LENGWALO LA MATHOMO LA PETRO

1 Nna Petro wa gore ke nna lepostola+ la Jeso Kreste, ke ngwalela lune ba gore le palakanne le dipoleke tsa Pontase, Galata, Khapadokiya,+ Asia le Bhethaniya, lune ba go tšwa le sepela ga dipoleke tsone ba gore fote le hlawodiwwe. 2 Modimo ye a le kgetiyeng ke Papa wa rune wa magedimong,+ fote o le kgetiye gore go makege so a se nyakang. O le neyye moya wa go hlawolega gore le lune le thogo hlawolega.+ O makiye tsotsone gore le thogo mo theetsela, fote o le hlatswiye ka madi ya Jeso Kreste.+ Ke re:

Nkare Modimo a ka le kwela go baba a boya a maka gore le bebe.

3 Go thanakiwe Modimo wa gore ke Papa wa Morena wa rune Jeso Kreste. Ka taba la gore o re kwele go baba, o makiye gore re belegiwe ka bonyuwane+ gore re thogo tshepa re tiyisiye ga tso di nyoko makegang ku mahlong.+ Re tshepisa ke gore Jeso o tsusiwwe ga bo ba kgwileng.+ 4 Yene o re neya patela yo a re tshepisiyeng gore o nyoko re neya yona.+ Tso a nyoko re patelang ka tsona a di bole, di hlawolegiye fote di nyoko ba gona go ya go yye. Dilo tsowa di le yemele ku legedimong,+ 5 lune ba gore Modimo o le pasopiye ka matšhika yage ka taba la gore le na le tumelo ya gore Modimo o nyoko le wunyulla ka nako ya gona. 6 Ka taba la tsotsone le jabola ka matla le mo le gahlana le tsa go le ghula tsa senakonyana mara dilo tsone di tshwanele di makege.+ 7 Tumelo ya lune ya gore yi liketsiwwe gore yi tiyye go segela kaye,+ yi nyoko maka gore le thanakiwe, le gadimisiwe fote le hlompiwe mo Jeso Kreste a nyarela. Tumelo ya mošaga wonone yi phala gholdi ya gore ya sinyega le mo ba yi tšhubiye* ka mollo.+ 8 Kreste a le soko mmona mara go mo nyaka gona le ya mo nyaka. A le mmone gana byalo mara le dumela gage fote le jabodiye la go sa hlayisege, 9 ka gore le ya di tshepa tsa gore tumelo ya lune yi nyoko le phonisa.+

10 Baporofeta bo ba porofitiyeng ka taba yowa ya gore Modimo o le kwele go baba, ba yi nyakolliye ka matla taba yowa ya go phonisa, ba boya ba butsisa ka yona.+ 11 Modimo o ba butsiye di soko makega a berekisa moya wa go hlawolega* gore Kreste+ o nyoko hlorisiwa ke mokane a gadimisiwe. Ke sona so se makiyeng gore ba ye mahlong ba liketsa go kraya gore go nyoko makega ying ka Kreste+ le gore tsotsone di nyoko makega leng. 12 Modimo o wunyullele baporofeta ba gore ke mo ba sa tiperekele mara ke mo ba berekela lune. Baporofeta bowa ba ngwadiye ka dilo tso le di kwileng, fote lune le di kwelele ka bo ba tšhomayelang ditaba tsa go bafala ba gelepa ke moya wa go hlawolega wa go tšwa legedimong.+ Mangeloyi ma karakara ka matla gore ma tšibe dilo tsowa.

