Eshuura 14
Ni Bushoboorozi bw’Oha obu Oshemereire Kwikiriza?
1, 2. Emiringo y’obushoboorozi yoona ni mibi? Shoboroora.
EKIGAMBO “obushoboorozi” nikigwisa kubi abantu baingi. Eki nikyetegyerezibwa ahabw’okuba Obushoboorozi nibukira kukoresibwa kubi—aha mirimo, omu maka, kandi n’omu by’obutegyeki. Baibuli ehikire kugira ngu: “Omuntu naayekuriza ahari mugyenzi we kumukora kubi.” (Omubuurizi 8:9) Eego, baingi nibatwaza kubi bagyenzi babo omu muringo gw’obushaarizi kandi n’okweyendeza bonka.
2 Kwonka tikugira ngu obushoboorozi bwoona nibubi. Nk’eky’okureeberaho, nikibaasa kugambwa ngu omubiri gwaitu gutwineho obushoboorozi. “Niguturagiira” okwitsya, kurya, kunywa kandi hamwe n’okubyama. Eki nikirutsya? Ingaaha. Okwikiriza ebiragiro ebi eby’omubiri n’eky’oburungi bwaitu. N’obu okwikiriza ebyetengo by’omubiri kirikwereeta, hariho emiringo endijo ey’obushoboorozi erikwetenga kugikuratira twekundiire. Teekateeka ahaby’okureeberaho.
OBUSHOBOOROZI OBURIKUKIRA OBUKURU
3. Ahabw’enki kihikire kweeta Yehova “ow’Obushoboorozi Bwoona”?
3 Okurenga omu mirundi 300 omu Baibuli, Yehova nayetwa Ruhanga “ow’Obushoboorozi Bwoona.” Ategyeka byoona n’omuntu oine obushoboorozi bwoona. N’enki ekirikureetera Yehova kuba omu mwanya ogu? Okushuuruurwa 4:11 nirugarukamu: “Mukama Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona; ahabw’okukunda kwawe bikahangwa kandi byabaho.”
4. Yehova nacwamu kukoresa ata amaani ge?
4 Nk’Omuhangi waitu, Yehova aine obugabe bw’okukoresa obushoboorozi bwe nk’oku arikwenda. Eki nikibaasa kutiinisa okukira munonga waateekateeka aha ‘maani maingi’ agu Ruhanga aine. Nayetwa “Ruhanga ow’Obushoboorozi Bwoona”—ekigambo ky’Oruheburaayo ekirikureeta amakuru g’amaani maingi munonga. (Isaaya 40:26; Okutandika 17:1) Baitu, Yehova nayoreeka amaani ge omu muringo gw’embabazi, ahakuba omuringo gwe omukuru ni rukundo.—1 Yohaana 4:16.
5. Ahabw’enki okukuratira amateeka ga Yehova kitagumire?
5 N’obu Yehova yaayehanangiriize ngu akaba naija kufubira abatari kweteisa ebibi byabo, okukira byoona, Musa akamumanya nka ‘Ruhanga ow’amazima, kandi ‘Ruhanga omwesigwa, orikurinda endagano, akagirira embabazi abari kumukunda, bakoorobera ebiragiro bye.’ (Eky’Ebiragiro 7:9) Teekateeka ahari ekyo! Ow’Obushoboorozi Bwoona omu nsi yoona tari kutugyema kumuheereza. Kureka, nitumwirira haihi ahabwa rukundo ye. (Abarooma 2:4; 5:8) Okworobera obushoboorozi bwa Yehova nikishemeza ahakuba nikiturugiramu ebirungi.—Zaaburi 19:7, 8.
6. Enshonga erikukwaata aha bushoboorozi omu musiri Edeni ekatandika eta, kandi n’enki ekyarugiremu?
6 Abazaire baitu ab’okubanza bakagomera obutegyeki bwa Ruhanga. Bakaba nibenda kweshariraho ekibi n’ekirungi. (Okutandika 3:4-6) Ekyarugiremu, bakabingwa omu maka gaabo ag’Omukibanja kya Ruhanga. Yehova reero bwanyima yaikiriza abantu kutaho entebekanisa ey’obutegyeki eya kubabaasise kutuura omu buteeka, n’obu bwabaire butahikiriire. Bumwe aha bushoboorozi obu nibuuha, kandi Ruhanga atwiineho amatsiko kubworobera kuhitsya nkahi?
