Jehova o ‘Wolodiye Ditsela Tsaka’

BABELEGI BAKA BA N’YETETSIYE GORE KE THOGO KRAYA MONG YONA TSELA

Ka mongwaga wa bo 1920 mo babelegi baka ba soko bane ba šadha, ba yye ba tšhuta nnete. Ke belegiwwe mathomisong ya 1939. Mo ke sa gola ku England ne ke ya megahlanong ya Sekreste le babelegi baka fote ke jabolela Sekolo sa Mmereko wa go Lawola ke Modimo. Le lekgono lowa, a ke lebale gore ne ke tikwa byang mo ke kalama gedimo ga lebhokisi gore ke lefe ka gonyana gore ke thogo bona ka ku ga seralo mo ke beya polabolo yaka ya mathomo. Ke mo ke na le kobodi ya mengwaga fote mo ke lebelela batho ka mokana ga bona ba bagolo ba ntheetsele, ke mo ke hlagasela ka matla.

Papa ke mo a nngwalele lekhate la tso ke nyoko di bolabolang mo ke segela tšhomong fote ne di sa lefa. Mo ke thomisa go tšhomayela mutši ka mutši ke le ntoši ne ke na le mabala ya mengwaga. Ne ke sa jabola lona mo mong wa mutši a bala lekhate lone laka ke mokane a boya a yamogela puku ya gore “Let God Be True”! Ke f’lo napa ke tabogela go ye botsa papa. Mmereko wa go tšhomayela le megahlano ke mo di njabodisa ka matla di boya di maka gore ke ro nabele go berekela Jehova dinako ka moka.

Nnete ya ka ho Baebeleng yi thomisiye go ntikisa ka matla ka nthago ga mo papa a maka gore ke dule ke kraya di maghazini tsa Sewokamelo. Mo maghazini wo mongwana le wo mongwana wo segela ka poso, ne ke wo bala di mpaba. Ke yye ka thomisa go tshepela ga Jehova ka matla ke mokane tsotsone dya maka gore ke tineyele gage.

Ba mutši wa geru ke mo go le di vakaši ka 1950 ga mogahlano wo mogolonyana wa Theocracy’s Increase ku New York. Ka Labone ka di 3 tsa August, dipolabolo tsa letšatši lone ka mokana ga tsona ke mo di na le taba ya gore “Missionary Day.” Ka letšatši lolone, Mogageru Carey Barber wa gore ka nthagonyana o yye a bereka go le wa ba Mogoba wa go Lawola, o yye a beya polabolo ya bo ba yang go kolobetsiweng. Ka nthago mo a fetsiye go butsisa bo ba yang go kolobetsiweng diputsiso ka dipedi mo a fetsa polabolo yage, ke yye ka yemelela ke mokane ka re, “Eya!” Ke mo ke na le 11 ya mengwaga mara ne ke di tšiba gore so ke se hlawodiyeng ke mong selo se segolo ka matla. Mara ne ke tšhaba go kena ka meetšing ka taba la gore ke mo ke sa di tšibi tsa go hlapela. Malome waka o yye le nna mone meetšing, ke mokane a leketsa go ntiyisa gore ke sa hlagasele go ka sa ro sinyega selo. Nnete, a gwa sinyega selo le mong mawoto yaka ne ma soko bane ma segela ku tengteng ga meetši. Magageru ma yye ma neyetsana ka nna; wa gore ne a nkolobetsa le wa go nkakula a mpeya ka tawong. Go tlugisela ka tšatši lolone la go jabodisa, Jehova o yye mahlong a kene a wolola ditsela tsaka.

GO HLAWOLA GO TSHEPA JEHOVA

Ke mo ke nyaka go ba mošupatsela mo ke fetsa sekolo mara mathitšhere yaka ke mo ma nkutšetsela gore ke ye yunivesithi. Ke mo ma sa n’wonisi, ka fo šinya ke ma theetsela ke mokane ka ya yunivesithi mara ke yye ka yakgoswa ke di bona tsa gore ke šitegiye go yemelela nnete ke šišimele ka fo kena ka hlogo ka matla ga tso ke di tšhutelang yunivesithi, byalo ke yye ka segelela sepheto sa gore ke lesetse yunivesithi. Ke butsiye Jehova taba yone ka thapelo ke mokane ka ngwalela mathitšhere lengwalo la go ma hlatollela gore mo mongwaga wo fela ke ya tloga. Ka taba la gore ne ke tshepela ga Jehova ka matla ke yye ka sa jikajiki ka napa ka thomisa go ba mošupatsela.

