Eshuura ya Kashatu

Hamira aha Kigambo kya Ruhanga

1. (a) Ebigambo bya Ruhanga bikahikiirira bita aha Baisraeli aba ira? (b) Ahabw’enki ekyo ni kikuru ahariitwe?

“MWENA nimumanya gye omu mitima yaanyu n’omu magara gaanyu, ku hatariho kintu na kimwe ekirabuzire aha birungi byona ebi MUKAMA Ruhanga waanyu yaabaraganiise; byona bikabahikaho, tihariho kintu na kimwe ekitarabaireho.” (Yoshua 23:14-16) Ebi nibyo bigambo ebi Yoshua yaagambiire abakuru b’Abaisraeli bwanyima y’okutebeekana omu Nsi Eyaaraganisiibwe. Buzima ebi Yehova yaaraganiise bikaba nibyesigwa. Ekyahandiikirwe ekyo—n’ebindi byona eby’omu Baibuli—bikariindwa ngu “tubone kugira amatsiko.”—Abarooma 15:4.

2. (a) Ni muringo ki ogu Baibuli ‘ehandiikisiibwemu omwoyo wa Ruhanga’? (b) Okumanya ngu Baibuli ehandiikisiibwe omwoyo wa Ruhanga nikitutaho bujunaanizibwa ki?

² N’obu abantu 40 baraabe baayejunisiibwe omu kuhandiika Baibuli, Yehova buzima niwe Muhandiiki waayo. Eki shi nikimanyisa ngu akoorekyerera oku ebigirimu byona byahandiikirwe? Eego. Eki akakikora arikwejunisa omwoyo we orikwera, nigwo maani agu Ruhanga arikukoresa. Entumwa Paulo akooreka amazima g’ebi obu yaagira ati: ‘Ebyahandiikirwe byona, bihandiikisiibwe [o]mwoyo wa Ruhanga ngu omuntu wa Ruhanga abone kuba ohikire buzima, oine byona ebishemereire omurimo gwona omurungi.’ Buri hantu, abantu abarikwikiriza ekyo nibata omutima aha biri omu Baibuli kandi bahikaanisa amagara gaabo n’ebi Baibuli erikwegyesa.—2 Timoseo 3:16, 17; 1 Abatesalonika 2:13.

Hwera Abandi Kwetegyereza Baibuli

3. Omuringo ogurikukirayo oburungi ogw’okuhweramu bamwe abatarikwikiriza ngu Baibuli n’Ekigambo kya Ruhanga ni guuha?

³ Bamwe abu turikubuurira tibarikwikirizana naitwe ngu Baibuli n’Ekigambo kya Ruhanga. Tukaabahwera tuta? Emirundi emingi, okubashuuruurira Baibuli tukabooreka eki yo erikugamba nikyo kirikukirayo oburungi. “Ekigambo kya Ruhanga kiine amagara n’amaani, kiine obwogi bwingi okukira rurara yoona ey’amoogi abiri, . . . kandi kirahuka kucaaka ebi omuntu arikuteekateeka n’ebi amaririire omu mutima gwe kukora.” (Abaheburaayo 4:12) “Ekigambo kya Ruhanga” t’ebyabaireho haza ebitatwiniire mugasho; kiine amagara! Ebi Baibuli erikuragaanisa biri haihi kuhikiirira. Obushoboorozi obu Baibuli eine aha mutima gw’omuntu nibukira ekindi kyona eki itwe ahabwaitu twakubaasa kumugambira.

4. Ni kushoboorora ki okuri omu Baibuli okuhindwire emiteekateekyere ei abantu abamwe baine ahari Baibuli, kandi n’ahabw’enki?

⁴ Baingi bacwiremu kwongyera kwetegyereza Baibuli baaheza kureeba iziina rya Ruhanga omu Baibuli. Abandi bacwiremu kwega Baibuli baaheza kureeba eki erikugamba aha kigyendererwa ky’amagara, ahabw’enki Ruhanga naareka obubi kubaho, aha makuru g’ebirikubaho ebiro ebi, n’aha matsiko g’okutunga amagara agatahwaho omu nsi ehiindwirwe paradiso. Omu mahanga ei emitwarize y’amadiini erugiiremu abantu okunyangarazibwa emyoyo emibi, okumanya eki Baibuli erikushoborora aha kirikureeta okunyangarara okwo n’oku omuntu yaakukukira, kureetaire bamwe kwenda kwega Baibuli. Ahabw’enki enshonga ezi nizikwata aha mitima y’abantu abarikukunda amazima? N’ahabw’okuba Baibuli yonka niyo erikwesigwa omu kushoboorora enshonga ezi enkuru.—Zaaburi 119:130.

