Di Gabutši ka Matla mo re Mamarelanne!

1-2. King so Jehova a se tseyelang gedimo ka matla, fote o nyaka gore rune re make ying?

JEHOVA o yi tseyela gedimo taba ya gore re tshwara batho ba bangwana byang. Jeso o tšhutisiye gore re nyake bayagelane ba rune go fo tshwana le ka mokgo re tinyakang ka gona. (Mat. 22:37-39) Gana hone go kena le bo ba gore a ba berekele Jehova. Mo re šupetsa gore re kwela bangwana, re ba re yekisela Jehova Modimo, yene ye a makang gore ‘letšatši lage le hlabele batho ba go sa loka le ba go loka fote o ba nisela pula.’—Mat. 5:45.

² Le mo nkare Jehova o kwana le batho ka mokana ga bona, bo ba gore ba ya mahlong ba maka tsa gabutši, o ba nyakang tsa nkare ke moka. (Joh. 14:21) O nyaka gore re mo yekisele. O re hlohletsela gore re “nyakanane” re le magageru re boye re sa ‘timakisi mo re re re nyaka batho.’ (1 Pet. 4:8; Marom. 12:10) Go nyakanana ga mošaga wonone re ka go tshwanisa le ka mokgo re tikwang ka gona ka lešaga la gore re le nyaka ka matla kela ka monghana wa rune ye mogolo.

3. Mo di tla ga taba ya go nyakanana, di nyaka re sa lebale ying?

³ Go fo tshwana le mo simelane sa ka ntlong se nyaka go pasopiwa le go tšheletsiwa gore se thogo gola, le taba ya go nyakanana yi fo ba ka mokgonone. Pawulo wa lepostola o butsiye Makreste gore: “Ariyeneng mahlong le nyakanana go fo tshwana le bana ba motho.” (Maheb. 13:1) Jehova o nyaka gore re ye mahlong re nyakanana. Hlogotaba yowa yi nyoko bolabola ka taba ya gore ke ntaba di nyaka re mamarelana le magageru, le gore re ka ya mahlong re di maka byang tsotsone.

KE NTABA DI NYAKA RE MAMARELANE?

4. Go fo ya ka mokgo Pisalema 133:1 yi hlayang, re ka maka byang gore re sa lisetsi go dula re leboga taba ya gore re selo ka ssoši le magageru? (Lebelela le dithombhe.)

⁴ Bala Pisalema 133:1. Re dumelelana le mopisalema ye a ngwadiyeng gore go nghanelana le bo ba gore ga Jehova ba mo nyaka ka matla go “gabutši” fote gwa “jabodisa.” Mara go fo tshwana le mo motho a sa tseyele hlogong ka mokgo mohlare wa gore o dula a wo bona ka moka matšatši wo bafeleng ka gona, le rune re ka feleletsa re tseyela fase ka mokgo taba ya go mamarelana le magageru yi bafeleng ka gona. Phela re dula re ma bona magageru yawa, fote di ka makega gore re ma bona gatlelenyana mo bekeng. Re ka maka byang gore re dule re ma tseyela gedimo? Re nyoko ro napa re ma nyaka ka matla magageru yawa mo re ka tineya nako ya go nagana ka gore ye mongwana le ye mongwana wa bona o nyakega ka matla ka ho phutegong le lephelong la rune.