Mmereko waka wa nako ka moka wo thomme July 1957 toropong ya Wellingborough. Ke yye ka kgopela gore magageru ya Bethele ya ku London ma n’gelepe ke kraye mogageru wa gore ke botala a maka mmereko wo fote wa gore nka tshwarisana naye ga wona. Ke mokane Mogageru Bert Vaisey gwa ba yene ye a ntšhutisang mmereko fote mokgwa wage wa go bereka wo n’gelepiye gore ke thogo bereka tšhomo ke sa thise. Ga phutego yone ke mo go na le kobodi ya batšhomayedi ba gore ke magageru ya basadi ba gore šele ba gudiye ke mokane gwa ba Mogageru  Vaisey le nna. Go lukiselela le go tšhela letsogo ga megahlano yone ka mokana ga yona go nthulele mašuba ya go tlala ya gore ke thogo tshepela ga Jehova ke boye ke šupetse gore ke na le tumelo.

Ka nthagonyana ga mo ke duli jele ka taba la mo ke ganne go kenela tsa ntwa, ke yye ka gahlana le Barbara mogageru wa mosadi wa gore ke mošupatsela wa go hlawolega. Re šadhiye ka 1959, ke mo re tikemisele go bereka go gongwana le go gongwana mo ba re kgopelang gore re ye gona. Mathomisong, re yye Lancashire ku Lebowabodikela bya England. Ka January 1961, ba mmeme ga Sekolo sa Batšhomayedi ba Mmušo ku Bethele ya London sa gore se tseya kgwedi. Mo ke fetsa ga sekolo sone, ke makele ka matla mo ba nneya mmereko wa go potologa. Mopotulugi wa gore ke botala a potuloga o re tšhutisiye mmereko wone ka mabeke ka mabedi ku toropong ya Birmingham fote ke mo ba n’dumelele gore ke tle le Barbara. Ke mokane mo re fetsa ra boyela mo ne re tshwanele re berekele gona dimitšaneng tsa Lancashire le Cheshire.

GO TSHEPELA GA JEHOVA GO PHALA DILO KA MOKA

Ka August 1962 mo re sa yye ga go ya, re yye ra kraya lengwalo la go tšwa ofising ya lekala. Ka ho teng ke mo go le difomo tsa Sekolo sa Gilead! Ka nthago ga mo re rapele ka taba yone, nna le Barbara re yye ra tlatsa difomo tsone ke mokane ra di romela ka go yakgoswa ofising ya lekala. Mo go šele go takamele kapheta ya dikgwedi, ke mo re šele go segele nako ya go ya Brooklyn ku New York, gore re ye kena tlelase ya Gilead ya bo 38 ya gore re nyoko fetsa lesome la dikgwedi re tšhutisiwa Baebele.

Ga Sekolo sa Gilead a sanka ra fo tšhuta ka Lentsu la Modimo le mokgahlo wage fela mara ba re tšhutisiye le ka magageru ya lefase ka mokana ga lona. Le mo mengwaga wa rune yi sa teya gana hala ga bo 20 re tšhutiye tsa go tlala ga magageru wo ne re kena nawo tlelaseng. Go bereka ka moka matšatši le Mogageru Fred Rusk wa gore ke ye mongwana wa bo ne ba re tšhutisa, ke mo go le selo so ke se tseyelang gedimo ka matla. Mo a kene a re tšhutisa, so a yyeng a se šihlela ka matla ke taba ya go wolola ka go loka, go leng go yetetsa le go neya mayele o berekisa Baebele ka moka nako. Ga bo ba neyyeng dipolabolo ga tlelase yone ke mo go le magageru ya gore ke botala ma berekela Jehova, ya go tshwana le Nathan Knorr, Frederick Franz le Karl Klein. Re tšhutiye tsa go tlala le ga Mogageru A.  H.  Macmillan wa gore o tinyanafatsiye ka matla, polabolo yage yi re tšhutisiye ka taba ya ka mokgo Jehova a gelepiyeng batho bage, magageru ya ka ho mokgahlong wage mo ma gahlana le dintshitshire, go tlugisela ka mongwaga wa 1914 go segela mathomisong ga 1919!

