Ahabw’enki Oine Kumanya Obukama bwa Ruhanga?

Abantu baingi omu nsi yoona nibata amatsiko gaabo omu Bukama bwa Ruhanga. Nibatooreza Yesu owaayegyeise abakuratsi be kushaba bati: “Obukama bwawe bwije; eby’okunda bikorwe omu nsi.”​—Matayo 6:10.

N’obu abantu baingi baraabe nibenda kumanya ebirikukwata aha Bukama bwa Ruhanga, amadiini maingi tigarikufayo kumanya ebirikubukwataho. H. G. Wells akagamba aha ki Yesu yaayegyeiseho “ekyarangaine munonga . . . niyo nyegyesa y’eki yaayetsire Obukama bw’omu iguru” kandi Wells naagira ngu enyegyesa egi “terikugambwaho munonga omu . . . nyegyesa y’amakanisa agarikweyeta Amakristaayo.”

Okutashushana n’amadiini agandi, Abajurizi ba Yehova nibeebembeza Obukama bwa Ruhanga. Nk’eky’okureeberaho, Magaziini yaitu ei oriyo nooshoma hati neevunuurwa omu ndimi 220. Buri kushohoza,nitushohoza magaziini ezirikurenga obukaikuru 46, ekirikureetera magaziini egi kuba niyo erikukirayo kujanjaazibwa omu nsi yoona. Ni kintu ki ekikuru eki Magaziini egi erikugambaho? Yeetegyereze omutwe gwayo: Omunaara gw’Omurinzi Ogurikuranga Obukama Bwa Yehova.a

Ahabw’enki Abajurizi ba Yehova nibata omutima munonga aha kuranga Obukama bwa Ruhanga? N’ahabw’okugira ngu nitwikiriza ngu Obukama bwa Ruhanga nigwe omutwe mukuru ogurikugambwaho omuri Baibuli. Kandi nitwikiriza ngu Obukama bwa Ruhanga nibwo bwonka oburaamareho oburemeezi bw’abantu.

Abajurizi ba Yehova nibateeraho kukuratira eky’okureeberaho kya Yesu barikuhwera abantu kumanya ebirikukwata aha Bukama bwa Ruhanga. Obu Yesu yaabaire ari omu nsi, Obukama bwa Ruhanga nibwo yaabaire agambaho munonga. (Luk. 4:43) Ahabw’enki Yesu yaabaire naatwara Obukama nka bukuru? Kandi iwe nibubaasa kukugasira buta? Nitukushaba kushwijuma oku Baibuli erikugarukamu ebibuuzo ebyo nk’oku kirikworekwa omu bicweka ebirikukurataho.