13 Le di tšibeneng gore le nyoko ba le mmereko wo mogolo ka matla,+ le hlalefe+ le kene le tshepa gore le nyoko kwediwa go baba mo Jeso Kreste a nyarela. 14 Go tshwana le bana ba go theetsela, le lisetseneng go nabela go maka dilo tso ne le di maka ka nakwela le sa tseyele dilo hlogong, 15 le lune le hlawolege ga dilo ka mokana ga tsona+ go tshwana le Modimo wa gore o Hlawolegiye wa gore le bitsiye ke yene, 16 ka gore go ngwadiwwe gore: “Di nyaka le hlawolege ka taba la gore le nna ke hlawolegiye.”+

17 Fote mo nkare le rapela Papa wa gore mo a yahlula aa hlawole+ o yahlula go ya ka tso motho a di makiyeng, di nyaka le titshware ka go hlompega+ mo le kene le duli tsa senakonyana ho lefaseng. 18 Le di tšiba gabutši gore silva le gholdi le dilo tsa gore di ya fela a yi tsona tso di le phonisiyeng+ ga maphelelo ya lune ya go sa re selo ya gore le ma tšhutiye ga bokokwane ba lune. 19 Mara le phonisiye ke madi+ ya go hlawolega ya Kreste ya gore ma tshwana le madi ya nku ya gore a yi na selabi+ fote yi yediye.+ 20 Ke nnete gore yene ke mo a šele a tšibega mo lefase le soko ba gona,+ mara o nyarele ka dinako tsowa tsa mafelelo ka taba la lune.+ 21 Ka yene le dumela ga Modimo,+ wa gore o mo tsusiye ga bo ba kgwileng+ fote a mo gadimisa,+ gore le be le tumelo fote le tshepele ga Modimo.

22 Byalo ka gore gana byalo le tiyedisiye ka go theetsela nnete ya lentsu la Modimo fote a le timakisi mo le re ga magageru le ma nyaka ka matla,+ ariyeneng mahlong le nyakanana ka matla di tšwa pelong.+ 23 Le belegiwwe ka bonyuwane.+ A le tšwe ga pewu ya gore ya bola, le tšwa ga pewu ya go phela.*+ Le belegiwwe ka taba la gore mantsu ya Modimo wa gore wa phela ke ya go ya go yye.+ 24 “Batho ka mokana ga bona ba tshwana le mabyang, ba bafele go tshwana le mabhlomu ya ku hlageng, mabyang maa puna fote mabhlomu maa wologa, 25 mara lentsu la Jehova* le nyoko dula le le gona go ya go yye.”+ Fote “lentsu” lone ke ditaba tsa go bafala tso le di kwileng.+

2 Lisetsaneng go maka dilo ka mokana ga tsona tsa go sa loka,+ le lahleneng matsaka, tsa go timakisa, go jelaselana le tsa go rekisana. 2 Le wongwe lentsu la Modimo go tshwana le dibananyana+ tsa go llela lebese gore lentsu lone le tle le thogo le phonisa,+ 3 ka taba la gore le liketsiye la di bona gore Morena o lukiye.

4 Mo le kene le tla gage, yene wa gore ke letlapa la gore batho ba le ganne,+ la gore Modimo yene o le hlawodiye fote ke mong lekolwane lage,+ 5 lune ka bo lune ke setšha le le matlapa ya go phela, lune le tshwana le ntlo ya gore ba yi yagiye ka moya+ wa Modimo gore le be maprista ya go hlawolega ya go maka dihlabelo+ tsa gore Modimo wa di yamogela ka Jeso Kreste,+ 6 ka taba la gore Mangwalo ma re: “Bonaneng! Ke beya letlapa la gore ba le kgetiye Siyoni, letlapa la khoneng ya fandhiši ya gore yi tseyediwa gedimo, fote ye a dumelang ga lona a ka sa šale a tšebiye.”+

7 Byalo ke mong lekolwane mo ga lune, ka taba la gore le dumela gage mara a yi lekolwane ga bo ba gore a ba dumele ka gore “letlapa la gore bommeselane ba le ganne+ go fetsiye go ba khona ya fandhiši,”*+ 8 fote “ke letlapa la go maka gore batho ba phiriketsege le letlapa la go ba ghula.”+ Baa phiriketsega ka taba la gore a ba kwe so lentsu le se hlayang. Le go segela gana byalo lowa, ba sa na ba kgetiwwe. 9 Mara lune ke lune “batho ba gore ba ba kgetiye, maprista ya gore ke magoši, setšhaba sa go hlawolega,+ ke lune phahlo ya Modimo ya go hlawolega,+ gore le sabalatse dilo tsa gabutši tsa gore Modimo+ o tšibega ka tsona”* yene wa gore o le ntshiye letshwifing a le leya ga gore go khannye.+ 10 Ka gore ke mo le se batho ba Modimo mara gana byalo le batho bage,+ Modimo ke mo a sa le kwele go baba, mara gana byalo o le kwela go baba.+