MO GO TŠHENTŠHA MMEREKO

Mo tlelase yi le thina le go fela, Mogageru Knorr o butsiye nna le Barbara gore ba re neyye gore re ye bereka Burundi ku Afrikha. Ra napa ra ya ga layibhrari ya Bethele re nyoko bona ga Puku ya Mongwaga gore ke batšhomayedi ka ba kaye bo ba berekelang ku Burundi ka nako yone. Di re makatsiye ka matla mo re sa kraye le mong ka ssoši sa go hlatolla ka batšhomayedi bo ba leng ga naga yone! Eya, ne di fo šupetsa gore re ya ga tšhomo ya gore mmereko wa go tšhomayela a wo soko makiwa ga yona fote go le poleke ya gore ne re sa yi tšibi gabutši. Yii, ra napa ra thomisa go šekela! Mara go rapela go re gelepiye gore re kgibe.

Ga mmereko wa rune wa nyuwane, dilo ka mokana ga tsona ke mo di tšhentšhiye—ka mokgo bosang ka gona, setšo le mmolabolo. Gana byalo di nyaka re tšhute mmolabolo wa Sefrench. Ne di nyaka re kraye le poleke ya go dula. Ka nthago ga matšatši ka mabedi re segele hone, ye mongwana wa gore re kenne naye ga tlelase ya Gilead ye ba reng ke Harry Arnott, o fitiye a re tsosela mo a tšwa mmerekong wage wa go tšhomayela ku Zambia. O re gelepiye gore re kraye ntlo gwa napa go ba yona ya mathomo ya barumiwa. Di so yi kgole, ba go lawola ba mmušo ba polekeng yone ba gore a ba tšibi mong selo ka Dihlatse tsa Jehova, ba yye ba thomisa go re ganetsa. Mola re sa re re thomisa go natefela ke mmereko wa rune, ba go lawola ba mmušo ba yye ba re botsa gore re ka sa duli ga poleke yone mo re se na mangwalo ya molawo ya go re dumelela gore re ka bereka ga poleke yone. Taba ya go kwisa go baba ke gore ne re tshwanele re ye ga naga ye nngwana, byalo ra ya Uganda.

Taba ya gore ke mo re tshepela ga Jehova, yi makiye gore re sa šekele ka matla mo re segela Uganda re se na sa go kena ka sona so ba reng ke visa. Mogageru wa ku Canada wa gore o bereka mo go gayelang batšhomayedi ba Mmušo gana hone Uganda, o kgonne go hlatollela motho wa go lawola bo ba go tšwa mafaseng ya mangwana seyemo sa rune, ke mokane ba re neya kapheta ya dikgwedi gore re lukise mangwalo ya rune ya go re dumelela gore re dula hone. Mo dilo di re sepelela gabutši ka mokgonone re yye ra di bona gore re gelepa ke Jehova.

Seyemo ga mmereko wa rune wa nyuwane ne se sa tshwane le ka gonyana le sa ku Burundi. Mmereko wa go tšhomayela ne wo kene wo makiwa hone Uganda le mo ne go na le 28 ya batšhomayedi fela ga naga yone ka mokana ga yona. Ga tšhomo yone re krayye ba go tlala ba gore ba bolabola Sekgowa. Ra yakgoswa re di bona gore mo nkare re nyaka go gelepa ba gore baa thogathoga gore ba ye mahlong ga tso tsa Modimo di nyaka re tšhute mmolabolo ka wwoši ga mebolabolo ya go tlala yo ba yi berekisang ga poleke yone. Re yye ra thomisa go tšhomayela ga poleke ya Kampala ga gore batho ba go tlala ba bolabola Seluganda ke mokane ra fetsa ka gore re tšhute mmolabolo wone. Di tsere mengwaga ya go tlalanyana gore re thogo bolabola mmolabolo wone gabutši mara go tšiba mmolabolo wone di makiye gore mmereko wa rune wa tšhomo wo be lula! Ra napa ra kwisisa gabutši gore king tso re tshwaneleng re di tšhutise bo re tšhutang nabo Baebele. Ke mokane bona ba thogo re kgotolela dipelo tsa bona ba re botsa gore ba tikwa ka mokgo mang ka tso ba di tšhutang.