5. Mo re šupetsana gore re ya nyakanana, tsotsone di ka tikisa ba bangwana ka mokgo mang?

⁵ Ba bangwana ba gore ba tla megahlanong ya phutego la mathomo, ba jabodisa ke taba ya mo ba bona re šupetsana gore re ya nyakanana. Ka taba la sosone fela, ba ka napa ba fetsa le pelo gore ba krayye mong yona nnete. Jeso o yitseri: “Batho ba ko di tšibeng gore le malata yaka—mo le nyakanana.” (Joh. 13:35) Tseya ka mošupetso wa Chaithra wa gore ke mo a le yunivesithi, fote a šele a tšhuta Bhayibele le Dihlatse Tsa Jehova. O yye a dumela mo ba mo mema gore a tle mogahlanong wo mogolo. Mo go fela letšatši la mathomo, o butsiye ye a balang naye Bhayibele gore: “Babelegi baka a ba soko n’haka. Mara ga mogahlano wowa wa lune, ka letšatši ka lloši fela, ba n’hakiye ga 52! Ke di bonne gore Jehova o berekisiye batho bowa go nšupetsa gore o nnyaka ka matla. Ke nyaka go ba ka teng ga mutši wowa.” Chaithra o yye mahlong a tšhuta fote o kolobetsiwwe ka 2024. Re ya di bona gore mo bo ba nyuwane ba bona dilo tsa gabutši tso re di makang, ga go tlala di ba tšhofa gore ba berekele Jehova.—Mat. 5:16.

6. Go šutela thina le magageru go ka re tšhireletsa ka mokgo mang?

⁶ Go šutela thina ka matla le magageru go ka re tšhireletsa. Mo Pawulo a bolabola le Makreste ya mangwana o yitseri: “Ariyeneng mahlong le tiyisana ka moka matšatši . . . gore go sa be le ye pelo yage yi thathafang ka taba la go sinya.” (Maheb. 3:13) Mo re ka kgongwela lela la gore re thomisa go keketlela kgole le pata ya go loka, Jehova a ka berekisa mogageru wa gore o ntshiye maahlo dikwakweng gore a thogo go gelepa. (Pis. 73:2, 17, 23) Dilo tsa mošaga wonone di re berekela ka matla.

7. Taba ya go nyakanana yi šagelana byang le ya go mamarelana? (Makolosi 3:13, 14)

⁷ Re ga mogoba wa batho ba gore ba karakara ka matla gore ba šupetsane gore baa nyakanana, byalo re rufiwa ka dilo tsa go tlala. (1 Joh. 4:11) Mo re beyisa, go nyakanana go re tšhofa gore re ‘ye mahlong re lefiselana pelo,’ fote tsotsone di maka gore re dule re mamarelanne. (Bala Makolosi 3:13, 14; Maef. 4:2-6) Nka taba lo mo re le megahlanong ya rune, re tikwa re le mong ga poleke ya gore go teyela moya wa go natefa, ya gore re rapela Modimo ga yona ya go phala mo re le go gongwana.

ŠUPETSANANENG GORE LE YA HLOMPANA

8. Jehova o maka ying gore a thogo re gelepa gore re mamarelana?

⁸ Taba ya gore re ngata ka yyoši lefaseng ka mokana ga lona ke mong mohlolo. Phela Jehova ke yene ye a makang gore tsotsone di kgonege le mo re kene re sa yenela. (1 Makor. 12:25) Bhayibele yi re, re ‘tšhutisa ke Modimo gore re nyakanane.’ (1 Mathes. 4:9) Re ka re Jehova o berekisa Mangwalo go re botsa gore di nyaka re make ying gore re thogo mamarelana. Re ka ‘tšhutisa ke Modimo’ mo re nyakolla gabutši tso a re tšhutisang fote re maka gore di re berekele. (Maheb. 4:12; Jak. 1:25) Tsotsone ke tso Dihlatse Tsa Jehova di karakarang go di maka.

9. Re tšhuta ying ga Maroma 12:9-13 ga taba ya go šupetsana gore re ya hlompana?

⁹ Lentsu la Modimo le re tšhutisa ka mokgo mang gore re mamarelane? Bala tso Pawulo a di hlayyeng ka taba yone, go fo ya ka mokgo go ngwadiwweng ga Maroma 12:9-13. (Bala.) Di nyaka re ma tseyele gedimo mantsu yawa ya gore “le kwe di le tšhofa gore le hlompe batho ba bangwana.” Tsotsone di rela gore king? Di nyaka gore go be rune ba mathomo bo re šupetsang ba bangwana gore ‘re ba nyaka ka matla’ ka go ba tshwarela mo ba kekemisiye, re ba yamogele re boye re sa konane le ga dilo tse dingwana. (Maef. 4:32) A di šinyi di nyaka gore o yemele mogageru ye mongwana gore a šutele thina nago. Tikwe ‘di go tšhofa’ gore o make ka mokgonone. Jeso o yitseri: “Mo le neya batho ba bangwana dilo, di jabodisa ka matla go phala mo ba neya lune.”—Meber. 20:35.

