Anthe mo re Kgwa re ya Kaye?

1-3. Batho ba tiputsisa diputsiso difeng tsa go yelana le likgu, fote diputsiso tsone di fetodiwa byang ga dikereke tse dingwana?

BAEBELE yi re tshepisa gore tšatši le lengwana “likgu le ko ba le sa sa le šiyo.” (Kutullo 21:4) Ga Tema 5, re tšhutiye gore go lepolliwa go makiye gore re thogo kraya lephelo la go ya go yye. Mara batho ba sa na ba fo kgwa le gana byalo. (Mmolabodi 9:5) Byalo re tiputsisa gore, Go makega ying ka rune mo re kgwa?

² Phetolo ya putsiso yone re napa re nabela go yi tšiba ka matla mo go hlokofala motho ye re dulang naye ka mutšing kela lešaga. Re ka tiputsisa gore: ‘Mara o yye kaye? Nje wa re bona? Ayitsano a ka re gelepa? Nje re ko tsoga re mmonne fote?’

³ Ga dikereke tsa go tlala, diputsiso tsone a ba di fetole go tshwana. Ga tse dingwana ba tšhutisa gore mo o le motho wa go loka, o ya legedimong ke mokane mo o sa loka, o nyoko tšhubiwa diheleng. Ga tse dingwana ba re mo motho a kgwa, o ba moya ke mokane a ye phela le bokokwane wage ba gore ba kgwile botala. Ba bangwana bona ba re mo o kgwile ke mokane ba go yahludiye, o nyoko belegiwa fote, kela wa boya fote o tl’le pheleng mara ka mmele wo mongwana, nako ye nngwana go le wene motho ye mongwana kela go le wene pholwane.

4. Dikereke di tšhutisa taba yifeng ka likgu ya nkare ya yelana?

⁴ Dikereke di tšhutisa dilo tsa go sa tshwane. Mara tsa go tlala di tšhutisa selo sa nkare se ya tshwana. Di tšhutisa gore mo motho a kgwa, go na le se sengwana ho gage sa gore sona a se kgwe, se fo ya mahlong se phela. Nje ke nnete?

ANTHE MO RE KGWA RE YA KAYE?

5, 6. Go makega ying ka rune mo re kgwa?

⁵ Jehova ke yene a di tšibang gore go makega ying mo motho a kgwa, fote o re botsa gore mo motho a kgwa, go napa go fela gana hone ka tsa lephelo lage, aa yi go gongwana. Go kgwa a go tshwane le go phela. Byalo mo motho a kgwa, a go na selo sage le ka ssoši so se šalang se phela go gongwana.a Mo re kgwile a re sa bona selo, a re sa kwa fote le tsa go nagana a re sa di kgona.

⁶ Kgoši Solomoni o ngwadiye gore “bo ba kgwileng a ba tšibi selo le ka gonyana.” Motho ye a hlokofeleng a ka sa di kgone go kwana le motho kela go mo hloya, fote “hala lebitleng a go na mmereko, aa nagane selo, aa tšibi selo fote a go na tso a di hlalefeleng.” (Bala Mmolabodi 9:5, 6, 10.) Fote ga Pisalema 146:4, Baebele yi re botsa gore mo motho a kgwa, “monagano wage” o re phi.

SO JESO A SE BOLABODIYENG KA LIKGU

7. Jeso o yitseri king ka likgu?

⁷ Mo monghana ye mogolo wa Jeso ye ba reng ke Lazaro a kgwa, Jeso o yye a botsa mapostola yage gore: “Monghana wa rune Lazaro o yetsele.” Mara Jeso ke mo a sa rele gore Lazaro o yetsele tsa gore wa khutsa. Jeso o napiye a yi yedisa a re: “Lazaro o kgwile.” (Johane 11:11-14) Gabutšibutši Jeso ke mo a fo tshwanisa go kgwa le go yetsela. A sanka a re Lazaro o yye legedimong kela gore o na le mašaga yage ya gore ma kgwile botala. Fote a sanka a re Lazaro wa hlopegisiwa ku diheleng kela gore o belegiwwe go le motho ye mongwana kela go le pholwane. Ke mo di tshwana le nkare Lazaro ke mo a womme ka boroko. Ya mangwana mangwalo ma tshwanisa likgu le go ro napa o woma ka boroko. Baebele yi re ka nakwela Stefano a bolayiwa, “o yye a yetsela boroko bya likgu.” (Mebereko 7:60) Pawulo wa lepostola le yene o ngwadiye gore Makreste ya mangwana le wona ma “yetsele boroko bya likgu.”—1 Makorente 15:6.

8. Re di tšiba byang gore Modimo ke mo a sa re makela go kgwa?

⁸ Mo Modimo a maka Adamo le Efa, ayitsano ke mo a ba makela gore tšatši le lengwana ba tle ba kgwe? Awwa! Jehova o ba makiye a nyaka gore ba jabolele lephelo la go ya go yye, ba phidiye gabutši. Mo Jehova a maka batho, o ba makiye gore ba nabele go phela go ya go yye. (Mmolabodi 3:11) Babelegi a ba di nyake go bona bana ba bona ba tsofala ke mokane ba fetsa ba kgwile, byalo Jehova le yene o fo tikwa ka mokgonone le ka rune. Byalo mo nkare Modimo o re makiye gore re phele go ya go yye, anthe re kgwela ying?