5. (a) Abantu ku baakutugira ngu tibarikwikiririza mu Baibuli, bakaaba baine nshonga ki? (b) Abantu nk’abo tukaabahwera tuta?

⁵ Kandi shi, abantu ku baakutugira ngu tibarikwiririza mu Baibuli, ekyo kikatureetera okurekyera aho kugaaniira nabo? Ngaaha tikishemereire, baaba nibaikiriza kuhikaanisa naitwe ebiteekateeko. Noobaasa kushanga ngu Baibuli nibagitwara nk’ekitabo ky’amadiini g’ebishuba agarikweyeta Amakristaayo. Emitwarize yaago eijwire oburyarya, n’okwetaatsyataatsya kwago omu by’obutegyeki, otaireho n’okushabiiriza esente nibibaasa kuba nibyo birikureetera abantu okutaikiririza omuri Baibuli. Ahabw’enki tutarikubabuuza tukamanya yaaba nikwo kiri kityo? Okumanya ngu Baibuli neejumiirira emitwarize y’amadiini aga n’okumanya entaaniso eri ahagati y’ediini ey’amazima n’ez’ebishuba, nikibaasa kubareetera kwenda kumanya ebirikukiraho.—Miika 3:11, 12; Matayo 15:7-9; Yakobo 4:4.

6. (a) N’enki iwe ekirikukuhamiza ngu Baibuli n’Ekigambo kya Ruhanga? (b) Ni buhame ki obundi obu turikubaasa kwejunisa okuhwera abantu kwetegyereza ngu Baibuli buzima n’ekigambo kya Ruhanga?

⁶ Aha bandi, okuganiira aha buhame oburikworeka ngu Baibuli ekahandiikisibwa omwoyo wa Ruhanga tutabandize kwetoorora, nikibaasa kuba eky’omugasho. N’enki ekirikukuhamiza ngu Baibuli n’Ekigambo kya Yehova Ruhanga? N’eki yo erikugamba aha burugo bw’ebigirimu? Ninga n’ahabw’okugira ngu erimu obunabi bwingi, obushemereire kuba bwarugire aha muntu oine obwengye obweshumbire aha bw’omuntu owa butoosha? (2 Petero 1:20, 21) Nari n’ahabw’okugira ngu ebigirimu nibiikirizana gye, n’obu biraabe byahandiikirwe abashaija 40 omu bwire bw’emyaka 1,600? N’ahabw’okugira ngu shi ehikire gye omu bya sayansi waagigyeragyeranisa n’ebindi bihandiiko eby’obwire obwo? Ninga n’amazima g’abahandiiki baayo omu kuhandiika ebyababaireho? Nari n’okurindwa kwayo n’obu haraabe haakozirwe kyona ekirikubaasika kugicwekyereza? Kyona ekyatushemeize nitubaasa kukyejunisa kuhwera n’abandi.a

Okushoma Baibuli Kwaitu

7, 8. (a) N’enki eki tushemereire kuba nitukoresa Baibuli? (b) Oyihireho okweshomesa Baibuli itwe ahabwaitu, ekindi nitwetenga kukora ki? (c) Iwe n’enki ekikuhwereire kwetegyereza ebigyendererwa bya Yehova?

⁷ Oyihireho okuhwera abandi kwikiririza omuri Baibuli, naitwe twine kugishoma butoosha. Nookora ekyo? Omu bitabo byona ebirahandiikirwe, Baibuli niyo erikukirayo kuba ey’omugasho. Kwonka eki tikirikumanyisa ngu twayeshomesa Baibuli, nitugyetegyereza gye tutaine buhwezi bwona. Ebyahandiikirwe nibitwehanangiriza kwetantara okwetaanisa aha bandi. Titushemereire kuteekateeka ngu nitubaasa kwetegyereza buri kimwe turikucondooza ahabwaitu. Okweshomesa eby’omu Baibuli n’okuza omu nteerane z’abantu ba Ruhanga butoosha nibikuru twaba turi ab’okuba Abakristaayo abahamire.—Enfumu 18:1; Abaheburaayo 10:24, 25.

