Baibuli Neehindura Emitwarize
Ahabw’enki omushaija owaabaire aine abakazi baingi kandi arikuhakanisa Abajurizi ba Yehova yaahindukire Omukristaayo? Niki ekyahigire omwebembezi w’ediini kuhindura enyikiriza ze? Niki ekyahwereire omukazi owaakuriire omu naku kusingura okwetamwa kandi akabaasa kwirira haihi Ruhanga? Ahabw’enki owaabaire naakunda ebyeshongoro bitashemeire yaahindukire omuheereza wa Yehova? Shoma ebicweka ebi kubaasa kutunga eby’okugarukamu.
“Mbaasize kuba omutwe gw’eka murungi.”—RIGOBERT HOUETO
OMWAKA OBU NAAZAARWA: 1941
EIHANGA ERI NAAZAARIIRWEMU: BENIN
EBY’ENYIMA: NKABA NYINE ABAKAZI BAINGI, KANDI NDIKUHAKANISA ABAJURIZI BA YEHOVA
EBI NAARABIREMU:
Nkazaarirwa omu Cotonou, orurembo ruhango omuri Benin. Nkakura ndi Omunyakaturiki kwonka nkaba ntarikukira kuza aha kereziya. Abanyakaturiki omu kicweka eki naabaire nintuuramu bakaba baine abakazi baingi, kandi omu biro ebyo kikaba nikiikirizibwa. Naanye nkahendera nshweire abakazi bana.
Omu myaka ya 70 ku haabaireho empinduka omu by’obutegyeki, nkateekateeka ngu nikiija kugasira eihanga ryangye. Nkashagika empinduka egyo naahendera ndi omu by’obutegyeki. Ekibiina ekyo kikaba kitarikukunda Abajurizi ba Yehova ahabw’okugira ngu tibarikwejwanzya omu by’obutegyeki. Nkaba ndi omwe ahari abo abaabaire nibahiiganisa Abajurizi ba Yehova. Abamiisani Abajurizi ba Yehova ku babingirwe omu ihanga omuri 1976, nkaba nimpamya ngu tihaine orikwija kugaruka.
OKU BAIBULI YAAHINDWIRE EMITWARIZE YANGYE:
Okuhakanisa gavumenti kukahendera omuri 1990. Kikaantangaaza, kureeba abamiisani abo nibagaruka omu bwire bukye. Nkatandika kuteekateeka ngu obundi Ruhanga naashagika abantu abo. Omu bwire nibwo bumwe, nkaza kukorera omu mwanya ogundi. Omwe aha bakozi bagyenzi bangye akaba ari Omujurizi wa Yehova, kandi omu bwire bukye akatandika kungambira ebi arikwikiriza. Akanshomera Ebyahandiikirwe ebirikworeka ngu Yehova, ni Ruhanga oine rukundo n’oburingaaniza. (Eky’Ebiragiro 32:4; 1 Yohaana 4:8) Emitwarize egyo ekanshemeza. Nkaba niinyenda kumanya bingi ahari Yehova, n’ahabw’ekyo nkaikiriza kwegyesibwa Baibuli.
Omu bwire bukye nkatandika kuza omu nteerane z’Abajurizi ba Yehova. Kikaanshemeza okureeba nibakundana buzima kandi batarikushoroora. Okuguma ninkorangana n’Abajurizi ba Yehova, kikampwera kureeba butunu ngu nibo bakuratsi ba Yesu ab’amazima.—Yohaana 13:35.
Nketegyereza ngu naaba niinyenda kuheereza Yehova, nyine kuruga omu diini y’Abakaturiki. Kikaba kitoorobi kuteera orutambwe orwo, ahabw’okutiina oku abandi barikwija kundeeba. Bwanyima y’okuhinguraho obwire ahabw’obuhwezi bwa Yehova, nkabaasa kugira obumanzi naayecwa aha diini egyo.
Kwonka hakaba hariho empindahinduka y’amaani endiijo ei naabaire nyine kukora. Omu kwega Baibuli nketegyereza ngu Ruhanga tarikwikiriza kushwera abakazi baingi. (Okutandika 2:18-24; Matayo 19:4-6) Akaba naasiima omukazi ou naabandize kutaaha nawe omu bushwere. N’ahabw’ekyo nkagaitwa n’omukazi omwe, abandi naabashenda kwonka naakora entebeekanisa y’okuguma nimbaha eby’okwebaisaho. Bwanyima, babiri aha bakazi abo bakaba Abajurizi ba Yehova.