MO RE YA GA GOYA

Mo re kene re jabodisa ke go kraya batho ba gore ba yamogela nnete, re yye ra jabodisa ke selo se sengwana fote—mo ba re kgopela gore re bereke mmereko wa go vakašela di poleke tsa naga yone ka mokana ga yona. Mo re kene re yetetsa ke ba lekala la Kenya, re yye ra thomisa go “vakašela ku le ku” gore re kraye di poleke tsa gore di gayela batšhomayedi, gore mašupatsela ya go hlawolega mo ma tla, ma thomise go bereka ga tsona. Ga go tlala ke mo re yamogela ke batho ba gore a ba soko bane ba gahlana le Dihlatse. Ke mo ba re yamogela ba boya ba re makela le tsa go ja.

Ka nthago ne re tshwanele re vakašele poleke ya gore a yi tshwane le tse dingwana. Mo ke tloga Kampala ke kalamme setimela matšatši ka mabedi ke ya toropong ya Mombasa ku Kenya ke mokane ka ya Seychelles ka sekepe, ga poleke ya gore yi dukulugiye ke meetši ya Lewatle la India. Mo goya-goya, go tloga ka 1965 go segela ga 1972, Barbara ke mo a ya le nna mo ke dula ke vakašela Seychelles. Ka dinako tsone, ke mo go na le batšhomayedi ka babedi ba gore ba dula ga dipoleke tsone tsa gore di ku thoko mara mo goya-goya ba yye ba yeketsega go segela yi ba phutego. Mo re kene re vakaša, re segele le ga magageru ya ku Eritrea, Yitopiya le Sudan.

Ku Uganda seyemo sa tsa dipolotiki se yye sa tšhentšha ka go yakgoswa ka nthago ga mo masole ma tsere mmušo. Dilo tsa go tshosa tso di makegiyeng ka nthago ga mengwaga yone, di makiye gore ke nape ke kwisise gore re šupetsa gore re hlalefiye mo re “patela Kesara dilo tsa Kesara.” (Mar. 12:17) Ka nako ye nngwana, batho ka mokana ga bona ba gore ke mo ba tšwa ga dinaga tsa ka tawong ke mo di nyaka ba ngwadise ofising ya maphodisa ya thina le mo ba dulang. Re yye ra fo maka ka mokgonone. Ka nthago mo go fitiye matšatši, mo nkene ke drayiva ke le Kampala, ke na le morumiwa ye mongwana re yye ra yemisa ke maphodisa ka mabedi. Ne re tšhogiye ka matla! Ke mo ma tseya nkare ke rune dimpimpi, ke mokane ba re yisa maphodiseng mo re segela ra hlatolla gore rune re fo ba barumiwa ba gore ba bebiye. Mo re ba botsa gore rune re šele re ngwadisiye, ba yye ba tithibisa ditsebe. Ba yye ba re tshwara ba re yisa ga maphodisa ya gore ma thina le mo re dulang. Mo re segela ga lephodisa lo le ngwadisang la gore fote le ya di tšiba tsa gore re šele re ngwadisiye, le yye la ba botsa gore ba re lesetse re sepele!

Ka dinako tsotsone, ne di kgongwetsa ka matla mo o ka kraya masole ma thibiye pata ma boya ma yemisa batho, fote ke mo di tinwisa ka matla mo nkare masole ya ma go yemisang ma gaputlele mokgete la go šinya ma tlayila. Ka moka nako ne re rapela gore re kgibe ke mokane re feta re tšhireletsegiye. Mara sa go kwisa go baba ke gore ka 1973 barumiwa ka mokana ga bona ba go tšwa dinageng tse dingwana ba ba butsiye gore ba tshwanele ba tloge Uganda.

