Eishomo 3

Yesu Kristo n’Oha?

Ahabw’enki, Yesu nayetwa Omwaana wa Ruhanga “ow’omujigaijo”? (1)

Ahabw’enki nayetwa “Kigambo”? (1)

Ahabw’enki Yesu akaija omu nsi nk’omuntu? (2-4)

Ahabw’enki akakora eby’okutangaaza? (5)

Yesu naija kukora ki omu biro by’omu maisho aho? (6)

1. Yesu akaba atuura omu iguru nk’omuntu ow’omwoyo, atakabaire kwija omu nsi. Nikyo kihangwa kya Ruhanga ekya bandize, haza nikyo ayeterwa Omwaana wa Ruhanga “ow’omujigaijo.” (Abakolosai 1:15; Okushuuruurirwa 3:14) Yesu nuwe Mwaana wenka ou Ruhanga we wenka yayehangiire. Yehova akakozesa Yesu atakabaire muntu, nka “omukozi mukuru” omu kuhanga ebintu ebindi byoona eby’omu iguru n’omu nsi. (Enfumu 8:22-31; Abakolosai 1:16, 17) Kandi Ruhanga akamukozesa nk’omugambi We omukuru. Egi niyo nshonga ahabw’enki Yesu nayetwa “Kigambo.”—Yohaana 1:1-3; Okushuuruurirwa 19:13.

2. Ruhanga akatuma Omwaana We omu nsi yaata amagara ge omunda ya Mariamu. Ahabw’enshonga egi Yesu taragizire ishe ow’omuntu. Egi niyo nshonga ahabw’enki tarahungwiire kibi kyoona nari okutahikiirira. Ruhanga akatuma Yesu omu nsi ahabw’enshonga ishatu: (1) Okutwegyesa amazima agari kukwaata ahari Ruhanga (Yohaana 18:37), (2) okurinda obwesigwa obuhikire ari kututeeraho eky’okureeberaho ky’okukuratira (1 Petero 2:21), na (3) okuhayo amagara ge, nk’ekitambo okutukomoorora okuruga omu kibi n’okufa. Ahabw’enki eki kikaba nikyetengwa?—Matayo 20:28.

3. Ahabw’okutoorobera kiragiro kya Ruhanga, omuntu owabandize, Adamu, akakora ekyo Baiburi eki eri kweeta “ekibi.” Atyo Ruhanga yamucweera ekiheneso ky’okufa. (Okutandika 3:17-19) Akaba atakihikaana n’emituurire ya Ruhanga, nahabw’ekyo akaba atakiri ohikiriire. Mpora mpora yakura haza yaafa. Adamu akahunguza abaana be boona ekibi. Egi niyo nshonga ahabw’enki naitwe ni tukura, ni turwaara kandi ni tufa. Omuntu akajunirwe ata?—Abarooma 3:23; 5:12.

4. Yesu akaba ari omuntu ohikiriire nka Adamu. Kwonka we Yesu tarashushaine na Adamu, we akoorobera Ruhanga omu muringo gw’okuhikiirira n’obu araabe yayohiibwe omu muringo ogw’ekika ky’ahaiguru. Nahabw’ekyo akaba nabaasa kuhayo amagara ge ag’obuntu agahikiriire okwihura ekibi kya Adamu. Eki, Baiburi nikyo eri kugambaho “nk’ekitambo.” Omu muringo nk’ogu abaana ba Adamu bakabaasize kukomoororwa okuruga omu kifubiro ky’okufa. Abo boona abari kwikiririza omuri Yesu nibabaasa kusaasirwa ebibi byaabo nibatunga amagara agatahwaho.—1 Timoseo 2:5, 6, NW; Yohaana 3:16; Abarooma 5:18, 19.

5. Yesu obu yabaire ari omu nsi, akakiza abarwaire, yariisa abaine enjara, kandi yacureeza omuyaga. Akazoora n’abafu. Ahabw’enki yakozire eby’okutangaaza? (1) Akasaasibwa abantu ababaire nibabonabona, kandi yakunda kubahweera. (2) Eby’okutangaaza ebi yakozire bikahamya ku yabaire ari Omwaana wa Ruhanga (3) Bikooreka ebyo ebi araakorere abantu abacureezi, ku araabe nategyeka ensi egi nk’Omugabe.—Matayo 14:14; Mako 2:10-12; Yohaana 5:28, 29.

6. Yesu akafa, Ruhanga yamuzoora nk’ekihangirwe eky’omwoyo, kandi yagaruka omu iguru. (1 Petero 3:18) Obwa hati Ruhanga yaherize kumuhindura Omugabe. Aho naaho Yesu naija kwihaho obutahikiirira bwoona n’obusaasi oburi omu nsi egi.—Zaaburi 37:9-11; Enfumu 2:21, 22.

[Ebishushani ebiri aha rupapura 7]

Obuheereza bwa Yesu bukabamu okweegyesa, okukora eby’okutangaaza hamwe n’okuhayo amagara ge aha bwaitu