OKU NGASIIRWE:
N’obu omukazi wangye yaagumire ari Omukaturiki, naampa ekitiinisa ahabw’okucwamu kuheereza Yehova. Twembi twongyeire kugira obushwere burungi.
Nkaba ninteekateeka ngu nimbaasa kushoboorora oburemeezi bw’abatuuzi kurabira omu by’obutegyeki, kwonka okuteeraho okwo tikurarugiremu ebirungi. Hati nindeeba ngu Obukama bwa Ruhanga nibwo bwonka oburikubaasa kuhezaho oburemeezi bw’abantu. (Matayo 6:9, 10) Ninsiima Yehova ahabw’okunyoreka oku nyine kutwaza kubaasa kugira okushemererwa okwabuzima.
“Kikaba kitoorobi kukora empinduka ezirikwetengyesa.”—ALEX LEMOS SILVA
OMWAKA OBU NAAZAARWA: 1977
EIHANGA ERI NAAZAARIIRWEMU: BRAZIL
EBY’ENYIMA: OMWEBEMBEZI W’EDIINI Y’ABAROKORE
EBI NAARABIREMU: Nkakurira aha mwatano gwa Itu, omu rurembo São Paulo. Ekicweka ky’etauni egi kikaba nikimanywa munonga ahabw’okubamu abahenzi b’ebiragiro.
Nkaba ndi enshaarizi kandi enshambani. Kandi, nkaba ninguza emibazi y’ekitabura bwongo. Bwanyima y’obwire, nketegyereza ngu naagumizamu omu bikorwa ebi, nimbaasa kuteebwa omu kihome nari nfiire, n’ahabw’ekyo nkacwamu kubirugamu. Bwanyima nkegaita aha diini y’abarokore, naahendera mpindukire pasita.
Nkaba ninteekateeka ngu nimbaasa kuhwera abantu kurabira omu buheereza bwangye. Nangwa nkaba nza aha radiyo kubuurira abantu, nikwo kurangaanwa omwanya ogwo. Kwonka, mporampora nketegyereza ngu bagyenzi bangye boona, bakaba batarikufayo aha mbeera z’abakuratsi baabo, nangwa n’obu kwakuba okweta aha bya Ruhanga. Nketegyereza ngu ekanisa ekaba neeta omutima aha kurundaana esente kyonka. Nkacwamu kuruga omu kanisa egyo.
OKU BAIBULI YAAHINDWIRE MITWARIZE YANGYE: Abajurizi ba Yehova ku batandikire kunyegyesa Baibuli, nkahika nindeeba ngu nibataana aha diini ezindi. Nkabakundaho ebintu bibiri. Eky’okubanza, Abajurizi ba Yehova tibarikwegyesa aha bikwatiraine n’okukunda Ruhanga n’abataahi kyonka, beitu nibagyoreka. Ekya kabiri, tibarikwejumba omu by’obutegyeki nari eby’entaro. (Isaaya 2:4) Enshonga ezo zikampamiza ngu mboine ediini ey’amazima nigwo muhanda ogufunzire ogurikuhitsya omu magara agatahwaho.—Matayo 7:13, 14.
Nketegyereza ngu naaba niinyenda kushemeza Ruhanga, haine empindahinduka ezi nyine kukora. Nyine kumara obwire n’ab’eka yangye. Kandi nkongyera kwebundaaza. Kikaba kitoorobi kukora empindahinduka ezo, kwonka ahabw’okuhwerwa Yehova, nkabaasa kusingura. Okukora empinduka ezi kikashemeza omukazi wangye. Niwe yaabandize kwega Baibuli, kwonka hati akoongyeramu amaani omu kwega kwe. Juba twembi tukagira ekihika ky’okwenda kuba Abajurizi ba Yehova. Tukabatizibwa aha izooba rimwe.