Mmereko wa rune wo yye wa tšhentšha fote, ba re kgopela gore re ye Côte d’Ivoire, Bodikela bya Afrikha. Tsone ne di rela gore re nyoko tšhuta setšo se sengwana fote re boya re bolabola Sefrench ka moka nako fote re boye re tlwayele go phela le barumiwa ba mehlobo ye mengwana! Le ga seyemo sone, re di bonne gore Jehova wa re yetetsa, ka taba la gore le hone ga tšhomo ya rune ya nyuwane ne re kraya batho ba gore ba tinyanafatsiye, ba dipelo tsa go loka fote ba gore ba yamogela ditaba tsa go bafala ka go yakgoswa. Re le ka babedi re di bonne gore go tshepela ga Jehova go wolodiye ditsela tsa rune.

Ke mokane jikijiki ra kraya gore Barbara o na le khensa. Le mo re dula re boya gaye gatlele gore ba thogo gelepa Barbara, ka 1983 re yye ra di bona tsa gore re ka sa sa ya mahlong le go maka mmereko wa rune ku Afrikha. Tsone ke mo di re tšebisiye ka matla!

MO SEYEMO SE TŠHENTŠHA

Khensa ya Barbara ke mo yi ya mahlong mo re kene re bereka Bethele ya ku London, mo goya-goya o yye a hlokofala. Ba mutši wa Bethele ba nthegiye ka matla. Mogageru ye mongwana le mosadi wage ba n’gelepiye go yamogela seyemo gore ke ye mahlong nkene ke tshepela ga Jehova. Ka nthago ke yye ka gahlana le mogageru wa mosadi wa gore ne a tla a bereka Bethele a kene a dula gaye, wa gore o berekiye go le mošupatsela wa go hlawolega fote a šupetsa gore ga Jehova o mo nyaka ka matla fote o tlalele ga tso tsa Modimo. Nna le Ann re yye ra šadha ka 1989 fote go tlugisela ka nako yonone re sa na re bereka Bethele ya ku London.

Go tlugisela ka 1995 go segela ka 2018, ke jabolele go bereka ke le wa go yemela ntlokgolo ya lefase ka mokana ga lona ke vakašela dinaga tsa go segela gana hala ga 60. Mo re kene re vakašela ga naga ye nngwana le ye nngwana ke di bonne gore Jehova o rufa malata yage ka mokgo mang, ga seyemo se sengwana le se sengwana.

Ka 2017 re yye ra vakašela ku Afrikha fote. Ke mo ke jabolele go ya le Ann ku Burundi la mathomo re le ka babedi, di re makatsiye ka matla mo re bona gore batho ba go tlala ba yamogele nnete! Ga seterata sa gore ne ke fela ke tšhomayela ka mutši ka mutši ga sona ku nthago ka 1964, gana byalo se ke ntlo ya go bafala ya Bethele ya gore ga yona go bereka batšhomayedi ba go teya ka ku ga 15 500.

Ne ke jabodiye mo ke kraya letheto la dinaga tso ke tshwaneleng go di vakašela ka 2018. Ga mabitso ya dinaga tsone ne go na le Côte d’Ivoire. Mo re segela toropong ku Abidjan, ne ke kwa nkare ke gaye. Mo ke bona mo ba ngwadiyeng difowunu tsa bo ba dulang hone Bethele, ka napa ke tšiba gore ke mang ye a dulang ga ntlo ya thina le ya rune, ke mo go le mogageru ye ba reng ke Sossou. Ke sa gopola gore o yye a bereka go le mopotulugi wa ditoropo mo ke le ku Abidjan. Mara ke mo di ntlonnye, go se yene. Ke mo go le Sossou ye mongwana—ne go le morwayi wage.

Jehova a sanka a ntshepisa matsaka. Le mo re gahlanne le tsa go sasamela hala le hala, ke Ieboga ke sa fetsi go tšhuta gore mo re tshepela ga Jehova nnete o wolola ditsela tsa rune. Byalo, re lebelele ku mahlong ga pata ya gore yi na le lephelo la go gadimela lefaseng la nyuwane.—Diy. 4:18.