Jehova o Nrufiye ka Šala ke sa Tshepe

Mo ke šele ke thomisiye go phayona, go yye gwa thulega lešuba le lengwana la go maka gore lephelo laka le tšhentšhe ka mokgo ne ke sa nagana. (Maef. 3:20) O ka makala gore tsotsone di makegiye byang. Yema ke tle natso ka letheto.

Ke belegediwwe Berlin ya ku Jeremane, ke mo go se botala Ntwa ya Bobedi ya Lefase yi thomisiye ka 1939. Mo ntwa yi šele yi bakiye mafelelong ka 1945, Berlin ba yye ba yi hlasela ka dibhomo tsa go lahla ke dielebhreyi. Ye nngwana bhomo yi yye ya wela ga layini yo ne re dula ga yona ke mokane nna le ba mutši wa geru re yye ra tšhabela ga poleke ya gore re ka thogo pasopega. Ka nthago re yye ra ya Erfurt, ga gore mmane o belegediwwe gona, gore re thogo tšhireletsega.

Mmane a sanka a lesetsa go nyaka nnete. O yye a bala dipuku tsa batho ba go tšhutisa dilo tsa go fo tikhandela a boya a nyakolla madumedi ya mangwana mara a fo boya a yitsa. Gana hala ga bo 1948, Dihlatse tsa Jehova ka dipedi di yye tsa tla ga geru. Mmane o yye a di yamogela a boya a ro di butsisa le diputsiso tsa go tlala. Go soko bane go fela awara, mmane o yye a botsa nna le sesi a re, “Ye lune, nnete yela ke yi krayye!” Ka nthago ga mone, nna le mmane le sesi re yye ra thomisa go ya mogahlanong ku Erfurt.

Ka 1950, re yye ra boyela nthago ku Berlin, ra thomisa go gahlanela le phutego ya Berlin-Kreuzberg. Mo re le gana hone Berlin, re yye ra rurela ga poleke ye nngwana ya gana hone, ra thomisa go gahlanela le phutego ya Berlin-Tempelhof. Mo goya-goya, mmane o yye a kolobetsiwa, mara nna ke mo ke kamaka. Anthe mara ne ke kenne king?

GO HLULA TABA YA GO BA LE DIHLONG LE GO KWA KE TSHWATA

Ke mo ke totoba ka matla ga tso tsa Modimo ka taba la dihlong. Ke tsere mengwaga ka mmedi ke ya tšhomong, mara a sanka ka tšhomayelela motho le ka wwoši. Dilo di yye tsa thomisa go tšhentšha mo ke thomisa go tseya nako ya go tlala ke na le magageru ya ka ho phutegong, ya gore ne ma na le lešiši fote ma tineyele ga Jehova. Ba bangwana ba yye ba tiyisela go hlopegisiwa ku kampeng ya mahloriso ya Nazi kela ga dijele tsa Bohlabela Bya Jeremane. Ba bangwana ke mo ba di tšiba tsa gore ba ka fo bolayiwa ka taba la go tseya dipuku ka makhukhung ba tla natso ka jele ya Bohlabela Bya Jeremane. Tso ba di makiyeng di yye tsa ntikisa pelo. Ke yye ka di bona gore batho bowa ba berekela Jehova le magagabo bona le mo go nkga likgu, byalo sosone se ra gore le nna di nyaka ke lahle dihlong.

Ka 1955, re yye ra tšwa letsima la go kgetega la go tšhomayela, go tlugisela gana hone ke yye ka napa ke lahla dihlong. Mogageru Nathan Knorr o yye a bolabola ga lengwalo lo ne le gatisiwwe ga Informant,a a re letsima lowa ke le legolo ga matsima ka mokana ga wona ya gore mokgahlo o yye wa ba nawo. O tokegele ka gore, mo batšhomayedi ka mokana ga bona ba ka fo kena temeng, “re nyoko ba le kgwedi ya go sa tshwane le dikgwedi tse dingwana tsa go tšhomayela tso di yyeng tsa ba gona lefaseng ka mokana ga lona.” Go f’lo makega ka mokgononeng! Go se botala, ke yye ka tineyela ga Jehova ke mokane nna le papa le sesi ra kolobetsiwa ka 1956. Ka nthagonyana di yye tsa nnyaka gore ke tseye sepheto se sengwana se segolo stereka.

