Nkaba Ngyenda n’Embundu Yangye Buri Hamwe

EBI NAARABIREMU:

Nkazaarirwa Rome kandi niyo naakuriire, omu kicweka ky’abantu abakyene. Embeera zikaba zitoorobi. Nkaba ntarikumanya maawe, kandi nkaba ntarikukwatanisa gye na tata. Nkakura ndikwega obukoryo bw’okwebaisaho omu mbeera zigumire.

Aha myaka ikumi nkaba naatandikire kwiba. Aha myaka ikumi-n’ebiri, nibwo naashohora nkaruga omuka omurungi gw’okubanza. Emirungi mingi, tata akaba anyakiira aha ofiisi enkuru eya poriisi atwara omuka. Nkaba ninkira kutongana n’abantu, nyiniire buri omwe ekiniga. Ku naahikize emyaka 14, nkarugira kimwe omuka. Nkatandika kukoresa emibazi y’ekitabura bwongo n’okuraara aha nguuto. Ahabw’okugira ngu nkaba ntaine buraaro, nkaba mpenda emotoka z’abandi ntahamu kandi ndaraaramu kuhitsya omu kasheeshe. Bwanyima nkaba nsherura eiziba kutunga amaizi g’okunaaba.

Nkahinduka omushuma kondo, orikujakura eshaaho z’abantu, naatandika n’okuhenda amaju g’abantu nyekiro. Nkasiisikara ekirenga juba naayetwa kwegaita aha kigombe ky’abayaayi enshaarizi, naahika n’aha kwiba banka. Ahabw’okugira ngu nkaba ndi ekihanda, ab’ekigombe eki bakaba nibaampa ekitiinisa. Nkaba ntarikubaasa kugira ahu naaza ntaine mbundu yangye, nkaba nindaarara nayo ahansi y’omushego. Ebikorwa byangye bikaba nibitwariramu, obushaarizi, okukoresa kubi emibazi, okwiba, emigambire mibi, n’obushambani. Poriisi butoosha ekaba neensherura. Nkakomwa emirundi mingi, kandi naamara emyaka mingi omu kihome.

OKU BAIBULI YAAHINDWIRE EMITWARIZE YANGYE:

Eizooba rimwe ku naarugire omu kihome, nkacwamu kuza kutaayaayira omwe ahari maawento. Nkashanga, maawento na babiri aha baana be bahindukire Abajurizi ba Yehova. Bakanyeta kuza omu ruteerane rw’Abajurizi ba Yehova. Nkaba niinyenda kubamanya, kandi nkaikiriza kugyenda nabo. Ku twahikire aha Kyombeko ky’Obukama, nkashutama haihi n’omuryango kubaasa kuguma nindeeba abarikutahamu n’abarikushohora. Kandi, nkaba nyine embundu yangye.

Oruteerane orwo rukampwera kuhindura emitwarize yangye. Ninyijuka ndikuteekateeka ngu shana ndi aha kizinga ekindi. Abantu bakaba nibandamutsya bashemereirwe, barikumwenya, kandi barikutwaza gye. Ninkijuka gye entwaza y’Abajurizi ba Yehova abo n’okuba ab’amazima kwabo. Buzima nkeereeba nk’ori hare n’ensi ei naabaire mmanyiriire!

Abajurizi ba Yehova bakatandika kunyegyesa Baibuli. Ku naabaire nyongyera kwega, nyongyera kumanya ngu nyine kuhindurira kimwe emitwarize yangye. Ebigambo ebiri omu Enfumu 13:20 bikakwataho ebirikugira biti: ‘Orikugyenda n’abanyabwengye, nawe naahinduka omunyabwengye, kwonka mugyenzi w’abashema naija kukizira.’ Nketegyereza ngu nyine kwetaanisa aha kigombe kibi. Ekyo kikaba kitoroobi kukora, kwonka ahabw’okuhwerwa Yehova, nkasingura.

Kandi nkaboneza endeebeka yangye. Nkateeraho munonga kubaasa kucwa okureetsa n’okukoresa emibazi y’ekitabura bwongo. Nkatega eishokye ryangye, naareka kujwara eby’omu matu, kandi naarekyera aho kukoresa ebigambo ebirikuhemurana. Ogu nigwo murundi gwangye gw’okubanza kutegyeka ebikorwa byangye.

Nkakura ntarikukunda kushoma nari kwega, n’ahabw’ekyo kikangumiira kutaho mutima n’okugira ekihika ky’okweyegyesa Baibuli. Kwonka, nkatamu amaani, kandi mporampora naakunda Yehova, kandi haine ekyatandikire kuhinduka omu magara gangye, omuntu wangye ow’omunda akatandika kweshinja. Kaingi nkaba ngira emiteekateekyere etahikire, ndikubangaanisa yaaba Yehova naabaasa kunsaasira ebintu bibi ebi naakozire. Ku naabaire nyehurira ntyo, nkaba ntunga okuhuumurizibwa naashoma oku Yehova yaasaasire Omugabe Daudi bwanyima y’okukora ebibi by’amaani.—2 Samueli 11:1–12:13.

Ekindi ekyangumiire kukora n’okubuurira enju aha nju. (Matayo 28:19, 20) Nkaba nintiina kubugana omuntu ou naahuutarize nari ou naatwariize kubi enyimaho! Kwonka nkarugaho naasingura okutiina okwo. Nkatandika kutunga okumarwa okwabuzima ahabw’okuhwera abantu kwega ahari Yehova Tataitwe, orikusaasirira kimwe.

OKU NGASIIRWE:

Okwega ebirikukwata ahari Yehova kikacungura amagara gangye! Baingi abu naabaire ninkwatanisa nabo bakafa nari obundi bari omu kihome, kwonka nyine okumarwa okwabuzima n’amatsiko g’ebiro birungi eby’omumaisho. Mbaasize kwecureeza, okworoba, n’okutegyeka ekiniga kyangye. N’ekirugiremu, nyine enkoragana nungi n’abantu abu ndikukoragana nabo. Nyowe n’omukazi wangye nyamurungi Carmen twine obushwere burungi. Twembi, nikitwesiimisa kuhwera abantu kwega Baibuli.

Nyowe, na Oh nitukora emirimo y’obwesigwa, eine akakwate na banka, kwonka omu mwanya gw’okuziiba, hati nituba nituziboneza!