Lune ka Moka ka Phutegong, Gelepaneng bo ba go Tšhuta Baebele Gore ba Kolobetsiwe

1-2. Motho wa gore o sa tšhuta Baebele a ka gelepa ke mang gore a šinye a kolobetsiwe?

SESI ye ba reng ke Amy wa gore o dula hala Fiji o re: “Dilo tso ne ke di tšhuta ka ho Baebeleng ke mo di njabodisa ka matla. Ke mo ke di tšiba tsa gore yowa ke nnete. Mara ke thomisiye go tšhentšha ka nthago ga gore ke thomise go gahlana le magageru, ka šinya ke kolobetsiwa.” Taba yo yi makegiyeng ga Amy yi re tšhutisa selo se sengwana ke sowa sa gore a se tšhentšhi: Ga go tlala, ho nkare ba bangwana ka ho phutegong le bona ba gelepa motho ye a sa ga tšhuta Baebele, o ya a kene a butšwa, a šinya a segela le mo a kolobetsiwang.

² Motšhomayedi ye mongwana le ye mongwana a ka tšhela letsogo gore phutego yi gule. (Maef. 4:16) Mogageru ye mongwana wa gore ke mošupatsela kela lephayona ye ba reng ke Leilani wa gore o dula hala Vanuatu o re: “Ngwana a yi wa motho ka wweši. Ke nagana gore go fo ba ka mokgonone le ga taba ya go maka batho gore go be malata; ga go tlala di nyaka gore phutego yi tšhele letsogo gore motho a tsike nneteng.” Babelegi, mašaga, banghana le mathitšere ba tšhela letsogo gore ngwana a thogo butšwa. Tsotsone ba di maka ka go hlohletsela ngwanene ka go mo tšhutisa tsa lephelo. Byalo, batšhomayedi le bona ba ka yeletsa ye a sa ga tšhuta Baebele, ba mo tiyisa ba boya ba ba mešupetso ya gabutši gage, gore ba mo gelepe a šinye a kolobetsiwe.—Diy. 15:22.

3. Wene o tšhuta ying ga tso di hlayang ke Ana, Dorin le Leilani?

³ Ke ntaba motšhomayedi a ko ba a sa make tsona mo a ganela batšhomayedi mo ba re ba nyaka go gelepa ye a tšhutang naye Baebele? Lephayona la go hlawolega la go dula ku Moldova lo ba reng ke Ana le re: “Mo motho ye a tšhutisiwang Baebele a kene a ya mahlong, a ka sa gelepe ke motho ka wweši ga se sengwana le se sengwana so a se gayelang.” Dorin wa gore le yene ke lephayona la go hlawolega gana hone ga poleke yone o re: “Ga go tlala, o kraya batšhomayedi ba bangwana ba hlaya selo se sengwana sa gore ne ke sa se nagana, sa gore se tikisa pelo ya ye ke tšhutang naye Baebele.” Leilani yene o re: “Mo re šupetsa motho ye re tšhutang naye gore re mo nyaka ka matla, sosone se nyoko mo gelepa gore a thogo tšiba bo go leng batho ba Jehova.”—Joh. 13:35.

4. Re nyoko petapeta ka ying mo ga hlogotaba yowa?

⁴ Mara o ka tiputsisa gore, ‘Nka gelepa byang motho wa gore o sa tšhuta Baebele le mo a sa tšhutisi ke nna.’ Tla re boneneng gore re ka maka byang mo motšhomayedi ye mongwana a re bitsa gore re ye naye ga ye a tšhutang naye Baebele le gore re ka maka ying mo ye a tšhutang Baebele a thomisa go tla megahlanong. Fote re nyoko bona gore bagolo ba ka mo gelepa byang gore a šinye a kolobetsiwe.

MO YE MONGWANA A RE ‘KORIYE’ GA YE A TŠHUTANG NAYE BAEBELE

5. Di nyaka o make ying mo ba re koriye le ye balela motho?

⁵ Mo re ye tšhutisa motho Baebele, yewa wa gore ke yene a mo tšhutisang, ke yene ka matlamatla wa gore o tshwanele a mo gelepe go kwisisa Lentsu la Modimo. Mo ye a tšhutisang a go mema gore o ye naye ga ye a tšhutang naye, di nyaka o tseye gore wene le yene le ya berekisana. Wene sago ke go mo thega. (Mmo. 4:9, 10) Byalo, king so wene o ka ga se maka mo le kene le tšhutisa motho yene?