“AB’OBUSHOBOOROZI ABARIKUTEGYEKA”
7. “Ab’obushoboorozi abarikutegyeka” nibaahi, kandi omwanya gwabo gwiine kakwate ki n’obushoboorozi bwa Ruhanga?
7 Entumwa Paulo akahandiika ati: “Omuntu weena ayorobere abakama [“ab’obushoboorozi,” NW] abarikutegyeka; ahakuba tihariho butegyeki obutaruga ahari Ruhanga.” “Ab’obushoboorozi abarikutegyeka” ni baahi? Ebigambo bya Paulo eby’omunyiriri ezirikukurataho nibyoreeka ngu n’obushoboorozi bwa gavumenti z’abantu. (Abarooma 13:1-7; Tito 3:1) Yehova tiwe yaatandikireho gavumenti z’abantu kwonka ziriho ahabw’okuba azikiriize kugumaho. N’ahabw’ekyo, Paulo akabaasa kuhandiika ati: “Abategyeki abariho nibaikirizibwa Ruhanga.” Eki nikyoreeka ki ebirikukwaata aha butegyeki bw’ensi egi? Ngu buri ahansi y’obushoboorozi bwa Ruhanga. (Yohaana 19:10, 11) N’ahabw’ekyo, haabaho obutaikirizana rwagati y’amateeka g’abantu n’aga Ruhanga, Abakristayo bashemereire kwebemberwa omuntu waabo ow’omunda owaatendekirwe Baibuli. ‘Bashemereire kworobera Ruhanga nk’omutegyeki okukira abantu.’—Ebyakozirwe 5:29.
8. Nogasirwa ota omu kworobera ab’obushoboorozi abarikutegyeka, kandi nobaasa ota kuboreeka obuhurizi?
8 Obwiire oburikukira obwingi, ab’obushoboorozi omu gavumenti abarikutegyeka, nibakora nk’Omuheereza wa Ruhanga ahabw’oburungi bwaitu.’ (Abarooma 13:4) Ni mu miringo ki? Teekateeka aha mirimo eyi ab’obushoboorozi abarikutegyeka barikukora, nk’okutwara amabaruha, abarinzi nka puriisi, abarikuraaza omuriro, eby’obwecumi n’eby’enyegyesa. “Nikyo muheera omushoro, ahakuba abo n’abaheereza ba Ruhanga ahabw’abantu, abeezirika kukora omurimo ogwo obutoosha.” Atyo Paulo nikwo yaahandikire (Abarooma 13:6) Ebikwatiraine n’emishoro nari ebindi byoona ebirikwetengwa omu mateeka, tushemereire “kutwaza gye omuri byona.”—Abaheburaayo 13:18.
9, 10. (a) Ab’obushoboorozi abarikutegyeka nibaza bata omu nteebekanisa ya Ruhanga? (b) Ahabw’enki kyakubaire kitahikire okuhakanisa ab’obushoboorozi abarikutegyeka?
9 Obumwe na bumwe, ab’obushoboorozi abarikutegyeka nibakoresa kubi obushoboorozi bwabo. Eki nikitwihaho obujunanizibwa kuguma nituboorobera? Ngaaha. Yehova nareeba ebibi eby’abategyeki aba. (Enfumu 15:3) Okuguma arekireho obutegyeki bw’abantu tikirikumanyisa ngu nashemba ebikorwa byabo ebibi; n’obu kwakuba okututeekateekaho kubishemba. Omu mazima, jubajuba Ruhanga naija ‘kwatagura kandi amareho obu bugabe bwoona,’ omu mwanya gwabwo atemu obutegyeki bwe obuhikiriire. (Danieli 2:44) Kwonka eki kitakabaireho, ab’obushoboorozi abarikutegyeka baine omugasho muhango.
