11 Obweziriki

EKI KIRIKUMANYISA

Abantu abeeziriki tibarikwetantara emirimo. Kureka, nibakunda okukora n’amaani kwegasira n’okugasira abandi, n’obu omurimo gurikuba nigureebeka nk’ogw’ahansi.

ENSHONGA AHABW’ENKI NI KIKURU

Kiikirize nari oyangye, buri muntu naaba aine obujunaanizibwa. Omu nsi ahu abantu batarikwenda kukora munonga, okuba omweziriki nikikureetera emigisha mingi.​—Omubuurizi 3:13.

“Nyegire ngu waakora n’amaani, nooyesiima kandi omarwa. Okuhurira omazirwe nangwa kindeeteire kwega kukunda okukora. Waagira omucwe murungi gw’okukunda kukora noija kugira eiziina rirungi.”​—Reyon.

OMUSINGYE GWA BAIBULI: ‘Omu kufa kubi okw’emiringo yoona harimu omugasho.’​—Enfumu 14:23.

EKI ORIKUBAASA KUKORA

Gira emiteekateekyere mirungi aha kukora orikukuratira amadaara aga.

Yesiime ahabw’okwega kukora gye ebintu. Yaaba nookora emirimo y’aha ka, heza emirimo ei ohairwe, nari waaba nookora emirimo y’okwebaisaho ta omutima omu bi orikukora. Waakora gye omurimo, reeba ahu oine kwongyeramu amaani, orikukora juba nari kurungi. Oku orikwongyera kugira omwoga, nikwo orikwongyera kukunda omurimo gwawe.

OMUSINGYE GWA BAIBULI: ‘Nooreeba omuntu orikwezirika omu murimo gwe? Naija kwemerera omu maisho g’abagabe naabaheereza. Tarikwija kuheereza bataine iziina.’​—Enfumu 22:29.

Reeba enshonga enkuru. Obwire obwingi, ku orikuhikiiriza gye obujunaanizibwa bwawe, noogasira abandi. Nk’eky’okureeberaho, waaba ori omweziriki aha kukora emirimo y’aha ka, nootuubya aha mugugu gw’abandi omu ka.

OMUSINGYE GWA BAIBULI: ‘Okuha [nikureeta okushemererwa] okukira okuheebwa.’​—Ebyakozirwe 20:35.

Gyenda mahiro endiijo. Omu mwanya gw’okukora ebiringaniire, teeraho kukora ekirengire aha ki waashabwa kukora. Omu muringo ogu, nooba nooyetegyeka, orikukora bingi kutari kugira ngu noogyemwa, kureka nooba ocwiremu kukikora.​—Matayo 5:41.

OMUSINGYE GWA BAIBULI: “Ekirungi kyawe kirekye kuba eki ogyemirwe, kureka eki oyekundiire.”​—Filemooni 14.

Ba omuringaaniza. Abantu abeeziriki ti banafu, kwonka ti bahuuku b’emirimo. Nibaringaaniza ebintu bibiri, okukora n’obweziriki n’obwire bw’okuhuumura.

OMUSINGYE GWA BAIBULI: “Oruhi rumwe rwijwire obusingye niruhita empi ibiri eziijwire emirabanamu n’okwitanira omuyaga.”​—Omubuurizi 4:6.