6. Mo ba go memme gore le ye tšhutisa motho Baebele, o ka yi berekisa byang tšhiko yo yi leng ga Diyema 20:18?

⁶ Lukiselela. Sa mathomo, handahanda le yewa a go bitsang, mo kgopele a go hlatollele tse dingwana ka motho yene. (Bala Diyema 20:18.) O ka fo butsisa gore: “Ye o tšhutang naye ke motho wa mošaga mang? Le ye tšhuta ka hlogotaba yifeng? O nyaka gore ye o balang naye a tšhute ying ga taba yowa? Di gona tsa gore di gabutši kela a di gabutši go di maka kela go di hlaya mo re kene re tšhuta naye? King so nka se hlayang sa go ka mo maka gore a tlalele ka mo ga tsa Modimo?” Ke nnete gore ye a mo tšhutisang a ka sa nape a go thuletsela diphiri tsa motho yene, mara tso a go botsang tsona di ka gelepa. Morumiwa ye mongwana ye ba reng ke Joy, o hlatollela bo a sepelang nabo ditaba tsa mohlobo wonone. O re: “Tsotsone di maka gore ye ke sepelang naye a kwe a nyaka go gelepa ye ke balang naye le gore a tšibe so a ka se hlayang mo re kene re bala.”

7. Ho ba go memme gore le ye tšhutisa motho Baebele, ke ntaba di nyaka o lukiselele?

⁷ Mo nkare ba go memme gore le ye tšhutisa motho Baebele, di ko ba gabutši gore o lukiselele puku yo le ko bang le yi bala. (Ezera 7:10) Mogageru Dorin, yela re bolabodiyeng ka yene ka ho kgakala, o re: “Mo ye ke sepelang naye a lukiselele, ke kwa ke jabola wa tšiba. Mo a makiye tsotsone, o kgona go tšiba mo a ka kenang gona.” Go tokegela gana hone, ye le balang naye a ka fo di bona le yene gore le tšiba ditaba tsa lune, a tseyela ga lune. Le mo o ka sa nape o lukiselela o kenelela, leketsa go kraya dilo tso di ka go gelepang go kwisisa tabataba.

8. O ka maka byang gore thapelo yago yi kwagale mo le le ga ye le balang naye?

⁸ Mo nkare ba go kgopele gore o rapele, di nyaka o nagane gore o nyoko re king ka taba la gore thapelo ke taba ye kgolo. Mo o maka ka mokgonone, thapelo yago yi nyoko kwagala. (Pis. 141:2) Hanae, wa gore o dula ku Japane, o sa gopola dithapelo tsa mogageru ye mongwana wa mosadi wa gore ke mo ba tla naye mo ba tl’le tšhuta naye Baebele. O re: “Ke mo ke di kwa gore senghana sage le Jehova se tiyye, ne ke nabela go tshwana naye wa tšiba. Mo ke kwa a hlaya lebitso laka mo a kene a rapela, ke mo ke tikwa barena gore le nna ke nna motho.”

9. Jakobo 1:19 yi šupetsa gore o ka ye gelepa ka mokgo mang mo ba yitseri o koriye ga ye ba tšhutang naye Baebele?

⁹ Thega ye a tšhutisang mo le kene le bala. Omamuyovbi, wa gore ke lephayona la go hlawolega wa go tšwa Nigeria, o re: “Motho wa gore o sipidisana nago mo o kene o tšhutisa, o gelepa ka matla. O bolabola dilo tsa go kwagala mara aa bolabole ka matla, ka taba la gore ye a tšhutisang ke yene a yetang mahlong.” Byalo o nyoko tšiba ka ying gore o ka bolabola le gore o ka re king mo go kene go badiwa? (Diy. 25:11) Mo ye a tšhutisang le ye a tšhutang naye ba kene ba bolabola, wene theetsela. (Bala Jakobo 1:19) Ke mokane mo nkare go thulega lešuba, o ko thogo gelepa. Ke nnete gore le wene di nyaka o thomise o nagana, o sa fo bolabola. Mo re beyisa, a di nyake o bolabola ka matla, o kraya mo ye a tšhutisang a sa re wa bolabola o fo mo tshwaranya molomo kela o fo thomisa taba ye nngwana ya gore a le bolabole ka yona hone. Mara o ka fo bolabola ka go nyana, wa bolabola ka mošupetso kela wa butsisa putsiso, nakwengwana o ka maka gore taba yo le bolabolang ka yona yi mo yelele. Ka dinako tse dingwana, o ka kwa nkare a go na so o ka se bolabolang. Mara mo o ka fo thanaka ye le tšhutang naye wa boya wa šupetsa gore wa tihlupa ka yene, o nyoko mo gelepa gore a ye mahlong.