10 Paulo akashoboorora ati: “N’ahabw’ekyo orikugomera obutegyeki naaba agomiire eki Ruhanga yaataireho.” (Abarooma 13:2) Ab’obushoboorozi abarikutegyeka ni “entebekanisa” ya Ruhanga omu muringo gw’okurinda obusingye, ahakubaire omuhondano n’obugomi ei batari. Okubahakanisa tikiri kwikirizana n’Ebyahandiikirwe kandi tiky’oburyo. Eky’okureeberaho: Teera akashushani ngu oherize kushemezibwa kandi ehuuzi zikwatsire obuhuta bwawe. N’obu ehuuzi ziraabe zitari kicweka ky’omubiri, ziine omurimo muhango okumara akanya kakye. Okuzihaho otakakizire nikibaasa kureeta oburemeezi. Omu muringo nigwo gumwe, obutegyeki bwa gavumenti z’abantu bukaba butari kicweka kimwe omu kigyendererwa kya Ruhanga eky’okubanza. Okuhitsya obu Obukama bwe buritegyeka ensi yoona, gavumenti z’abantu niziteerana hamwe abantu obwe nizikora omurimo ogurikwikirizana n’ebi Ruhanga arikukunda omu bunaku obu. N’ahabw’ekyo, tushemereire kuguma nitworobera ab’obushoboorozi abarikutegyeka, baitu turikuha ebiragiro n’obushoboorozi bwa Ruhanga omwanya gw’okubanza.
OBUSHOBOOROZI OMU MAKA
11. Nobaasa kushoboorora ota omusingye gw’obwebembezi?
11 Amaka niyo ntebekanisa y’okubanza omu kigombe ky’abantu. Omu maka omushaija n’omukazi we nimwo barikugirira omukago murungi munonga kandi n’abaana nibabaasa kurindwa gye kandi batendekwe kukura kurungi. (Enfumu 5:15-21; Abaefeso 6:1-4) Entebekanisa nungi nk’egyo neyetenga kutebekanisibwa omu muringo ogurikwikiriza ab’omu maka okutuura omu busingye n’omu bumwe. Omuhanda gwa Yehova ogw’okuhikirizamu eki n’okurabira omu musingye gw’obwebembezi, oguri kuzingirwa omu bigambo ebi, ebirikushangwa omu 1 Abakorinso 11:3: ‘Omutwe gw’omushaija ni Kristo, n’omutwe gw’omukazi ni iba, kandi omutwe gwa Kristo ni Ruhanga.’
12, 13. Omutwe gw’eka n’oha, kandi nitubaasa kweega ki aha muringo gu Yesu yaakoreisemu obwebembezi?
12 Omushaija niwe mutwe gw’eka. Kwonka hariyo omutwe gwe nawe orikumukira—Yesu Kristo. Paulo akahandiika ati: “Imwe abashaija, mukunde abakazi baanyu, nk’oku Kristo yaakunzire ekanisa, akeehayo ahabwayo.” (Abaefeso 5:25) Omushaija nayoreeka obuhurizi bwe ahari Kristo ku arikutwaza omukazi we omu muringo ogu Yesu arikutwazamu ekanisa. (1 Yohaana 2:6) Obushoboorozi bw’amaani buheirwe Yesu kwonka naabukoresa n’embabazi, na rukundo hamwe n’oburyo. (Matayo 20:25-28) Nk’omuntu, Yesu tarakoreise kubi bushoboorozi bwe. Akaba ‘natwaza gye kandi ari omucureezi omu mutima,’ kandi akeeta abakuratsi be “banywani” be omu mwanya gw’okubeeta “abahuuku.” ‘Ndyabaruhuura,’ atyo nikwo yaabaraganiise kandi nikwo yaakozire.—Matayo 11:28, 29; Yohaana15:15.
13 Eky’okureeberaho kya Yesu nikyegyesa abashaija ngu obwebembezi bw’Ekikristayo timwanya gw’okutegyeka n’obushaarizi. Kureka n’omwanya gw’ekitiniisa kandi ogw’okwehayo oyekundiire. Eki nikihiramu kimwe okutwaza kubi ou oshwereine nawe orikumuteera ninga orikumujuma. (Abaefeso 4:29, 31, 32; 5:28, 29; Abakolosai 3:19) Omushaija ku yaakutwaza kubi omukazi we, ebikorwa bye ebirungi nibiba bitaine mugasho, kandi n’eshaara ze nizizibirwa.—1 Abakorinso 13:1-3; 1 Petero 3:7.
14, 15. Okumanya okurikukwaata ahari Ruhanga nikuhweera kuta omukazi okuba omuhurizi ahari iba?
