Baingi Nibaija Kukira Emperu Naiwe Noobaasa

Baibuli neetugambira ngu emperu neija kutwariramu okucwekyerera: “Omu biro ebyo haryabaho okubonabona kwingi okutakabahoga okwiha aha kuhangwa kw’ensi okuhitsya hati . . . Ebiro ebyo kuri bitaracwirweho, tihaakurokokireho muntu n’omwe.” (Matayo 24:21, 22) Kwonka Ruhanga naaraganisa ngu abantu baingi nibaija kuhonokaho: “Ensi egi neehwaho . . . , kwonka okora ebi Ruhanga akunda, agumaho ebiro byona.”​—1 Yohaana 2:17.

Ku oraabe nooyenda kuhonokaho aha mperu y’ensi egi kandi ‘okagumaho ebiro byona,’ oine kukora ki? Mbwenu shi oshemereire kutandika kubiika ebintu nari kugira ebi waatebeekanisa? Ngaaha. Baibuli neetuhiga kugira ebintu bikuru ebi twayebembeza ebitarikushushana. Nitushoma tuti: “Ebyo byona ku biraabe biri eby’okuyaga bityo, mureebe oku mushemereire kuba abarikwera kandi abarikutiina Ruhanga omu mitwarize yaanyu, nimutegyereza ekiro kya Mukama.” (2 Petero 3:10-12) Kurugiirira aha byetoroire emishororongo egi, “ebyo byona” ebirikwija kucwekyerezibwa nibitwariramu obutegyeki bw’ensi egi n’abo boona abarikubushagika omu mwanya gw’okushagika Ruhanga. Buzima, okurundaana ebintu, tikirikubaasa kutujuna okucwekyerezibwa.

Kubaasa kuhonokaho twine kwemarira ahari Yehova Ruhanga turikuteeraho kugira emitwarize n’ebikorwa ebi arikusiima. (Zefania 2:3) Omu mwanya gw’okuba nk’abantu b’ensi egi tukeebwa ku turi omu biro by’emperu, twine kuguma ‘nitutegyereza ekiro kya’ Yehova. Abajurizi ba Yehova nibabaasa kukworeka kuruga omu Baibuli oku orikubaasa kuhonokaho aha kiro ekyo.