OKU NGASIIRWE: Nyowe n’omukazi wangye twine okushemererwa ahabw’okuhwera abaana baitu bashatu kugira omukago murungi na Yehova. Twine okushemererwa omu ka yaitu. Ninsiima Yehova ahabw’okumanyisa amazima agari omu Kigambo kye, Baibuli. Buzima neehwera abantu kuhindura emitwarize yaabo! Ekyo mbaasize kukyereebera.
“Ndi oshemeire, mpuriire, kandi nyijwire.”—VICTORIA TONG
OMWAKA OBU NAAZAARWA: 1957
EIHANGA ERI NAAZAARIIRWEMU: AUSTRALIA
EBY’ENYIMA: NKAKURIRA OMU NAKU
EBI NAARABIREMU: Nkakurira Newcastle, New South Wales. Niinye orikukirayo obukuru aha baana mushanju abaayoroirwe abazaire enshaarizi kandi abasinzi. Maawe akaba anteera kandi anjuma. Akagira ngu nyine emicwe mibi kandi ninyija kwokibwa omu muriro ogutarikuraara. Emigambire egyo ekandeetera kugira obwoba.
Obuhuta obu maawe yaampikizeho obumwe bukaba bundeetera kwosha kuza aha ishomero. Aha myaka 11, ab’obushoboorozi baakanyiha aha bazaire bangye baantwara kundeebera. Ku naahikize emyaka 14, nkatorokayo. Nkaba ntarikwenda kugaruka omuka, n’ahabw’ekyo nkatandika kuraara aha nguuto za Kings Cross, omuri Sydney.
Obu naabaire nindaara aha nguuto ezo, nkatandika kukoresa emibazi, amaarwa, okureeba ebirikwitsya enshoni n’obwamaraaya. Haine ekyabaireho ekyandetaire kugira obwoba. Nkaba nindaara omu kishengye kimwe ahaiguru y’omwanya gw’okuziniramu. Omwabazyo gumwe, abashaija babiri bakaija kureeba mukama w’omwanya ogwo. Akangira ngu nze omu kishengye, kwonka nkaba nimbaasa kuhurira ekigaaniiro kyabo. Mukama w’omwanya ogwo akaba naakora entebeekanisa y’okunguza abashaija abo. Bakaba nibaza kunta aha meeri y’emigugu baatware Japan kukora omu baara. Nkatiina, naagurukira omu dirisa, nairuka kusherura obuhwezi.
Nkabugana omushaija owaabaire ataayaayire Sydney, naamushoboororera embeera yangye ndikuteekateeka ngu naabaasa kumpa esente. Omu mwanya gw’ekyo, akantwara ahu yaabaire naatuura, kunaaba n’okutunga eky’okurya. N’ekyarugiremu, nkaguma owe, bwanyima y’omwaka gumwe twataaha hamwe omu bushwere.
OKU BAIBULI YAAHINDWIRE EMITWARIZE YANGYE: Abajurizi ba Yehova ku batandikire kunyegyesa Baibuli, nkatandika kuteekateeka ebintu bingi. Nkehurira kubi ku naamanyire ngu Sitaane niwe bukomooko w’ebintu bibi, nkaba ntwire ninyegyesibwa ngu Ruhanga niwe arikureetera abantu kubonabona. Nkagira oburuhuuko ku naayegire ngu tarikufubira abantu omu muriro ogutarikuraara, enyegyesa eyaabaire neentiinisa munonga.
Nkakunda oku Abajurizi ba Yehova barikucwamu barikwegamira ahari Baibuli. Nibagyendera aha bi barikwegyesa. Nkaba ndi omuntu agumire, kwonka oyihireho eki naabaire ningamba nari ninkora, Abajurizi ba Yehova bakaba nibantwariza omu muringo gwa rukundo kandi ogw’ekitiinisa.
Nkaba ningumirwa kwereeba nk’omuntu w’omugasho. Nkeetamwa, kandi nkaguma nyehurira ntyo na bwanyima y’okubatizibwa nkaba omwe aha Bajurizi ba Yehova. Nkaba niimanya ngu ninkunda Yehova, kwonka nkaba niimbangaanisa yaaba naabaasa kukunda omuntu nkaanye.
