Abaafiire Nibaija Kuzooka!

Noobaasa kuba noijuka Gail owaaba yaagambirweho. Naagira ngu tarikumanya yaaba naabaasa kwebwa okufa kwa iba. Kwonka, aine ekihika ky’okureeba Rob omu nsi ensya ei Ruhanga yaaraganiise. Naagira ati: “Ekyahandiikirwe eki ndikukunda, n’Okushuuruurwa 21:3, 4.” Nikigira kiti: “We wenka aryaguma nabo, ari Ruhanga waabo; aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.”

Gail naayongyeraho ati: “Okuraganisa oku nikushoboorora amatsiko gaitu goona aha biro by’omumaisho. Ningirira esaasi abantu abafeereirwe abakundwa baabo kwonka batarikumanya amatsiko aga ag’okwija kugaruka kubareeba.” Gail naakora ebirikuhikaana n’ebi arikwikiriza arikwehayo kuheereza omu buheereza bw’obutwire, arikugambira abataahi ebi Ruhanga araganiise omu biro by’omumaisho obu haraabe ‘hatariho kufa bundi.’

Noobaasa kugira oti: ‘Eki tikirikubaasika!’ Kwonka teekateeka ahari Yobu. Akaba arwaire munonga. (Yobu 2:7) N’obu Yobu araabe yaabaire naashaba ngu afe, akaba naikiririza omu maani ga Ruhanga ag’okwija kumuzoora. N’obumanzi akagira ati: “Nkaabaasibwa ki, onshereka okuzimu, . . . Ku waakuunyeta, nkaakwetaba; kandi naiwe okaayetenga kureeba eki emikono yaawe yaakozire.” (Yobu 14:13, 15) Yobu akaba aine obuhame ngu Ruhanga we naija kuba aine ekihika ky’okumuzoora.

Omu bwire butari bwa hare, Ruhanga naija kuzoora Yobu n’abandi bantu nyamwingi obu ensi egi eraahindurwe paradiso. (Luka 23:42, 43) Ebyakozirwe 24:15 nihahamya ngu nihaija kubaho “okuzooka.” Yesu naatugambira ati: “Mutatangaarira eki; ahakuba obunaku nibwija, abari omu bituuro boona obu barihurira eiraka rye, bakarugamu.” (Yohaana 5:28, 29) Yobu naija kureeba obuhame ngu ekiraganiso eki kihikiirire. Naija kugira “amaani nk’agu yaabaire aine omu butsigazi bwe” kugira ngu omubiri gwe gugume guri “nk’ogw’omwana.” (Yobu 33:24, 25) Nikyo kimwe ekiraabe ahari boona abarikusiima embabazi za Ruhanga z’okuzoora abafu kutuura omu nsi.

Waaba waafeereirweho omuntu ou orikukunda munonga, ebi twagambaho nibibaasa kutamariraho kimwe okuganya oku oine. Kwonka okuteekateeka aha biri omu Baibuli, nikibaasa kukuha amatsiko agaabuzima kandi kikuhwere okutahwa amaani.—1 Abatesalonika 4:13.

Okaayenzire kumanya ebirikukiraho aha bikwatiraine n’okwemera amaganya? Nari oine ekibuuzo nk’eki: “Ahabw’enki Ruhanga naareka okubonabona n’obubi kubaho?” Za aha, jw.org, kureeba oku Baibuli erikugarukamu omu muringo ogurikuhuumuriza.