⁸ Aha kikwatiraine n’ebi, Baibuli neetebya aha mukonwa wa Esiopia owaabaire naashoma omu kitabo kya nabi Isaaya. Maraika akoohereza Filipo kubuuza ogwo mukonwa ati: “Nooshoborokyerwa ebi orikushoma?” N’obucureezi, Omukonwa ogwo akagarukamu ati: “Nimbaasa nta, ntaine w’okunshobororera?” Akashaba Filipo kumushobororera Ebyahandiikirwe ebi yaamushangire naashoma. Haza Filipo akaba atari muntu owaabaire ayeshomesa Baibuli we ahabwe ataine buhwezi bw’abandi nari owaabaire ashoboorora Ebyahandiikirwe nk’oku yaayeyendera. Akaba akorera hamwe n’ekibiina kya Ruhanga. Nikyo yaabaire naabaasiza kuhwera Omunyesiopia kugasirwa obuhabuzi obu Yehova yaabaire naaheereza kurabira omuri ekyo kibiina. (Ebyakozirwe 6:5, 6; 8:5, 26-35) Nikyo kimwe n’omu bunaku obu, tihaine n’omwe orikubaasa we ahabwe kwetegyereza gye ebigyendererwa bya Ruhanga. Twena nitwetenga obuhwezi obu Yehova arikuha kurabira omu kibiina kye.

9. Ni ntebeekanisa ki ey’okushoma Baibuli erikubaasa kugasira twena?

⁹ Okubaasa kutuhwera kwetegyereza Baibuli, ekibiina kya Yehova nikituha ebitabo by’emiringo mingi ebirikushoborora Ebyahandiikirwe. N’ekindi, omu ishomero ry’obuheereza ery’omu bibiina by’Abajurizi ba Yehova omu nsi yoona, twinemu entebeekanisa y’okushoma Baibuli ei turikugyenderaho. Noogasirwa kihango iwe ahabwawe waashwijuma Ebyahandiikirwe Ebirikwera. (Zaaburi 1:1-3; 19:7, 8) Teeraho kushoma Baibuli butoosha. N’obu otarayetegyereze buri kimwe, waamanya eki Ebyahandiikirwe birikugambaho okutwarira hamwe, noogasirwa kihango. Nk’eky’okureeberaho, waashoma empapura za Baibuli ina nari itaano buri izooba, noobaasa kuheza okugishoma nk’omu mwaka gumwe.

10. (a) Ni ryari obu orikweshomesa Baibuli? (b) Ni baahi abandi abashemereire kwejumba omu ntebeekanisa y’okushoma Baibuli, kandi ahabw’enki okugishoma butoosha kiri kikuru?

¹⁰ Ni ryari obu orikubaasa kweshomesa Baibuli? Waagira edakiika zaawe 10 nari 15 ez’okushomeramu Baibuli buri izooba, noogasirwa kihango. Ekyo kyaba kitabaasikire, taho entebeekanisa ey’okugishoma buri saabiiti, haza ogihamireho. Ku oraabe ori omu bushwere, ni kirungi iwe nari mutaahi waawe okugishomera ondi obwo onu ahurikiriize. Mwaba mwine abaana abaamanyire kushoma, nabo nibabaasa kugira embu zaabo ez’okushoma Baibuli. Okushoma Baibuli tushemereire kukuhindura omucwe gwaitu gwa butoosha, nk’okurya eby’okurya. Nk’oku orikukimanya, omuntu yaaba naarya kubi, naagira amagara mabi. Nikyo kimwe, okuhama kwaitu omu by’omwoyo hamwe n’okutunga amagara agatahwaho byegami aha kuteeraho kureeba ngu obutoosha twatungwa “ekigambo kyona ekiruga omu kanwa ka Ruhanga.”—Matayo 4:4.

