Eishomo 8

Emituurire y’Amaka eri Kushemeza Ruhanga

Omushaija aine mwanya ki omu maka? (1)

Omushaija ashemereire kutwaaza ata omukazi we? (2)

Ni bujunanizibwa ki taata obu aine? (3)

Omukazi aine mwanya ki omu maka? (4)

Ruhanga nayenza ki abazaire n’abaana? (5)

Baiburi negamba ki aha kutaana n’okugaitururwa omu bushweere? (6, 7)

1. Baiburi ne gira ngu omushaija nuwe mutwe gw’eka ye. (1 Abakorinso 11:3) Omushaija naragirwa kugira omukazi omwe wenka. Bashemereire kuza omu bushweere obuhikire oburi kwikirizibwa omu biragiro.—1 Timoseo 3:2; Tito 3:1.

2. Omushaija ashemereire kukunda omukazi we nk’oku ari kwekunda. Ashemereire kumutwariza omu muringo gu Yesu ari kutwarizamu abakuratsi be. (Abaefeso 5:25, 28, 29) Tashemereire kuteera omukazi we nari kumutwariza kubi omu muringo gwoona. Okwihaho ashemereire kumuha ekitiinisa.—Abakolosai 3:19; 1 Petero 3:7.

3. Taata ashemereire kukora munonga kureeberera ab’omuka ye. Naragirwa kutungira omukazi we n’abaana eby’okurya, ebijwaro, n’oburaaro. Kandi taata naragirwa kuha ab’omuka ye ebyetengo by’omwoyo. (1 Timoseo 5:8) Nuwe aine obwebembezi kuhweera ab’omuka ye kweega ebiri kukwaata ahari Ruhanga n’ebigyendererwa Bye.—Eky’Ebiragiro 6:4-9; Abaefeso 6:4.

4. Omukazi ashemereire kuba omuhweezi murungi ahari iba. (Okutandika 2:18) Ashemereire kuhweera iba omu kweegyesa n’okugunjura abaana baabo. (Enfumu 1:8) Yehova nayenda omukazi ku areeberera eka ye na rukundo. (Enfumu 31:10, 15, 26, 27; Tito 2:4, 5) Ashemereire kuha iba ekitiinisa.—Abaefeso 5:22, 23, 33.

5. Ruhanga nayenda ngu abaana boorobere abazaire baabo. (Abaefeso 6:1-3) Nayenda ngu abazaire beegyese abaana baabo n’okubahabura. Abazaire nikibetengyesa kuhayo obwiire kuguma n’abaana baabo nibeega nabo Baiburi, bari kufa aha byetengo byaabo by’omwoyo n’ebiteekateeko byaabo. (Eky’Ebiragiro 11:18, 19; Enfumu 22:6, 15) Abazaire tibashemereire kufubira abaana baabo omu muringo gw’obushaarizi.—Abakolosai 3:21.

6. Ku hakubaho obuteetegyerezana ahagati y’abashwereine, bakagyerizeho kukuratira okuhabura kwa Baiburi. Baiburi netwehanangiriza kworeka okukunda n’okusaasira. (Abakolosai 3:12-14) Ekigambo kya Ruhanga tikiri kushemba okutaana nk’omuringo gw’okuhezaho oburemeezi bukye bukye. Baitu omukazi naabasa kucwamu kutsigaho iba kuri, (1) naaba ayangire nkana kureberera ab’omuka ye, (2) naaba enshaarizi munonga kureeba ngu, amagara ge gari omu kabi nari, (3) okuhakanisiza kimwe kwe, nikuremesa omukazi kuheereza Yehova.—1 Abakorinso 7:12, 13.

7. Abashwereine nibaragirwa kwesigana. Obushambani nikibi omu maisho ga Ruhanga n’omu maisho g’ow’oshweraine nawe. (Abaheburaayo 13:4) Okushambana n’omuntu ondiijo aheeru y’obushweere, niyo nshonga yonka omu Byahandiikirwe, eri kubaasa kurugirirwaho okugaiturirwa omu bushweere, okagira obugabe bw’okuza omu bushweere obundi. (Matayo 19:6-9; Abarooma 7:2, 3) Yehova nayangira kimwe ekikorwa ky’abantu kugaiturirwa hatariho nshonga yoona ey’omu Byahandiikirwe, haza bakashwerana n’omuntu ondiijo.—Malaki 2:14-16.

[Ebishushani ebiri aha rupapura 17]

Ruhanga aine amatsiko omu bazaire kweegyesa abaana baabo n’okubahabura

[Ekishushani ekiri aha rupapura 17]

Taata aine rukundo areeberera ab’omuka ye omu by’omubiri n’omwoyo