Akabokisi k’Ebibuuzo

◼ Buri omwe naabaasa kuhwera ata omu kurinda obuteeka omu nteerane z’ekibiina? (Bir. 31:12)

Ahabw’okwenda kuha Yehova ekitiinisa n’enteerane z’ekibiina ezi arikutuha, twena nituhigwa kwija kare kandi tukaba tweteekateekire kwegyesibwa. Ni kihwera twashutama omu ntebe ez’omu maisho reero ez’enyima tukazirekyera abaine abaana bato n’abo abaraije bakyerereirwe. Enteerane zitakatandikire, abaine esimu baine kuhamya ngu tizirikwija kuteganisa abandi. Nihaija kubaho okuteganisibwa kukye twena abarikuba bari omu nteerane twateeraho kuziha ekitiinisa.—Mub. 5:1; Fil. 2:4.

Abasya baatandika kwija omu nteerane, omubuurizi orikubamanya naabaasa kushutama nabo. Eki nikiija kuhwera na munonga haaba hariho abaana bato abarikwetenga kutendekwa. Noobaasa kushanga ngu ab’eka nigwo murundi gwabo gw’okubanza kwija omu nteerane. Kyaba nikwo kiri, nibabaasa kushutama enyima; eki nikija kuhwera abazaire, baaba nibenda kutwara abaana baabo aheeru kutateganisa abandi. (Enf. 22:6, 15) Eka erimu abaana bato ti kirungi kugishutamisa yonka omu kishengye ei abaana barikubaasa kuzaanira bakayomberera abandi. Ni kirungi abazaire kutwara abaana aheeru y’Ekyombeko ky’Obukama baaba nibenda kubahana nari kubahwera kandi bakagaruka nabo omunda.

Abo abarikwakiira abantu nibafayo munonga kureeba ngu haabaho obuteeka omu nteerane. Nibahwera amaka n’abo abarikwija bakyerereirwe kubooreka ahu bashemereire kushutama. Abarikwakiira abantu nibafayo baaba nibooreka abantu ah’okushutama kugira ngu batateganisa abandi. Haabaho ekyateganisa nibakoresa obwengye kukishoboorora. Abaana batwaza omu muringo ogurikubaasa kuhuzya abandi, abarikwakiira abantu nibabaasa kuhwera.

Buri omwe orikuba ari omu nteerane aine eki arikubaasa kukora kureeba ngu haabaho obuteeka kubaasisa abo abaija, kwega ahari Yehova n’ekigyendererwa kye ahabw’ensi ensya eribamu obusingye n’okuhikiirira.—Heb. 10:24, 25.