Ekigyendererwa Kyaitu

11. Tushemereire kushoma Baibuli twine kigyendererwa ki?

¹¹ Tushemereire kushoma Baibuli twine kigyendererwa ki? Ekigyendererwa kyaitu tikishemereire kuba kiri okushoma omuhendo gw’empapura guti na guti. Kureka kishemereire kuba eky’okweyongyera kumanya Ruhanga kugira ngu tweyongyere kumukunda n’okumuramya omu muringo ogu arikusiima. (Yohaana 5:39-42) Emiteekateekyere yaitu eshemereire kuba nk’ey’omuhandiiki wa Baibuli owaagizire ati: “Ompabure emihanda yaawe, ai MUKAMA; kandi onyegyese emitwarize yaawe.”—Zaaburi 25:4.

12. (a) Ahabw’enki kiri kikuru okutunga ‘okumanya okuhikire,’ kandi omuntu akaataho buryo ki okubaasa kutunga okumanya okwo yaaba naashoma Baibuli? (b) Ni miringo ki ena erikubaasa kutuhwera kihango kushwijuma ebi turikushoma omu Baibuli? (Reeba akashanduuko akari aha rupapura orwa 30.) (c) Shoborora enshonga ezi orikugarukamu ebibuuzo ebyakuheebwa omu kacweka aka. Shoma ebyahandiikirwe ebyayorekwa haza bitajurizibwe.

¹² Omu kwega ahari Yehova, ekigyendererwa kyaitu kishemereire kuba kiri eky’okutunga ‘okumanya okuhikire.’ Mbwenu twaba tutaine okumanya okuhikire, tukaabaasa tuta kugyendera aha bi Ekigambo kya Ruhanga kirikutugambira nari okukishobororera gye abandi? (Abakolosai 3:10; 2 Timoseo 2:15) Okubaasa kutunga okumanya okuhikire, nitwetenga kushoma Baibuli n’obwegyendesereza, kandi haagira akacweka kaayo akaatugumira kwetegyereza, nikibaasa kutwetengyesa kukashoma emirundi erengire ahari gumwe kugira ngu tukeetegyereze. Kandi nabwo nitwija kugasirwa twagira akiire tukacumitiriza aha bi turikushoma, tukabiteekateekaho omu miringo etari emwe n’emwe. Emiringo ena ey’okutuhwera omu kubiteekateekaho yaayorekwa aha rupapura rwa 30. Nitubaasa kushwijuma ebyahandiikirwe bingi turikwejunisa omuringo gumwe nari emiringo erikurenga ahari gumwe. Nooza kwetegyereza oku orikubaasa kubishwijuma orikugarukamu ebibuuzo ebiri aha mpapura ezirikukurataho.

(1) Emirundi mingi, ebi orikushoma nibigira eki byakumanyisa aha mitwarize ya Yehova. Nk’eky’okureeberaho, omuri Zaaburi 139:13, 14, NW, nitwega ngu Ruhanga naafa munonga aha baana abatakazairwe: ‘Okaguma ondiinzire omunda ya maawe. Niinyija kukuhimbisa ahabw’okumpanga omu muringo gw’eihano kandi ogurikutangaaza. Ebi waakozire n’eby’okutangaaza nk’oku omutima gwangye gurikubimanya gye buzima.’ Ebi Yehova yaahangire ka nibitangaaza! Omuringo ogu abantu bahangirwemu niguhamya rukundo mpango ei Yehova atwiniire.

Okurugiirira aha kirikugambwaho omuri Yohaana 14:9, 10, ku turikushoma aha ku Yesu yaatwariize abandi, nitureeba buzima oku Yehova we yaakutwarize. Turikumanya ekyo, n’enki eki turikubaasa kuhamya ahari Yehova okurugiirira aha byabaireho ebihandiikirwe omuri Luka 5:12, 13 na Luka 7:11-15?

(2) Teekateeka aha ku ebi orikushoma birikwikirizana n’omutwe gwa Baibuli: okuhamya obushoboorozi bwa Yehova obw’okutegyeka n’okweza eiziina rye arikwejunisa Obukama bwe oburikutegyekwa Yesu Kristo, Oruzaaro orwaraganisiibwe.