Ke botala ke di tšiba gore tsa go ba mošupatsela ke mong tsona-tsona, mara ke mo ke fo tshwara ku ke lesa. Sa mathomo, ke yye ka tšhuta go reka dilo le go di rekisa ga dinaga tse dingwana. Mo ke soko bane ke ba mošupatsela, ke mo ke nyaka go thomisa ka go bereka gore ke thogo ba segele ga mmereko waka. Ke mokane ka 1961 ka bereka Hamburg mo go yemang dikepe ku Jeremane. Ke mo ke kwana ka matla le mmereko waka la gore ke mo ke fo dula ke thisa mo ke tshwanele ke ngwadise go ba mošupatsela. Ke mo ke nyoko maka byang mara?

Di njabodisa ka matla go bona gore Jehova o n’gelepiye a berekisa magageru gore ke thogo bona gore go mmerekela ke selo se segolo. Ba bangwana ba banghana baka ke mo ba šele ba thomisiye go ba mašupatsela, tsotsone di makiye gore le nna ke nabele. Go tokegela gana hone, Mogageru Erich wa ga Mundt wa gore ke mo a le kampeng ya mahloriso o yye a ntiyisa ka matla gore ke tshepele ga Jehova. O yye a re ku kampeng ya mahloriso magageru ya gore ke mo ma tshepa wona beng ma sa tshepele ga Jehova, ma yye ma feleletsa ka go lelemela. Mara bo ba yyeng ba tshepela ga Jehova ba yye ba dula ba tshepega fote ba gelepa ka matla ka phutegong.

Mogageru  Martin wa ga Poetzinger wa gore o yye a feleletsa a bereka le Mogoba wa go Lawola o yye a ya mahlong a tiyisa magageru ya mangwana a re: “Lešiši ke selo se segolo ka matla!” Ka nthago ga go ghayela ka so a se bolabodiyeng ke yye ka lesetsa mmereko ke mokane ka June 1963 ka thomisa go ba mošupatsela. Wa tšiba a ke tisole ka so ke se makiyeng! Ka nthago ga dikgwedi ka dipedi ke soko bane ke nagana ka go nyaka mmereko wo mongwana, ba yye ba nkgopela gore ke bereke ke le mošupatsela wa go hlawolega. Go soko bane go ya kaye, Jehova o yye a nrufa ka šala ke sa tshepe. Ba yye ba mpitsa gore ke tle ga tl’lase ya bo 44 ya sekolo sa Gilead.

GO TŠHUTA DILO TSE DIKGOLO GILEAD

Se sengwana sa go jabodisa so ke se tšhutiyeng ga mogageru Nathan Knorr le mogageru Lyman Swingle ke gore “O sa yakgoswe o nagana go lesetsa mmereko wo o wo makang mo ga Modimo.” Ba re tiyisiye gore le mo di baba re sa lesetsi mmereko wa rune. Mogageru Knorr o butsisiye gore: “King so o nyoko dulang o naganne ka sona? Ke dithila, dikhukhununu kela go hlupega? Kela o nyoko lebelela dihlare, mabhlomu le difahlego tsa batho mo di kene di ngwalangwala? Titšhutise go kwana le batho!” Tšatši ye nngwana mo Mogageru Swingle o yye a fogafoga dinepedi mo a bolabola ka gore ke ntaba ba bangwana ba yye ba feleletsa ba lahlele tewu. A šinya a ro yemisa polabolo yage gore a thogo kgiba. Sosone se yye sa ntikisa ka matla ke mokane ka tipotsa gore nka sa tsoge ke tšebisiye Kreste le magageru ya go tshepega.—Mat. 25:40.

Mo ba šele ba re butsiye gore ro berekela kaye, magageru ya mangwana ya go bereka Bethele ma yye ma butsisa ba bangwana ho ga rune gore ba re romela kaye. Ke mo ba jabola mo ba kene ba kwa go hlayiwa mabitso ya dipoleke tsa mohlobohlobo mara gwa sa be ka mokgonone mo go segela nako ya gore nna ke hlaye gore ke ya: “Congo (Kinshasa).” Ba yye ba fo kgomolela ka gonyana ke mokane ba re: “Yii, Congo! Jehova a be nago!” Ka dinako tsotsone, Congo (Kinshasa) ke mo go bolabodiwa ka yona ditabeng gore yi na le dintwa, batho ba ba hirela gore ba ye ntweng fote baa bolayana. Mara ke yye ka fo nagana ka tso ke yyeng ka di tšhuta ku Gilead. Mo re fetsa sekolo ka September 1967, nna, Heinrich Dehnbostel le Claude Lindsay re yye ra ya Congo, Kinshasa.

