EBIBUUZO EBI BAIBULI ERIKUGARUKAMU

Ahabw’enki twine kushaba?

Yehova Ruhanga naayenda ngu butoosha tumugambire ebirikutwerarikiriza tutarikutiina. (Luka 18:1-7) Naatuhurikiza ahabw’okugira ngu naatufaho. Obu arikwenda ngu tumushabe, nikiba kiri eky’obushema twayanga kumushaba.​—Shoma Abafilipi 4:6.

Okushaba tikirikumanyisa okushaba obuhwezi kyonka. Kureka, okushaba nikutuhwera kwirira haihi na Ruhanga. (Zaaburi 8:3, 4) Twaguma nitugambira Ruhanga oku turikwehurira, nitugira omukago guhami nawe.​—Shoma Yakobo 4:8.

Tushemereire kushaba tuta?

Twaba nitushaba, Ruhanga tarikwenda ngu tukorese ebigambo ebirikworeka okwetunguura nari kugarukagarukamu ebigambo ebi tukwatsire omu mutwe. Kandi tikirikwetengyesa ngu tugire omuringo gw’omutaano ogu twayetebeekanisamu kubaasa kushaba. Yehova naayenda ngu tushabe kuruga aha mutima. (Matayo 6:7) Nk’eky’okureeberaho, omu Israeli eya ira, Hanna akashaba aha buremeezi obu yaabaire aine omu ka ye. Bwanyima, enaku ye ku yaahindukiremu okushemererwa, akasiima Ruhanga arikushaba aihire aha mutima.​—Shoma 1 Samueli 1:10, 12, 13, 26, 27; 2:1.

Ka twine omugisha gw’amaani! Buzima nitubaasa kugambira Omuhangi waitu ebirikutwerarikiriza. Kandi nitubaasa kumuhimbisa kandi tumusiime ahabw’ebi arikukora. Buzima titushemereire kwehuzya omugisha gw’omuhendo nk’ogwo.​—Shoma Zaaburi 145:14-16.