10. Tso wene o yyeng wa gahlana natso di ka mo gelepa byang ga ye le tšhutang naye Baebele?

¹⁰ Mo yanegele tso o yyeng wa gahlana natso. Mo di kgonega, mo yanegele gore nnete yowa o yi krayye byang mara o sa lefisi, o mmotse gore o makiye byang gore o hlule tso ne di leketsa go go phiriketsa, kela gore wene Jehova o go gelepiye byang ho o kene o phela. (Pis. 78:4, 7) Tsotsone o mo hlayiselang tsona go ka fo ba tsona tso di nyoko go mo tikisa. Di ka fo yi tiyisa tumelo yage kela dya mo hlohletsela gore a šinye a segela le mo a kolobetsiwang. Di ka mo šupetsa gore a ka maka byang gore a thogo hlula tso di mo phiriketsang. (1 Pet. 5:9) Gabriel, wa gore o dula Brazil wa gore fote ke mošupatsela, o sa gopola gore o yye a gelepa king nakwela a sa tšhuta Baebele. O re: “Mo magageru ma n’yanegela tso ma yyeng ma gahlana natso, ke di bonne gabutši gore Jehova wa di bona gore re ghula king. Mo ba kgonne go di hlula, le nna di ka sa nšiti.”

MO YE A TŠHUTANG BAEBELE A TLA MEGAHLANONG

11-12. Mo ye a tšhutang Baebele a tla megahlanong, ke ntaba di nyaka re mo yamogele ka matsogo ka mabedi re jabodiye?

¹¹ Gore motho wa gore o sa tšhuta Baebele a šinye a kolobetsiwa, di nyaka a sa lofe megahlano ya phutego fote a berekise tso a di tšhutang. (Maheb. 10:24, 25) Ga go tlala, ye a mo tšhutisang ke yene a nyoko go mo mema gore a tle megahlanong. Mo a tla, ka mokana ga rune re ka mo hlohletsela gore a sa lesetse go tla megahlanong Holong ya Mmušo. Tsotsone re ka di makamaka byang mara?

¹² Mo yamogeleneng ka matsogo ka mabedi. (Mrm. 15:7) Mo a ka fo di bona gore le jabolela go ba naye, a ka napa a nabela go dula a tla megahlanong. Mo tamiseneng fote le mo tšibise ga ba bangwana, mara le sa make ka matla wa kraya a sa sa lokologa. Le sa fo tseya nkare go na le ye a mo pasopang, di ka makega gore ye a mo tšhutisang aa soko segela kela go na le tso di sa mo tshwereng. Le mo theetsele mo a kene a bolabola fote le šupetse gore le ya tihlupa ka yene. Mo le mo yamogela gabutši, tsotsone di nyoko mo gelepa ka ying? Bona tso di yyeng dya makegela Dmitrii wa gore o na le mengwaganyana a kolobetsiwwe fote gana byalo ke lelata ka phutegong. Mo a nagana ka letšatši la mo a thoma go ya megahlanong, o re: “Mogageru ye mongwana o mponne ke yemme ka tawong ga Holo ya Mmušo ke sa tšhoga lona, ke mokane a tla a mpitsa ka kena naye. Ba go tlala ba yye ba tla ba tl’le ntamiseng. Ke mo ke makele. Ke mo ke jabodiye ka matla, ka šinya ke re nkare go ka fo ba megahlano ka moka matšatši. Tsotsone ke mo ke ro thoma le go di bona.”