11 Lune bo ke le nyakang ka matla, ka gore le batho ba go tšwa le sepela+ fote le ka sa tseye nako le dula hone, ke le kgopela gore le ye mahlong le kganela kgole le go maka tso mmele wo di nabelang+ tsa gore a di ya loka tsa gore di lwa le lune,+ 12 ariyeneng mahlong le titshwere gabutši mo le le gare ga ditšhaba+ gore mo ba le hlayela matsaka ba re le ya sinya, bona beng ba ko bona ka dilo tsa gabutši+ tso le di makang ke mokane tsotsone dya maka gore ba gadimise Modimo ka letšatši la mo a yahlula.

13 Tinyanafatseneng ga bo ba go lawola+ ka mokana ga bona, ka taba la Morena. Kela ke ga kgoši+ ya gore ya le lawola 14 kela ke ga bo ba go lawola ba gore ba kgetiye ke kgoši gore ba wolole ba go sinya, ke mokane ba thanake bo ba makang dilo gabutši.+ 15 Modimo o nyaka gore le make dilo tsa gabutši gore le kwale bo ba diphokophoko molomo ga tso ba di bolabolang tsa go sa yi ka tsela.+ 16 Le tshwane le batho ba gore ba lokologiye,+ le berekise go lokologa mone ga lune le le mabhantiti ya Modimo+ mara le sa go berekisi gore le wutametse dilo tsa gore a di ya loka+ tso le di makang. 17 Hlompaneng batho ba mehlobo ka mokana ga yona,+ le šupetse magageru lefaseng ka mokana ga lona gore le ma nyaka ka matla,+ le tšhabeneng Modimo+ le hlompe kgoši.+

18 Bo go leng dibereki di nyaka ba theetsele bo ba ba hiriyeng fote ba ba hlompe+ ba sa fo theetsela bo ba gore ba ba tshwara gabutši fote ba ba naganela mara di nyaka ba theetsele le bo ba gore a di lula go ba kgotsofatsa. 19 Ka gore mo motho a hlorisiwa fote a sa tshwariwi gabutši ka taba la lekwalo lage la gore le tšhutisiye ke Modimo, tsotsone di gabutši.+ 20 Mo o teyiwa ka taba la gore o sinnye fote o tiyisela, ayitsano o ka thanakiwa ka tsotsone?+ Mara mo o hlupegisiwa ka taba la gore o maka tsa gabutši fote o tiyisela, tsotsone di jabodisa Modimo ka matla.+

21 Gabutšibutši, ba le bitsele tsotsone, ka gore Kreste le yene o hlorisiwwe+ ka taba la lune a le beyela mošupetso gore le lune le make tso a di makiyeng.+ 22 Aa maka dilo tsa go befa,+ fote aa bolabola matsaka.+ 23 Mo batho ba bolabola mantsu ya go mo kwisa go baba+ aa busetsa,+ mo ba mo hlorisa,+ aa ba tshosetsa, o f’lo di lisetsela ye wa gore o yahlula+ ka go loka. 24 Nakwela ba mo kokotela ku phateng ya mohlupego,+ o rwele dilo tso re di sinnyeng+ ka mmele wage, gore re thogo phonisiwa ga tso re di sinnyeng ke mokane re phelele go maka tsa gabutši. Fote “mabadi yage ma makiye gore le fole.”+ 25 Ke mo le tshwana le dinku tsa go keketlela,+ mara gana byalo le buyye ga mong wa lune wa go le disa,+ wa gore ke yene ye a le wokamelang.

