Ababuurizi Abakristaayo Baine Kushaba
1. Niki ekirikwetengyesa okubaasa kukora gye omurimo gwaitu gw’okubuurira?
1 Titurikubaasa kukora omurimo gw’okubuurira ahabwaitu. Yehova naatuha amaani g’okubuurira. (Fil. 4:13) Naakoresa baamaraika be kutuhwera kuhika aha bantu abarikwenda kwega amazima. (Kush. 14:6, 7) Yehova niwe arikukuza embibo z’amazima ezi turikubiba kandi tukaitirira. (1 Kor. 3:6, 9) N’ahabw’ekyo ni kikuru ababuurizi Abakristaayo okusherura obuhwezi ahari Tataitwe ow’omu iguru kurabira omu kushaba.
2. Niki ebi turikubaasa kushaba?
2 Twine Kweshabira: Buri kuza kubuurira twine kushaba. (Efe. 6:18) Ni bintu ki ebi turikubaasa kushaba? Nitubaasa kushaba ngu tugire obumanzi n’emiteekateekyere mirungi aha kicweka eki turikubuuriramu. (Byak. 4:29) Nitubaasa kushaba Yehova kutuhwera kuhika ahari abo abarikwenda kwega amazima abu turikubaasa kwegyesa Baibuli. Ou turikubuurira yaatubuuza ekibuuzo, omu bugufu nitubaasa kushaba tuhunami, turikushaba Yehova kutuhwera kugarukamu ebihikire. (Neh. 2:4) Nitubaasa kushaba Yehova kutuha obwengye kuguma nitwebembeza omurimo gw’okubuurira. (Yak. 1:5) Ekindi, Yehova naashemererwa, omu kushaba kwaitu twayoreka ngu nitusiima omugisha gw’okuba abaheereza be.—Kol. 3:15.
3. Okushabira abandi nikuhwera kuta omurimo gw’okubuurira kugyenda omumaisho?
3 Twine Kushabira Abandi: Kandi tushemereire ‘kushabirana,’ nangwa n’omu kushaba nitubaasa kugamba amaziina g’ab’eishe-emwe bagyenzi baitu. (Yak. 5:16; Byak. 12:5) Amagara mabi nigakuremesa kukora kihango omu murimo gw’okubuurira? Shabira ababuurizi bagyenzi baawe abaine amagara marungi. Otakaateekateeka ngu okushabira abandi tikirikuhwera munonga. Ni kirungi okushaba ngu abategyeki bakunde omurimo gwaitu gw’okubuurira, kugira ngu ab’eishe-emwe bagyenzi baitu babaase kuguma baine ‘obusingye n’obutebeekana.’—1 Tim. 2:1, 2.
4. Ahabw’enki tushemereire kushaba obutoosha?
4 Okubuurira amakuru marungi omu nsi yoona n’omurimo ogu tutarikubaasa kukora ahabw’amaani gaitu. ‘Twaguma nitushaba’ obutoosha nitwija kukora gye omurimo gw’okubuurira obwo Yehova arikutuhwera.—Rom. 12:12.