13. Mo le titshwara gabutši, tsotsone di ka mo gelepa ka mokgo mang ye a tšhutang Baebele?

¹³ Le titshware gabutši. Mokgwa wo le titshwarang ka wona wo ka gelepa ye a sa ga tšhuta Baebele gore a nape a di bona gore o krayye nnete. (Mat. 5:16) Vitalii wa gore o phayona ku Moldova, o re: “Ke di bonne gore batho ba ka phutegong ba phela byang, ba nagana byang le gore ba titshwara byang. A ke sa kamaka gore nnete Dihlatse tsa Jehova di sepela le Modimo.”

14. Mo motho a lebelela ka mokgo o titshwereng ka gona, tsotsone di ka mo gelepa byang gore a ye mahlong?

¹⁴ Gore ye a tšhutang Baebele a thogo kolobetsiwa, di nyaka a berekise tso a di tšhutang. Tsotsone ga go tlala ke letogo. Mara mo a bona gore le wene wa di berekisa ditšhiko tsa Baebele fote di ya bereka, a ka nabela go go yekisela. (1 Makor. 11:1) Yema re fo beyisa ka tso di makegiyeng ga Hanae ye re bolabodiyeng ka yene ka ho kgakala. O re: “Tso ne ke di tšhuta, ke mo ke bona magageru ma di berekisa. Ke yye ka di bona gore nka tiyisa ba bangwana ka mokgo mang, gore nka ba tshwarela byang le gore nka šupetsa byang gore ke ba nyaka ka matla. Ke mo ba dula ba bolabola tsa gabutši ka batho ba bangwana. Ke mo ke nyaka go tshwana nabo.”

15. Diyema 27:17 yi re ke ntaba di le gabutši gore re nghanelane le ye a sa tšhutang Baebele mo a kene a tla megahlanong?

¹⁵ Maka gore ye a tšhutang Baebele go be monghanago. Mo ye a tšhutang Baebele a kene a tla megahlanong, ariye mahlong o mo šupetsa gore wa tihlupa ka yene. (Mafil. 2:4) Leketsa go bolabola naye. O ka mo thanaka ga tso a tšhentšhiyeng ga tsona ke mokane wa mmutsisa gore di ya byang tsa go tšhuta Baebele, wa mmutsisa ka ba mutši wage le ka mmereko wage, mara o sa nape o ya ka matla. Mo le bolabola ka dilo tsa mošaga wonone, le ka fetsa le le banghana. Mo o mo maka monghanago, o nyoko mo gelepa gore a ye mahlong a šinye a kolobetsiwe. (Bala Diyema 27:17.) Gana byalo, Hanae ke mošupatsela wa nako ka moka. Mo a gopola nakwela a sa thomisa go ya megahlanong, o re: “Mo nkene ke ba le banghana ka phutegong, sosone se makiye gore ke kwe ke nyaka go ya megahlanong, fote ke mo ke ya le mo ke tinnwe. Ke mo ke jabola mo ke na le banghana baka ba nyuwane fote sosone se n’gelepiye gore ke lesetse banghana baka ba botala ba gore ke mo ba sa kwane le tso ke di dumelang. Ke mo ke nyaka go ba le senghana sa thina le Jehova le magageru. Byalo, ke yye ka segelela sepheto sa gore ke kolobetsiwe.”

16. King se sengwana so o ka se makang gore o gelepe ye a sa tšhutang Baebele gore a jabole mo a le megahlanong?

¹⁶ Mo ye a tšhutang Baebele a kene a ya mahlong fote a tšhentšha le maphelelo, mo gelepe gore a kwe a sa lahlega ka ho phutegong. Sone o ka se maka ka gore o sa mo kganyele. (Maheb. 13:2) Denis, wa ku Moldova, mo a gopola tso magageru ma mo makeleng tsona nakwela a sa tšhuta Baebele, o re: “Magageru ma re memme gatleletlele, nna le mosadi waka, gore re tle re fokatse nabo. Ba yye ba re hlayisela ka mokgo Jehova a yyeng a ba gelepa ka gona. Tsotsone di yye dya re tiyisa. Mo re kene re fokatsa le magageru, re di bonne gore gabutšibutši le rune re nabela go berekela Jehova fote ra di bona gore ku mahlong, lephelo le nyoko natefa ka matla.” Mo ye a tšhutang Baebele go šele go le motšhomayedi, o ka mmitsa gore a ye nago tšhomong. Motšhomayedi ye ba reng ke Diego wa ku Brazil, o re: “Magageru ya go tlala ke mo ma mpitsa gore ke ye nawo tšhomong. Wowa ke mo go le mokgwa wa gabutši wa go tšibana nawo. Mo nkene ke maka ka mokgonone, ke yye ka tšhuta tsa go tlala fote tsotsone di yye dya maka gore ke šutele thina le Jehova le Jeso.”