14 Omushaija ku arikutooreza eky’okureeberaho kya Kristo, nikyanguhira omukazi we kukuratira ebigambo eby’omu Abaefeso 5:22, 23: “Abakazi mworobere baabaroimwe nk’oku mworobera Mukama. Ahakuba omushaija niwe mutwe gw’omukazi, nk’oku Kristo ari omutwe gw’ekanisa.” Buzimazima, nk’oku omushaija ashemereire kworobera Kristo, atyo omukazi naragirwa kworobera iba. Baibuli kandi neshoborora kurungi ngu abakazi b’omutima bashemereire kuheebwa ekitiinisa kandi n’okusiimwa ahabw’obwengye n’obweziriki bwabo obw’okutiina Ruhanga.—Enfumu 31:10-31.
15 Obuhurizi bw’omukazi omukristayo ahari iba bwiine ahu burikugarukira. Eki nikimanyisa ngu naragirwa kworobera Ruhanga omu mwanya gw’omuntu yaaba okwikiriza enshonga nanka nehenda amateeka ga Ruhanga. Kwonka nabwo, okumaririira kw’omukazi kworobera ebiragiro bya Ruhanga kushemereire kworekwa omu ‘bucureezi bw’omwoyo ogutuurize.’ Kishemereire kweyoreka butunu ngu okumanya okurikukwaata ahari Ruhanga kumuhindwiire omukazi murungi w’oburyo. (1 Petero 3:1-4) Nikyo kimwe n’aha mushaija Omukristayo oine omukazi otarikwikiriza. We omu kukuratira emisingye ya Baibuli kikaamuhindwiire omushaija murungi.
16. Abaana nibabaasa kutooreza bata eky’okureeberaho kya Yesu eki yaateireho obu yabaire ari omunyeeto?
16 Abaefeso 6:1 nirworeka omwanya gw’abaana, nirugira ruti: “Mworobere abazaire baanyu omuri Mukama, ahakuba nikyo kihikire.” Abaana Abakristayo nibakuratira eky’okureeberaho kya Yesu, owaagumire naayorobera abazaire be omu kukura kwe. Nk’omwojo omuhurizi, “[ake]eyongyera kutunga obwengye n’okukura, nasiimwa Ruhanga hamwe n’abantu.”—Luka 2:51, 52.
17. Omuringo gu abazaire barikukoresamu obushoboorozi nigubaasa kukora ki aha baana baabo?
17 Omuringo gu abazaire barikutwaramu obujunanizibwa bwabo nikikora kihango aha baana babo yaaba baaraheereze ab’obushoboorozi ekitiinisa nari baarabagomere. (Enfumu 22:6) N’ahabw’ekyo, kihikire abazaire kwebuuza bati: ‘Ninkoresa obushoboorozi bwangye omu muringo gwa rukundo nari n’omu gw’obushaarizi? Niimara agaikiriza?’ Omuzaire orikutiina Ruhanga ashemereire kugira rukundo kandi n’okufayo, kwonka ahamire omu kukuratira emisingye ya Ruhanga. Kihikire kityo, Paulo akahandiika: “Baishebo, murekye kugwisa kubi abaana banyu, [nimubeisa ‘ekiniga’] kureka mubarere, nimubategyeka gye, kandi nimubegyeseza omuri Mukama.”—Abaefeso 6:4; Abakolosai 3:21.
18. Abazaire bashemereire kuhana bata abaana baabo?
18 Abazaire bashemereire kushwijuma emitendekyere yaabo, okukira munonga ku baraabe nibenda ngu abaana baabo babe abahurizi kandi ngu babareetere okushemererwa. (Enfumu 23:24, 25) Omu Baibuli, okuhana okukira munonga n’omuringo gw’okwegyesa. (Enfumu 4:1; 8:33) Nigukwatanisibwa na rukundo n’obucureera, ti na kiniga hamwe n’obushaarizi. N’ahabw’ekyo, abazaire Abakristayo nibetenga kutwaza n’amagyezi kandi beerinde kurenzya baaba nibahana abaana baabo.—Enfumu 1:7.
OBUSHOBOOROZI OMU KIBIINA
19. Ruhanga ataireho ata entebekanisa nungi omu kibiina ky’Abakristayo?
19 Obu Yehova ari Ruhanga w’obusingye, n’eky’oburyo kugira ngu akaaheereize obwebembezi n’obushoboorozi obutebekanisibwe gye ahabw’abantu be. Ahabw’enshonga egi, akaronda Yesu kuba Omutwe gw’ekibiina Ekikristayo. (1 Abakorinso 14:33, 40; Abaefeso 1:20-23) Ahansi y’obutegyeki bwa Kristo obutarikureebwa, Ruhanga ataireho entebekanisa eyi abareeberezi abatorainwe omu buri kibiina barikuriisa obusyo bwa Ruhanga beekundiire, kandi na rukundo. (1 Petero 5:2, 3) Abaheereza nibabahweera omu miringo mingi kandi nibakora omurimo gw’omugasho muhango omu kibiina.—Abafilipi 1:1.