3 Ka mokgonone lune basadi, di nyaka le tinyanafatse ga banna ba lune,+ gore le mo ba sa theetsele lentsu mara ba thogo ba le tumelo mo ba bona maphelelo ya lune le mo le sa ba tšhomayelela,+ 2 ka taba la gore ba ko ba ba di bonne gore le titshwere gabutši+ fote le ba hlompa ka matla. 3 Le sa fo bafala tsa ka ho tawong, tsa go loga moriri, ka go yapara tsa go tipafatsa tsa gholdi+ kela ka go yapara dikobo tsa go tura. 4 Mara le tipafatse ka ho pelong ka gore go wutamme go yitseri tsee, fote go bafala hone Modimo o go tseyela gedimo. Dilo tso le tipafatsang ka tsona di ka sa tsoge di khuriye, di bebiye.+ 5 Basadi ba ku botala ba gore ba hlawolegiye fote ba tshepa Modimo ke mo ba tipafatsa ka mokgonone, ba tinyanafatsa ga banna ba bona, 6 go fo tshwana le mo Sara a yye a theetsela Abhrahama, a boya a re ke Morena.+ Lune le bana bage mo nkare le ya mahlong le maka tsa gabutši fote le sa tšhoge selo.+

7 Ka mokgonone le lune banna, ariyeneng mahlong le phidisana le basadi ba lune gabutši, go šupetsa gore le ya ba kwisisa. Le hlompeneng+ basadi ka gore ba tshwana le sitša sa gore a se ya tiyelela, ka gore Modimo o ba kwele go baba a ba neya lephelo,+ go fo tshwana le mo lune a le neyye lephelo. Mo le sa make ka mokgonone Modimo a ka sa le theetsele mo le mo rapela.

8 Ke fetsa ka gore, ka mokana ga lune le nagane go tshwana,+ le naganelane, le nyakanane tsa nkare ke lune bana ba motho, le kwelane go baba+ fote le tinyanafatse.+ 9 Mo ba le maka tsa go befa,+ lune le sa busetse, mo ba bolabola mantsu ya go le kwisa go baba le sa busetsi.+ Lune le fo ba makela tsa gabutši,+ ka taba la gore le bitsiwwe ga pata yowa gore le thogo rufiwa.

10 Byalo, “ye a kwanang le go phela fote a nyaka gore dilo di mo sepelele gabutši a pasope lleme lage gore le sa bolabole dilo tsa go sa loka,+ le molomo wage gore wo sa bolabole matsaka. 11 A kganele kgole le dilo tsa go sa loka+ fote a make dilo tsa gabutši,+ a nyakane le go beba fote a go ngangarele.+ 12 Maahlo ya Jehova* ma lebelele ba go loka, fote ditsebe tsage di ya theetsela mo ba mo rapela di ba baba,+ mara Jehova* aa yamogele bo ba go maka dilo tsa go befa.”+

13 Nje le ka hlupa ke mang mara mo le karakara go maka dilo tsa gabutši?+ 14 Le ya jabola mo le hlorisiwa ka taba la gore le maka dilo tsa gabutši.+ Dilo tso ba di tšhabang, lune le sa di tšhabe,* fote di sa le hlagasedisi.+ 15 Mara le di tšibeneng ka ho dipelong tsa lune gore Kreste ke Morena, le gore o hlawolegiye fote le duleneng le tikemisele go fetola ye mongwana le ye mongwana ye a butsisang ka tumelo ya lune. Le make tsotsone le bebiye+ le šupetsa gore le hlompa ka matla.+

16 Le duleneng le na le makwalo ya gabutši+ gore bo ba le hlayelang matsaka ba šale ba tšebiye,+ mo ba bona ka mokgo le phelang ka gona le šupetsa gore ke lune Makreste.+ 17 Di gabutši ka matla mo ba le hlorisa ka taba la gore le maka dilo tsa go loka+ mo nkare Modimo o f’lo lisetsa gore di le tlele, solanka go se ka taba la gore le makiye dilo tsa go befa.+ 18 Kreste o kgwele tso re di sinnyeng ga teya fela a ba a fetsiye,+ ke motho wa go loka mara o kgwele bo ba go sa loka,+ gore a le šutetse thina le Modimo.+ Mo ba mmolaya, ke mo go le motho wa nama le madi+ mara Modimo o mo tsusiye go le motho wa go phela legedimong.+ 19 O yye a le ka mokgonone a ye tšhomayelela madimona yala ya gore ma tlemiwwe,+ 20 ya gore ma tithibiye ditsebe nakwela Modimo a lefisiye pelo ka dinako tsela tsa Nnowa,+ hala go yagiwa+ areka ya gore ke mo yi rwele mabala ya batho bala ba go phona mogogola.+