POLEKE YA GABUTŠI YA GO TŠHUTISA BARUMIWA

Mo re šele re segele ku Kinshasa, go re tsere dikgwedi ka ditharo gore re tšhute se-French. Re yye ra sobelela Lubumbashi ga gore ke mo ba re ke Elisabethville, thina le mo go kgerang Zambia ka borwa bya Congo. Re yye ra rurela mutšing wa barumiwa ka teng-teng ga toropo.

Ka taba la gore ke mo go soko bane go tšhomayediwa ku Lubumbashi, tsotsone di re jabodisiye ka matla ka taba la gore ke mo go le rune ba mathomo ba go tšhomayela ga poleke yone. Go soko ya kaye, ke mo re šele re na le batho ba go tlala bo re tšhutang nabo Baebele. Fote re yye ra tšhomayelela banna bo ne ba bereka mmušo le maphodisa. Ba go tlala ba yye ba šupetsa gore ba hlompa Lentsu la Modimo le mmereko wa rune wa go tšhomayela. Batho ba gona ke mo ba bolabola Seswahili, byalo nna le Claude Lindsay re yye ra tšhuta mmolabolo wone. Di so yi kgole, re yye ra kgopediwa gore re ye bereka ga phutego ya mmolabolo wa Seswahili.

Le mo ne go na le dilo tsa go tlala tsa go jabodisa, tsa go re ghula le tsona ke mo di le gona. Ga go tlala ke mo re gahlana le masole ya go tlayila le maphodisa ya go hlupa, ka ho thoko ba re sola ka dilo tso re sa di makang. Tšatši ye nngwana mogoba wa maphodisa o yye wa re kenela re sa tshwere mogahlano ke mokane ba re tseya ba re yisa maphodiseng ba re beya gona go segela ka 10 ya bošego re duli mo fase.

Ka 1969, ba yye ba mmaka mopotulugi. Ga modukulugo wone, ke mo re sepela mašahleng ya Afrikha re sepela diawara le diawara ga ditsela tsa maraga. Ga poleke ye nngwana yo ne re le ga yona, ke mo go na le kgokgo ya gore yi yetsela ka fase ga mpeto waka. Nka sa tsoge ke lebele ka mokgo ne yi ntsosa go sa le ka phu. Ke jabola setereka mo ke nagana ka dilo tso ne re di maka le magageru mo re kene re wora mollo ka malobana, re bolabola ka Baebele.

Tse dingwana tsa dintshetshere tso ne re gahlana natso ke batho ba gore ke mo ba timaka nkare ke bona Dihlatse tsa Jehova, mara gabutšibutši ba yema le mokgahlo wa dipolotiki wa Kitawala.b Ba bangwana ba yye ba ro feleletsa ba kolobetsiwwe le go maka mmereko wa ka ho phutegong go le bagolo. Ba go tlala bo ne ba timakisa di ba šitiye go woka magageru ya mannete. (Juda 12) Ka go nyana ka go nyana, Jehova o yye a yedisa phutego yage fote a maka gore ba go tlala ba tle nneteng.

Ka 1971, ke yye ka yisiwa ofising ya lekala ya Kinshasa, mo ke le gana hone ke mo ke bereka mebereko ya mehlobohlobo, go tshwana le wa go ngwala, wa go odha dipuku le wa go tshwaragana le ditaba tsa tšhomo. Mo ke le Bethele, ke tšhutiye go beyakanya mmereko wo mogolo ga naga ya gore ke ye kgolo mara yi se na dilo tsa go tlala tsa gore re ka di berekisa. Ka dinako tse dingwana marifi ya ne re ma romela ka dielebhreyi ke mo ma tseya dikgwedi gore ma segele diphutegong. Marifi yane ke mo ba ma ntsha elebhreying ke mokane ba ma tšhela dikepeng tsa gore nakwenngwana o kraya di tseya mabeke di logele ka taba la mabhlomu yala ya go yatlala gedimo ga meetši. Le mo go le ka mokgonone, mmereko wo yye wa makega le mo re kene re gahlana le dintshetshere tsowa le tse dingwana.

