Noobaasa Kwejumba omu Kubuurira aha Sande?
1. Nitwega ki aha ki Paulo na bagyenzi be baakozire omuri Filipi?
1 Ahari Sabato, Abayudaaya baingi omuri Filipi nibwo baabaire bahuumura. Paulo na bagyenzi be bakaba batayaayire omu rurembo orwo aha rugyendo rwabo rumwe rw’obumiisani. Tihaine owaabaire naabaasa kubakwatsa orubanja ahabw’okutabuurira aha izooba eryo. Kwonka, bakamanya ngu Abayudaaya beteeraniire aheeru y’orurembo kushaba baakoresa omugisha ogwo kubabuurira. Paulo na bagyenzi be ka baine kuba baashemereirwe Ludia n’ab’omuka ye boona ku baahurikiize kandi bakabatizibwa! (Byak. 16:13-15) Obu baingi omu bunaku obu barikuhuumura aha Sande, noobaasa kukoresa zimwe aha shaaha z’izooba eryo kubabuurira.
2. Ni buremeezi ki obu abantu ba Yehova baasingwire ekirikutubaasisa kubuurira aha Sande tutarikuzibirwa?
2 Orutaro rw’Okubuurira aha Sande: Omuri 1927, abantu ba Yehova bakahigwa kwejumba omu kubuurira aha Sande. Ahonaaho ekyo kikarugamu okuhiiganisibwa. Omuri Amerika baingi bakakwatwa ahabw’okuhenda ekiragiro kya Sabato, okushiisha obusingye n’okuguza ebitabo bataikiriziibwe. Kwonka abantu ba Yehova tibararekiire aho kubuurira. Omu myaka eya 1930, ebibiina ebihereraine bikatandikaho kampeyini y’okweteeranira hamwe kubuurira omu kicweka kimwe. Obumwe ab’obushoboorozi ku baabaire bakwata ababuurizi, ahabw’okuba baingi bakaba batabaasa kubazibira. Buzima noosiima okwefeerereza kw’ab’eishe-emwe abo okurikutubaasisa hati kubuurira aha Sande tutarikuzibirwa?
3. Niki ekirikureetera Sande kuba eizooba rirungi ry’okwejumba omu kubuurira?
3 Eizooba Rirungi ry’Okubuurira: Aha Sande abantu baingi nibaba bari omuka. Nibaba bataine bingi by’okukora. Bamwe aha barikukira kuza omu makanisa nibabaasa kukunda kugamba aha birikukwata ahari Ruhanga aha izooba eri. Obu turikuba twine enteerane zaitu aha Sande kandi tujwire gye, nitubaasa kwejumba omu kubuurira eshaaha z’enteerane zitakahikire nari bwanyima yaazo. Kyaba nikyetengyesa, noobaasa kwija n’eky’okurya.
4. Nitubaasa kutunga kushemererwa ki twakoresa bumwe aha bwire tukejumba omu kubuurira aha Sande?
4 Aha Sande twakoresa bumwe aha bwire tukejumba omu kubuurira, nabwo nituba tukiine obwire bw’okuhuumura. Kandi okuhuumura kwaitu nikwija kuba kurimu okumarwa okurikuruga omu kwejumba omu buheereza oburikwera. (Enf. 19:23) Nitubaasa n’okutunga okushemererwa ahabw’okubuurira omuntu ori nka Ludia.