Yesu Akatambira Omuntu aha Sabato

Abafarisaayo bakaba nibanga Yesu kandi bakateeraho kusherura enshonga y’okumukwata. Bakagira ngu akaba atashemereire kutambira abarwaire aha Sabato. Eizooba rimwe aha Sabato, Yesu akashanga omushaija empumi aha ruguuto naashabiiriza. Akagambira abeegi be ati: ‘Mureebe oku amaani ga Ruhanga garaahwere omushaija ogu.’ Yesu akata amacwante omu itaka, yaarimusiiga omu maisho. Bwanyima, Yesu akamugira ati: “Gyenda onaabe omu kiyanja kya Siloamu.” Omushaija akakora ekyo, yaareeba.

Abantu bakatangaara. Bakabuuza bati: ‘Ogu t’omushaija owaabaire atuura naashabiiriza, nari n’ondiijo naashushana nawe?’ Omushaija akabagira ati: ‘Niinye owaazairwe ndi empumi.’ Abantu bakamubuuza bati: ‘Amaisho gaawe gaahumuuka gata?’ Ku yaabagambiire ekyabaireho, bakamutwara aha Bafarisaayo.

Omushaija akagambira Abafarisaayo ati: ‘Yesu yaansiiga eitaka omu maisho kandi yaangira ngu ngyende naabe, naanaaba. Kandi hati nindeeba.’ Abafarisaayo bakagira bati: ‘Yesu ku araabe atarikukuza Sabato, amaani ge ti garikubaasa kuruga ahari Ruhanga.’ Kwonka abandi bakagira bati: ‘Amaani ge gaaba gatarikuruga ahari Ruhanga, takubaasize kukora eky’okutangaaza nk’eki.’

Abafarisaayo bakeeta abazaire b’omushaija ogwo bababuuza bati: ‘Mutabani waanyu, yaahumuuka ata?’ Abazaire be bakaba batiinire ahakuba Abafarisaayo bakagira ngu omuntu weena oraikirize Yesu naija kubingwa omu sinagogi. N’ahabw’ekyo bakagarukamu bati: ‘Titurikumanya. Mumwebuuriize.’ Abafarisaayo bakabuuza omushaija ebibuuzo ebindi bingi kuhitsya obu yaabagizire ati: ‘Naabagambira byona. Ahabw’enki nimuguma nimumbuuza?’ Abafarisaayo bakagira ekiniga, baamubinga.

Yesu akaza kusherura omushaija ogwo, kandi akamubuuza ati: ‘Noikiririza omuri Mesia?’ Omushaija akamugarukamu ati: ‘Naamumanya nkamwikiririzamu.’ Yesu akamugira ati: ‘Niinye Mesia.’ Yesu akamugirira embabazi nyingi. Akamutambira kandi yaamuhwera kugira okwikiriza.