Eishomo 1

Omuringo ogw’Okubaasa Kuzooramu eki Ruhanga ari Kukwenza

Ni bintu ki ebikuru ebiri kutugambirwa omu Baiburi? (1)

N’oha owahandiikire Baiburi? (2)

Ahabw’enki oshemereire kweega Baiburi? (3)

1. Baiburi n’ekiconco ky’omuhendo kuruga ahari Ruhanga. Ni nk’ebaruha ei ishe abaana abaari kukunda yakubahandiikira. Netumanyisa amazima agari kukwaata ahari Ruhanga​—⁠okwaari kandi n’ebi ari kwenda. Neshoboorora oku twakubaasa kwemeramu oburemeezi, n’oku twakubaasa kuzoora okushemererwa okw’obutwiire. Baiburi niyo yonka eri kutugambira eki turi kuragirwa kukora, kubaasa kushemeza Ruhanga.​—⁠Zaaburi 1:1-3; Isaaya 48:​17, 18.

2. Baiburi ekahandiikwa abashaija 40 abatari kushushana omu bwiire bw’emyaaka 1,600 okuruga omu gwa 1513 B.C.E. Erimu ebitabo 66. Abo abaahandiikire Baiburi bakahweerwa Ruhanga. Bakahandiika ebiteekateeko bye baitu bitari byaabo. Nahabw’ekyo Ruhanga ow’omu iguru, atari muntu weena omu nsi, nuwe Muhandiiki wa Baiburi.​—⁠2 Timoseo 3:​16, 17; 2 Petero 1:​20, 21.

3. Ruhanga akahamya kureeba ngu, Baiburi yakopoororwa omu muringo oguhikire, kandi yarindwa gye. Baiburi zihandiikirwe omu kyaapa okukira ekitabo ekindi kyoona. Boona tibari kwiija kushemererwa kukureeba noyega Baiburi, baitu ekyo kitakakuzibira. Amagara gaawe ag’omu maisho, ag’ebiro n’ebiro, nigegamira munonga aha kumanya Ruhanga n’okukora ebi akunda, n’obu hakubaho okuhakanisibwa.​—⁠Matayo 5:​10-12; Yohaana 17:⁠3.