Bakakoresa Baibuli kugarukamu buri kibuuzo!

EBI NAARABIREMU:

Obu naazaarwa, abazaire bangye bakaba baine omwanya gw’okuhingaho n’okuriisizaho mukye omu kyaro kya Galicia, northwestern Spain. Nkaba ndi owa kaana aha baana munaana. Tukaba twine okushemererwa omu ka. Omu bwire obwo omuri Spain, kikaba kiri ekya butoosha omwe ah’abaana b’omu ka kuza omu seminare nari omu kigo. Omu ka yaitu bashatu bakacwamu kukora ekyo.

Aha myaka 13, nkashanga mukuru wangye omu seminare omuri Madrid. Embeera zikaba zitari nungi. Hakaba hatariyo kutwarizana gye kureka ebiragiro byonka, okushaba, n’okubura obwehinduriro. Tukaba twimuka omu kasheeshe kare munonga tuza omu mwanya gumwe kuteekateeka, n’obu nyowe omu mutwe gwangye gwabaire gutarimu kiteekateeko kyona. Bwanyima, tukaba tweshongora ebyeshongoro by’ediini kandi tuza omu Misa, byona ebyabaire nibikorwa omu Rulaatini. Tihaine na kimwe eki naabaire ninyetegyereza, kandi okaba nooshusha ngu Ruhanga andi hare munonga. Nkashiisha obwire bwangye ndikworobera ebiragiro ebiri nk’omugugu. Nangwa nyowe na mukuru wangye ku twabaire tubugana, tukaba tugira ngu, “oheebwe ekitiinisa Mariamu ohikiriire.” Abasisita bakaba batwikiriza kugamba hamwe nk’ekicweka ky’eshaaha bwanyima y’okurya. Eki kikaba nikitaana n’embeera z’eka yaitu! Nkaba nyine eihamba kandi kaingi nkaba ndira.

N’obu ndaabe naabaire nimpurira ngu tindi haihi na Ruhanga, nkarahira kuba omusisita aha myaka 17. Buzima, nkakora eki naashabirwe kukora, kwonka juba nkatandika kubangaanisa yaaba Ruhanga antoraine kumuheereza. Abasisita bakaba nibakira kugira ngu waaba noobangaanisa noobaasa kuhendera ogiire omu muriro ogutarikuraara! Kwonka nabwo nkaguma niimbangaanisa. Nkaba niimanya ngu Yesu Kristo tareeshoroire aha bandi, kureka akaguma naayegyesa kandi arikuhwera abandi. (Matayo 4:23-25) Aha myaka 20, nkaba ntakyenda kuguma ndi omusisita. Ekirikutangaaza, orikukurira abasisita akagira ngu ku ndaabe ntamirwe kuguma ndi omusisita, n’eky’oburyo kugyenda ahonaaho kyaba nikibaasika. Nkateekateeka ngu akatiina ngu nimbaasa kuta omu bandi emiteekateekyere yangye. N’ahabw’ekyo nkacwamu kuruga omu kigo

Ku naahikire omu ka, abazaire bangye bakanyetegyereza. Kwonka ahabw’okugira ngu tindatungire murimo omu kyaro kyaitu, nkafurukira Germany, ahu munyaanyazi yaabaire naatuura. Akaba ari omu kigombe ky’Abakomunisiti abaarugire Spain. Nkaba ninyehurira gye ahabw’okuba omwe ah’abantu abo abaabaire nibarwanirira obugabe bw’abakozi n’oburingaaniza omu bakazi. N’ahabw’ekyo nkeegaita aha kigombe ekyo kandi naataaha n’omwe aha ab’ekigombe ekyo omu bushwere. Nkaba niinteekateeka ngu ndiyo niinkora ekintu ky’oburyo, kugaba ebitabo by’Abakomunisiti n’okwejumba omu bwesharingo.

Kwonka, bwanyima y’obwire nkagaruka naatamwa. Nketegyereza ngu obwire obwingi Abakomunisiti tibarikukora ebi barikubuurira. Enyehurira ezo nkazigira omuri 1971, bwanyima ya bamwe aha b’ekigombe kyaitu kwotsya ofiisi y’Omujwekyerwa wa Spain omuri German eyabaire eri omuri Frankfurt. Bakakikora ahabw’obutari buringaaniza obwabaire buri Spain. Kwonka nkaba niimanya ngu ogu n’omuringo mubi gw’okworeka ekiniga.

Ku twazaire omwana w’okubanza, nkagambira ibanyi ngu ninza kurekyera aho kuza omu nteerane z’Abakomunisiti. Nkagira eihamba ahabw’okuba tihaine n’omwe aha banywani bangye owaabaire naantayaayira n’omwana wangye. Nkaba ntarikumanya ahabw’enki ndiho. Ahabw’enki niinteeraho kuhwera abantu kuba gye?

OKU BAIBULI YAAHINDWIRE EMITWARIZE YANGYE:

Omu 1976, Abajurizi ba Yehova babiri kuruga Spain bakaiguza aha rwingi rwaitu baatuha magaziini kandi twazaakiira. Ku baagarukire omurundi gwa kabiri, nkatandika kubabuuza ebibuuzo bingi aha bikwatiraine n’okubonabona, okushoroora, n’obutari buringaaniza. Nkatangaara ku naareebire nibakoresa Baibuli kugarukamu buri kibuuzo! Ahonaaho nkaikiriza kwega Baibuli.

Omu kubanza, nkaba niinyega kumanya amazima kyonka. Kwonka embeera zikahinduka obu nyowe na ibanyi twatandika kuza omu nteerane aha Kyombeko ky’Obukama eky’Abajurizi ba Yehova. Omu bwire obwo, tukaba twine abaana babiri. Ab’eishe-emwe bakaba batwakiira omu ka, kandi batuhwera kukiikira abaana baitu omu bwire bw’enteerane. Nkatandika kukunda Abajurizi ba Yehova.

Kwonka nabwo, nkaba ninkibangaanisa aha diini. Nkacwamu kutaayaayira ab’eka yangye omuri Spain. Tatento omusosorodoti, akateeraho kuntamisa okwega Baibuli. Kwonka Abajurizi ba Yehova omuri Spain bakampwera kihango. Bakagarukamu ebibuuzo byangye barikukoresa Baibuli, nk’oku aba Germany baabaire nibakora. Nkagumizamu niinyega Baibuli ku naagaruka Germany. N’obu ibanyi yaayangire, nyowe nkamariirira kugumizamu niinyega Baibuli. Omu 1978, nkabatizibwa naaba Omujurizi wa Yehova.

OKU NGASIIRWE:

Okumanyiira kimwe amazima ga Baibuli kimpwereire kugira ekigyendererwa. Nk’eky’okureeberaho, 1 Petero 3:1-4 nihahiga abakazi ‘kworobera baibabo’ n’okubaha ekitiinisa kingi kandi bakateeraho kugira ‘omwoyo gw’obucureezi ogutuurize ogw’obuguzi bwingi omu maisho ga Ruhanga.’ Emisingye nk’egi empweraire kuhikiiriza gye obujunaanizibwa bwangye nk’omukazi Omukristaayo.

Haahingwireho emyaka nka 35 kwiha obu naaba Omujurizi wa Yehova. Nikinshemeza kuheereza Ruhanga ndi hamwe n’eka yangye ey’eby’omwoyo, n’okureeba abaana bangye bana ahari bataano nibakora nikyo kimwe.