EKIBUUZO 3
Nimbaasa Kugamba nta n’Abazaire Bangye?
NOIJA KUKORA KI?
Teekateeka aha mbeera egi: Ni izooba ry’Orwakashatu omu mwabazyo. Geoffrey ow’emyaka 17, yaaheza kukora emirimo ye, kandi naayenda kuhuumuraho! Ataho tiivi reero ashutama omu ntebe ei arikukunda munonga.
Omu kaire ako, ishe areetwa aha rwigi, kwonka tashemereirwe.
“Geoffrey! Ahabw’enki nooshiisha obwire bwawe orikureeba tiivi kandi obwo oshemereire kuba noohwera murumuna waawe kukora ebi baamuha aha ishomero kukorera omuka? Butoosha torikukora ebi barikukugambira!”
Geoffrey ajunjuma munonga ati: “Mpaho eby’aha byatandika.”
Ishe amwirira haihi amubuuza ati: “Waagamba ki mutsigazi?”
Geoffrey amugarukamu n’ekyejo ati: “Tikiriho, Taata.”
Ishe agira ekiniga kingi. Amugira ati: “Otagaruka kugamba naanye omu muringo ogwo!”
Ku ogire ngu niiwe Geoffrey, okaba noobaasa kukora ki kwetantara embeera egyo kubaho?
TEEKATEEKA AHARI EKI!
Okugamba n’abazaire baawe nikibaasa kugyeragyeranisibwa n’okuvuga emotoka. Waashanga omuhanda gukiingirwe, noorabira omu gundi.
NK’EKY’OKUREEBERAHO:
Omwishiki orikweta Leah akagira ati: “Nikiingumira kugamba na taata. Obumwe nimba ndiyo ningamba nawe, reero agira ati: ‘Onsaasire, hari waaba noogamba naanye?’”
LEAH NAABAASA KUKORA KIMWE AHARI EBI.
Okugambira kubi ishe.
Leah naabaasa kugamba n’eiraka rihango ati: “Taata eki ni kikuru! Hurikiza!”
Okurekyera aho kugamba na ishe.
Leah naabaasa kurekyera aho kugambira ishe oburemeezi bwe.
Okutegyereza obwire burungi, akabona kugamba aha nshonga.
Leah naabaasa kugamba na ishe bwanyima, nari amuhandiikire ebaruha amugambire oburemeezi bwe.
Iwe okaayenzire ngu Leah akorese muringo ki?
YETEGYEREZE EKI: Ishe Leah aine ebirikumuhuzya, n’ahabw’ekyo tarikumanya ngu kyagwisa kubi omuhara. N’ahabw’ekyo Leah yaacwamu Omuringo A, ishe naabaasa kuteetegyereza ahabw’enki omuhara yaagamba kubi. Omuringo ogu nigubaasa kutahwera ishe Leah kuhurikiza, kandi tigurikworeka ngu naaha ishe ekitiinisa. (Abaefeso 6:2) Buzima, omuringo ogu, tihaine ou guraagasire.
Nk’oku otarikubaasa kuremwa kugyenda omuhanda gwaba gukiingirwe, noobaasa kutunga oburyo bw’okugaaniira n’abazaire baawe
N’obu Omuringo B guraabe nigureebeka nk’ogworobi, kwonka ti gw’obwengye. Ahabw’enki? Ahabw’okuba Leah yaaba naayenda kushoboorora oburemeezi bwe, aine kugamba na ishe, kandi ishe yaaba ari ow’okumuhwera aine kumanya oburemeezi obu aine. Okuhunama tikurikubaasa kuhwera na kakye.
Kwonka Omuringo C, Leah tarikwikiriza ekintu kyona kumuremesa kugamba na ishe. Kureka, naateeraho kugaaniira nawe omurundi ogundi. Kandi Leah yaacwamu kuhandiikira ishe ebaruha, naabaasa kwehurira gye ahonaaho.
Kandi okuhandiika ebaruha nikibaasa kumuhwera kutebeekanisa gye ebi arikwenda kugamba. Ishe Leah yaaheza kushoma ebaruha egyo, naija kumanya eki omuhara abaire naateeraho kumugambira, ekiraamuhwere kumanya oburemeezi bwe. N’ahabw’ekyo omuringo C nigugasira bombi Leah na ishe. Yaaba agamba nawe butunu nari akamuhandiikira ebaruha, omuringo ogu niguhikaana n’obuhabuzi bwa Baibuli “tukuratire ebirikureeta obusingye.”—Abarooma 14:19.
Leah naabaasa kukoresa miringo ki endiijo?
Reeba waaba noobaasa kuteekateeka aha muringo ogundi, reero oguhandiikye ahaifo. Kandi ohandiikye ekirikubaasa kuruga omu muringo ogwo.
YETANTARE KUGAMBA EBIRIKUBUZABUZA
Ijuka ngu eki orikugamba n’eki abazaire baawe barikuteekateeka ngu nikyo waagamba obumwe tibirikushushana.
NK’EKY’OKUREEBERAHO:
Abazaire baawe baakubuuza ahabw’enki otashemereirwe. Noobaasa kubagarukamu oti: “Tindikwenda kukigambaho.”
Kwonka abazaire baawe nibabaasa kuhurira ngu waabagira oti: “Tindikubeesiga ekirikumara kubagambira oburemeezi bwangye. Ninyija kubugambira banywani bangye beitu mutari imwe.”
Teera akashushani ori omu mbeera egumire reero abazaire baawe baakugira ngu nibenda kukuhwera. Kwonka obagarukamu oti: “Mutafayo. Nimbaasa kukyemarira.”
Abazaire baawe nibabaasa kuteekateeka ngu waagira ngu:
Eky’okugarukamu kyawe ekirungi kikaabaire: