Kodi Mumapindula na Kabuku ka Kusanthula Malemba Tsiku na Tsiku?

Kodi pulogilamu yanu yauzimu imaphatikizapo kuŵelenga lemba la tsiku na ndemanga yake m’kabuku ka Kusanthula Malemba Tsiku na Tsiku? Ngati si conco, kodi mungaiphatikize pa pulogilamu yanu yocita zauzimu? Ambili amasanthula lemba la tsiku m’maŵa kuti aziliganizilapo pamene akugwila nchito za tsikulo. (Yos. 1:8; Sal. 119:97) Koma kodi mungacite ciani kuti muzipindula moŵilikiza na Lemba la tsiku? Muziŵelenga nkhani pamene pacokela vesilo m’Baibo kuti mudziŵe nkhani yonse. Yesani kuganizila nkhani ya m’Baibo imene igwilizana na mfundo imene yafotokozedwa m’lemba la tsiku. Ndiyeno, ganizilani mmene mungaseŵenzetsele mfundoyo mu umoyo wanu. Mukamalola Mawu a Mulungu kukutsogolelani popanga zosankha, mudzapindula kwambili.—Sal. 119:105.

Mabanja a Beteli pa dziko lonse, amasanthula Lemba la Tsiku pa nthawi ya cakudya ca m’maŵa. Ndipo m’zaka zaposacedwa, zambili mwa nkhani zimene timakambilana pokambilana lemba la tsiku zaikidwa pa JW Broadcasting^® pa mbali yakuti MAPULOGILAMU NA ZOCITIKA ZINA. Kodi ni liti pamene munamvetselako nkhani zimenezi? Mwina nkhani zina zinakuthandizani kwambili. Mwacitsanzo, kodi citsanzo ca Loti cingakuthandizeni bwanji popanga zosankha?

TAMBITSANI VIDIYO YAKUTI MUSAMAKONDE DZIKO (1Jo 2:15), PAMBUYO PAKE YANKHANI MAFUNSO AYA:

• Kodi Kulambila kwa M’maŵa kumeneku kunazikidwa pa mfundo iti ya m’Baibo?

• Pa nkhani ya Loti, kodi kukonda dziko kapena zinthu za m’dziko kuli na ngozi yanji?—Gen. 13:12; 14:12; 19:3, 12, 13, 24-26

• Tingaonetse bwanji kuti timakonda Yehova osati dziko kapena zinthu za m’dziko?