TSA GO GELEPA MUTŠI | MOŠADHO

Tso le ka di Makang Mošadhong wa Lune Gore le sa Jelaselane

Mošadho wo ka sa phomelele mo bo ba šadhiyeng ba sa tshepane kela mo ye mongwana a naganela ye mongwana dilo tsa gore a di šiyo. O ka maka byang gore o sa fo tubisa ke selo sa gore a se šiyo?

Ga hlogotaba yowa

Jelase king?

Lentsu lowa “jelase” le na le dilo tsa go sa tshwane tso le relang tsona. Ga hlogotaba yowa, le rela ka mokgo o tikwang ka gona mo o bona nkare ye mongwana o šutela thina ka matla le ye o šadhiyeng naye kela mo ye o šadhiyeng naye a šutela thina ka matla le motho ye mongwana tsa nkare ba ro nyakanana. O ka kwa nkare mošadho wago wo kotsing. Mo nkare ka nnete go ka mokgonone, jelase ke mo yi thomisang gona. Go phala dilo ka mokana ga tsona, mošadho wo maka gore batho ka babedi ba mamarelane fote monna le mosadi ba ka maka so ba se kgonang gore ba tšhireletse mošadho wa bona.

Tšhiko ya Bhayibele: “Gore ba sa sa ba ka babedi, mara go be nama ka yyoši. . . . Byalo so Modimo a se swineleleng lejokong, go sa be le ye a se tlemollang.”—Matewu 19:6.

“Mo nkare mošadho wago wo kotsing, jelase re ka yi tshwanisa le motšhini wa go lla mo go swa wa go go pasopisa gore o make se sengwana o sa fo phuta matsogo.”—Benjamin.

Go fo tinaganela dilo tsa gore a di šiyo, tsotsone di hlohletsela ke ye a kokolang ka ye mongwana a fo tshosa ke selo sa gore a se šiyo. Go nyakanana tsa mannete go re gelepa gore re sa be le jelase ya mošaga wonone ya go kwaletsana. (1 Makorente 13:4, 7) Dr. Robert L. Leahy o ngwadiye gore: “Mo o na le jelase ga se sengwana le sengwana, o feleletsa o maka dilo tsa gore di ka sinya mošadho wago, wononeng o liketsang go wo tšhireletsa.”a

King so se makang gore le šinye le jelaselane?

Se sengwana so se makang gore o feleletse o na le jelase ke mo nkare ye o yyeng wa šadha naye la mathomo o yye a go sepela ka fase. Kela o ka kraya gore mošadho wa babelegi bago wo yye wa sinyega ka taba la go sa tshepege ga ye mongwana fote o tshosa ke gore le wene o ka makegela ke tsa mošaga wonone.

“Mo ke sa le ye monyana papa o yye kwana le mosadi ye mongwana a kene a šadhiye le mmane, byalo dya nthathafalela gore ke tshepe ba bangwana. Tsotsone di nkwaletsiye dya nšiya le lebadi, byalo ka dinako tse dingwana le monnaka a ke sa mo tshepa.”—Melissa.

Se sengwana fote: Mo o sa tshepe ye o šadhiyeng naye o ka fo yakgoswela go rwesa ba bangwana molato o nagana gore ke bona ba sinyang mošadho wago. Fote o ka thomisa le go tshepa gore mo o ka fo yikela taba yonone, ye o šadhiyeng naye o nyoko tloga a go šiya a ya gwe dula le ye mongwana.

“Monnaka ba yye ba mo kgopela gore a tle a bine mošadhong wa monghanage, tsotsone ne di rela gore ne ba nyoko mo pana le mosadi ye mongwana gore a bine naye. Ne ke sa di kwisisi tsotsone. Ke mmutsiye gore a gane.”—Naomi.

Mešadho a yi tshwane, yi fapana go ya ka dinaga le ditšo mara Makreste di nyaka ma yetetse ke ditšhiko tsa Bhayibele. Ayitsano Naomi ne a segelele sepheto sa gabutši ga taba yowa? Ka nthago ga mo mošadho wone wo šele wo fitiye, o yye a naganisisa ka yona a di bona gore nke a sa ganela monnage. O hlayye gore “Ne ke kwa ke sa tshepe monnaka. Ne ke nagana gore monnaka o ntshwanisa le basadi ba bangwana mara tsotsone ne di fo ba ka ho monaganong waka.”

Di se na taba gore king so se go makang gore o tikwe ka mokgonone, mo nkare jelase yi f’lo re gememe ho gago, o ka fo thomisa go nagana dilo tsa gore a yi tsona o kokolela ye o šadhiyeng naye o re aa tshepege. Taba yowa ya go dulela go šupa ye mongwana ka senwana yi ka sinya mošadho wago ya boya yi go bakela malwele.

Tšhiko ya Bhayibele: “Jelase yi tshwana le khensa.”—Diyema 14:30, Easy-to-Read Version.

Mara jelase o ka yi lawola byang?

Lokotša tshepo yago. Go na le gore o fatafatane le dilo tsa go šupetsa gore ye o šadhiyeng naye aa na nnete, nagana ka dilo tsa gabutši tso ye o šadhiyeng naye a yyeng a di maka go šupetsa gore wa tshepega.

