Amagara omu Nsi Ensya ey’Obusingye
Wareeba ebiri aha mwanya oguri aha kapapura aka, nohurira wagira biteekateeko ki? Omutima gwaawe tigukayetenga obusingye, okushemererwa n’obugwagye ebiri kureebwaho? Buzima nigubyetenga. Kwonka nink’ekirooto nari eky’okutangaaza, kwikiriza ku emituurire egi n’eyokwiija kubaho omu nsi?
Abantu baingi obumwe nikwo bateekateeka. Omu bunaku obu, ebiri kuhamibwa ni entaro, obutemu, enjara, endwaara, bukuru—okugambaho bikye. Kwonka hariho ekiri kutureetera kugira amatsiko. Ku eri kuranzya aha biri omu maisho, Baiburi egamba aha “eiguru erisya n’ensi ensya ebituurwamu okuhikiirira nk’oku [Ruhanga] yaaraganiise.”—2 Petero 3:13; Isaaya 65:17.
“Eiguru erisya” “n’ensi ensya” ebi, okurugiirira oku Baiburi eri kugamba ti muringo ogundi ogw’eiguru nari ensi nk’egi. Ensi egi n’eiguru bikahangwa bihikiriire kandi Baiburi neyoreka ku birigumaho ebiro byoona. (Zaaburi 89:36, 37; 104:5) “Ensi ensya” kiryaaba kiri ekibiina ky’abantu abahikiriire abarigituuramu, kandi “eiguru erisya” ribe obukama obuhikiriire obw’omwiguru nari shi gavumenti eriija kutegyeka ekyo kibiina ky’abantu eky’omu nsi. Kwonka n’eky’amazima kwikiriza ngu okubaho kw“ensi ensya” nari ensi ey’ekitiinisa nikibaasika?
Mbwenu, kimanye ku emituurire mirungi etyo kyabaire kiri kimwe aha bigyendererwa bya Ruhanga aha bw’ensi egi. Akata abantu b’okubanza omu Kibanja kya Ruhanga omu nsi omuri Edeni kandi yabaha omurimo gw’okutangaaza: “Muzaare mukanye mwijure ensi, ebe eyaanyu.” (Okutandika 1:28) Eego, ekigyendererwa kya Ruhanga kikaba kiri ngu bagire abaana bakanye, mporampora bahangutsye Ekibanja kya Ruhanga okubuga ensi yoona. Nobu bwanyima baraabe baatoraineho okugomera Ruhanga, kityo kikahamya ku batahikire kutuura ebiro byoona, ekigyendererwa kya Ruhanga eky’okubanza tikirahindukire. Kandi nikiragirwa kuhikiirizibwa omu nsi ensya!—Isaaya 55:11.
Omu mazima ku oshaba Eshaara ya Mukama waitu nari Tataitwe ori kushaba ngu Obukama bwa Ruhanga bwiije, oba noshaba ngu gavumenti ye ey’omwiguru eije eihireho kimwe ensi ey’obutahikiirira bwanyima etegyekye ensi egi ensya. (Matayo 6:9, 10) Kandi twiine obwesigye ngu Ruhanga naija kugarukamu eshaara egyo, aha bw’okuba Ekigambo kye kiraganisa kiti: “Abahikiriire baryahungura ensi bagituuremu ebiro byona.”—Zaaburi 37:29.
Amagara omu Nsi ya Ruhanga Ensya
Obukama bwa Ruhanga nibwiija kureetera ensi emigisha etakabahoga, buhikiirize ibara kintu kirungi kyoona eki Ruhanga omu kubanza yagabirwe atebeekanisiize abantu be kushemererwa omu nsi. Obwangani n’obutaikirizana biryahweeraho kimwe, mpora mpora buri omwe omu nsi abe munywaani wa buri omwe ow’amazima. Omu Baiburi Ruhanga naraganisa ku ariija ‘kuherezaho kimwe engamba okuhisya aha muheru gw’ensi.’ “Eihanga tiriri bangira rindi rurara, kandi tibari garuka kwega by’engamba.”—Zaaburi 46:9; Isaaya 2:4.
