EKIBUUZO 7

Nimbaasa Kusingura nta Okugyemeserezibwa Kuteerana?

AHABW’ENKI NI KIKURU?

Okucwamu kwawe aha bikwatiraine n’okuteerana nikukwata munonga aha biro byawe by’omumaisho.

NOIJA KUKORA KI?

Teekateeka aha mbeera egi: Heather areebire Mike kumara ameezi abiri gonka, kwonka naayehurira nk’otwire naamumanya. Nibakira kwetsindikira obutumwa, nibamara eshaaha nyingi barikugamba aha simu, kandi buri omwe naaba naamanya eki mugyenzi we arikuza kugamba! Kwonka hati Mike naayenda ekirikukira aha kugaaniira.

Ameezi abiri agahweire, Mike na Heather babaire nibakwatana omu ngaro kandi banywegyerana kyonka. Heather naahurira atarikwenda kukora ekirikukira ahari ekyo. Kwonka tarikwenda kufeerwa Mike. Yaaba ari na nawe, naahurira arikukundwa kandi ari ow’omutaano. Kandi Heather omu mutima gwe naamanya ngu we na Mike nibakundana . . .’

Ku ogire ngu ohikize emyaka y’okuriima kandi ori omu mbeera nk’eya Heather, okaakozire ki?

TEEKATEEKA AHARI EKI!

Omwenda nigukoresibwa nk’ekisiimuura — Okuteerana n’ekiconco kuruga ahari Ruhanga eki yaahaire abari omu bushwere bonka. Waateerana otakagiire omu bushwere nooba waakoresa kubi ekiconco ekyo. Nikishushana n’okutwara omwenda murungi ogu omuntu akuhaire okagukoresa nk’ekisiimuura

Waayanga kworobera ebiragiro by’obuhangwa, nk’amaani agarikukurura ebintu kubigarura ahansi, noija kutunga oburemeezi. Nikyo kimwe na waayanga kworobera ekiragiro ky’emicwe, eki: ‘Mwerinde obushambani.’—1 Abatesalonika 4:3.

Ni bibi ki ebirikuruga omu kutoorobera ekiragiro ekyo? Baibuli neegira eti: “Orikushambana naaba akozire ekibi ky’okushiisha omubiri gwe wenka.” (1 Abakorinso 6:18) Ahabw’enki ekyo kihikire?

Abarikucondooza bashangire ngu eminyeeto baingi abaateeraine batakataahire mu bushwere, nibatunga oburemeezi obu.

AMAGANYA. Baingi abaateeraine batakataahire mu bushwere nibagira ngu bwanyima nibeefuuza.
OKUTEESIGANA. Bwanyima y’okuteerana, buri omwe aharibo naatandika kuteekateeka ati: ‘Nikireebeka haine ondiijo ou araateeraine nawe.’
OKWETAMWA. Abaishiki abarikukira obwingi, nibenda omuntu orikubaha oburinzi, beitu atari ogwo orikwenda kubakoresa kwonka. Kandi aboojo baingi, tibarikukira kukunda abaishiki abarikurahuka kubeihwabeihwa.
Ekikuru eki oine kuteekateekaho: Waikiriza kuteerana otakataahire mu bushwere, nooba nooyegarura ahansi orikweihaho ekintu ky’omuhendo. (Abarooma 1:24) Omubiri gwawe n’ogw’omuhendo toine kugugabira eryo!

Yoreka ngu omaririire ‘kwerinda obushambani.’ (1 Abatesalonika 4:3) Reero, ku oraahitsye obunaku bw’okutaaha omu bushwere, noija kubaasa kuteerana. Omu bwire obwo, okuteerana nikwija kukushemeza, otaine kwerarikirira, otarikwefuuza, nari kuhurira otaine burinzi ebirikukira kubaho omuntu yaateerana atakagiire mu bushwere.—Enfumu 7:22, 23; 1 Abakorinso 7:3.

NIKI EKI ORIKUTEEKATEEKA?

Mbwenu shi omuntu orikukukunda buzima naabaasa kukukora kubi aha mubiri nari enyehurira?
Mbwenu shi omuntu orikukufaho buzima naabaasa kukureetera kushiisha omukago gwawe na Ruhanga?—Abaheburaayo 13:4.