Ekicweka 2
Ensi Etarimu Kubonabona
1, 2. Ni nteekateeka ki ey’omutaano ei abantu baingi baine?
KWONKA, obukaikuru bw’abantu omu nsi yoona nibakireeba omu muringo ogundi. Nibareeba ngu ebiro by’abantu eby’omu maisho nibiija kuba birungi munonga. Nibagira ngu omu nsi egi, juba nihaija kuba hatakirimu obubi n’okubonabona. Baine obwesigye ngu ebintu ebibi byona ebiriho nibiija kumarirwaho kimwe kandi ensi yoona ehindukye nsya. Kandi nibagira ngu omusingye gw’ensi egyo ensya guriyo niguteebwaho omu bunaku obu!
2 Abantu aba nibaikiriza ngu ensi egyo ensya neija kuba etarimu ntaro, obwinazi, obugomi, obutari buringaaniza, n’obworo. Neija kuba eri ensi etarimu ndwara, enaku, amarira, n’obu kwakuba okufa. Omu bunaku obwo abantu nibaija kuhindurwa abahikiriire, bagumeho ebiro byona baine okushemererwa omu nsi ehindwirwe paradiso. Manya n’abaafiire nibaija kuzoorwa kandi baheebwe omugisha gw’okuguma bari abahuriire ebiro byona!
3, 4. Ahabw’enki abantu abo bataine kubangaanisa aha bi barikwikiriza?
3 Okureeba ebiro by’omu maisho omu muringo ogu n’ekirooto burooto? Ngaaha tikwo kiri. Nikurugiirira aha kwikiriza okuhamire ngu buzima Paradiso egi neija kubaho. (Abaheburaayo 11:1) Ahabw’enki bataine kubanganisa kwona? N’ahabw’okuba ow’obushoboorozi bwona kandi Omuhangi w’ebintu byona niwe yaakiraganiise.
4 Aha bikwatiraine n’ebi Ruhanga arikuragaanisa, Baibuli neegira eti: ‘Tihariho kintu na kimwe ekirabuzire aha birungi byona ebi MUKAMA Ruhanga waanyu yaabaraganiise; byona bikabahikaho, tihariho kintu na kimwe ekitarabaireho.’ “Ruhanga ti muntu ngu abeihe . . . Ebi yaagambire taribikora? Kandi ebyarugire omu kanwa ke taribihikiiriza?” “MUKAMA ow’amahe arahiire naagira ati: Nk’oku naateekateekire, nikwo kiriba, kandi kiryaba nk’oku naamaririire.”—Yoshua 23:14; Okubara 23:19; Isaaya 14:24.
5. Ni bibuuzo ki ebirikwetengwa kugarukwamu?
5 Kwonka shi, ekigyendererwa kya Ruhanga ku kiraabe kyabaire kiri okuhindura ensi paradiso, omwanya ogutarimu kubonabona, ahabw’enki yaikiriize ebintu bibi kubaho? Ahabw’enki ategyereize, hakahinguraho emyaka enkumi mukaaga okuhitsya nahati okubaasa kushoboorora ekyashobire? Tugire ngu shi emyaka egi yoona ehingwireho ebairemu okubonabona neeyoreka ngu Ruhanga buzima tarikutufaho, nari ngu tabaho?