20. Ahabw’enki tushemereire kworobera Abakristayo abatorainwe kuba abareeberezi, kandi ahabwaki eki nikigasha?
20 Ebirikukwaata aha bareeberezi Abakristayo, Paulo akahandiika ati: “Muhurire abeebembezi baanyu, muboorobere, ahakuba nibo barinda amagara gaanyu nk’abarikumanya ngu baryagabuuzibwa. Nabo babone kukora ekyo bashemereirwe, batagwirwe kubi; ahabw’okuba ekyo naimwe tikikaabagasira.” (Abaheburaayo 13:17) N’amagyezi, Ruhanga ahaire abareeberezi Abakristayo obujunanisibwa bw’okureeberera abo ab’omu kibiina omu byetengo byabo eby’eby’omwoyo. Abareeberezi aba ti kibiina kya abebembezi b’amadiini. N’abaheereza kandi abahuuku ba Ruhanga, abarikuheereza ahabw’ebyetengo by’abaramya bagyenzi baabo, nk’oku Mukama waitu, Yesu Kristo, yaakozire. (Yohaana 10:14, 15) Okumanya ngu abashaija abarikwetegyereza Ebyahandikirwe nibafayo aha kutunguuka kwaitu okw’eby’omwoyo, nikitugaruramu amaani okukwaatanisa nabo kandi n’okuborobera.—1 Abakorinso 16:16.
21. Abareeberezi abatorainwe nibafayo bata okuhweera Abakristayo batahi babo omu by’omwoyo?
21 Obumwe nabumwe, entaama za Ruhanga nizibaasa kuhaba nari okugwa omu buremeezi bw’ensi egi embi. Bari ahansi y’obwebembezi bw’Omuriisa Omukuru, abareeberezi nk’abariisa abato nibamanya ebyetengo by’abo abu barikureeberera kandi nibezirika kubafaho. (1 Petero 5:4) Nibatayayira ab’omu kibiina kandi babagaruramu amaani. Barikumanya ngu Omuregi nasherura kushiisha obusingye bw’abantu ba Ruhanga, abareeberezi nibakoresa amagyezi agarikuruga omu iguru omu kushoborora oburemeezi bwoona. (Yakobo 3:17, 18) Nibakora n’amaani okurinda obumwe omukwikiriza, ekintu eki Yesu yaashabiire.—Yohaana 17:20-22; 1 Abakorinso 1:10.
22. Ni buhweezi ki obu abareeberezi barikuheereza habaho okushobya?
22 Kwonka shi Omukristayo ku yaakugwa omu kibi ninga akahwamu amaani ahabw’okukora ekibi? Obuhabuzi bwa Baibuli oburi kuhuumuriza n’eshaara z’abareeberezi ezirugire aha mutima ezi barikumushabira niziija kumuhweera kugarukana amagara marungi ag’omwoyo. (Yakobo 5:13-15) Abashaija aba abatorainwe omwoyo orikweera, hoona baine n’obushoboorozi obw’okuhana n’okuhabura omuntu weena orikugumizamu kukora kubi nari shi abari kubaasa kushiisha obuyonjo bw’ekibiina obw’omwoyo n’obw’emicwe. (Ebyakozirwe 20:28; Tito 1:9; 2:15) Okubaasa kusigaza ekibiina kiri ekyecumi, nikibaasa kwetengyesa abamwe okwatura ebibi eby’amaani. (Abaleevi 5:1) Omukristayo okozire ekibi ky’amaani ku arikwikiriza okuhana n’okuhabura kw’Ebyahandiikirwe kandi yayoreka ngu buzima ayeteisize, naija kuyambwa. N’eky’amazima, abari kugumizamu kuhenda amateeka ga Ruhanga kandi bakanga kweteisa, nibabingwa omu kibiina.—1 Abakorinso 5:9-13.
