Ebyeshongoro Bisya by’Okukoresa omu Kuramya!
1 Aha ruteerane orwa buri mwaka orwa Watch Tower Bible and Tract Society of Pennsylvania, orwabaireho Okitoba 4, 2014, hakarangwa entebeekanisa y’okuhindura omu kitabo kyaitu ky’ebyeshongoro. Amakuru ago buzima gakaba nigashemeza! Boona abaabaire bariho bakaijukibwa ngu ebyeshongoro byaitu by’Obukama biine omwanya mukuru omu kuramya kwaitu.—Zab. 96:2.
2 Noobaasa kwebuuza oti: ‘Ahabw’enki nikyetengyesa kukora empindahinduka omu kitabo ky’ebyeshongoro?’ Hariho enshonga nyingi. Ey’okubanza, oku turikuba nitwetegyereza Ebyahandiikirwe nikuguma nikushemezibwamu, kandi ekyo nikibaasa kureetera n’ebyeshongoro byaitu kuhinduka. (Enf. 4:18) Enshonga endiijo: Ebigambo ebingi ebirikukoresibwa omu kitabo ky’ebyeshongoro eki twine bikaruga omu New World Translation enkuru. Ebigambo ebyo biine kuhindurwamu bikahikaana n’ebiri omu New World Translation ensya. Ahabw’okugira ngu hariho omurimo muhango ogwine kukorwa kugira ngu ebigambo bihikaane n’enyetegyereza y’Ebyahandiikirwe, bakacwamu kugira ebyeshongoro bikye ebisya ebyayongyerwamu.
3 Mbwenu shi twine kutegyereza ekitabo ky’ebyeshongoro ekisya kuhitsya obu kiraashohozibwe kubaasa kweshongora ebyeshongoro ebisya? Ngaaha. Nitubamanyisa ngu omu meezi makye agarikwija, bimwe aha byeshongoro ebisya nibiija kuteebwa aha jw.org. Ekyeshongoro ekisya ku kiraashohozibwe, nikiija kuteebwa aha muheru gw’entebeekanisa y’Oruteerane rw’Obuheereza kiriho ebigambo “ekyeshongoro kisya.”
4 Oku Turikubaasa Kwega Ebyeshongoro Ebisya: Nikibaasa kuguma kwega ekyeshongoro kisya. Kwonka nk’omuhandiiki wa zaaburi, nitwenda kweshongora twaba turi omu nteerane z’ekibiina kutari “kuhunama.” (Zab. 30:12.) Kubaasa kwega ekyeshongoro ekisya, kuratira obuhabuzi oburikworekwa ahaifo.
Guma noohurikiza amaraka g’ebyeshongoro ebyo, agaraije kuteebwa aha Mukura gwaitu. Oku oraagume noohurikiza amaraka ago, nikwo kiraije kukworobera kuguma nobiijuka.
Yega ebigambo ebiri omu kyeshongoro kandi oteereho kubikwata.
Teeraho kweshongora eiraka ry’ekyeshongoro hamwe n’ebigambo byakyo. Guma nookora otyo kuhitsya obu oraayegye ekyeshongoro.
Mugume mwegyezemu omu byeshongoro ebisya omu bwire bw’Okuramya kw’Eka kuhitsya obu mwena muraabikwate.
5 Ameezi agarikwija ekyeshongoro ekisya kyaba nikyo kiraayeshongorwe aha muheru gw’Oruteerane rw’Obuheereza, ekibiina nikiija kubanza kyahurikiza eiraka ryakyo omurundi gumwe. Reero bwanyima beeshongore nka butoosha.
6 Okweshongorera hamwe twaba turi omu nteerane zaitu nikitureetera kushemererwa turikuhimbisa Yehova. N’ahabw’ekyo, titushemereire kugira omuze gw’okushohora aheeru ahu kitarikwetengyesa baaba nibaza kutandika ekyeshongoro omu nteerane zaitu.
7 Hariho omuringo ogundi ogu turikubaasa kworekamu ngu nitusiima ebyeshongoro byaitu ebirikwera. Aha nteerane zaitu empango, buri kicweka nikitandika n’obweshongoro. Emirundi ebiri buri mwaka, ab’eishe-emwe na banyaanyazi-itwe abeehaireyo kuruga omu mbaju ina z’ensi nibakoresa esente zaabo kuza Patterson, New York, kushohoza ebyeshongoro birungi ebi turikukoresa omu kuramya kwaitu. N’ahabw’ekyo, ceyamaani yaatushaba kushutama ngu tuhurikiize obweshongoro obutebeekanisiibwe, twine kukikora. Twakora ekyo nikiija kutuhwera kutebeekanisa emitima yaitu ahabw’ebi turikuba nituza kwega.—Ezr. 7:10.
8 Nituza kuhendera oruteerane rwaitu eri izooba, n’ekyeshongoro ekisya ekiine omutwe “Obukama Bwatairweho—Ka Bwije!” Ekyeshongoro eki, kikagambwaho aha ruteerane rw’omwaka oruhwaire, kitebeekanisiibwe kuhikaana n’okukuza emyaka 100 ei Obukama bwahitsya burikutegyeka.
9 Hatariho kubanganisa ebyeshongoro ebisya n’ebintu ‘birungi’ kuruga ahari Yehova. (Mat. 12:35a) Ka tumariirire kwega ebyeshongoro bisya ebi, kandi tubyeshogore kuruga aha mutima, turikuhimbisa Ruhanga kandi tukamuha ekitiinisa!—Zab. 147:1.