Eishomo 11

Enyikiriza n’Emigyenzo Ebitari Kushemeza Ruhanga

Ni nyikiriza ki n’emigyenzo ebitahikire? (1)

Abakristaayo bakaikirize ngu Ruhanga n’Obushatu? (2)

Ahabw’enki Abakristaayo ab’amazima batari kukuza Noeil, Pasika, nari amazooba g’okuzaarwa? (3, 4)

Abafu nibabaasa kusaasa abahuriire? (5) Yesu akafeera aha musharaba? (6) Okushemeza Ruhanga kiine bukuru ki? (7)

1. Enyikiriza n’emigyenzo byoona tibibi. Kwonka Ruhanga tari kubisiima byaaba nibiruga omu diini y’ebishuba nari nibihakanisa eki Baiburi eri kweegyesa.—Matayo 15:6.

2. Obushatu: Yehova n’Obushatu—abantu bashatu omuri Ruhanga omwe? Ngaaha! Yehova Tataitwe ni “Ruhanga omwe ow’amazima.” (Yohaana 17:3; Mako 12:29) Yesu n’Omwaana We w’omujigaijo kandi ari ahansi y’obushoborozi bwa Ruhanga. (1 Abakorinso 11:3) Tataitwe nakira Omwaana. (Yohaana 14:28) Omwoyo orikwera ti muntu, n’amaani ga Ruhanga agari kukora.—Okutandika 1:2; Ebyakozirwe 2:18.

3. Noeil na Pasika: Yesu tarazairwe hari Desemba 25. Akazaarwa nka Okitoba 1, obwiire obw’omwaaka abariisa obu babeire barebereramu amasyo gaabo aheru nyekiro. (Luka 2:8-12) Yesu taragizire bu aragiira Abakristaayo okukuza okuzaarwa kwe. Okwihaho akaragiira abegyesibwa be kuguma nibaijuka okufa kwe. (Luka 22:19, 20) Noeil n’emigyenzo yaayo nibiruga omu diini eza ira ez’ebishuba. Nukwo kiri kityo naha migyenzo ya Pasika, katugire nk’okukozesa amahuri n’obume. Abakristaayo abaabandize tibarakurize Noeil nari Pasika, kandi n’Abakristaayo ab’amazima ab’omu bwiire obu tibari kugikuza.

4. Amazaarwa: Amazaarwa abiri gonka agari kugambwaho omu Baiburi gakakuzibwa abantu ababaire batari kuramya Yehova. (Okutandika 40:20-22; Mako 6:21, 22, 24-27) Abakristaayo abaabandize bakaba batakuza mazaarwa. Omucwe gw’okukuza amazaarwa gukaruga omu madiini ag’ebishuba aga ira. Abakristaayo ab’amazima nibagaba ebiconco kandi nibashemererwa hamwe omu bwiire bwoona omu mwaaka.

5. Okutiina Abafu: Abafu tibaine kibari kubaasa kukora nobu kwakuba okuhurira ekintu kyoona. Tibari kubaasa kutuhweera kandi tibari kubaasa kutusaasa. (Zaaburi 146:4; Omubuurizi 9:5, 10) Omwoyo nigufa; tiguri kugaruka kuba oguhuriire gwaaheza kufa. (Ezekieli 18:4) Kwonka obumwe n’obumwe ba maraika ababi abeetwa amasitaani behindura kuba emyoyo y’abafu. Emigyenzo yoona eri kukwaata aha kutiina nari kuramya abafu tehikire.—Isaaya 8:19.

6. Omusharaba: Yesu tarafeereire ha musharaba. Akafeera aha kikondo nari enyomyo y’omuti. Ekigambo ky’Oruyonaani ekiri kuhindurwa “omusharaba” omu Baiburi nyingi nikimanyisa enyomyo emwe eti y’omuti. Akamanyiso k’omusharaba kakaruga omu madiini ag’ebishuba aga ira. Omusharaba gukaba gutejunisibwa nobu kwakuba okuramibwa Abakristaayo abaabandize. Mbwenu nogira ngu kihikire kwejunisa omusharaba omu kuramya?—Eky’Ebiragiro 7:26; 1 Abakorinso 10:14.

7. Nikibaasa kuguma munonga okureka zimwe aha nyikiriza ezi n’emigyenzo. Abanyabuzaare na banywaani baawe nibabaasa kugyezaho kukushendashenda ngu otakaahindura aha nyikiriza yaawe. Kwonka okushemeza Ruhanga nikikuru munonga okukira okushemeza abantu.—Enfumu 29:25; Matayo 10:36, 37.

[Ekishushani ekiri aha rupapura 22]

Ruhanga tari Bushatu

Ekishushani ekiri aha rupapura 23]

Noeil na Pasika nibiruga omu diini ez’ebishuba eza ira

[Ekishushani ekiri aha rupapura 23]

Tihariho nshonga yoona eya kutureteire okuramya abafu nari okubatiina