Nkaba nindwanisa obutari buringaaniza n’obushaarizi

EBI NAARABIREMU:

Nkakurira omuri Rmaysh, haihi n’omwatano gwa Israeli na Lebanon, omu bwire bw’orutaro rw’enganda. Nkaba ndeeba zaabomu zirikubaruka zikacwaho abantu abataine rubanja emikono n’amaguru. Embeera zikaba zigumire, okuhenda ebiragiro n’obushaarizi biri buri hamwe.

Ab’omu ka bakaba nibashabira omu kanisa ya Maronite, emwe aha kanisa z’abakaturiki ez’oburugwa izooba. Tata akaba naakora munonga kureeberera eka yaitu ey’abantu 12, kwonka maawe akaba ahamya ngu twena abaatsigara twaza omu kanisa. Bwanyima, nkatandika kwetegyereza ngu ekanisa ekaba etarikuhwera abataine maani.

Omu myaka yangye y’obunyeeto, nkatandika kukunda kung fu. Nkatunga okutendekwa kw’amaani naaba omuhangu omu kukoresa emikono n’amaguru, n’ebirwaniso bitari bimwe na bimwe. Nkateekateeka nti: ‘Tindikubaasa kumaraho orugamba, kwonka nimbaasa kuteeraho kuhezaho abantu enshaarizi.’ Ku naabaire ndeeba abantu babiri nibarwana, nkaba nteeraho kubaramura. Nkaba nyine ekiniga kingi, kandi ndikurahuka kuguubwa kubi. Abantu b’obukiizi-bwa-buryo bwa Lebanon bakaba nibantiina, ahakuba nkaba niinteeraho kurwanisa obutari buringaaniza n’obushaarizi.

Omuri 1980, nkaza omu kibiina kya kung fu omuri Beirut. Nkagumizamu n’okutendekwa kwangye, n’obu zaabomu n’amasasi biraabe byabaire nibiteerwa buri izooba. Nkaba ninkunda okurya, okubyama n’okutwaza amagara gangye nka Bruce Lee, enzaarwa ya China orikutuura omuri Amerika omuhangu omu kung fu. Nkateeraho kutooreza emitwarize ye, oku arikugyenda, n’oku arikuyomba yaaba naazaana kung fu. Nkaba ntasheka.

OKU BAIBULI YAAHINDWIRE EMITWARIZE YANGYE:

Ekigyendererwa kyangye kikaba kiri okuba omuhangu wa kung fu omuri China. Omwabazyo gumwe, ku naabaire nintendekwa ndikwetebeekanisa kuza China, nkahurira abarikwiguza aha orwigi. Akaba ari munywani wangye hamwe n’Abajurizi ba Yehova babiri. Njwaire suuti erikwiragura n’etuutu erikuragarika, nkabagira nti: “Tihaine ekindikumanya aha bikwatiraine na Baibuli.” Kwonka nkaba ntarikumanya ngu okuruga obwo amagara gangye gakaba nigaija kuhinduka.

Abajurizi ba Yehova barikukoresa Baibuli, bakaanyoreka ahabw’enki abantu batarikubaasa kusingura omu kwihaho obutari buringaaniza n’obushaarizi. Bakashoboorora ngu Sitaane Omuregi niwe arikureetaho oburemeezi. (Okushuuruurwa 12:12) Nkasiima obucureezi n’obumanzi obu Abajurizi ba Yehova abo baayorekire. Nkakwatwaho ku baanyegyeise ngu Ruhanga aine eiziina. (Zaaburi 83:18) Bakaanyoreka na 1 Timoseo 4:8, aharikugira hati: “Okwemanyiiza eby’omubiri nikugasha kakye, kwonka okwemanyiiza okutiina Ruhanga nikugasha omu muringo gwona, ahakuba kwine eki kuturaganisa aha magara g’ebiro ebi n’ag’ebiro ebiriija.” Ebigambo ebyo bikaija kumpwera munonga.

Kwonka ekibi, tindagarukire kureeba Abajurizi ba Yehova abo, ahabw’okuba ab’eka yaitu bakabagira ngu batagaruka. N’obu kiraabe kyabaire kityo, nkacwamu kurekyera aho omuzaano gwa kung fu, kugira ngu ntandikye kwega Baibuli. Beene-tata tibarakunzire okucwamu kwangye, kwonka nkaba mmaririire kugaruka kusherura Abajurizi ba Yehova bakaanyegyesa Baibuli.

Nkagumizamu ninsherura Abajurizi ba Yehova kwonka baamburira. Omu bunaku obwo, nkatunga amaganya ahabw’okufa kwa tata hamwe n’oburemeezi obundi omu ka yaitu. Nkaba ntandikire kukora omu kitongore ekirikukora aha by’okwombeka, kandi eizooba rimwe, omwe aha bakozi bagyenzi bangye orikwetwa Adel akambuuza ahabw’enki naabaire ngwirwe kubi. Akatandika kugamba aha matsiko g’okuzooka agari omu Baibuli. Omujurizi wa Yehova ogu owaabaire aine embabazi, rukundo n’okugumisiriza akanyegyesa Baibuli kumara ameezi mwenda.

Ku naagumiizemu niinyega Baibuli, nkareeba ngu nyine kuhindura emitwarize yangye. Ekyo kikaba kitoorobi. Butoosha nkaba ndahuka kuguubwa kubi. Kuruga omu Baibuli nkeega oku ndikubaasa kurinda ekiniga kyangye n’okutata omutima aha buri kantu akarikubaasa kungwisa kubi. Nk’eky’okureeberaho, omuri Matayo 5:44 harimu obuhabuzi bwa Yesu oburikugira buti: “Mukunde abazigu baanyu, kandi mushabire n’abarikubahiiga.” Kandi omu Abarooma 12:19 niharabura hati: “Muteehoorera enzigu, . . . nk’oku kyahandiikirwe ngu: Okuhoora enzigu n’okwangye; niinye ndizimuura, nikwo Mukama arikugira.” Ebyahandiikirwe ebyo hamwe n’ebindi bikampwera kutandika kugira obusingye.

OKU NGASIIRWE:

N’obu ab’omu ka yaitu baraabe baabaire batarikwikirizana naanye aha ky’okwega n’Abajurizi ba Yehova, bwanyima bakatandika kuha Abajurizi ba Yehova ekitiinisa. Omwe ahari beene-tata nawe hati n’Omujurizi wa Yehova, kandi maawe atakafiire akaba agamba gye aha nyikiriza yaitu abandi baaba nibagijuma.

Nkatunga omukazi omwesigwa orikwetwa Anita, kandi twembi turi baapayoniya ab’obutwire. Kuruga 2000, nyowe na Anita nitutuura Eskilstuna, omuri Sweden, ahu turikuhwera omu kwegyesa abantu Baibuli abarikugamba Oruharabu.

Na hati ninkisaasibwa abantu abarikubonabona ahabw’obushaarizi. Kwonka ahabw’okumanya enshonga ahabw’enki buriho, kandi nkamanya ngu Ruhanga ari haihi kubwihaho, nikindeetera kugira okushemererwa n’obusingye.​—Zaaburi 37:29.