21 Le lune le phonisiwa ka taba la go kolobetsiwa ga gore go yelana le taba yowa (a yi go kolobetsiwa ga go hlapa dithila tsa ho mmeleng mara ke ga go kgopela lekwalo la go yela ga Modimo)+ ka go tsusiwa ga Jeso Kreste. 22 Gana byalo o ka letsogong la go ja la Modimo,+ ka gore o yye legedimong fote ba mo neyye matšhika ya go lawola mangeloyi le bo ba go lawola.+

4 Byalo ka taba la gore Kreste o hlorisiwwe nakwela go le motho wa nama,+ le lune le dule le di tšiba tsa gore le nyoko hlorisiwa, ka taba la gore motho wa gore o hlorisiwwe nameng aa sa sinya,+ 2 gore a thogo fetsa lephelo lage ka mokana ga lona a maka dilo tso di nyakang ke Modimo a sa sa maka tso di nyakang ke batho,+ mo a kene a phela go le motho wa nama.+ 3 Ka taba la gore nako yo yi šeleng yi fitiye yi tlele ka matla gore le ka ba le makiye tso di nyakang ke ditšhaba+ nakwela le maka dilo le sa tšebi,* le tlayila, le nabela go maka dilo tsa go sa loka, le maka menyanya ya go sa hlamatsega, menyanya ya go ba le mokgete wa go tlala fote le maka dilo tsa go silikisa tsa go rapela medimo ya dithombhe.+ 4 A ba le bolabole gabutši ka taba la gore a ba le kwisisi gore anthe lune, ke ntaba le sa sa maka tso ba di makang.+ 5 Batho bowa ba nyoko yahlula ke ye a yahlulang batho ba go phela le ba go kgwa, o nyoko ba yahlula go ya ka tso ba di makiyeng.+ 6 Gabutšibutši ke sona so se makiyeng gore le bo ba kgwileng ba kwe ditaba tsowa tsa go bafala,+ gore le mo ba ka yahludiwa go ya ka batho ba thogo phela go ya ka Modimo.

7 Dilo di bakiye mafelelong, byalo le šupetse gore le batho ba go butšwa mabyokong,+ le duleneng le rapela.+ 8 Le nyakanane ka matla+ ka taba la gore go nyakanana hone go nyoko phiphetsa dilo ka mokana ga tsona tsa go sinya.+ 9 Le yamogele divakaši le sa kokole.+ 10 Ye mongwana le ye mongwana a berekise so ba mo neyyeng sona go berekela ba bangwana ka mokgo malata ya Modimo ma tshwaneleng go maka ka gona go šupetsa gore Modimo o re kwele go baba ka mekgwa ya go tlala.+ 11 Mo nkare go na le wa gore wa bolabola a bolabole dilo tsa go tšwa ga Modimo, mo nkare go na le ye a berekang, a lisetse Modimo a mo gelepe ka matšhika yage,+ go thanakiwe+ Modimo ga dilo ka mokana ga tsona ka Jeso Kreste. Matšhika le tsa go gadimisiwa ke tsa gage go ya go yye. Amene.

12 Magageru ya ke ma nyakang ka matla, le sa makatse ke dilo tso di le ghulang+ nkare kela le ro thoma go di bona, 13 mara ariyeneng mahlong le kene le jabola+ ka taba la gore le lune le hlorisiwa le Kreste ga tso a hlorisiwweng ga tsona,+ gore le thogo jabola ka matla mo go segela nako ya gore a gadimisiwe.+ 14 Mo nkare ba le rogelela ka taba la lebitso la Kreste, le ya jabola+ ka taba la gore tsotsone di šupetsa gore le na le moya wa Modimo.