Di yye tsa mmakatsa stereka mo ke bona magageru ma lukiselela megahlano ye megolo ka tšheleta ye nyana. Ba yye ba yaga diralo ka mobu wa diwolo ke mokane ba maka mapharo ka mabyang ya go lefa ba boya ba loga mabyang yane ba maka ditulo ka wona. Ba yye ba berekisa mahlaka mo ba yaga ntlo ke mokane ba berekisa mesemo kela ditafola mo ba rulela. Ba yye ba berekisa diphate tsa mohlare gore ba make dipikiri tsa go kokotela. Ke yye ka jabodisa ke dipolane tsa magageru le go hlalefa ga bona. Ke yye ka thomisa go kwa ke ba nyaka ka matla. Ke yye ka šala ke ba gopola ka matla mo ke šele ke tlugiye ke yye go gongwana!

GO BEREKELA KENYA

Ka 1974, ke yye ka ya ofising ya lekala ya Nairobi ku Kenya. Ke mo go na le dilo tsa go tlala tso ne re tshwanele re di make, ka taba la gore ofisi ya lekala ya Kenya ke mo yi gelepana le lesome la dinaga tse dingwana, tsa gore tse dingwana tsa tsona ke mo di rakela mmereko wa rune. Ba yye ba nromela ga dinaga tsowa ga go tlala nyana, ka matlamatla ku Yitopiya, ga gore magageru ke mo ma hlorisiwa fote ma tiyisela tsa go tlala. Ba go tlala ga bona ba yye ba teyiwa, ba ba hlahlela le jele ka thoko ba kene ba bolaya ba bangwana. Mara ba yye ba tiyisela ka taba la gore ke mo ba mamarele Jehova fote le bona ka bobona ba mamarelanne.

Ka 1980, go makegiye selo se sengwana sa go jabodisa sa go tšhentšha lephelo laka mo ke nyala Gail Matheson, wa gore ke mo a tšwa Canada. Nna le Gail, ke mo re le ga tl’lase ka yyoši nakwela re le ku Gilead. Re yye ra ngwalelana marifi. Gail ke mo a bereka go le morumiwa ku Bolivia. Ka nthago ga 12 ya mengwaga, re yye ra gahlana fote ku New York. Ka nthago re yye ra nyalana ku Kenya. Wa njabodisa Gail ka taba la gore o fo dula a nagana ka tso tsa Modimo. O sa fo ya mahlong a n’gelepa fote ke mo nyaka ka matla.

Ka 1986, nna le Gail ba yye ba re romela go ye bereka mmereko wa bopotulugi, nna ka thoko nkene ke bereka le komiti ya lekala. Mmereko wa go potologa ke mo wo nyaka gore motho a ye le ga dinaga tsa go tlala tsa gore ke mo di le ka fase ga lekala la Kenya.

Ke sa gopola re lukiselela mogahlano wa ku Asmara (Eritrea) go le ka 1992, ga gore mmereko wa rune ke mo ba sa wo rakele ga poleke yone. Sa go kwisa go baba ke gore re f’lo kraya ntlo ya go gapela dipholwane ya lehlege, ka ho teng ga yona gonagona ke mo go hlagele le lengwana la go sa hlayisege. Ke yye ka šala ke makele mo go segela letšatši la mogahlano, ke bona magageru ma tšhentšhiye ka hala teng ga ntlo yela, yi le gabutši go bafele tsa gore Jehova a ka rapediwa ga yona. Batho ba yye ba tla le malapi ya go kgabisa ba boya ba ro kena fase ba kogela ga go sa hlamatsega. Re yye ra tikwisa ka mogahlano wone, wa gore ke mo go na le batho ba go teya gana ku ga 1 279.