ANTHE KE NTABA RE KGWA?

9. Ke ntaba re re tso Jehova a di butsiyeng Adamo le Efa ne di sa hlupi?

⁹ Ku tšhomong ya Edeni, Jehova o yitseri ga Adamo: “Ga sehlare se sengwana le se sengwana sa ho tšhomong o ka ja wa boya wa ro tikhodisa. Mara ga sehlare sela sa go tšiba tsa go bafala le tsa go befa, o sa ji tsa sona, ka taba la gore tšatši lo o jang hone ga sona, ka nnete o nyoko kgwa.” (Genesi 2:9, 16, 17) Molawo wone ke mo go le lola go wo theetsela, fote Jehova ke mo di mo tshwanela tsa gore a botse Adamo le Efa gore sa gabutši ke sefeng, sa go befa ke sefeng. Mola ba theetsele Jehova, nke di šupetsiye gore a ba mo dheleli. Fote ke mo di nyoko šupetsa gore ba leboga dilo ka mokana ga tsona tso a ba neyyeng tsona.

10, 11. (a) Sathane o yitseri king mo a tshokanya Adamo le Efa? (b) Ke ntaba re re tso Adamo le Efa ba di makiyeng di ya tshwatisa?

¹⁰ Sa go babisa pelo ke gore Adamo le Efa ba yye ba maka tsa go tšiba ke bona, ba sa theetsele Jehova. Sathane o yitseri ga Efa: “Ayitsano Modimo o yitseri le sa ji ga sehlare se sengwana le se sengwana sa ho tšhomong?” Efa o fetodiye ka gore: “Tsa sehlare se sengwana le se sengwana sa ho tšhomong ba re re ka ja. Mara mo Modimo a bolabola ka tsa sehlare sela sa hala gare ga tšhomo, o yitseri: ‘Le sa ji tsa sehlare sone, fote le sa ro boya le se tikisa; mo le ka maka tsotsone, le nyoko kgwa.’”—Genesi 3:1-3.

¹¹ Ke mokane Sathane yene a re: “Le ka sa ro kgwa. Modimo wa di tšiba gore ka letšatši lo le nyoko jang tsa sehlare sela, mahlo ya lune ma nyoko popologa ke mokane la tshwana le Modimo, la tšiba sa go bafala le sa go befa.” (Genesi 3:4-6) Sathane ke mo a nyaka gore Efa a tseye nkare a ka tikgetela gore sa gabutši ke sefeng le sa go befa ke sefeng. Phela o hlayye matsaka mo a ba botsa tso ne di nyoko ba makegela ho ba ka fo sa theetsele. Sathane o yitseri Efa a ka sa kgwe, byalo Efa o jile seyengwa sa sehlare sone ke mokane a neya le monnage. Adamo le Efa ke mo ba di tšiba tsa gore Jehova o yitseri ba sa ji seyengwa sone. Mo ba se ja, ba yye ba hlawola go maka tsa go tšiba ke bona, ba sa theetsele molawo. Mo ba ja, di napiye di šupetsa gore a ba mo hlompe le ka gonyana ga Papa wa bona wa legedimong wa gore yene o ba nyaka ka matla. Baa tshwatisa ka tso ba di makiyeng wa tšiba!

12. Ke ntaba di tšebisa ka matla tsa gore Adamo le Efa a baa theetsela Jehova?

¹² Di tšebisa ka matla wa tšiba, gore babelegi ba rune ba mathomo ba šupetsiye gabutši gore ye a ba makiyeng a ba mo hlompe! Mara o ka re king go le wene o hlupegiye o leketsa go gudisa bana bago ka babedi, wa mošomanyana le wa ngwannyana, ke mokane bona ba fo thomisa go maka tsa go tšiba ke bona, ba boya ba sa go theetsele? Nje o ka sa kwe go baba?

13. Jehova ke mo a ra gore king mo a re “o nyoko boyela leroleng”?

¹³ Tsa gore Adamo le Efa ba nyoko phela go ya go yye di napiye di šaša nakwela ba sa theetsele. Jehova o yye a re ga Adamo: “Ka taba la gore ke wene lerole, o nyoko boyela leroleng.” (Bala Genesi 3:19.) Sosone ke mo se rela gore Adamo ke mo go nyoko ba lerole fote, gwa tshwana le nkare a sanka a ba gona. (Genesi 2:7) Ka nthago ga mo Adamo a sinnye, o yye a kgwa ke mokane gwa fela ka yene.

