Girira Rukundo Ab’eishe-emwe ab’Omu Nsi Yoona

Ebiri omu 1 Petero 2:​17 ebyahandiikirwe emyaka nk’enkumi ibiri ehingwire nibituhiga kukundana. Obunaku obu twine kugyendera aha bigambo ebyo okukira ira. Kwonka shi nitubaasa kukunda tuta ab’eishe-emwe ab’omu nsi yoona? Kandi omu nsi egi etarimu rukundo, nitubaasa kukora ki okuguma twine rukundo? (Mat. 24:12) Bwanyima y’okureeba vidiyo Our Whole Association of Brothers noobaasa kugarukamu ebibuuzo ebi.

(1) Ni ryari obu waaba omwe aha Bakristaayo? (2) Ni bintu ki bishatu ebi twena ab’eishe-emwe omu nsi yoona turikwejumbamu? (3) Ab’eishe-emwe nibooreka bata ngu bamaririire kubuurira (a) omu ihamba rya Alaska, (b) aha bizinga bya Europe (c) n’omu bibira bya Peru? (4) Ahabw’enki tutashemereire kureeba omurimo gwaitu gw’okubuurira nk’ogutari mukuru? (5) Ha eby’okureeberaho ebirikworeka oku Abajurizi ba Yehova barikuhwera kandi bakagumya bagyenzi baabo (a) bwanyima y’okubaho omutsitsa, (b) bwanyima y’omwegyemure gw’amaani (c) n’abwanyima y’orutaro rw’amaani? (6) Ni bintu ki ebi twena turikubaasa kukora kworeka ngu twine rukundo eya buzima? (Yoh. 13:35) (7) Ni birungi ki ebirikuruga omu kukorera hamwe omu kwombeka Ebyombeko by’Obukama? (8) Ab’eishe-emwe omu burugwa-izooba bwa Europe na Russia bakaguma bata haihi na Yehova obu baabaire batarikwikirizibwa kubuurira? (9) Abajurizi ba Yehova nibateeraho bata munonga kuza omu nteerane empango, kandi ahabw’enki? (10) Vidiyo egi ekuhwereire eta kumariirira (a) kuramya Yehova ori hamwe n’ab’eishe-emwe, (b) kuhwera abandi omu bwire bw’oburemeezi (c) n’okugumizamu noobuurira n’obwesigwa omu mbeera zoona? (11) Noobaasa kukoresa ota vidiyo egi omu kubuurira kandi ryari?

Okukunda Yehova nikwo kurikutureetera kuba ab’eishe-emwe. N’ahabw’ekyo nitukunda kwega ebirikumukwataho kandi tubyegyesa n’abandi. Nitukunda n’abo abu arikukunda. Ku turikubahwera omu bwire bw’oburemeezi, titurikuteekateeka ngu Yehova naija kutwebaza, kureka niitwe turikumwebaza ahabw’okugira ngu okuba ab’eishe-emwe n’ekiconco kuruga ahariwe. Obu ebiro by’emperu eby’ensi egi etarimu rukundo biri haihi kuhendera, ka tuteereho kugirira rukundo ab’eishe-emwe ab’omu nsi yoona!