Emiteekateekyere yangye ekatandika kuhinduka bwanyima y’emyaka 15 mbatiziibwe. Ow’eishe-emwe akaha orubazo aha Kyombeko ky’Obukama, reero yaajuriza Yakobo 1:23, 24. Emishororongo egyo neegyeragyeranisa Ekigambo kya Ruhanga n’endeeberwamu eki turikukoresa kwereeba nk’oku Yehova arikutureeba. Nkatandika kwebuuza yaaba oku ndikwereeba nikutaana aha ku Yehova arikundeeba. Omu kubanza, kikangumira kwikiriza enshoboorora nsya egi. Nabwo nkaguma ninkiteekateeka ngu Yehova tarikubaasa kunkunda.
Bwanyima y’ebiro bikye, nkashoma Ekyahandiikirwe ekyahindwire emiteekateekyere yangye. Ekyahandiikirwe ekyo ni Isaaya 1:18, ahu Yehova arikugira ati: “Mbwenu nu nimwije tuhanuure hamwe. . . . ebibi byanyu n’obu biraabe nibitukura nka karari, nibiija kwera nk’orubaare.” Okaba nooshusha oti Yehova ariyo naagamba naanye, arikugira ati: “Ija, Vicky, tuhanuure hamwe. Niinkumanya, niimanya ebibi byawe, n’omutima gwawe kandi ninkukunda.”
Tindabaasize kugwejegyera ekiro ekyo. Kwonka nabwo nkaba nimbangaanisa yaaba Yehova naabaasa kunkunda, kwonka nkatandika kuteekateeka aha kitambo kya Yesu. Ekirikushemeza, Yehova akaba angumisiriize kumara obwire, arikunyoreka ngu naankunda omu miringo mingi. Kwonka, nkaba ndi nk’orikumugira nti: “Rukundo yaawe terikubaasa kumpika. Ekitambo ky’Omwana waawe tikirikumara kushwekyerera ebibi byangye.” Nkaba ndi nk’orikugambira Yehova kugarurayo ekitambo kye. Kwonka ku naataandikire kuteekateeka aha kiconco ky’ekitambo, nkatandika kumanya ngu Yehova naankunda.
OKU NGASIIRWE: Ndi oshemeire, mpuriire, kandi nyijwire. Obushwere bwangye bwongyeire kushemera, kandi nikinshemeza kuhwera abandi. Nimpurira ndi haihi na Yehova.
“Okushaba kwangye kukagarukwamu.”—SERGEY BOTANKIN
OMWAKA OBU NAAZAARWA: 1974
EIHANGA ERI NAAZAARIIRWEMU: RUSSIA
EBY’ENYIMA: ORIKUKUNDA EBIDONGO
EBI NAARABIREMU: Nkazaarirwa omuri Votkinsk, ekicweka eki omweshongozi rurangaanwa Pyotr Ilich Tchaikovsky yaazaariirwemu. Eka yaitu ekaba eri enyoro. Tata akaba aine emitwarize mirungi mingi, kwonka akaba ari omusinzi, n’ahabw’ekyo tukaba tutaine busingye omu ka.
Nkaba ntarikurahuka kukwata ebi naayegyesibwa, bwanyima y’emyaka, nkatandika kwereeba nk’otaine mugasho. Nkaba ntarikukunda kugamba n’abandi kandi tihaine ou naabaire ninyesiga. Nkaba ntaine muhimbo gw’okuza aha ishomero. Nk’eky’okureeberaho, ku baabaire banshaba kugira eki naagamba, nkaba ndemwa kushoboorora enshonga ezimwe ezi ndikumanya gye. Ku naantungire gureedi ya munaana, ripoota yangye bakagihadiikaho ebigambo ebi: “Tarikumanya kugamba gye orurimi, kandi tarikubaasa kushoronzya gye enshonga.” Ebigambo ebyo binkacwa omutima kandi byandeetera kwereeba nk’otaine mugasho. Nkatandika kwebuuza ekigyendererwa ky’okubaho.
Obu naabaire ndi omu myaka y’obushogoyo, nkatandika kunywa ebirikusinza. Omu kubanza, ku naabaire ntsinda nkaba nyehurira gye. Kwonka ku naabaire nywa amaarwa ekirenga, omuntu wangye akaba anshinja. Nkaba ntarikumanya ekigyendererwa ky’okubaho. Nkeeyongyera kugira amaganya maingi, kandi obumwe nkaba mmara ebiro omu nju ntashohoire. Nkatandika kugira ebiteekateeko by’okweita.