14. Ke ntaba re kgwa?

¹⁴ Mola Adamo le Efa ba yye ba theetsela Modimo, nke le lekgono lowa ba sa na ba phela. Mara ka taba la gore a baa theetsela, ba yye ba sinya ke mokane ba feleletsa ba kgwile. Go sinya gone ke setšha go le bolwele bya go sasamela bya gore re bo tshiletsiye ke babelegi ba rune ba mathomo. Ka mokana ga rune re belegiwa re na le bolwele byone bya go fo dulela go sinya, re maka ke tsotsone gore re kgwe. (Maroma 5:12) Mara a yi tsona tso Modimo a nyakang di makegela batho. Modimo a sanka a tsoga a di nyakiye tsa gore batho ba kgwe, le Baebele ya hlaya gore likgu ke “lenaba.”—1 Makorente 15:26.

GO TŠIBA NNETE GWA RE LOKOLLA

15. Go tšiba nnete ka bo ba kgwileng go re lokolla byang?

¹⁵ Go tšiba nnete ka so se makegang mo re kgwa, go maka gore re sa be re kene re šekela ka taba la matsaka ya go tlala ya batho ba ma bolabolang. Baebele yi re tšhutisa gore motho ye a hlokofeleng aa kwi go baba le ka go nyana. Re ka sa bolabole naye a re kwa, le rune a ka sa re bolabodisi. Batho bo ba hlokofeleng re ka sa ba gelepe ka selo, le bona ba ka sa re gelepe ka selo. A di nyake re ba tšhaba ka taba la gore ba ka sa re kwaletsi. Mara, dikereke tsa go tlala di tšhutisa gore bo ba hlokofeleng baa phela kaye-kaye le gore re ka ba gelepa mo re ka patela baruti tšheleta kela batho ba nkare ke banna ba go hlawolega. Mara mo re tšiba nnete ka bo ba kgwileng, re ka sa fokoge re maka ke matsaka ya mošaga wonone.

16. Dikereke tsa go tlala di tšhutisa matsaka ya gore king ka batho bo ba hlokofeleng?

¹⁶ Sathane o berekisa dikereke tsa matsaka gore ba re tshokanye re šinye re nagana gore bo ba kgwileng ba sa phela. Mo re beyisa, dikereke tse dingwana di tšhutisa gore mo motho a kgwa, go na le so se tšwang mo gage ke mokane sa ya go phela mo re sa go tšibing. Nje yago kereke yi go tšhutisa tsotsone, kela yi go tšhutisa so Baebele yi se bolabolang ka bakgu? Sathane o berekisa matsaka gore batho ba jikele Jehova.

17. Ke ntaba taba yowa ya gore batho ba tšhubiwa diheleng yi le go lebela Jehova?

¹⁷ Dilo tso di tšhutisiwang ga dikereke tsa go tlala di ro tshosa. Mo re beyisa, tse dingwana di tšhutisa gore batho ba gore a baa loka ba nyoko tšhubelediwa diheleng. Matsaka yane ka mokana ga wona ma lebela Jehova. A ka sa tsoge a lesetsiye batho gore ba hlopegisiwe ka mokgonone! (Bala 1 Johane 4:8.) O ka re king mara mo o ka fo bona motho a tšhubelela matsogo ya sengwananyana a re a se kwe? O nyoko tseya gore o na le lešidi. Fote o ka sa nyake le go mo maka monghanago. Byalo Sathane o nyaka gore ga Jehova re mo tseye ka mokgonone!

18. Ke ntaba di sa nyake re tšhaba bakgu?

¹⁸ Dikereke tse dingwana di tšhutisa gore mo motho a kgwa, o ba sepoko. Dikereke tsone di tšhutisa gore re hlompe batho bone fote re ba tšhabe ka taba la gore di ka makega ba be banghana ba rune kela manaba ya magolo. Batho ba go tlala ba tshepa matsaka yane. Ba tšhaba batho ba go kgwa, ke tsona tso di makang gore ba rapele bona ba lesetsa go rapela Jehova. O sa lebale gore bo ba kgwileng a ba kwe selo, byalo a di nyake re ba tšhaba. Re makiye ke Jehova. Ke Modimo wa mannete, fote di nyaka re rapele yene a ntoši.—Kutullo 4:11.

19. Go tšiba nnete ka likgu go re gelepa ka ying?

¹⁹ Mo re šele re tšiba nnete ka likgu, re tlemolugiye ga matsaka ya ba dikereke. Fote nnete yone yi re gelepa gore re thogo kwisisa dilo tsa go bafala tso Jehova a re tshepisang tsona ka tsa lephelo la rune le ka dinako tsa ku mahlong.

20. Re nyoko tšhuta ka ying ga tema ya go latela?

²⁰ Ku botala, lelata le lengwana la Modimo lo ba reng ke Jobo le butsisiye gore: “Mo motho a kgwa, nje di ka makega gore a tle a phele fote?” (Jobo 14:14) Nje di ka makega tsa gore motho ye a šeleng a kgwile a boye a phele fote? Phetolo ye Modimo a re neyang yona ka ho Baebeleng yi jabodisa setereka. Re nyoko yi kwa gabutši ga tema ya go latela.