“Ke nagana ka mekgwa ya gabutši yo monnaka a nang nayo. Mo a tshegatshega le ye mongwana a yi gore o nyaka motho yene mara o fo ba a hlupegiye ka yene. Taba ya gore mošadho wa babelegi baka ne wo fageganne, ne yi sa rele gore le waka wo nyoko ba ka mokgonone.”—Melissa.

Mosadi yenela re bolabodiyeng ka yene o lebelele sethombhe sa letšatši la bona la mošadho a kene a ngwalangwala. O budiye Bhayibele o yi beyye ka ho mahlong gage.

Tšhiko ya Bhayibele: ‘Motho wa gore o nyaka ba bangwana ka matla . . . o tshepa dilo ka mokana ga tsona.’—1 Makorente 13:4, 7.

Lwang le tsa go kekema tso o di naganang. Dr. Leahy, ye re bolabodiyeng ka yene ku kgakala o ngwadiye gore: “Ka dinako tse dingwana re tseya nkare tso re di naganang ke nnete. Sosone go ba go le byona bohlatse bya rune, ka gore re ba re šele re segelele sepheto. Mara go fo tshepa selo so o se naganang gore ke nnete, a di rele gore wa resa.”b

“Mo o fo tinaganela taba ya go kekema o fetsa ka gore taba yone o yi naganang ke nnete, sosone se ka maka gore mošadho wa lune wo sa sa jabodisa.”—Nadine.

Tšhiko ya Bhayibele: “Makaneng gore go kwisisa ga lune go tšibe ke batho ka mokana ga bona.”—Mafilipi 4:5.

Bolabodisanang ka tso di le hlupang. King so se makang gore o be le jelase, bolabodisana le ye o šadhiyeng naye ka taba yo yi go kokonang ke mokane le beyelane molawo wa gore le ka sa make tsa go kwaletsa ye mongwana.

“Mo le kene le bolabodisana o sa tseye nkare ye o šadhiyeng naye o nyaka go go kwisa go baba mara o fo ba a liketsa go lukisa bothatha. Le mo di sa nape di go yelela gabutši o fo tseya gore ye o šadhiyeng naye o tikemisele go gelepa. Ka nako ye nngwana o kraya o fo tiwopisa hlogo ka dilo tsa gore a di šiyo. Kela o kraya ye o šadhiyeng naye a sa di bone gore o go teyisa bodutu.”—Ciara.

Mosadi o dule le monnage ka tawong o mo hlatollela ka mokgo a tikwang ka gona.

Tšhiko ya Bhayibele: “Motho a sa fo dulela go maka tsa go jabodisa yene a ntoši, mara a ye mahlong a maka le tsa go jabodisa ba bangwana.”—1 Makorente 10:24.

a b Di tšwa ga puku ya Jealousy Cure.

Mo nkare ye o šadhiyeng naye o na le Jelase

O sa nagane gore ye o šadhiyeng naye a ka sa go jelasele. Mara mo gelepe a thogo bona gore ke ntaba o mo jelasela. Bhayibele yi botsa banna gore ba phidisane le basadi ba bona “gabutši.” (1 Petro 3:7, The Word—New Century Version) Eya, tsotsone di rela le basadi. Go tseyela taba yone gedimo ke selo se segolo ka matla, o ka kraya ye o šadhiyeng naye ba yye ba mo sepela ka fase ga mošadho wage wa mathomo ke mokane tsotsone di makiye gore a sa sa tshepa motho.

Tipombhole wene mong. Mo nkare o monna ayitsano o titshwara gabutši mo o gahlanne le basadi ba bangwana kela o bolabodisana nabo ga inthanete, mo o le mosadi ayitsano o titshwara gabutši mo o gahlanne le banna ba bangwana kela o bolabodisana nabo ga inthanete? Ayitsano tso o di makang le tso o di hlayang di maka gore motho ye mongwana a bone nkare o ro mo nyaka? Nje ye o šadhiyeng naye o nyoko kwana le tsotsone o di makang? O sa make dilo tsa gore ye o šadhiyeng naye a kwe a sa sa go tshepa kela a bone nkare a wona taba naye.

Diputsiso tso le ka petapetang ka tsona

Mo nkare tsa go jelaselana di f’lo re gememe mošadhong wa lune, di nyaka o ghayele ka diputsiso tsowa o le ntoši. Ke mokane ka nako ya gabutši o bolabodisane le ye o šadhiyeng naye ka diphetolo tso o di krayyeng. O sa lebale gore le mo go le ka mokgonone “ye mongwana le ye mongwana a yakgoswele go theetsela, a sa yakgoswele go bolabola.”—Jakobo 1:19.

Ke seyemo sa mošaga mang so se makang gore o šinye o be le jelase?
Ayitsano o bona nkare ye o šadhiyeng naye ke yene a go tšhofang gore o šinye o be le jelase? Mo nkare go ka mokgonone, byang mara?
Ayitsano go na le tse dingwana fote, tso di makang gore o be le jelase—ba yye ba go sepela ka fase ga mošadho wago wa mathomo?
Ayitsano taba ya gore ye o šadhiyeng naye o kenakena ga tso tsa go bolabodisana le batho ga inthanete yi totometsa seyemo?
King tso o nyakang gore ye o šadhiyeng naye a di potolle?
O ka maka byang gore ye o šadhiyeng naye a sa kamake gore o mo nyaka ka matla fote a go tshepe?