10. Re ka ba le matšato ka mokgo mang mo re ‘šupetsa gore re hlompa batho ba bangwana’? (Lebelela le sethombhe.)

¹⁰ Taba ye nngwana ke gore ka nthago ga gore Pawulo a hlaye gore re yete mahlong ga taba ya go šupetsana gore re ya hlompana, o re hlohletsele le gore re ‘bereke ka matla, re sa tshwate.’ Motho wa go bereka ka matla o na le matšato fote o ro bhahla mo a kenne fase. Mo ba mo neyye mmereko, o wo maka gabutši. Diyema 3:27, 28 yi re botsa gore: “Mo nkare wa di kgona go gelepa ba bangwana, o sa gane go gelepa bo ba nyakang go gelepiwa.” Byalo, mo re bona motho a nyaka go gelepiwa, re maka so re ka se kgonang gore re mo gelepe. A re thisathisi ra fo phuta matsogo re re kela ye mongwana o ko maka se sengwana gore a gelepe.—1 Joh. 3:17, 18.

11. King so se ka re gelepang gore re mamarelane?

¹¹ Mokgwa wo mongwana wo re ka šupetsang ba bangwana gore re ya ba hlompa ke mo re yakgoswa re ba tshwarela mo ba re gata dikhonse. Maefeso 4:26 yi re: “Letšatši le sa dikele le sa kwatiye.” Ke ntaba mara? Temanyana 27 yi re mo re ka sa make ka mokgonone, re nyoko ba re “thulele Diyabolo lešuba.” Jehova o re botsa ka Lentsung lage gatleletlele gore re tshwarelane. Makolose 3:13 yi re hlohletsela gore “Ariyeneng mahlong. . . le tshwarelana le sa kokole.” Mokgwa wa go di phala ka moka wa go re gelepa gore re mamarelane le magageru ke mo re ma tshwarela ga tso ma di kekemisiyeng. Mo re maka ka mokgonone, re gelepa gore ‘re dule re mamarelanne fote re bebiye ka taba la gore moya wa go hlawolega wo maka gore re be selo ka ssoši.’ (Maef. 4:3) Mo re fo yi beya nje, mo re tshwarelana, tsotsone di maka gore re ye mahlong re mamarelanne dya boya dya maka gore go bebe.

12. Jehova o re gelepa ka mokgo mang gore re tshwarelane?

¹² Ke nnete gore a di fefoge gore re tshwarele bo ba re kwisiyeng go baba. Mara re ka di kgona mo re gelepa ke moya wa Jehova. Ka nthago ga gore Mangwalo ma re hlohletsele gore re “nyakanane ka matla” le gore re ‘bereke ka matla,’ ma tokegele ka gore: “Re lisetse moya wa go hlawolega gore wo re neye matšato.” Byalo, moya wa Modimo wo ka re gelepa gore re šupetsane gore re ya nyakanana le gore re tshwarelane re sa kokole. Nka taba lo re kgopelang Jehova re sa fetsi gore a re gelepe.—Luk. 11:13.

“LE SA YAHLUGANE”

13. King so se ka makang gore re yahlugane?

¹³ Phutego yi na le ‘batho ba gore ka mokana ga bona’ a ba tshwane fote a baa gudisiwa go tshwana. (1 Thim. 2:3, 4) Mo re sa pasope, go sa tshwane hone go ka maka gore re sa mamarelane wa kraya re yahluganne ka taba la gore a re tseye dilo go tshwana, mo di tla ga taba ya mokgwa wo re yaparang ka gona le go tilukisa, ka mokgo re nyakang go yalafiwa ka gona kela le mong go tijabodisa. (Marom. 14:4; 1 Makor. 1:10) Ka gore “Modimo o re tšhutisiye gore re nyakanane,” di nyaka re pasope gore o sa kraye re šele re gapeletsa ba bangwana gore ba bone dilo ka mokgo rune re di bonang ka gona.—Mafil. 2:3.

