Emigasho Y’Okuba Omwerinzi

OKWERINDA NIKI?

Okwerinda nikutwariramu okubaasa

• okutarahuka kwehimbisa

• okuzibira enyehurira

• okukora emirimo ei otarikukunda okagiheza

• okwebembeza eby’abandi okukira ebyawe

AHABW’ENKI OKWERINDA NI KUKURU?

Abaana abarikwerinda munonga nibabaasa kwangira okwohibwa, nangwa n’obu okwohibwa kwakuba nikuza kurugamu ebirungi by’akaire kakye. Okutaana n’ekyo, abaana abatarikwerinda nibabaasa

• kuba ebihaze

• kurwara amaganya

• kureetsa nari kukoresa kubi amaarwa nari emibazi

• kugira emiriire mibi

Okucondooza kumwe kukooreka ngu abaana abarikwerinda munonga tibarikukira kurwararwara, kugira oburemeezi bw’esente, nari kuhenda ebiragiro. Okucondooza oku kukareetera omuhangu Angela Duck-worth owa Yunivasite ya Pennsylvania kugira ati: “Nihabaasa kuba hatariho ekintu ekirikwetwa okwerinda munonga.”

OKU ORIKUBAASA KWEGYESA OKWERINDA

Yega kugira ngu ngaaha kandi okimanyise.

OMUSINGYE GWA BAIBULI: ‘Ebigambo byanyu Eego, ebe Eego, nari Ngaaha, [ebe] Ngaaha.’​—Matayo 5:37.

Abaana nibabaasa kugyeza okumariirira kw’omuzaire barikushezya emigyere, nangwa obundi n’omu bantu. Omuzaire yaagonda, omwana naamanya ngu okushezya emigyere n’omuringo murugi gw’okuhindura ngaaha y’omuzaire kuba eego.

Kwonka, omuzaire yaagira ngu ngaaha kandi akakimanyisa, omwana naayega enshonga nkuru, ngu titurikubaasa kutunga ebi turikwenda butoosha. “Buzima, abantu abarikwega eishomo eri nibareebeka nk’abaine okumarwa,” Dr. David Walsh nikwo yaahandiikire. “Nituba tutarikuhwera abaana baitu twabeegyesa ngu ensi butoosha neija kuba neebakwata mememe.”a

Omwana waawe waamugira ngu ngaaha hati nikiija kumuhwera kwegira ngu ngaaha yaakura, nka yaayohibwa kukoresa emibazi nari kwejumba omu bikorwa by’akabi.

Hwera abaana baawe kwetegyereza ebirungi n’ebibi ebirikubaasa kurugamu.

OMUSINGYE GWA BAIBULI: ’Ebi omuntu arikubiba nibyo arikugyesha.’​—Abagalatia 6:7.

Omwana waawe aine kumanya ngu ebi arikukora haine ebirikurugamu, kandi ngu okuteezibira nikwija kurugamu ebitari birungi. Nk’eky’okureeberaho, omwana waawe yaaba naarahuka kugira ekiniga, abandi nibabaasa kumwetantara. Kwonka, yaaba naayezibira yaagira ekiniga, nari kutegyereza omu bugumisiriza omu mwanya gw’okushara abandi ekirimi, kandi abantu nibaija kumukunda. Hwera omwana waawe kwetegyereza ngu naaba naija kutunga ebirungi yaaguma naayezibira.

Yegyesa omwana waawe kwebembeza ebikuru.

OMUSINGYE GWA BAIBULI: ‘Siima ebirikukira [obukuru].’—Abafilipi 1:10.

Okwerinda ti kwezibira kukora ekigwire kyonka; nikitwariramu okukora ebirikwetengyesa, n’obu birikuba bitarikushemeza. Ni kikuru omwana waawe kwega kumanya ebintu bikuru kandi akabihamiraho. Hwera omwana waawe kubanza kukora ebintu ebikuru. Nk’eky’okureebereho, aine kubanza kukora eby’eishomero eby’okukorera omuka atakagiire omu by’okweshemeza.

Ba eky’okureeberaho kirungi.

OMUSINGYE GWA BAIBULI: “[Naabateeraho] eky’okureeberaho, ngu naimwe mukore nk’oku naabakorera.”—Yohaana 13:15.

Omwana waawe naija kureeba oku orikutwaza omu mbeera mbi nari ezirikumaramu amaani. Yoreka ngu okwerinda nikurugamu ebirungi. Nk’eky’okureeberaho, omwana waawe yaagyeza okugumisiriza kwawe, nootwaza omu muringo gw’ekiniga nari nooguma oikaikaine?