ya di tšiba gore Morena Jeso Kreste o šupetsiye gore o re kwela go baba, ke mo a na le dilo ka mokana ga tsona mara o yye a hlupega ka taba la lune+ gore le thogo ba le dilo ka mokana ga tsona.

10 Nna ke nagana+ gore mo le maka mmereko wowa di gelepa lune ka taba la gore le wo thomme mongwaga wa go fela la boya la šupetsa gore le di nyaka ka matla go wo maka. 11 Byalo fetsaneng tso le di thommeng, ka mokgonone le nyoko fetsa tso le di thommeng ka tso le nang natso ka gore tsotsone ne le kene le nabela go di maka mathomisong. 12 Mo motho a neyela ka pelo yage ka moka, Modimo wa di yamogela ka taba la gore Modimo aa nyake gore motho a neyele ka tsa gore a ka sa di kgone, mara o nyaka gore a neyele ka tso a di kgonang,+ 13 a ke nyake gore ga ba bangwana di be lula mara ga lune di robe. 14 Lune le gelepeneng bo ba gore a ba na selo ka tso le nang natso fote le bona ba le gelepe ka tso ba nang natso gore le thogo tshwarisana. 15 Go tshwana le ka mokgo go ngwadiwweng gore: “Motho wa gore o na le dilo tsa go tlala di sa nape di tlala ka matla, le wa gore o na le tse dinyana di sa nape di pomega.”+

16 Byalo re leboga Modimo gore Titosi o hlupega ka lune go fo tshwana le mo le rune re hlupega ka lune.+ 17 O makiye tso re mmutsiyeng tsona mara le yene ke mo a nyaka go maka ka mokgonone, o titlela ka boyene mong. 18 Mara re mo romela hone ga lune le mogageru yela wa gore ba mmolabola gabutši ga diphutego ka mokana ga tsona ka taba la go tšhomayela ditaba tsa go bafala. 19 Fote a yi tsona fela, mara diphutego di mo hlawodiye gore a sepele le rune gore a re gelepe mo re tsama re neya magageru dilo tso le ba kolekeleng tsona. Re tsama re ba neya dilo tsowa gore go thanakiwe Morena. Mo re maka ka mokgonone, re nyoko ba re šupetsa gore re tikemisele go gelepa ba bangwana. 20 Byalo, a re nyake gore go be le motho ye a re solang ga mmereko wowa wa go tsama re neya magageru dilo tsowa.+ 21 Ka gore ‘re maka dilo gabutši ka go tshepega mahlong ga Jehova* le mahlong ga batho.’+

22 Go tokegela gana hone, re ba romela le mogageru ye mongwana wa gore re di bonne gabutši gore wa karakara ga dilo ka mokana ga tsona tso a di makang fote gana byalo o nyoko ro napa a karakara go phala mone, ka taba la gore wa di tšiba tsa gore le nyoko maka tso re le butsiyeng tsona. 23 Mara mo nkare go na le ye a butsisang ka Titosi, le mmotseneng gore ke monghanaka fote o berekisana le nna gore re le gelepe. Fote mo nkare go na le ye a butsisang ka magageru yawa, le mmotseneng gore ke mapostola ya diphutego fote ba gadimisa Kreste. 24 Byalo le tišupetseneng gore le ba nyaka ka matla+ fote le make gore diphutego di bone gore ke ntaba re titeya sekguba ka lune.

9 Byalo a di nyake gore ke šinye ke le ngwalele ka mmereko wa bo ba go hlawolega.+ 2 Ke ya di tšiba gore tsa go gelepa le ya di nyaka, a ke fetsi go botsa batho ba Masedoniya ka lune. Ke ba butsiye gore lune ba Akhaya le šele le na le mongwaga le tikemisele go gelepa. Byalo ka taba la gore tsa go gelepa le ro di nyaka, ba bangwana le bona ba kwa ba di nyaka. 3 Mara ke romela magageru yawa gore ma tle ma di bone gore tso ne re di bolabola ka lune re re le kwana le go gelepa a yi matsaka, 4 ka gore mo magageru ya Masedoniya ma ka tla mowa ma kraya go se ka mokgo re hlayyeng gore lune le nyaka go gelepa, di nyoko re tšebisa. Fote lune di nyoko napa di le tšebisa ka matla. 5 Ke bonne di le gabutši go hlohletsela magageru yawa gore ma re yete mahlong ma tle mone ga lune, gore re tle re lukise taba ya meneyelo ya lune gore mo re segela re kraye dilo di dudisegiye fote di thogo bonala gore a re ya le gapeletsa mara le ro di nyaka.