Mmereko wa go ba mopotulugi ke mo wo se lola ka taba la gore ke mo re sepela dipoleke tsa go sa tshwane. Go gongwana re yye ra dula ga poleke ye nngwana ya go bafala stereka ya thina ga lewatle; tšatši le lengwana ra tikraya re le kompong ye nngwana re yetsela mokhukhung wa masenke, dithoyilete tsa gona ke mo wo sepela 100 ya dimitha mo o ya gona. Mara tsa go tlala ke ya di bona, ka gore ga go tlala tso re jabolelang go nagana ka tsona ke go bereka tšhomo le mašupatsela ya go ba le matšato. Mo go segela nako ya gore re tloge mone ga poleke yone re ye go gongwana, di yye tsa re nyaka gore re šiye banghana ba rune ba gore ke mo re nyoko ba gopola ka matla.

GO RUFIWA KA MATLA KU YITOPIYA

Mo go ye fela mengwaga ya bo 1980 ke mokane go le thina le go thomisa ya bo 1990, mmereko wa rune ke mo ba wo dumelele ka molawo ku ga dinaga tsa gore ne di le ka fase ga lekala la Kenya. Ke mokane gwa yagiwa ofisi ya lekala le ya naga, tsa gore di tikemele. Ka 1993, ba yye ba re yisa ofising ya Addis Ababa ku Yitopiya, ga gore ka nthago ga mengwaga go berekiwa ka makhukhung, mmereko wa rune ba yye ba wo dumelela.

Jehova o rufiye mmereko wa rune ku Yitopiya. Magageru ya go tlala ma yye ma kenela mmereko wa go ba mašupatsela. Batšhomayedi ba go teya ka ku ga 20 ya diphesente ba yye ba bereka go le mašupatsela ya nako ka moka go tlugisela ka 2012. Go tokegela gana hone, ba makiye gore go be le dikolo tsa go tšhutisa, gwa boya gwa yagiwa Diholo tsa Mmušo tsa go teya ka ku ga 120. Batho bo ne ba bereka Bethele ba yye ba rurela moyagong wa nyuwane ka 2004, fote re yye ra di bona gore Jehova o re rufiye nakwela go yagiwa Holo ya Mogahlano.

Mo mengwaga yi kene yi fela, nna le Gail re yye ra jabolela senghana so ke mo re le naso le magageru ya Yitopiya. Re ba nyaka ka matla ka taba la gore le bona ba na le dipelo tsa go bafala. Re lwa le bokoka gana byalo, byalo sosone se makiye gore ba re romele ga lekala la Yuropo. Mo re segela gona, ba yye ba re tshwara gabutši ba re pasopa, mara nnete ke gore barena re gopola banghana ba rune ba ku Yitopiya.

JEHOVA O GUDISIYE

Re di bonne ka mokgo Jehova a makiyeng gore mmereko wage wo gole. (1 Makor. 3:6, 9) Mo re beyisa, mo ke sa thomisa go tšhomayelela banna ba go bereka mmayini ku Rwanda ke mo go se na batšhomayedi. Gana byalo mo re bolabola re yitsa, go na le gana hala ga magageru ya go teya ka ku ga 30 000 ga naga yone. Ka 1967, ku Congo (Kinshasa) ke mo go na le gana hala ga 6 000 ya batšhomayedi. Gana byalo, go na le batšhomayedi ba go segela gana hala ga 230 000, fote ba go feta miliyoni ba yye ba tla segopotsong ka 2018. Ga dinaga tsone ka moka tsa gore ke mo di le ka fase ga lekala la Kenya, go na le batšhomayedi ba go teya ka ku ga 100 000.

Mengwaga ya go teya ka ku ga bo 50 ya go fela, Jehova o berekisiye magageru ya mohlobohlobo gore a n’gelepe ke kenele mmereko wa go ba mošupatsela wa nako ka moka. Dihlong tsona ke sa le natso, mara ke tšhutiye go tshepa Jehova. Tso ke gahlanneng natso ku Afrikha di n’gelepiye gore ke lefise pelo fote ke kwa ke yenele. Nna le Gail re jabodisa ka matla ke magageru ya gore ma yamogela bayeng, ma tiyisela mathatha fote ma tshepa Jehova. Ke kwa ke yi leboga ka matla taba yowa ya gore Jehova o re šupetsiye gore wa re nyaka. Jehova o nrufiye ka šala ke bafele.—Pis. 37:4.