Ku naahikize emyaka 20, nkatandika kutunga oburuhuuko. Nkatandika kuhurikiza ebyeshongoro bibi. Nkaba tunga amaani naahurikiza ebyeshongoro ebyo, kandi nteekateeka n’aha bandi abari omu mbeera nk’eyangye. Nkakuza eishokye ryangye, naafuumura amatu kandi naajwara nk’omweshongozi ou naabaire ninkunda. Mporampora, nkaba enshaarizi otarikufayo aha magara ndikukira kutongana n’ab’eka yangye.
Nkaba ninteekateeka ngu naahurikiza ebyeshongoro bibi ebyo ninyija kutunga okushemererwa, kwonka tikwo kyabaire. Nkongyera kuba mubi! Kandi ku naamanyire ebintu bibi ebirikukwata aha beeshongozi baarurangaanwa obu naabaire ninyegomba, nkareeba ngu baandebize.
Nkagaruka naatandika kugira ebiteekateeko by’okweita. Ekintu kyonka ekyandemeise kukikora n’okuteekateeka aha ku maawe yaabaire naija kukwatwaho. Akaba naankunda munonga, kandi akaba ankoreire bingi. Embeera egyo ekaba neetiinisa munonga. Nkaba ntarikwenda kuguma mpuriire kwonka nkaba nintiina kweita.
Nkaba ninshoma ebitabo by’emigane ebya Russia. Ekitebyo kimwe kikaba nikikwata aha manzi owaabaire naaheereza omu kanisa. Ahonaaho nkagira ekihika ky’okwenda kuheereza Ruhanga n’okuhwera abandi. Omu kaire ako nkashaba Ruhanga, ekintu eki naabaire ntakakorahoga. Nkashaba Ruhanga kunyoreka oku ndikubaasa kubaho nyine ekigyendererwa. Obu naabaire ninshaba, nkahurira naagira obunanukye omu mutima. Kwonka ekyabaire nikishemeza munonga, n’ekyakuratsireho. Bwanyima y’eshaaha ibiri, omwe aha Bajurizi ba Yehova akaiguza aha rwingi rwangye yaanshaba kunyegyesa Baibuli. Hatariho kubangaanisa okushaba kwangye kukagarukwamu. Obwo nibwo naatandika kutunga okushemererwa.
OKU BAIBULI YAAHINDWIRE EMITWARIZE YANGYE: N’obu kiraabe kyabaire kitoorobi kukora empindahinduka, kwonka nkacwekyereza ekintu kyona ekiine akakwate n’ebyeshongoro bibi. Kwonka, nkaguma ninyijuka ebyeshongoro ebyo kumara obwire buraingwa. Ku naabaire mba ndi omu emyanya erimu ebyeshongoro ebyo, ahonaaho nkaba nyijuka embeera yangye eyenyima. Nkaba ntarikwenda kujwanzya ebiteekateeko bibi ebyo n’ebintu birungi ebi naabaire niinyega omu Baibuli. N’ahabw’ekyo nkamariirira kwetantara kuraba omu myanya egyo nkigyendereire. Kandi ebiteekateeko bibi ebyo ku byabaire bigaruka, nkaba nshaba. Okukora ekyo kikampwera kutunga “obusingye bwa Ruhanga oburengire okwetegyereza kw’omuntu weena.”—Abafilipi 4:7.
Obu naabaire niinyega Baibuli, nketegyereza ngu Abakristaayo bahairwe obujunaanizibwa bw’okugambira abandi ebi barikwikiriza. (Matayo 28:19, 20) Amazima gari ngu nkaba niimanya ngu ekyo tindikubaasa kukikora. Kwonka omu bwire nibwo bumwe, ebintu bisya ebi naabaire niinyega bikampwera kugira okushemererwa n’obunanukye bw’omu mutima. Nkaba niimanya ngu abandi nibenda kwegyesibwa amazima aga. N’obu ndaabe naabaire ntiinire, nkatandika kugambira abandi ebi naabaire niinyega. Okugambira abandi ebirikukwata ahari Baibuli kikampwera kwongyera kwegiramu obwesigye. Kandi kikongyera kuhamya enyikiriza ezi omu mutima gwangye.