6 Taba yowa yi ka mokgo: Mo motho a gaša dilo tse dinyana o nyoko buna tse dinyana, mara mo a gaša dilo tsa go tlala o nyoko buna tsa go tlala.+ 7 Ye mongwana le ye mongwana a make ka mokgo a fetsiyeng le pelo yage, a sa kokole mo a neyela fote a sa tšhofe ke motho,+ ka taba la gore Modimo o kwana le motho wa go neyela a jabodiye.+

8 Go tokegela gana hone, Modimo aa šitege go le šupetsa gore o le kwela go baba, gore le sa gayele selo ga tso le di nyakang fote le be le tsa go tlala tsa go le gelepa go maka mmereko wa gabutši.+ 9 (go ya ka mokgo go ngwadiwweng gore: “O neyanne tso a nang natso a sa konane; o neyye bo ba go tihlupegela. Go loka gage go ya mahlong go ya go yye.”+ 10 Byalo Modimo wa gore ke yene ye a neyang motho wa go gaša pewu a boya a mo neya le tsa go ja, o nyoko le neya pewu ya go tlala gore le yi gaše a boya a maka gore le bune tsa go tlala ga dilo tsa go loka tso le di makang.) 11 Modimo o le rufiye ka matla gore le lune le neyane dilo le sa konane, ke mokane batho ba nyoko leboga Modimo ka taba la dilo tso le ba neyyeng tsona. 12 Mmereko wowa wa go gelepa ba bangwana ka tso ba di gayelang a yi wa go gelepa magageru ma le ntoši,+ re gelepa batho ka mokana ga bona gore ba thogo leboga Modimo ka tso a ba makelang tsona. 13 Batho ba nyoko bona ka tso le di makiyeng gore le batho ba mošaga mang fote tsotsone di nyoko maka gore ba thanake Modimo. Ka taba la gore maphelelo ya lune ma sipidisana le ditaba tsa go bafala ka Kreste tsa gore le di sabalatsiye, le ka gore ka mokana ga bona le ba neyye dilo tsa go tlala.+ 14 Fote ba le šupetsa gore ba le nyaka ka matla ka go le rapelela di ba baba ga Modimo, ka gore Modimo o le šupetsiye gore o le kwela go baba.

15 Tla re lebogeneng Modimo ka taba la so a re neyyeng sona mahala.

10 Byalo nna Pawulo, ke kgopela gore le make dilo tso ke le botsang tsona. Ka mokgo ke bolabodisanang le lune ka gona, ke kopisela ga Kreste wa gore o tinyanafatsiye fote o na le pelo ya go bafala.+ Mara ba bangwana hone gare ga lune ba re nna ke tiyele go beya ditaba tsaka ke sa jikajiki mo ke le ngwalela marifi,+ mara mo ke le mone gare ga lune ke na le boyi.+ 2 Ke tshepa gore mo ke tla mone ga lune a di nyake ke tle ke wololane le batho bo ba gore ba tseya nkare rune re titshwere go tshwana le batho ba gore a ba tšibi Modimo. 3 Le mo re phela go tshwana le batho ba bangwana, a re lwe dintwa tsa rune go tshwana le batho ba gore a ba tšibi Modimo. 4 A re lwe go tshwana le ka mokgo masole ma lwang ka gona,+ mara tso Modimo+ a re neyyeng tsona di na le matšhika ya go wisa dilo tsa gore di tsikiye. 5 Re phigisana le dilo tso batho ba di tšhutisang tsa matsaka le tsa go maka gore ba sa tšibi Modimo+ fote se sengwana le se sengwana so batho ba se naganang ke setšha re maka gore se sipidisane le so Kreste a se naganang, 6 fote mo le šupetsa gore le šele le ya theetsela, re nyoko wolola ye mongwana le ye mongwana wa gore aa theetsele.+