BAGOLO BA KA GELEPA BYANG?

17. Bagolo ba ka gelepa bo ba go tšhuta Baebele byang?

¹⁷ Tiphe nako ya go ba le bo ba gore ba sa tšhuta Baebele. Lune bagolo, mo le šupetsa bo ba gore ba sa tšhuta Baebele gore le ya tihlupa ka bona, tsotsone di nyoko ba gelepa gore ba ye mahlong ba šinye ba kolobetsiwe. Ayitsano le ka titlwayetsa go bolabola nabo mo le le megahlanong? Mo le ka gopola mabitso ya bona, ka matlamatla mo ba thomisa go fetola, ba nyoko di bona gore le ya tihlupa ka bona. Ayitsano le ka tipeyela nako ya gore le sepele le motšhomayedi mo a ye tšhutisa motho ye mongwana Baebele? O ka fo kraya o mo gelepiye ka matla, tsa gore le wene ke mo o sa di nagana. Mošupatsela ye mongwana ye ba reng ke Jackie, wa go dula Nigeria, o re: “Ba go tlala bo ke tšhutang nabo Baebele ba makatsa ke gore mogageru ye ke tlang naye mo ke tl’le bala nabo, ke mogolo.” Ye mongwana o yitseri: “Moruti wa rune a ka sa di make tsotsone. O vakašela ba gore ba ghannye, mo nkare baa mo patela!” Motho ye a hlayyeng tsotso o šele o tla megahlanong.

18. Bagolo ba ka maka byang gore ba make mmereko wa bona wo wo hlayang ke Mebereko 20:28?

¹⁸ Tšhutisaneng batšhomayedi le boye le ba tiyise. Lune bagolo, le na le mmereko wo mogolo wa go gelepa batšhomayedi gore go be digele tsa go tšhomayela le tsa go tšhutisa. (Bala Mebereko 20:28.) Mo nkare ye o sepelang naye o tšhaba go tšhutisa mo o le gona, o ka kgopela gore go be wene o tšhutisang. Jackie, yela re bolabodiyeng ka yene ka ho kgakala, o re: “Bagolo ba dula ba mputsisa ka bo ke balang nabo. Mo ke šitegang gona, baa n’yeletsa.” Bagolo ba ko ba ba berekiye ka matla mo ba tiyisa le go ba gelepa gore ba sa lahle tewu. (1 Mathes. 5:11) Jackie o re: “Di njabodisa ka matla mo bagolo ba ntiyisa ba boya ba mpotsa gore tso ke di makang ba di tseyela gedimo. Mantsu yane ma natefela nkare ke meetši ya go batela letšatši le re khi! Mo ba nthanaka, ba maka gore ke sa titšhoge fote di maka gore ke nape ke jabolela mmereko wo wa go tšhomayela ka matla.”—Diy. 25:25.

19. Ka mokana ga rune re ka jabodisa king?

¹⁹ Le mo nkare gana byalo a go na ye o tšhutang naye Baebele, o ka gelepa ye mongwana gore a tlalele ka matla ga tso tsa Modimo. O ka thega ye a tšhutisang Baebele ka diphetolo tsago tsa go kwagala tsa gore o di lukiselele gabutši, mara o sa bolabole ka matla. O ka nghanelana le bo go tšhutiwang nabo Baebele mo ba tla Holong ya Mmušo fote o ka ba mošupetso wa gabutši ga bona. Le bagolo ba ka tiyisa bo ba sa tšhutang Baebele ka go tipha nako ya go ba nabo le go tiyisa batšhomayedi ka go ba tšhutisa le go ba thanaka. Di jabodisa ka matla go tšiba gore re tšhediye letsogo ka go gelepa motho gore a nyake Papa wa rune Jehova fote a jabolele go mmerekela.