23. N’enki eki abareeberezi Abakristayo barikuheereza ahabw’oburungi bw’ekibiina?
23 Baibuli ekaranga ngu ahansi y’obukama bwa Yesu Kristo nk’Omugabe, abashaija abakuzire omu by’omwoyo nibaija kuha abantu ba Ruhanga obuhuumurizo, n’oburinzi. (Isaaya 32:1, 2) Nibaija kwebembera nk’ababuurizi, abariisa kandi nk’abeegyesa kugira ngu batunguure okukura kw’eby’omwoyo. (Abaefeso 4:11, 12, 16) N’obu obumwe abareeberezi Abakristayo barikuhana, bakateisa kandi bakehanangiriza abaramya bagyenzi babo, okuta omu bikorwa obuhabuzi oburi kuheebwa abareeberezi oburikuruga omu Kigambo kya Ruhanga nikihweera okurindira boona omu muhanda gw’amagara.—Enfumu 3:11, 12; 6:23; Tito 2:1.
YIKIRIZA OKU YEHOVA ARIKUTWARA OBUSHOBOOROZI
24. Buri-izooba nitugyezesibwa omu kintu ki?
24 Omushaija n’omukazi ab’okubanza bakagyezibwa aha nshonga ey’okworobera obushoboorozi. Kitakutangaaza, ekigyezo nikyo kimwe ekitworekyereire buri-izooba. Sitaane Omuregi nakuririiza omwoyo gw’obugomi omu bantu. (Abaefeso 2:2) Omuhanda gw’okwetegyeka nigureebeka nigushendashenda okukira ogwo ogw’okworoba.
25. Ni migasho ki eri omukwanga omwoyo gw’ensi ogw’obugomi hamwe n’okworobera obushoboorozi obu Ruhanga arikwikiriza?
25 Kwonka, tushemereire kwanga omwoyo gw’ensi ogw’obugomi. Omu kukora tutyo, nitwija kushanga ngu okworobera Ruhanga nikureeta ebihembo birungi. Nk’eky’okureeberaho, titurikwija kwemereza omutima kandi nitwija kwetantara oburemeezi oburikwizira abo abarikuhondana n’ab’obushoboorozi. Nitwija kutuubya empaka eziri omu maka maingi. Kandi nitwija kushemerererwa omukago gw’ab’eishe-emwe n’okukorera hamwe n’Abakristayo bataahi baitu. Kwonka okukira byoona, okworobera Ruhanga nikyija kukurugiramu enkorengana nungi na Yehova, ow’Obushoboorozi Bwoona.
GYEZESA OKUMANYA KWAAWE
Yehova nakoresa ata obushoboorozi bwe?
“Ab’obushoboorozi abarikutegyeka” nibaahi, kandi nituguma nituborobera tuta?
Omusingye gw’obwebembezi niguha bujunanizibwa ki ahari buri muntu omu maka?
Nitubaasa kworeeka tuta obuhurizi omu kibiina Ekikristayo?
[Akabokisi aha rupapura 134]
N’ABACUREEZI, TI BAGOMI
Nibarabira omu murimo gwabo ogw’okubuurira, Abajurizi ba Yehova niboreeka Obukama bwa Ruhanga nk’amatsiko gonka ahabw’obusingye n’oburinzi. Kwonka aba babuurizi b’Obukama bwa Ruhanga abekambi tibari kugomera gavumenti ezi barikutuuramu. Baitu Abajurizi nibo bamwe ahari abo abarikukirayo kurinda ebiragiro n’okubiheereza ekitiinisa. “Kuri ebibiina by’ediini byoona biri nk’Abajurizi ba Yehova, titwakubaire twine obwitsi, obwa kondo, obugomi, abasibe nari shi za rwatamigongo. Enyigi tizakukingirwe ny’omushana nari nyekiro.” Atyo nikwo omukungu ow’omu nsi emwe omu Afirika yaagambire.
Barikwetegyereza eki, abakungu baingi omu mahanga maingi baikiriize omurimo gw’Abajurizi ogw’okubuurira kugumizamu gutari kwemerezibwa. Omu nsi ezimwe, okwemerezibwa nari okwangirwa kubuurira kwihirweho ku ab’obushoboorozi barikuheeza kwetegyereza ngu Abajurizi ba Yehova nibakora omurimo gw’omugasho. Kiri nk’oku entumwa Paulo yaahandiikire ebikwatiraine n’okworobera ab’obushoboorozi abarikutegyeka: ‘Mugume nimukora ebirungi, haza muryasiimwa.’—Abarooma 13:1, 3.