Akabokisi k’Ebibuuzo

◼ Oshemereire kuguma noijuka ki waaba nooyenda ngu waaheza kufa ebintu byawe byona nari bimwe aharibyo biheebwe ekibiina kya Yehova?

Abantu ku barikuheza kufa, nibaba batakiine bushoboorozi aha bintu byabo. (Mub. 9:5, 6) N’ahabw’ekyo baingi batakafiire, nibahandiika oburagwa kworeka oku ebintu byabo biraabaganisibwe. (2 Bag. 20:1) Oburagwa obwo nibworeka n’ou mukama w’ebintu atooraine kubaganisa ebintu bye yaheza kufa. Omu mahanga maingi waaba otahandiikire buragwa, ab’eby’obushoboorozi nibo barikucwamu oku ebintu byawe biraabaganisibwe waaheza kufa. N’ahabw’ekyo, waaba nooyenda ngu waaheza kufa ebintu byawe byona nari bimwe aharibyo biheebwe ekibiina kya Yehova, ni kikuru kuhandiika oburagwa kworeka gye enshonga egyo kandi okatoorana n’oraabibaganise.

Ou orikutoorana kubaganisa ebintu byawe naaba aine obujunaanizibwa bw’amaani. Kurugiirira aha bwingi bw’ebintu, omurimo gw’okubibaganisa nigubaasa kutooroba kandi gutware n’obwire bwingi. Kandi ab’eby’obushoboorozi nibaba bataireho ebiragiro ebiine kukuratirwa omu kubaganisa ebintu. Ti buri omwe ori omu kibiina ngu noobaasa kumutoorana ngu aije abaganise ebintu byawe. Oshemereire kutoorana ou orikureeba ngu naabaasa, n’omwesigwa kandi ngu ayeteekateekire kugyendera aha ebi ohandiikire omu buragwa.​—Reeba ekicweka “Obukuru bw’Okuhandiika Oburagwa,” ekiri omu Awake! eya Desemba 8, 1998.

Ku Waakushabwa Kubaganisa Ebintu: Waashabwa ngu oije obaganise ebintu mukama waabyo yaaheza kufa, oshemereire kubanza waamanya ebirikutwarirwamu kandi okashaba Ruhanga kukuhwera kureeba yaaba noobaasa kuhikiiriza obujunaanizibwa obwo. (Luk. 14:28-32) Mukama waabyo yaheza kufa, oine kumanyisa boona abaragirwe. Bwanyima, nibuba buri obujunaanizibwa bwawe kubaganisa ebintu orikukuratira ebiragiro n’oku oburagwa burikworeka. Ebintu n’obu byakuba biri bingi nari biri bikye, orikubibaganisa tashemereire kuhakanisa ebiri omu buragwa. Ebintu byona ebirikworekwa omu buragwa ngu biine kuheebwa ekibiina kya Yehova, nibiba biri eby’okukora emirimo yaakyo.​—Luk. 16:10; 21:1-4.