Baanabi Mubatware nk’Eky’Okureeberaho—Hosea
1. Ni kibuuzo ki eki orikubaasa kuba oreebuurize?
1 ‘Ni bintu ki ebi ndikubaasa kwefeerereza ahabw’okuheereza Yehova?’ Noobaasa kuba oreebuurize ekibuuzo nk’ekyo orikuteekateeka aha mbabazi ze n’ebirungi ebi akukoreire. (Zab. 103:2-4; 116:12) Nabi Hosea akakora ayekundiire ebi Yehova yaamuragiire, n’obu araabe yaabaire aine kwefeerereza. Nitubaasa kutooreza tuta nabi Hosea?
2. Nitubaasa kutooreza tuta nabi Hosea tukagumisiriza omu kubuurira?
2 Okubuurira omu Bwire Obugumire: Obutumwa bwa Hosea bukaba bugyendereire kugasira enganda ikumi za Israeli, ei okuramya okw’amazima kwabaire kuri haihi kuhwaho. Omugabe Yeroboamu II akakora ebyabaire bitarikushemeza Yehova kandi akashagika okuramya ekishushani ky’enyana okwatandikirweho Yeroboamu I. (2 Bag. 14:23, 24) Abagabe abaakuratsireho bakongyera kushiisha omukago gwabo na Yehova kuhitsya obu enganda ezo zaacwekyereziibwe omuri 740 Yesu atakazairwe. Kwonka n’obu haraabe haabaire hariho okuramya kw’ebishuba, nabi Hosea akaguma ari omwesigwa naaheereza nka nabi kumara emyaka nka 59. Mbwenu shi naitwe tumaririire kuguma nitubuurira n’obu twakuba nituhiiganisibwa?—2 Tim. 4:2.
3. Ebyahikire ahari Hosea bikooreka bita embabazi za Yehova?
3 Ta Omutima aha Mbabazi za Yehova: Yehova akaragiira Hosea kushwera “omukazi maraaya.” (Hos. 1:2) Gomeri omukazi we n’obu araabe yaamuzaariire omwana w’omwojo, bwanyima akazaara abaana abandi babiri aheeru. Hosea okusaasira omukazi we kikooreka embabazi nyingi nk’ezi Yehova yaagiriire Abaisraeli ku bayeteisize. (Hos. 3:1; Rom. 9:22-26) Mbwenu shi nitubaasa kwefeerereza ebi turikukunda, kugira ngu tuhwere abantu boona kumanya embabazi za Yehova?—1 Kor. 9:19-23.
4. Ni bintu ki ebi turikubaasa kwefeerereza ahabw’okuheereza Yehova?
4 Abaheereza ba Yehova abamwe befeerereize emirimo mirungi ahabw’okwenda kwongyera aha bwire bwabo bw’okubuurira. Bamwe bacwiremu kutashwera nari kutazaara ahabw’okwenda kwebembeza eby’Obukama. Twateekateeka aha bi nabi Hosea yaakozire, nitubaasa kugira ngu, ‘titurikubaasa kukora ebi yaakozire.’ Kwonka ku turikwongyera kusiima embabazi za Yehova kandi tukamwesiga kutuha amaani arikukoresa omwoyo gwe ogurikwera, naitwe naabaasa kutukoresa omu miringo etari emwe nk’oku yaakoreise nabi Hosea.—Mat. 19:26; Fil. 2:13.