7 Lune le yahlula selo go ya ka mokgo le se bonang. Mo nkare go na le ye a titshepang gore yene ke yene wa Kreste a sa libale gore le rune ke rune ba Kreste. 8 Le mo nka kganya ka matšhika yawa ya gore Morena o re neyye wona, ya gore ke tiyise tumelo ya lune fote ke sa le kwaletse,+ nka sa tšebe. 9 A ke nyake le tseya nkare ke mo ke le tshosetsa mo ke le ngwalela marifi yala. 10 Ka gore ba re: “Tso a di ngwalang ho marifing di ya ba tikisa, fote di ba tšhofa gore ba make se sengwana mara mo a le gare ga bona o fo ba lephephe, fote aa di tšibi tsa go bolabola.” 11 Motho yene a di tšibe tsa gore dilo tso re di ngwalang mo marifing, re nyoko di maka le mo re le hone.+ 12 A re nyake go tipala le bo ba gore baa tipotsa, ba gore bona beng baa tiyahlula+ ka tso ba bonang gore di lukiye. Tsotsone di šupetsa gabutši gore a ba kwisisi.+

13 Re ka sa kganye ka dilo tsa gore a re ya di maka mara re nyoko kganya ka mmereko wo Modimo a re neyyeng wona, gana hone go kena le taba ya gore re tšhomayele hone ga lune.+ 14 Mo re tla hone ga lune re makiye tso Modimo a re rommeng gore re di make fote ke rune ba mathomo ba go le tšhomayelela ditaba tsa go bafala ka Kreste.+ 15 A re titeyi sekguba ka go tšhomayela ga poleke ya gore go šele go tšhomayele ba bangwana mara re tshepa gore mo tumelo ya lune yi kene yi ya mahlong yi tiyelela, le mmereko wa rune wo nyoko ya mahlong wo gola. Byalo re nyoko maka tsa go phala tso re di makiyeng mathomisong, 16 gore re thogo sabalatsa ditaba tsa go bafala ga dipoleke tsa gore di ku kgole le lune ke mokane re sa kganye ka poleke ya gore go tšhomayele batho ba bangwana. 17 Mara “ye a kganyang, a kganye ka Jehova.”*+ 18 Jehova* aa yamogele motho wa gore o titeya sekguba,+ yene mong ke yene a kgetang gore o yamogela mang.+

11 Le mo di šupetsa nkare a ke ya hlalefa, le fo nlefisela pelo. Mara gabutšibutši le kene le nlefisele pelo. 2 A ke nyake go kwa selo ka lune go fo tshwana le mo Modimo a sa nyake go kwa selo ka lune, ka gore ke le tshepisiye gore le nyoko tseya ke monna ka wwoši, yene Kreste fote ke nyaka gore le tineyele gage go tshwana le kgareba.+ 3 Mara ke ya tšhoga gore menagano ya lune yi ka sinyega wa kraya le nagana dilo tsa go sa yela tsa gore a di sipidisane le Kreste,+ go tshwana le ka mokgo noga yi wokiyeng Efa ka mathayithayi ya yona.+ 4 Ke hlaya dilo tsowa ka taba la gore mo go tla motho ye mongwana a tšhomayela dilo tsa go sa tshwane le tso Pawulo ne a di tšhutisa ka Jeso, kela wa go le kutšetsela ka dilo tsa go sa yelane le moya wa Modimo, kela a sa tle ka ditaba tsa go bafala tso le di yamogeleng+ le mo lefisela pelo, 5 ka gore ke ya di bona tsa gore a se šiyo so se napang se šupetsa gore mapostola ya lune ya go tseya nkare ma lukiye maa mphala.+ 6 Le mo nkare a ke di kgone tsa go bolabola,+ Modimo yene ke ya mo tšiba. Tsotsone le di bonne gabutši ga dilo ka mokana ga tsona tso ne re di maka.

7 Kela ke sinnye ka go tinyanafatsa mo ke tšhomayela ditaba tsa go bafala ke jabodiye fote ke sa le patedisi gore go hlompiwe lune?+ 8 Diphutego tse dingwana di n’gelepiye, di fo tshwana le mo ke ba tsotsiye gore ke tle ke gelepe lune.+ 9 Nakwela ke na le lune ne ke gayela tse dingwana mara ke mo ke sa nyake go ba morwalo ga lune ka taba la gore magageru ya go tšwa Masedoniya ma n’gelepiye ka tsa go tlala tso ne ke di gayela.+ Byalo ke makiye so nka se kgonang gore ke sa be morwalo ho ga lune fote ke ya mahlong ke maka ka mokgonone.+ 10 Solanka ke sa latelela Kreste, nka sa lisetsi go titeya sekguba+ ka dipoleke tsa Akhaya. 11 Byalo ke nyoko re ke ntaba ke sa yamogela dilo tsa go tšwa ga lune? Nje nka taba la gore a ke le nyake? Modimo wa di tšiba tsa gore ke le nyaka ka matla.

