Ebiro by’Omu Maisho Ebirungi Munonga

Sitaane na baadaimoni be tibarikwija kugumizamu kubeiha abantu okumara obwire buraingwa. Yehova yaaherize kubabinga omu iguru. (Okushuuruurwa 12:9) Omu biro bitari byahare, Ruhanga kandi naija kurwanisa Sitaane na baadaimoni be. Arikworekwa kuruga ahari Ruhanga, Yohaana entumwa akagira ati: “Bwanyima naareeba maraika ondiijo naashuuma, naaruga omu iguru aine omu ngaro ekishumuruzo ky’ekiina ekitaine bugarukiro n’orujegyere ruhango. Yaakwata ekyo kijoka ekya ira niwe Muregi kandi Sitaane, yaamuboha okumara emyaka rukumi, yaamunaga omu kiina ekitaine bugarukiro, yaakingaho, yaataho akamanyiso ngu arekye kurugamu kubeihabeiha amahanga obundi, okuhitsya ahi emyaka rukumi erihwera.” (Okushuuruurwa 20:1-3) Bwanyima, Omuregi na baadaimoni be baryacwekyerezibwa ebiro byona.—Okushuuruurwa 20:10.

Obwo abantu ababi baryacwekyerezibwa.—Zaaburi 37:9, 10; Luka 13:5.

Abafu Baryazooka!

Bwanyima y’okucwekyerezibwa kwa Sitaane na baadaimoni be, Yehova aryaha abantu emigisha mingi. Noija kwijuka ngu abantu abafiire tibaine magara, kandi ngu tibariho. Yesu akagyeranisa okufa n’okugwejegyera—okugwejegyerera kimwe okutarimu kuroota. (Yohaana 11:11-14) Akagamba ekyo ahabw’okuba akaba naamanya ngu obwire nibwija kuhika obu abo boona abagwejegyereire omu kufa barisisiimukira omu magara. Akagira ati: “Obunaku nibwija, abari omu bituuro boona abarikwijukwa obu . . . barirugamu.”—Yohaana 5:28, 29, NW; gyeranisa na Ebyakozirwe 24:15.

Baryazoorwa batungye amagara aha omu nsi. Omu mwanya gw’okuranga abantu abafiire, amakuru agarikushemeza garyaba ag’okuranga abo abariba bazookire kutunga amagara! Ka nikiija kuba nikishemeza munonga okwakiira abakundwa baitu kuruga omu bituuro!

[Ekishushani ekiri aha rupapura 28]

Omu bwire butari bwa hare Sitaane na baadaimoni be nibaija kucwekyerezibwa

[Ekishushani ekiri aha rupapura 29]

Abafiire baryazooka batungye amagara omu nsi