Ezekieli na Danieli bakahamya bata omutwe gwa Baibuli? (Ezekieli 38:21-23; Danieli 2:44; 4:17; 7:9-14)

Baibuli neeyoreka gye eta ngu Yesu niwe Ruzaaro orwaraganisiibwe? (Abagalatia 3:16)

Ekitabo kya Okushuuruurwa nikigamba ha bintu ki ebikuru ebirikukwata aha mutwe gwa Baibuli? (Okushuuruurwa 11:15; 12:7-10; 17:16-18; 19:11-16; 20:1-3; 21:1-5)

(3) Teekateeka aha ku orikubaasa kugyendera aha bi orikushoma. Nk’eky’okureeberaho, okwiha omu kitabo kya Okuruga okuhitsya omu Eky’Ebiragiro, nitushoma aha bugomi n’emicwe mibi eby’Abaisraeli. Nitwega ngu emitwarize egyo n’ebikorwa ebyo bikabarugiramu bibi. N’ahabw’ekyo, tushemereire kwenda kushemeza Yehova beitu kutari kutooreza eky’okureeberaho kibi ky’Abaisraeli. “Ebyo bikabahikaho kuba eby’okureeberaho, kandi bikahandiikwa kutuhuguura, itwe abariho omu biro by’aha muheru gw’ensi.”—1 Abakorinso 10:11.

Ebihandiikirwe ahari Kaini kwita Abeeli nibitwegyesa ki? (Okutandika 4:3-12; Abaheburaayo 11:4; 1 Yohaana 3:10-15; 4:20, 21)

Obuhabuzi obu Baibuli erikuha Abakristaayo abaine amatsiko g’okuza omu iguru nibukwata n’aha baine amatsiko g’okutunga amagara agatahwaho omu nsi? (Okubara 15:16; Yohaana 10:16)

Ahabw’enki tushemereire kuteekateeka aha ku turikubaasa kweyongyera kugasirwa obuhabuzi bwa Baibuli obu turikumanya n’obu twakuba tuhamire omu kibiina Ekikristaayo? (2 Abakorinso 13:5; 1 Abatesalonika 4:1)

(4) Teekateeka aha ku orikubaasa kwejunisa ebi orikushoma okuhwera abandi. Abantu boona beemereize emitima ahabw’endwara, n’ahabw’ekyo nitubaasa kubashomera ebi Yesu yaakozire nk’omurozo gw’ebi araije kukora ku araabe naategyeka nk’omutegyeki w’amaani omu Bukama bwa Ruhanga: “Emitwe y’abantu baingi baamushangayo, bamureeteire ebirema n’empumi n’ebiteta n’ebimuga n’abandi baingi, . . . yaabatambira.”—Matayo 15:30.

Ni baahi abarikubaasa kuhwerwa ebihandiikirwe aha kuzooka kwa muhara wa Yairo? (Luka 8:41, 42, 49-56)

13. Twine amatsiko kugasirwa tuta twagumizamu nitugyendera aha ntebeekanisa y’ekibiina kya Yehova ey’okushoma n’okwega Baibuli?

¹³ Ka nitugasirwa kihango twayejunisa emiringo ena eyaagambwaho aha ruguru omu kushoma Baibuli! Buzima, okushoma Baibuli ti kwanguhi. Beitu hoona, nikubaasa kutuhwera ebiro byona. Twaguma nitushoma Baibuli, nituhama omu by’omwoyo. Okushoma Baibuli butoosha nikwija kutwiriza haihi na Tataitwe Yehova otukunda, hamwe n’Ab’eishe-emwe. Nikwija kutuhwera omu kworobera obuhabuzi oburikutwehanangiriza ‘kuhamira aha kigambo ky’amagara.’—Abafilipi 2:16, NW.

[Obugambo obw’Ahansi]

Eby’Okweijutsya

• Ahabw’enki Baibuli yaahandiikirwe kandi ekariindwa n’okuhitsya hati?

• Tukaahwera tuta abandi kwetegyereza Baibuli?

• Ahabw’enki okweshomesa Baibuli butoosha kuri okw’omugasho? Ni miringo ki ena ei turikubaasa kwejunisa omu kushwijuma ebi turikushoma omu Baibuli?

[Akabokisi/Ekishushani ekiri aha rupapura 30]

BURI KI ORAASHOME OMU BAIBULI, YETEGYEREZE

Eki kirikukwegyesa ahari Yehova nk’omuntu

Akakwate aku kiine n’omutwe gwa Baibuli

Oku kishemereire kuhindura amagara gaawe

Oku orikubaasa kukyejunisa kuhwera abandi