Okugaaniira omu muringo gw’ekitiinisa ni nka siminti n’omusheenyi ebirikuhamya obushwere bwanyu
EBY’ABASHWERAINE
3 Ekitiinisa
EKI KIRIKUMANYISA
Abashweraine abarikuhaana ekitiinisa buri omwe naafayo ahari mugyenzi we, n’omu butaikirizana. “Abakundaine aba buri omwe tarikuremera aha kye,” ekitabo Ten Lessons to Transform Your Marriage nikwo kirikugira. “Kureka, buri omwe naaguma naagamba na mugyenzi we aha butaikirizana bwabo. Nibahurikizana omu muringo gw’ekitiinisa kandi nibooroberana.”
OMUSINGYE GWA BAIBULI: ‘Rukundo terikwesherurira ebyayo.’—1 Abakorinso 13:4, 5.
“Okuha omukazi wangye ekitiinisa nikimanyisa okusiima entwaza ye, n’okutakora ekintu kyona eky’akabi ahariwe nari aha bushwere bwaitu.”—Micah.
ENSHONGA AHABW’ENKI NI KIKURU
Abashweraine baaba batarikuhaana okuhaana ekitiinisa, nibagaaniira abarikucwererana emanja, barikuherana, nangwa n’okugayana, kandi abacondooza nibagira ngu emitwarize egi n’akamanyiso ngu nihabaasa kwija kubaho okugaitururwa.
“Okugaaniiza omukazi waawe nari, okumurengyeza, nari okumukiniika, nikimureetera kukwihamu obwesigye obu akwinemu, kandi nikishiisha n’obushwere bwanyu.”—Brian.
EKI ORIKUBAASA KUKORA
YEGYEZE
Kuratiriza ebigaaniiro byawe n’ebikorwa byawe kumara esaabiiti. Reero oyebuuze oti:
‘N’emirundi engahi ei ncweraire omukundwa wangye orubanja, kandi n’engahi ei nyorekire ngu niimusiima?’
‘Ni mu miringo ki ei nyorekire ngu nimpa omukundwa wangye ekitiinisa?’
GAANIIRAHO N’OMUKUNDWA WAAWE
Ni bikorwa ki na bigambo ki ebirikubaasa kuhwera buri omwe ahariimwe kuhurira ngu naaheebwa ekitiinisa?
Ni bikorwa ki na bigambo ki ebirikureetera buri omwe ahariimwe kuhurira atarikuheebwa kitiinisa?
OBUHABUZI
Handiika emiringo eshatu ei orikwenda ngu oheebwe ekitiinisa. Gambira omukundwa waawe nawe kukora nikyo kimwe. Muhaanise ebi mwahandiika, reero oteereho kuha mugyenzi waawe ekitiinisa omu miringo ei yaahandiika.
Handiika emitwarize ei orikusiima aha mukundwa waawe. Reero mugambire oku orikusiima emitwarize ye egyo.
“Okuha ibanyi ekitiinisa nikimanyisa okukyoreka omu bikorwa byangye ngu nimutwara nk’ow’omuhendo, kandi ngu niinyenda ngu ashemererwe. Tikirikumanyisa ngu butoosha oine kukora ekintu kihango, obuntu bukye obu ndikuguma niimukorera nibubaasa kworeka ngu niimuha ekitiinisa.”—Megan.
Ekikuru, tiiwe kuteekateeka ngu nooha mugyenzi waawe ekitiinisa nari torikukimuha, kureka ekikuru n’omukundwa waawe kuhurira ngu noomuha ekitiinisa.
OMUSINGYE GWA BAIBULI: “Mujware omutima gw’esaasi, embabazi, okutwaza gye, obucureezi n’okugumisiriza.”—Abakolosai 3:12.