Ekitebyo 86
Abashaija Okwebemberwa Enyonyoozi
NOOREEBA egyo nyonyoozi erikwaka munonga ei abo bashaija barikworekyereza orukumu? Ku baarugire omuri Yerusaalemu, enyonyoozi yaareebeka. Aba bashaija nibaruga omuri Burugwa-izooba, kandi nibeega ebirikukwata aha nyonyoozi. Nibaikiriza ngu egi nyonyoozi nsya nebeebembera kubahitsya aha muntu mukuru munonga.
Abashaija ku baahikire Yerusaalemu, baabuuza bati: ‘Omwana orikuza kuba omugabe w’Abayudaaya ari nkahi?’ “Abayudaaya” n’erindi iziina ry’Abaisraeli. Abashaija bagira bati: ‘Tubandize kureeba egi nyonyoozi y’omwana ogu obu tubaire turi omu Burugwa-izooba, kandi twaija kumuramya.’
Heroode, omugabe wa Yerusaalemu, ku yaakihuriire, yaaguubwa kubi. Akaba atarikwenda ondiijo mugabe kutwara omwanya gwe. N’ahabw’ekyo Heroode yaayeta abanyamurwa abakuru yaababuuza ati: ‘Omugabe owaaraganisiibwe aryazaarirwa nkahi?’ Baamugarukamu bati: ‘Baibuli neegira ngu n’omuri Betelehemu.’
Atyo Heroode yaayeta abashaija abaarugire Burugwa-izooba yaabagira ati: ‘Mwirooko mugyende musherure ogwo mwana. Ku muraamubone, mummanyise. Naanye niinyenda kuza kumuramya.’ Kwonka buzimazima, Heroode naayenda kusherura omwana ngu amwite!
Etyo enyonyoozi ebeebembera kuhika Betelehemu, eyemerera ahu omwana yaabaire ari. Abashaija ku bataaha omu nju, bashangamu Mariamu n’omwereere Yesu. Baihayo ebiconco kandi babiheereza Yesu. Kwonka bwanyima Yehova ahabura abashaija aba omu kirooto okutagaruka owa Heroode. N’ahabw’ekyo bagaruka owaabo nibatoora ogundi muhanda.
Heroode ku amanya ngu abashaija abarugire omuri Burugwa-izooba bagarukire owaabo, agira ekiniga kingi. N’ahabw’ekyo aragiira ngu abaana b’aboojo boona omuri Betelehemu ab’emyaka ebiri kugarura ahansi beitwe. Kwonka Yehova ahabura Yosefu omu kirooto obwire butakahikire, atyo Yosefu n’eka ye baza kutuura omuri Misri. Bwanyima, Yosefu ku yaamanyire ngu Heroode akafa, yaatwara Mariamu na Yesu bagaruka owaabo Nazareesi. Oku niyo Yesu yaakuriire.
Noteekateeka ngu n’oha owaareetaire egyo nyonyoozi kwaka? Ijuka, abashaija bakabanza kuza Yerusaalemu aha nyima y’okureeba enyonyoozi. Sitaane Omuregi akaba naayenda kwita Omwana wa Ruhanga, kandi akaba naamanya ngu Omugabe Heroode owa Yerusaalemu akaba naija kugyezaho kumwita. N’ahabw’ekyo, Sitaane aine kuba niwe yaayakiise egyo nyonyoozi.
Matayo 2:1-23; Mika 5:2.