15 Mara le sa tikraye le hlorisiwa ka taba la go bolaya, go yetswa, go maka tsa go befa kela go kenakena ditaba tsa batho.+ 16 Mara mo nkare go na le ye a hlorisiwang ka taba la gore ke Mokreste,+ di sa mo tšebisi tsone, a ye mahlong a thanaka Modimo. 17 Ke nako ya gore go yahlula go thomise ka ntlong ya Modimo.+ Byalo mo nkare di thoma ka rune,+ go nyoko makega ying ka bowa ba go sa theetsele ditaba tsa go bafala tsa Modimo?+ 18 “Mo nkare motho wa go loka o phonne ka lešuba la naleta, go nyoko makega ying ka ye wa go sa hlompe Modimo le ye wa go sinya?”+ 19 Byalo bo ba hlorisiwang ka taba la go maka tso Modimo a di nyakang ba nape ba tisamela ka yene mo ba kene ba maka tsa go loka fote ba tshepele ga ye wa gore o makiye dilo ka mokana ga tsona, wa gore wa tshepega.+

5 Nna wa gore ke nna mogolo ka ho phutegong go tshwana le lune, wa gore ke di bonne mo Kreste a hlorisiwa wa gore le nna ke nyoko gadimisiwa ka nako ya gona,+ ke kgopela bagolo ba mone gare ga lune gore ba make ka mokgo: 2 Disaneng morape wa Modimo+ wo a le neyyeng wona gore le wo pasope. Le wo wokamele le sa tšhofe ke motho, le makeneng ka go di nyaka mahlong ga Modimo,+ fote le sa make ka monagano wa gore le nyoko kraya se sengwana+ mara le makeneng di le baba. 3 Le sa gatelele bowa ba gore ke batho ba Modimo,+ mara le be mešupetso ya gabutši ga morape.+ 4 Mo ndhuna ya ba go disa yi šele yi segele,+ le nyoko kraya kgare ya gore a yi sinyegi ya go šupetsa gore le ya gadimisiwa.+

5 Le lune masogana, le tinyanafatse ga banna ba bagolo.+ Mara ka mokana ga lune le tinyanafatseneng ga ye mongwana le ye mongwana, ka taba la gore Modimo aa kwane le batho ba go ba le magetla mara bo ba gore baa tinyanafatsa o ba kwela go baba.+

6 Byalo tinyanafatseneng ga Modimo wa matšhika, gore a ko thogo le gadimisa ka nako ya gona,+ 7 le kene le bošela tso di le šekedisang ka mokana ga tsona gage,+ ka taba la gore wa tihlupa ka lune.+ 8 Le duleneng le ntshiye maahlo dikwakweng, le sa kobole!+ Ka gore lenaba la lune Diyabolo, o yinghayingha go tshwana le tawu ya go bopa, o nyaka go kgwisa ye mongwana.+ 9 Mara le sa thogathoge mo le kene le lwa naye,+ tumelo ya lune yi sa tekateke, le kene le di tšiba gore magageru lefaseng ka mokana ga lona ma gahlana le tsa mošaga wonone.+ 10 Mara ka nthagonyana, mo go šele go fitiye nako le hlorisiwa, Modimo wa go kwelana go baba, ye a le bitsiyeng gore le be selo ka ssoši le Kreste le gore le gadimisiwe go ya go yye,+ o nyoko le tšhutisa ka boyene mong. O nyoko le tiyisa,+ a le neye matšhika+ fote o nyoko maka gore le yeme le tiyye le sa thogathoge. 11 Matšhika ke ya Modimo go ya go yye. Amene.

12 Mogageru Silvanase+ wa gore wa tshepega, o n’gelepiye gore ke le ngwalele borifi byowa, gore ke le tiyise, le go le botsa gore le tshwere pata ya nnete, a le ya yi lahla, ka taba la gore Modimo o kwelana go baba. Le yi ngangarele. 13 Mosadi wa gore o ku Bhabhilona,* wa gore o kgetiwwe go tshwana le lune, wa le tamisa, le Mareka+ morwayi waka wa le tamisa. 14 Le tamisane ka khisi, go šupetsa gore le ya nyakanana.

Nkare lune ka mokana ga lune ba gore le selo ka ssoši le Kreste le ka beba.