Ensi yoona mpora mpora neija kuhindurwa omu muringo gw’ekibanja kya Ruhanga. Baiburi n’egira eti: “Eihamba n’ensi eyomire biryashemererwa eihamba ry’omushenyi riryashemererwa rirabye ebirabyo nk’esheko y’ensi. . . . Ahabw’okuba amaizi garyafumuka omu ihamba, n’emigyera omu ihamba ry’omusheenyi. Omushenyi gurikwotsya guryahinduka ekiyanja, n’ensi ekarangataine ehindukye ey’enshuro z’amaizi.”—Isaaya 35:1, 6, 7.
Haryaba hariho ebirireeta okushemererwa omu Kibanja kya Ruhanga aha nsi. Abantu tibarigaruka kugira njara obundi aha bw’okubura ebyokurya. “Ensi ereetsire omweru gwayo,” Baiburi nikwo eri kugira. (Zaaburi 67:6; 72:16) Boona baryashemerererwa eby’emikono yaabo ekozire nk’oku Omuhangi waitu ari kuraganisa: “Baryabyara emizaabibu barye ebijuma byayo. . . . Tibaribyara mizaabibu ekariibwa abandi.”—Isaaya 65:21, 22.
Omu nsi ya Ruhanga ensya tiharibamu abantu kwerunda omu byombeko bihango ebikwataine, nari omu buju bw’oburofa aha bw’okuba Ruhanga akatebeekanisa ngu: “Baryayombeka amaju bagatuuremu . . . Tibaryombeka maju abandi bakagataahamu.” Baiburi hoona eraganisa ngu: “Tibarihendekyera busha.” (Isaaya 65:21-23) Batyo abantu emirimo yaabo eryabeerera kandi ebahaazye. Amagara tigaritama.
Mpora mpora, Obukama bwa Ruhanga hoona buryagaruraho enkwatanisa y’obusingye obwabaire buriho omu kibanja kya Edeni ahagati y’enyamaishwa, hamwe n’ahagati y’enyamaishwa n’abantu. Baiburi n’egira eti: “Omushega guryataaha n’omwana gw’entaama n’engwe eryabyama n’omwana gw’embuzi, enyana n’entare n’enumi y’ekimasha ekigomokire biryaguma hamwe kandi omwana muto nuwe aribifunya.”—Isaaya 11:6-9; Hosea 2:18.
Teera akashushani, omu Kibanja kya Ruhanga oburwaire bwoona n’obumuga bwa buri muringo nabyo biryatambwa! Ekigambo kya Ruhanga nikituhamiza kiti: “Tihaine mutuuzi waayo origira ati: Ndwaire.” (Isaaya 33:24) “[Ruhanga] aryaragaza amarira goona aha maisho gaabo, tiharibaho kufa bundi n’obu kwakuba okucura nari okurira nari obusaasi, ahabw’okuba ebya ira biryaba bihwaireho.”—Okushuuruurirwa 21:4.
Iwe Oku Kyakukubaasikira
Omu mazima omutima gwaawe niguragirwa kutwaarwa ebiraganiso bya Ruhanga aha bikwatiraine n’amagara omu nsi ye ensya ey’okuhikiirira. Haza obwo bamwe nobu bakuba bari kuteekateeka ngu emigisha nk’egyo erengyesereize okutabaho, baitu tiyo erengyesereize munonga okutaruga omu mikono y’Omuhangi waitu otukunda.—Zaaburi 145:16; Mika 4:4.
N’amazima hariho ebiri kwetengwa kuhikiirizibwa twaaba ab’okutuura ebiro byona omu Kibanja kya Ruhanga aha nsi eri kwiija. Yesu akooreka eky’okubibandiza obu yabaire nashaba Ruhanga ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.”—Yohaana 17:3.
Nahabwekyo omu mazima kuturabe nitwetenga kutuura omu nsi ya Ruhanga ensya, nituragirwa kubanza twaayega ebi Ruhanga akunda haza tubigyendereho. Ahakuba ekihikire kiri ngu: “Ensi egi nehwaho n’okwetenga kwayo; kwonka okora ebi Ruhanga akunda agumaho ebiro byona,” kushemerererwa obutwiire bwoona emigisha ei Ruhanga otukunda kandi Omuhangi waitu ari shuumya.—1 Yohaana 2:17.
Okwihaho kyayorekwa omu muringo ogundi, Ebyahandiikirwe byoona nibiihwa omu Baiburi ey’Orunyankore eya 1964.