12 Go na le ba bangwana ba go kganya ka gore ke bona mapostola go tshwana le rune ke nyoko fo ya mahlong ke maka so ke se makiyeng+ gore ba sa be le so ba kganyang ka sona. 13 Ka gore batho bone ke mapostola ya matsaka, ba tshokanya batho fote baa timakisa mo ba re ke bona mapostola ya Kreste.+ 14 Fote a di makatse gore Sathane ka boyenemong o timaka lengeloyi la go loka.*+ 15 A di makatse le mo bo ba mmerekelang ba tiwutametsa ba timaka nkare ba maka tsa gabutši, byalo ka taba la tso ba di makang go nyoko fela ka bona.+

16 Fote ke re go sa be le ye a tseyang gore tso ke di hlayang a di kwagale. Mara le mo le ka nagana ka mokgonone a go na taba le fo n’yamogela ke le ka mokgonone gore le nna ke kganye ka se sengwana. 17 Tso ke di bolabolang gana byalo a yi tso Morena a ka di bolabolang, ke kganya go tshwana le sephokophoko. 18 Ka gore batho ba go tlala ba kganya ka dilo tsa lefase lowa, le nna ke nyoko kganya. 19 Ka taba la gore lune le tseya nkare le hlalefiye le kgona le go lefisela diphokophoko pelo. 20 Gabutšibutši bo ba gore ba makiye gore le be mabhantiti le ba gore ba le jela dilo tsa lune, ba go le tseyela tso le nang natso, ba go timaka nkare baa le phala le ba go le pshyasola mo sefahlegong le ya mahlong le kene le tiyisela tso ba le makang tsona.

21 Dya tšebisa gore re hlaya dilo tsowa, ka taba la gore ga ba bangwana ba lune di ka šupetsa nkare rune re lelemela lela la gore a re kgone le go berekisa matšhika ya rune gabutši.

Mara mo nkare go na le batho ba gore a di ba tšebisi tsa go kganya, le nna a di ntšebisi le mo nkare ye mongwana o nyoko bona nkare tso ke di hlayang a di kwagale. 22 Mo nkare ke Maheberu, le nna ke nna lona.+ Mo nkare ke Maisrayele, le nna ke nna lona. Mo nkare ke ditlogolwane tsa Abhrahama, le nna ke nna sona.+ 23 Ayitsano ke bona malata ya Kreste? Ke fetola go tshwana le sephokophoko, le nna ke lelata la Kreste go phala lune, ke berekiye ka matla go phala lune,+ ba nhlahlele jele ga go tlala,+ ba ntudiye la go sa hlayisege fote ke nyakiye ke kgwa ga go tlala.+ 24 Majuda ma nteyye ka 39 ya dikgati* ga kapheta.+ 25 Ba nteyye ga kararo ka kgati,+ ba nteya ga teya ka matlapa,+ sekepe saka sa robega ga kararo,+ ka fetsa bošego le motshegare ke le teng ga lewatle; 26 Ke sipidiye mayeto ya go tlala. Mo dinookeng ke makegele ke tsa go thathafa, go gongwana ke mo go na le dikgohlane,+ ke hlorisa ke batho ba setšhaba+ sa geru le ba ditšhaba tse dingwana, fote ke mo ke gahlana le dilo tsa go thathafa mo ke le ku Jerusalema,+ ke le ku mašahleng le ku lewatleng, fote le ga magageru ya go timakisa. 27 Ke mo ke bereka go baba, ga go tlala ke sa yetsele le bošego,+ ke kwa tlala+ le go wongwa meetši,+ fote go bata, le tsa go yapara di se šiyo.

28 A ke hlupege ka dilo tsone di ntoši mara letšatši le lengwana le le lengwana ke hlupega le ka diphutego ka mokana ga tsona.+ 29 Ayitsano mo ye mongwana a lelemela, nna nka sa lelemele? Nje a di nkwatisi mo ye mongwana di mo phiriketsa?

30 Mo nkare ke nyaka go kganya, nko kganya ka dilo tsa go šupetsa gabutši gore ke ya lelemela. 31 Modimo wa gore ke Papa wa Morena Jeso, yene wa gore re tshwanele re mo thanake go ya go yye wa di tšiba gore a ke bolabole matsaka. 32 Mo ke le ku Damasekhase ye mogolo wa go lawola ka tlase ga kgoši Aretase ke mo a ramele go ntshwara ku ga poleke ya Madamasekhase, 33 mara ba ntshiye ka lefasetere ke le ka teng ga mmantši hala lepharong la mutši,+ ka tšhaba fote ka mokgonone ka ba ke phonne.