14. Di nyaka re karakare gore re make ying fote ke ntaba?

¹⁴ Wa tšiba re ka yi kwalela ka tawong taba gore re yahlugane ka ho phutegong mo re ka fo karakara gore ba bangwana ba fo tikwa ba hlwayela ke moya mo ba na le rune fote ba kwa ba tiyelela ka moka dinako. (1 Mathes. 5:11) Gana byalo, batho ba gore ke mo ba šele ba bata ga tso tsa Modimo kela ba gore ke mo ba ba tlusiye ka phutegong ba šele ba buyye. Barena, re ya ba yamogela re re, wele-wele-wele! (2 Makor. 2:8) Bona tso di makegeleng sesi wa rune ye mongwana wa gore o buyye Holong ya Mmušo ka nthago ga lesome la mengwaga. O yitseri, “Ba ntamisiye ba kene ngwalangwala ba ro boya ba ntshwara ka letsogo.” (Meber. 3:19) Tsotsone di mo tikisiye go segela kaye? O re, “Di makiye gore ke kwe gore Jehova o n’gelepa gore ke boye ke jabole fote.” Mo re tiyisa ba bangwana, Kreste a ka re berekisa gore re yimulle bo ba gore ba ‘goga go baba fote ba kwa di ba roba.’—Mat. 11:28, 29.

15. King se sengwana so re ka se makang gore phutego yi dule yi mamarelanne? (Lebelela le sethombhe.)

¹⁵ Se sengwana so se ka makang gore re dule re mamarelanne, ke tso re di hlayang. Jobo 12:11 yi re: “Anthe tsebe a yi yona yi liketsang mantsu go tshwana le mo re kwa tsa go ja ka lleme?” Go fo tshwana le mo motho wa go yapega a kwa tsa go ja gore dya jega mo a soko bane a di neya ba bangwana, le rune re nyoko ba re maka gabutši mo re thomisa re nagana gabutši mo re soko hlaya se sengwana. (Pis. 141:3) So re nyakang go se segelela ke go dula re maka so re ka se kgonang gore tso re di hlayang di tiyise ba bangwana, di ba yimulle fote di ‘yagise le bo ba theetseleng.’—Maef. 4:29.

16. Ke bomang gabutšibutši ba gore ba tshwanele ba karakare gore be tiyise ba bangwana?

¹⁶ Banna le babelegi di nyaka ba ntshe maahlo dikwakweng gore tso ba di hlayang di thogo tiyisa ba bangwana. (Makol. 3:19, 21; Tito 2:4) Bagolo le bona di nyaka ba tiyise ba boye ba kgomoletse dinku tsa Jehova. (Jes. 32:1, 2; Magal. 6:1) Seyema se sengwana sa Bhayibele se re gopotsa gore: “Lentsu la gore le tšwa ka nako ya gabutši—le gabutši ka matla!”—Diy. 15:23.

‘RE ŠUPETSANE GORE KA NNETE RE YA NYAKANANA’

17. Re ka maka byang gore mo re re re nyaka magageru tsa mannete, re be re resa?

¹⁷ Johane wa lepostola o re hlohletsela gore re sa “fo botsa ba bangwana gore re ya ba nyaka ka molomo, di nyaka re šupetse ka tso re di makang gore ka nnete re ya ba nyaka.” (1 Joh. 3:18) Phela re tshwanele re nyake magageru di tšwa pelong. Tsotsone re ka di segelela byang? Mo re ka fetsa nako ya go tlala le magageru, re nyoko ba ngata ka yyoši fote re nyoko ro nyakanana la go sa hlayisege. Byalo, karakara ka matla gore o fetse nako le ba bangwana—mo o le megahlanong le mo o le tšhomong. Ba vakašele. Mo re maka ka mokgonone, re ba re šupetsa gore re “tšhutisa ke Modimo gore re nyakanane.” (1 Mathes. 4:9) Fote re nyoko dula re di bona ka maahlo ya rune gore “go gabutši fote di ya jabodisa mo bana ba motho ba dula ggoši fote ba kwana!”—Pis. 133:1.