Eishomo 4

Omuregi n’Oha?

Sitaani Omuregi—akaruga hi? (1, 2)

Sitaani nahabisa ata abantu? (3-7)

Ahabw’enki oshemereire kwangira Omuregi? (7)

1. Ekigambo “Omuregi” nikimanyisa omuntu ogwo ori kugamba ebishuba aha muntu ondiijo. “Sitaani” nikimanyisa omuzigu nari ori kuhakanisa. Ebigambo ebi nibyejunisibwa aha muzigu wa Ruhanga omukuru. Omu kubanza, akaba ari maraika ohikiriire, ari kutuura na Ruhanga omu iguru, kwonka bwanyima yayeteekateekaho munonga yayetenga n’okuramibwa okwa Ruhanga.—Matayo 4:8-10.

2. Maraika ogu Sitaani, akagamba na Haawa ari kurabira omu njoka. Ari kumugambira ebishuba, akamureetera okugomera Ruhanga. Omu muringo ogu Sitaani akataahirira ekiri kwetwa “obutegyeki” bwa Ruhanga nari omwanya gwe nk’ogwo Ori Ahaiguru Munonga. Sitaani akareetaho okubangaanisa yaaba Ruhanga nategyeka omu muringo oguhikire kandi n’ahabw’oburungi bw’abantu abu Ari kutegyeka. Sitaani kandi akareetaho okwebuuza yaaba nihabaasa kubaho omuntu weena owakuguma ahamiire ahari Ruhanga. Ahabw’okukora eki, Sitaani akehindura omuzigu wa Ruhanga. Egi niyo nshonga ahabw’enki nayetwa Sitaani Omuregi.—Okutandika 3:1-5; Yobu 1:8-11; Okushuuruurirwa 12:9.

3. Sitaani nagyezaho kuhabisa abantu ngu bamuramye. (2 Abakorinso 11:3, 14) Omuringo gumwe ogu ari kuhabisizamu abantu nigo madiini ag’ebishuba. Ediini yaaba neyegyesa ebishuba ahari Ruhanga, egyo neeba nehikiiriza ekigyendererwa kya Sitaani. (Yohaana 8:44) Abo abari omu madiini ag’ebishuba babaasa kwikiriza batari kubangaanisa ku bari kuramya Ruhanga ow’amazima. Kwonka buzima nibaba nibaheereza Sitaani. Nuwe ‘ruhanga w’ensi egi.’—2 Abakorinso 4:4.

4. Eby’obufumu nagwo n’omuringo ogundi omu Sitaani ari kuteera abantu ahansi y’obushoborozi bwe. Nibabaasa kushaba emandwa kubarinda, okusaasa abandi, okuragura ebiribaho omu biro ebiri kwiija nari okukora eby’okutangaaza. Sitaani nigo maani agari enyima y’ebikorwa ebi byoona. Okushemeza Ruhanga titushemereire kuba nitukoraganiraho kimwe n’eby’obufumu.—Eky’Ebiragiro 18:10-12; Ebyakozirwe 19:18, 19.

5. Kandi Sitaani nahabisa abantu ari kurabira omu kwehimbisiza munonga omu rangi hamwe n’okuramya enteekateeka z’eby’obutegyeki. Abamwe bateekateeka ngu eihanga nari erangi yaabo nehita ey’abandi. Baitu eki tikiri ky’amazima. (Ebyakozirwe 10:34, 35) Abamwe amaisho bagahangire enteekateeka z’eby’obutegyeki okuhezaho oburemeezi bw’abantu. Omu kukora eki baba nibanga Obukama bwa Ruhanga. Nibwo bwonka oburaahezeho oburemeezi bwaitu.—Danieli 2:44.

6. Omuringo ogundi Sitaani ogu ari kuhabizamu abantu, n’okubategyesa okwetenga okubi. Yehova natugambira okwerinda emitwaarize mibi ahabw’okuba naamanya ngu neija kutusaasa. (Abagalatia 6:7, 8) Abantu abamwe babaasa kwenda ngu obejwanzyemu omu mitwaarize nk’egyo. Kwonka ijuka ngu ogwo ori kwenda ngu okore ebyo ni Sitaani.—1 Abakorinso 6:9, 10; 15:33.

7. Sitaani abaasa kwejunisa okuhiiganisibwa nari okuhakanisibwa obaase kuruga ahari Yehova. Bamwe ahari banywaani baawe babaasa kubiihirirwa munonga ahabw’okuba nooyega Baiburi. Abandi babaasa kukushekyeerera. Kwonka n’oha owakuhaire amagara agoine? Sitaani nayenda akutiinatiinise, orekyere aho kweega ebiri kukwata ahari Yehova. Otaikiriza Sitaani kukusingura! (Matayo 10:34-39; 1 Petero 5:8, 9) Omu kwangira Omuregi, nobaasa kushemeza Yehova kandi noyoreka ku ori kushemba obutegyeki Bwe.—Enfumu 27:11.

[Ebishushani ebiri aha rupapura 9]

Ediini z’ebishuba, eby’obufumu n’okusaasibwa, eihanga nibihabisa abantu

[Ekishushani ekiri aha rupapura 9]

Yangira Sitaani obwo ori kweyongyera kweega ebiri kukwaata ahari Yehova