12 Ke tshwanele ke kganye. Ke nyoko bolabola ka mmono wo Morena a nšupetsiyeng wona+ le tso a yyeng a di wunyulla,+ le mo nkare go maka tsotsone a di n’gelepe ka selo. 2 Ke tšiba monna wa gore ke selo ka ssoši le Kreste, wa gore 14 ya mengwaga ya go fela o yye a tseyiwa ka go yakgoswa a ya legedimong la kararo⁠—gore o tseyiwwe ka mmele wage kela aa tseyiwa ka mmele wage a ke di tšibi, Modimo ke yene a di tšibang. 3 Monna wa mošaga wone ke ya mo tšiba, o tseyiwwe ka go yakgoswa a ya pharadeyising⁠—gore o tseyiwwe ka mmele wage kela aa tseyiwa ka mmele wage a ke di tšibi, Modimo ke yene a di tšibang. 4 Byalo mo a kene a le hone pharadeyising, o yye a kwa mantsu ya gore a ma bolabolege, ya gore ka molawo motho aa tshwanela go ma bolabola. 5 Ke nyoko kganya ka monna wa mošaga wonone, nka sa kganye ka nna mong mo go se ka dilo tsa go šupetsa gore ke ya lelemela. 6 Le mo nkare ke nyaka go kganya nka sa make tsa bophokophoko, ke nyoko fo bolabola nnete. Mara a ke make ka mokgonone, gore le sa nthanake ka matla ga tso le bonang ke di maka kela tso le kwang ke di hlaya, 7 ka taba la dilo tsa go makatsa tso Morena a n’šupetsiyeng tsona.

Gore ke sa tikraye ke na le magetla, ke na le mutlwa mo mmeleng,+ lengeloyi la Sathane, gore le ye mahlong le nkwisa go baba. Tsowa di makiye gore ke thogo tinyanafatsa. 8 Ke llele Morena ga kararo gore a nhlomole mutlwa wowa. 9 Mara yene a re gaka: “Ke go kwele go baba ka matla, ka taba la gore mo o lelemela matšhika yaka ma napa ma bonala gabutši.”+ Byalo, taba ya gore ke ya lelemela a yi ntšebisi ka taba la gore tsotsone di maka gore matšhika ya Kreste ma dule ma le ho gaka go tshwana le letente. 10 Byalo ke ya jabola mo ke lelemela ka taba la Kreste, le mo ba nrogelela, le mo go na le tso ke di gayelang, le mo ke hlupegisiwa ke boya ke gahlana le tsa go roba ka taba lage. Ka gore mo ke lelemela, ke na le matšhika.+

11 Ke bolabola nkare ke sephokophoko ka taba la lune, mara mola le bolabodiye gabutši ka nna, nke ke sa bolabole ka mokgo. Fote mapostola yane ya lune ya gore le ma tseyela gedimo a ma mphale ka selo.+ 12 Mara ke le šupetsiye gore ka nnete ke nna lepostola ka go le lefisela pelo,+ go le makela mohlolo, ka le šupetsa dilo tsa go makatsa le tsa gore a di ya tlwayelega.+ 13 Nna a ke ya ba morwalo ga lune, tsotsone ke tso di makang gore le sa tshwane le diphutego tse dingwana, anthe ke ro sinya?+ Mo nkare go ka mokgonone le ko fo ntshwarela.

14 Go nyoko ba go se la mathomo ke nyaka go tla hone ga lune mara go ko ba go le la kararo, fote a ke nyake go ba morwalo ga lune.+ A ke nyake dilo tsa lune, ke fo nyaka go le bona. Bana+ a yi bona ba gore ba tshwanele ba beyele babelegi ba bona tšheleta, mara babelegi ke bona ba gore ba tshwanele ba beyele bana ba bona tšheleta. 15 Nna nka neyela ka selo se sengwana le se sengwana ka taba la lune,+ le mong go neyela ka lephelo laka. Anthe mo nna ke le nyaka ka matla ka mokgo, a di ya ntshwanela gore le lune le nnyake go ya ka mokgo le nna ke le nyakang ka gona? 16 Le mo nkare a ke ya ba morwalo ga lune,+ lune le re ke le “hlalefetsiye” fote ke le tannye ka “bošakašakane.” 17 Ayitsano bo ke ba romeleng hone ga lune ke ba berekisiye gore ke le rope? 18 Ke hlohletsele Titosi gore a tle hone ga lune fote ka mo roma gore a tle le mogageru ye mongwana. Ayitsano Titosi o le ropiye?+ Ayitsano ne di sa šupetsi gore re selo ka ssoši? Ayitsano a re ya maka dilo ka mokgwa wa go tshwana?

19 Le ka fo nagana gore re ya tilwela, mara a di ka mokgonone. Ka gore re malata ya Kreste re fo bolabola nnete mahlong ga Modimo. Byalo ne re fo nyaka go le tiyisa magageru ka taba la gore re le nyaka ka matla. 20 Ke ya tšhoga gore mo ke tla hone ga lune nka fo kraya le se ka mokgo ne ke nabela go le kraya le le ka gona, wa kraya go na le go sa kwane, mona, go kwata, go phigisana, go sinyana mabitso, go seba, go ba le magetla le go sa sipidisi dilo gabutši. 21 Nakwenngwana mo ke boya mone ga lune ke nyoko tla ke tšeba mahlong ga Modimo mo ke le gare ga lune fote nka fo tla ka kwa go baba ka gore ba go tlala a baa sokologa ga dilo tsa go befa tso ba di sinnyeng. A ba soko tšhentšha ga dilo tsa go sa yela tso ke mo ba di maka, bonghwahla,* le go maka dilo tsa go tšebisa.*

13 Taba yowa ya gore ke ye tla hone ga lune ke šele ke yi hlaya la kararo. “Taba ye nngwana le ye nngwana yi nyaka dihlatse ka dipedi kela kararo ya tsona gore yi thogo yela.”+ 2 Byalo le mo ke se šiyo hone ga lune, le fo tseya gore ke šele ke tlile la mabedi ka tso ke di bolabolang fote ke re ga bo ba gore ba yye ba sinya le ga lune ka mokana ga lune, ke le botsa ke soko bane ke tla mone ga lune ke re: Mo di ka makega gore ke tle hone ga lune fote, nka sa le kwele go baba. 3 Ka taba la gore lune le nyaka sa go le šupetsa gore ka nnete tso ke di bolabolang di tšwa ga Kreste, wa gore mo a le makela dilo o fo šupetsa gore o na le matšhika fote aa lelemele. 4 Ba mo kokotele phateng ya mohlupego nakwela a lelemela, mara gana byalo wa phela ka matšhika ya Modimo.+ Byalo le rune re lelemela go fo tshwana le ka mokgo ne a lelemela ka gona mara re nyoko phela naye+ ka taba la gore re na le matšhika ya go tšwa ga Modimo.+

5 Le sa lisetsi go tinyakolla gore le thogo bona gore ayitsano le na le tumelo. Le ye mahlong le tišupetsa gore ke lune batho ba mošaga mang.+ Anthe a le selo ka ssoši le Kreste? Aritši mo nkare Modimo aa sa le yamogela. 6 Ke nabela nkare le ka di bona tsa gore Modimo o sa na a re yamogela.

7 Byalo re rapela Modimo gore a le gelepe le sa make dilo tsa go kekema, mara a re makele gore batho ba tseye nkare rune Modimo wa re yamogela, re fo ba re rapela gore le make dilo tsa gabutši le mo batho ba sa re yamogele. 8 Ka taba la gore re ka sa make dilo tsa gore a di yelane le tso Modimo a di hlayang mara re nyoko fo maka tso yene a di hlayang. 9 Re ya jabola mo lune le na le matšhika le mo nkare rune re ya lelemela. Fote re rapela gore le lukise mo di nyakang le lukisa. 10 Ke sona so se makang gore ke ngwale dilo tsowa gore mo ke šele ke segele mone ga lune, ke sa tle ke berekisa matšhika ya gore Morena o nneyye wona gore ke le kwise go baba,+ mara ke ma berekise gore ke le yagise.

11 Byalo magageru, ke fetsa ka gore ariyeneng mahlong le jabodiye, le lukise mo di nyakang gore le lukise, le lisetse ba bangwana gore ba le kgomoletse,+ le nagane go tshwana,+ le phidisane gabutši,+ ke mokane Modimo wa go re nyaka ka matla le wa go beba+ o nyoko ba le lune. 12 Le tamisaneneng ka khisi ya go hlawolega. 13 Magageru ya go hlawolega ka mokana ga wona maa le tamisa.

14 Nkare Morena Jeso Kreste a ka le kwela go baba ka mokana ga lune fote le Modimo a ya mahlong a le nyaka ka matla, a boya a le neya moya wage wa go hlawolega.